Ekout Sa Ki Lespri I Dir!

“Sa ki annan zorey, ekout sa ki Lespri i dir avek bann [kongregasyon, NW ].”—REVELASYON 3:22.

 1, 2. Ki konsey ki ganny repete konsernan mesaz ki Zezi ti anvoy pour sa set kongregasyon mansyonnen dan Revelasyon?

BANN serviter Zeova i bezwen pran kont sa ki Zezi ti dir sa set kongregasyon anba gidans lespri sen, ki ganny mansyonnen dan liv Revelasyon. Anfet, sak sa bann mesaz i akonpannyen avek sa konsey: “Sa ki annan zorey, alor ekout sa ki Lespri i dir avek bann [kongregasyon, NW ].”—Revelasyon 2:7, 11, 17, 29; 3:6, 13, 22.

² Nou’n deza egzamin mesaz ki Zezi ti anvoy pour bann lanz oubyen sirveyan Efez, Smirn, ek Perganm. Ki mannyer nou kapab benefisye avek sa ki i ti dir sa kat lezot kongregasyon atraver lespri sen?

Pour Lanz Tyatir

 3. Kote Tyatir ti ete, e kwa ki ti fer li renonmen?

³ “Garson Bondye” i felisit ensi ki koriz kongregasyon Tyatir. (Lir Revelasyon 2:18-29.) Tyatir (ki aprezan Akhisar) ti ganny konstri toudilon en larivyer ki zwenn avek Larivyer Gediz (ansyen Hermus) dan was Lazi Miner. Sa lavil ti renonmen pour son kantite travay artizanal. Bann dimoun laba ti servi en kalite rasin konman en tentir pour fer zot latwal rouz oubyen mov ki ti tre popiler. Lidi ki ti vin en Kretyen ler Pol ti vizit Filip, Lagres, ti “sorti dan lavil Tyatir e i ti en marsan dan bann latwal kouler rouz.”—Akt 16:12-15.

 4. Dan ki domenn kongregasyon Tyatir ti ganny felisite?

⁴ Zezi ti felisit kongregasyon Tyatir pour son bann bon aksyon, lanmour, lafwa, perseverans, ek devouman dan minister. Anfet, zot ‘bann dernyen aktivite ti pli gran ki bann okonmansman.’ Me kantmenm nou’n akonpli bokou dan lepase, nou pa devret zanmen negliz nou bann standar moral.

 5-7. (a) Lekel li sa “Zezabel,” e ki aksyon ki ti pou ganny pran konsernan son lenfliyans? (b) Ki mesaz Kris pour kongregasyon Tyatir i ed bann madanm ki atase avek Bondye pour fer?

⁵ Kongregasyon Tyatir ti pe toler ladorasyon zidol, fo lansennyman, ek imoralite seksyel. “Zezabel” ti parmi zot. Petet sa ti pe refer avek serten madanm ki ti annan en personnalite parey Zezabel, sa move larenn ki ti sorti dan Rwayonm dis tribi Izrael. Vi ki sak metye ti annan son bondye, serten spesyalis i sizere ki sa bann madanm an Tyatir ki ti pe ‘pretann zot profet,’ ti esey fer bann Kretyen ador sa bann bondye. Zot ti osi ensit bann Kretyen pour partisip dan bann festival kot ti annan manze ki ti’n ganny sakrifye avek zidol. Fotespere ki dan kongregasyon Kretyen denozour, napa sa bann ki pretann zot profet e ki esey manipil lezot!

⁶ Kris ti pou ‘zet Zezabel lo en lili lasoufrans e osi tou bann ki’n komet adilter avek li, amwen ki zot abandonn sa bann move pratik ki zot in fer avek li.’ Bann sirveyan pa devret zanmen les zot ganny anbete avek sa bann move lansennyman ek lenfliyans. Deplis, okenn Kretyen pa bezwen komet fornikasyon spirityel e fizik oubyen pratik ladorasyon zidol pour realize ki “bann profon sekre satan” i konpletman move. Si nou ekout lavertisman Zezi, ‘nou pou tenir for sa ki nou posede,’ e pese pa pou domin nou. Lefe ki zot in rezet bann pratik ki Bondye pa kontan, bann move dezir, ek lanbisyon, bann Kretyen swazir i resevwar “pouvwar lo bann nasyon” letan zot resisite, e ansanm avek Kris zot pou detrir sa bann nasyon. Bann kongregasyon konmela i annan bann zetwal senbolik. Bann Kretyen swazir zot, zot pou ganny “sa zetwal briyan gran-maten,” Nouvo Marye, Zezi Kri, ler zot resisite dan lesyel.—Revelasyon 22:16.

⁷ Kongregasyon Tyatir ti ganny averti pour pa toler move lenfliyans bann madanm ki fer louvraz aposta. Mesaz enspire ki Kris ti anvoy pour kongregasyon i ed bann madanm ki atase avek Bondye pour reste dan zot plas ki Bondye in donn zot ozordi. Zot pa esey ganny lotorite lo bann zonm e zot pa tant okenn frer pour komet fornikasyon spirityel oubyen fizik. (1 Timote 2:12) Okontrer, sa bann madanm i montre en bon legzanp par zot bon aksyon ek servis, pour laglwar Bondye. (Psonm 68:11; 1 Pyer 3:1-6) Si kongregasyon i protez sa ki i annan—doktrin ek kondwit pir, e servis Rwayonm—Kris pou vin avek bann zoli rekonpans olye egzekisyon.

Pour Lanz Sard

 8. (a) Kote Sard ti sitye, e ki bann detay i annan konsernan li? (b) Akoz kongregasyon Sard ti bezwen led?

⁸ Kongregasyon Sard ti byen bezwen led parski i ti mor spirityelman. (Lir Revelasyon 3:1-6.) Sard ti en lavil ki ti apepre 50 kilomet sid avek Tyatir e i ti byen prospere. Komers, prodiktivite later, ek prodiksyon bann latwal ek karpet lalenn ti kontribye pour fer li vin en lavil ris, ki en rafal ti annan 50,000 zabitan. Dapre Zozef, en istoryen, ti annan en gran kominote Zwif an Sard dan premye syek N.L. Parmi bann debri sa lavil i annan en sinagog ek en tanp bondye Efezyen, Artemis.

 9. Ki nou devret fer si nou servis pour Bondye in vin zis en routin?

⁹ Kris ti dir lanz kongregasyon Sard: “Mon konn tou ou bann aktivite, mon konnen ki ou annan repitasyon ki ou vivan, me ou’n mor.” Ki nou pou fer si lezot i vwar nou konman bann dimoun spirityel, me an realite nou pa enterese avek bann privilez Kretyen, nou servis in vin zis en routin, e nou “pre pour mor” spirityelman? Dan sa ka, nou bezwen kontinyen ‘rapel ki mannyer nou ti resevwar e tann’ sa mesaz Rwayonm, e nou devret renouvle nou zefor dan servis sakre. Definitivman, nou bezwen konmans partisip dan bann renyon Kretyen avek tou nou leker. (Ebre 10:24, 25) Kris ti averti kongregasyon Sard: “Si ou pa leve, mon pou vin konman en voler e ou pa pou konnen ki ler mon pou vin sirprann ou.” Eski sa i aplik pour nou ozordi? Byento, nou annan en kont pour rann.

10. Menm dan en sitiasyon parey an Sard, ki i kapab annan?

¹⁰ Menm dan en sitiasyon parey an Sard, i kapab annan serten ki ‘pa’n sali zot lenz, e ki mars avek Kris dan lenz blan parski zot merite.’ Zot gard zot lidantite Kretyen, zot reste prop, san okenn tas relizye oubyen moral sa lemonn. (Zak 1:27) Alors, Zezi pa pou ‘efas zot non dan liv lavi, me i pou deklare devan son Papa e devan son bann lanz, ki zot pour li.’ Vi ki zot merite mars avek Kris, zot pou abiye dan linenn fen, klate, e pir konman son nouvel marye. Sa i reprezant bann aksyon drwat bann sen Bondye. (Revelasyon 19:8) Sa bann privilez merveye ki pe esper zot dan lesyel i ankouraz zot pour ranport laviktwar lo lemonn. Benediksyon pe esper bann ki annan lespwar pour viv lo later osi. Zot osi, zot non in ganny ekrir dan liv lavi.

11. Ki nou devret fer si nou pe ganny sonmey spirityelman?

¹¹ Napa personn antre nou ki anvi tonm dan sa kondisyon spirityel ki kongregasyon Sard ti ladan. Me ki nou pou fer si nou realize ki nou pe ganny sonmey spirityelman? Nou devret azir vit pour nou prop dibyen. Meton nou pe ganny antrennen dan bann move semen oubyen nou pe mank renyon oubyen partisip mwens dan predikasyon. Annou rod led Zeova seryezman atraver lapriyer. (Filipyen 4:6, 7, 13) Lir Labib sak zour e etidye li, ansanm avek bann piblikasyon “serviter fidel,” pou ed nou reste reveye spirityelman. (Lik 12:42-44) Si nou fer sa, nou pou parey sa bann an Sard, ki ti annan laprouvasyon Kris, e nou pou vin en benediksyon pour nou bann konpanyon Kretyen.

Pour Lanz Filadelfi

12. Ki mannyer ou ti pou dekrir sitiasyon relizye dan ansyen Filadelfi?

¹² Zezi ti felisit kongregasyon Filadelfi. (Lir Revelasyon 3:7-13.) Filadelfi (ki aprezan Alasehir) ti sant en rezyon ki prodwir diven dan was Lazi Miner. Anfet, son bondye prensipal ti Dyonizos, bondye diven. Aparaman, bann Zwif an Filadelfi ti esey konvenk bann Kretyen Zwif laba pour kontinyen pratik oubyen rekonmans pratik serten Lalwa Moiz.

13. Ki mannyer Kris in servi “lakle David”?

¹³ Kris i “posed lakle David,” e i’n ganny konfye avek tou lentere Rwayonm ensi ki ladministrasyon pep Bondye. (Izai 22:22; Lik 1:32) Zezi ti servi sa lakle pour donn bann Kretyen an Filadelfi e lezot landrwa loportinite ek privilez ki annan pour fer avek Rwayonm. Depi 1919, i’n ouver “en gran laport” devan “serviter fidel” pour pres konsernan Rwayonm, en laport ki okenn lennmi pa kapab fermen. (1 Korentyen 16:9; Kolosyen 4:2-4) Byensir, sa laport ki anmenn ver bann privilez Rwayonm pa ouver pour bann “ki dan lasanble satan,” akoz zot pa bann Izraelit spirityel.

14. (a) Ki promes Zezi ti donn kongregasyon Filadelfi? (b) Ki mannyer nou kapab evite tonbe pandan “bann letan maler”?

¹⁴ Zezi ti donn bann Kretyen dan ansyen Filadelfi sa promes: “Parski ou’n obei mon lord avek perseverans, mon pou protez ou pandan bann letan maler ki pe vini pour teste bann zabitan later.” Prese i demann sa kalite perseverans ki Zezi ti demontre. I pa ti zanmen abandonnen akoz son lennmi, me i ti kontinyen fer lavolonte son Papa. Alors, Kris ti ganny resisite pour viv dan lesyel pour touzour. Si nou reste ferm avek nou desizyon pour ador Zeova e nou siport son Rwayonm par pres sa bon nouvel, nou pou ganny proteze pour nou pa tonbe pandan bann leprev, “bann letan maler.” Nou pou kontinyen ‘gard byen for sa ki nou posede’ par fer nou mye pour agrandi sa bann lentere Rwayonm. Pour bann Kretyen swazir, sa pou fer zot ganny kouronn lesyel ki tre presye e pour zot bann konpanyon fidel sa pou anmenn lavi eternel lo later.

15. Ki bann ki pou vin ‘pilye dan tanp Bondye’ i bezwen fer?

¹⁵ Kris i azoute: “Sa ki ganny laviktwar mon pou fer li vin en pilye dan tanp mon Bondye . . . mon pou ekri lo li non mon Bondye, ek non lavil mon Bondye, Nouvo Zerizalenm ki desann sorti dan lesyel kot mon Bondye avek mon nouvo non osi.” Bann sirveyan ki’n ganny swazir par lespri sen i bezwen soutenir vre ladorasyon. Zot bezwen gard zot kalifikasyon konman bann manm “Nouvo Zerizalenm” par pres lo Rwayonm Bondye e reste prop spirityelman. Sa i neseser si zot anvi vin pilye dan tanp seles e si zot pou port non lavil Bondye konman bann sitwayen lesyel e port non Kris konman son nouvel marye. Byensir, zot bezwen annan zorey ki “ekout sa ki Lespri i dir avek bann [kongregasyon, NW ].”

Pour Lanz Laodise

16. Ki nou konnen lo Laodise?

¹⁶ Kris ti koriz kongregasyon Laodise, ki ti ensousyan. (Lir Revelasyon 3:14-22.) Laodise ti 150 kilomet les avek Efez e i ti sitye kot bann gran larout komersyal i zwenn ansanm dan vale fertil Larivyer Likis. I ti en lavil endistriyel ki ti byen prospere e en sant finansyel. I ti renonmen pour son bann lenz ki’n ganny fer avek lalenn nwanr. Vi ki ti annan en lekol medsin byen popiler laba, i kapab ki Laodise ti prodwir en latizann pour lizye ki dimoun ti apel lapoud Frizi. Asklepyos, en bondye medsin, ti enn bann bondye prensipal sa lavil. I paret ki Laodise ti annan en gran popilasyon Zwif e serten sa bann Zwif ti paret ase ris.

17. Akoz bann Laodiseen ti ganny reprimande?

¹⁷ Ler i ti pe adres kongregasyon Laodise atraver son “lanz,” Zezi ti koz avek lotorite konman sa ‘temwen fidel e vre, e konmansman Kreasyon Bondye.’ (Kolosyen 1:13-16) Bann Laodiseen ti ganny reprimande akoz zot pa ti “ni fre ni so” spirityelman. Parski zot ti tyed, Kris ti pou vomi zot. I ti devret fasil pour zot konpran sa pwen. Hierapolis ki ti lanmenm obor ti annan bann sours delo so, tandis ki Kolos ti annan delo fre. Me vi ki delo ti bezwen ganny transporte en gran zistans ziska Laodise, petet ler i ti ariv dan sa lavil i ti’n vin tyed. Lanmwatye semen, i ti ganny transporte lo en pon ki ti’n ganny fer ekspreseman pour sa. Ler i ti ariv pli pre avek Laodise, i ti pas atraver en tiyo fouye dan bann gro blok ki ti’n ganny simante ansanm.

18, 19. Ki mannyer bann Kretyen denozour, ki parey bann Laodiseen, i kapab ganny ede?

¹⁸ Denozour, bann ki parey bann Laodiseen pa ni so pour kapab motive, ni fre pour kapab rafresir. Zis parey delo tyed, zot pou ganny rann par labous! Zezi pa anvi zot konman son portparol, konman “bann lanbasader Kris.” (2 Korentyen 5:20) Amwen ki zot repantir, zot pou perdi zot privilez pour pres konsernan Rwayonm. Bann Laodiseen ti rod larises lo later ‘san konnen ki zot malere, mizerab, pov, aveg e touni.’ Tou sa ki parey zot ozordi, i bezwen aste avek Kris, lafwa ki’n ganny teste parey “lor,” “lenz blan” ki reprezant ladrwatir, ek ‘en remed pour zot lizye’ vwar byen kler spirityelman. Koumsa, zot a nepli pov, aveg, e touni spirityelman. Bann sirveyan Kretyen i kontan pour ed zot pour konsyan zot bezwen spirityel pour ki zot vin “ris dan lafwa.” (Zak 2:5; Matye 5:3) Deplis, bann sirveyan i bezwen ed zot pour servi sa ‘remed pour lizye,’ setadir pour aksepte e obeir lansennyman, konsey, legzanp, ek leta lespri Zezi. Sa i en remed kont “dezir natir imen, dezir atraver nou lizye ek lorgey dan lavi toulezour.”—1 Zan 2:15-17.

¹⁹ Zezi i koriz e disiplin tou bann ki i kontan. Bann sirveyan par anba li, i bezwen fer parey avek tandres. (Akt 20:28, 29) Bann Laodiseen ti bezwen ‘ganny bokou lantousyas, e sanz zot konportman’ ek fason panse. Eski serten parmi nou in konmans viv en kalite lavi ki fer nou servis sakre pour Bondye napa gran lenportans dan nou lavi? Dan sa ka, annou ‘aste avek Zezi sa remed pour lizye’ pour ki nou kapab vwar akoz i enportan pour rod plito Rwayonm avek devouman.—Matye 6:33.

20, 21. Lekel ki pe ouver laport pour Zezi antre ozordi, e ki lespwar zot annan?

²⁰ Kris i dir: “La mon pe debout devan laport, e mon pe frape, si en dimoun i tann mon lavwa e i ouver laport, mon pou antre se li, e mon pou manz avek li, e li avek mwan.” Zezi ti souvan ansenny bann keksoz spirityel kan i ti pe manze avek lezot. (Lik 5:29-39; 7:36-50; 14:1-24) Aprezan i pe frap laport bann kongregasyon ki parey bann Laodiseen. Eski bann dimoun dan sa bann kongregasyon pou ouver laport, retrouv zot lafeksyon pour li, akey li parmi zot, e les li ansenny zot? Si wi, Kris pou manz avek zot e zot pou benefisye en kantite spirityelman.

²¹ Dan en sans senbolik, ozordi ‘lezot mouton’ pe les Zezi antre, e sa i anmenn zot ver lavi eternel. (Zan 10:16; Matye 25:34-40, 46) Pour sak Kretyen swazir ki ganny laviktwar, Kris pou donn li sa privilez pour ‘asiz avek li lo son tronn, parey li i’n ganny laviktwar e i’n asiz avek son papa lo son tronn.’ Wi, pour bann Kretyen swazir ki ganny laviktwar, Zezi i promet zot sa gran rekonpans pour asiz avek li lo tronn dan kote drwat son Papa dan lesyel. Lezot mouton ki ganny laviktwar, zot zot pe esper avek enpasyans en zoli landrwa lo later anba Gouvernman Bondye.

Leson pour nou tou

22, 23. (a) Konman tou Kretyen i kapab benefisye avek sa ki Zezi ti dir sa set kongregasyon? (b) Ki determinasyon nou devret annan?

²² Sirman, tou Kretyen i kapab benefisye bokou atraver sa ki Zezi ti dir sa set kongregasyon an Lazi Miner. Par egzanp, vi ki Kris ti felisit kongregasyon kan i ti apropriye, bann ansyen i ganny ankouraze pour felisit bann frer ek ser ki pe byen fer spirityelman e osi kongregasyon. Kan i annan bann pwen feb, bann ansyen i ed bann konpanyon Kretyen pour servi bann remed spirityel. Nou tou nou kapab benefisye avek diferan laspe konsey ki Kris ti donn sa set kongregasyon, osi lontan ki nou met li dan lapriyer e fer li san tarde.a

²³ Sa bann dernyen zour ki nou pe viv ladan pa en letan pour nou krwar ki nou pa bezwen progrese. I pa ni en letan pour nou tay deryer keksoz materyel oubyen nenport kwa ki ti a kapab fer nou pa donn Bondye nou meyer. Alors, fotespere ki tou kongregasyon i kontinyen klere parey sa bann sandelye ki Zezi i gard zot dan zot plas. Konman bann Kretyen fidel, annou touzour determinen pour atantif kan Kris i koze e ekout sa ki lespri i dir. Si nou fer sa, nou pou toultan ere konman bann porter lalimyer ki anmenn laglwar pour Zeova.

[Not anba lo paz]

Ki ou pou reponn?

• Lekel Zezabel e akoz bann madanm ki atase avek Bondye pa imit li?

• Ki sitiasyon ki ti egziste dan kongregasyon Sard, e ki nou kapab fer pour evite vin parey bokou Kretyen ki ti reste laba?

• Ki promes Zezi ti donn kongregasyon Filadelfi, e konman nou kapab aplik zot ozordi?

• Akoz bann Laodiseen ti ganny korize, me ki lespwar i annan pour bann Kretyen devoue?

[Portre lo paz 14]

Nou bezwen evit bann move fason “Zezabel”

[Portre lo paz 16]

Zezi in ouver “en gran laport” pour son bann disip ganny bann privilez an rapor avek Rwayonm

[Portre lo paz 18]

Eski ou akey Zezi e ekout li?