Devlop Lobeisans Avan Ki Lafen I Vini

“Tou bann pep pou obeir [Silo].”—ZENEZ 49:10.

 1. (a) Dan lepase, ki ti souvan enplike dan obeir Zeova? (b) Ki Zakob ti profetize konsernan lobeisans?

OBEIR Zeova in souvan enplik obeir son bann reprezantan. Parmi ti annan bann lanz, patrias, ziz, pret, profet, ek lerwa. Tronn bann lerwa Izrael ti menm ganny apele tronn Zeova. (1 Kronik 29:23) Malerezman, bokou dirizan Izrael ti dezobei Bondye. Sa ti anmenn maler lo zot menm ek zot pep. Me Zeova pa ti les son bann fidel san lespwar. I ti rekonfort zot avek en promes pour enstal en Lerwa parfe, ki bann dimoun drwat ti pou pran plezir pour obeir. (Izai 9:6, 7) Omoman patrias Zakob ti pe mor, i ti profetiz konsernan sa fitir dirizan, an dizan: “Baton lerwa pa pou ekarte avek Zida, ni baton komandan avek li, ziska ki Silo i vini; e tou bann pep pou obeir li.”—Zenez 49:10.

 2. Ki savedir sa mo “Silo,” e ki son dominasyon rwayal pou enkli?

² “Silo” i en mo Ebre ki vedir sa Enn ki annan drwa gannyen. Wi, Silo pou erit tou drwa pour dirize, parey i ganny reprezante par sa baton lerwa. Sa baton komandan i reprezant pouvwar pour konmande. Deplis, i pa pou zis domin lo bann desandans Zakob me lo “tou bann pep.” Sa i anliny avek sa promes ki Zeova ti fer avek Abraam: “Ou semans [oubyen desandans] pou pran posesyon lavil son bann lennmi. E par mwayen ou semans tou nasyon lo later pou ganny beni.” (Zenez 22:17, 18) An 29 N.L. ler Zezi sorti Nazaret ti resevwar lespri sen sorti kot Zeova, sa ti konfirm son lidantite konman sa “semans.”—Lik 3:21-23, 34; Galat 3:16.

Premye Rwayonm ki Zezi in gannyen

 3. Ki rwayonm Zezi ti gannyen ler i ti mont dan lesyel?

³ Ler Zezi ti mont dan lesyel, i pa ti resevwar pouvwar pour konmans diriz tou dimoun lo later. (Psonm 110:1) Me toudmenm, i ti resevwar en “rwayonm” avek serten dimoun ki ti obeir li. Zapot Pol ti idantifye sa rwayonm ler i ti ekrir: “I’n fer nou sorti dan pisans teneb e i’n transfer nou dan Rwayonm son Garson byenneme.” (Kolosyen 1:13, nou ki’n met an italik.) Sa ti konmans zour Lapannkot 33 N.L., ler lespri sen ti desann lo bann disip fidel Zezi.—Akt 2:1-4; 1 Pyer 2:9.

 4. Dan ki fason bann premye disip Zezi ti demontre zot lobeisans, e konman Zezi ti idantifye zot?

⁴ Konman “bann lanbasader Kris,” bann disip ki ti ganny swazir avek lespri sen, ti obeir e konmans rasanble lezot ki ti pou vin sitwayen sa rwayonm spirityel. (2 Korentyen 5:20; Efezyen 2:19; Akt 1:8) Deplis, zot tou zot ti bezwen reste “byen ini ansanm dan en menm lespri e en menm lopinyon” pour kapab rezwir laprouvasyon zot Lerwa Zezi Kri. (1 Korentyen 1:10) Zot ti form “lesklav fidel e pridan” oubyen “sa serviter fidel e onnet.”—Matye 24:45, NW; Lik 12:42.

Beni pour obeir “Lesklav” Bondye

 5. Dan letan ansyen, konman Zeova in ansenny son pep?

⁵ Zeova in toultan fourni bann ansennyan pour son pep. Par egzanp, apre ki bann Zwif ti’n sorti Babilonn, Ezra ek lezot zonm kalifye pa ti zis lir Lalwa Bondye avek lepep, me zot ti ‘eksplik’ lalwa, e ‘kontinyen fer bann dimoun konpran’ Parol Bondye.—Neemya 8:8.

 6, 7. Konman ki sa lesklav fidel in fourni nouritir spirityel dan moman apropriye atraver son Konsey Direkter? Akoz soumisyon anver sa lesklav i apropriye?

⁶ An 49 N.L., ler problenm konsernan sirkonsizyon ti leve, konsey direkter sa lesklav fidel dan premye syek ti reflesi e priy bokou pour gidans. Apre ki zot ti’n reflesir lo sa size, zot ti finalman ariv lo en konklizyon ki ti baze e an armoni avek Labib. Ler zot ti anons zot desizyon par let, bann kongregasyon ti obeir sa gidans e zot ti ganny bokou benediksyon Zeova. (Akt 15:6-15, 22-29; 16:4, 5) I menm parey dan nou letan. Atraver Konsey Direkter, lesklav fidel in eklersi bann size enportan tel parey pozisyon en Kretyen vizazi lemonn, respe pour disan, ek lizaz drog ek taba. (Izai 2:4; Akt 21:25; 2 Korentyen 7:1) Zeova ti beni son pep pour zot lobeisans anver son Parol e anver lesklav fidel.

⁷ Par obeir sa lesklav fidel, pep Bondye i osi montre zot soumisyon anver Zezi Kri, Met sa lesklav. Ozordi soumet avek Zezi Kri in vin en keksoz ki ankor pli enportan. Sa i akoz Zezi in ganny plis lotorite, an armoni avek sa ki Zakob ti profetize avan son lanmor.

Silo i ganny Drwa pour diriz Later

 8. Ki mannyer e kan ki Kris ti ganny plis lotorite?

⁸ Profesi Zakob ti predir ki “tou bann pep pou obeir” Silo. I evidan ki Kris pa ti pou Lerwa zis lo Izrael spirityel. Lekel ki i ti pou dirize osi? Revelasyon 11:15 i reponn: “Rwayonm lemonn in vin rwayonm nou Senyer, e son Kris. E i pou rennyen pour touzour.” (Nou ki’n met an italik.) Labib i revele ki Zezi ti resevwar sa lotorite alafen sa “set letan” profetik—“letan bann nasyon etranze”—an 1914.a (Danyel 4:16, 17; Lik 21:24) Dan sa lannen, “prezans” envizib Kris konman Lerwa Mesyanik ti konmanse, ensi ki son letan pour li ‘al domin omilye son bann lennmi.’—Matye 24:3; Psonm 110:2.

 9. Ki Zezi ti fer ler i ti resevwar son Rwayonm, e ki lefe endirek sa in annan lo limanite, sirtou lo son bann disip?

⁹ Premye keksoz ki Zezi ti fer apre ki i ti resevwar pouvwar konman Lerwa, se zet sa gran rebel, Satan, ansanm avek son bann demon “lo later.” Depi sa letan, sa bann move lanz ti kree maler ki pa ti’n zanmen arive avan pour limanite. Anmenmtan, zot in promot en lanvironnman ki fer li vreman difisil pour dimoun obeir Zeova. (Revelasyon 12:7-12; 2 Timote 3:1-5) Annefe, Satan i target sirtou bann Kretyen swazir, “ki obei konmannman Bondye e ki fidel avek temwanyaz Zezi,” e osi zot konpanyon ‘lezot mouton.’—Revelasyon 12:17; Zan 10:16.

10. Lakonplisman ki profesi Labib ki garanti ki Satan pa pou reisi dan son lager kont bann vre Kretyen?

¹⁰ Me, Satan pa pou zanmen reisi, parski nou dan “Zour Senyer” e napa nanryen ki kapab anpes Zezi “ganny laviktwar.” (Revelasyon 1:10; 6:2) Par egzanp, Zezi pou fer sir ki sa 144,000 Izraelit spirityel i finalman ganny sele. I pou osi protez “en gran lafoul, ki personn pa ti kapab konte, sorti dan tou nasyon, tribi, pep ek lalang.” (Revelasyon 7:1-4, 9, 14-16) Me sa gran lafoul i diferan avek bann Kretyen swazir, akoz zot pou reste lo later konman bann sitwayen obeisan Zezi. (Danyel 7:13, 14) Prezans sa gran lafoul lo later ozordi i deza fourni levidans konkret ki Silo i vreman Dirizan dan “rwayonm lemonn.”—Revelasyon 11:15.

Ozordi i Letan pour “obei Levanzil”

11, 12. (a) Ki kalite dimoun ki pou sirviv lafen sa sistenm? (b) Bann ki les ‘Lespri lemonn’ enfliyans zot, i devlop ki kalite latitid?

¹¹ Tou dimoun ki anvi lavi eternel i devret aprann obeir. Sa i akoz Labib i klerman dir ki “bann ki pa obei levanzil ki konsern nou Senyer Zezi” pa pou sirviv zour vanzans Bondye. (2 Tesalonisyen 1:8) Me sa move lanvironnman ek son leta lespri rebel kont bann prensip ek lalwa Labib ki egziste ozordi, i fer li pa fasil pour obeir sa bon nouvel.

¹² Labib i dekrir sa leta lespri rebel kont Bondye konman ‘Lespri lemonn.’ (1 Korentyen 2:12) Ler zapot Pol ti ekrir bann Kretyen dan premye syek an Efez, i ti eksplik lefe ki sa lespri i annan lo dimoun, an dizan: “Zot ti pe viv dapre mannyer lemonn, an swivan sef pisans dan lespas, sa menm lespri ki aprezan pe travay dan bann zanfan dezobeisans. Nou tou, avan nou ti parey zot, nou ti viv dapre pasyon nou prop natir, e nou ti swiv bann dezir nou lekor ek nou lespri. Pour sa rezon, par natir, nou ti bann zanfan lakoler parey tou lezot imen.”—Efezyen 2:2, 3.

13. Konman bann Kretyen i kapab reziste lespri lemonn, e ki benefis sa i anmennen?

¹³ Erezman, bann Kretyen an Efez pa ti kontinyen les zot ganny dominen par sa latitid dezobeisan. Okontrer, zot ti vin bann zanfan obeisan Bondye par soumet avek son lespri e rekolte bann bon fri ki sa lespri i prodwir. (Galat 5:22, 23) Pareyman ozordi, lespri Bondye—lafors pli pwisan dan liniver—pe ed plizyer milyon pour obei Zeova. E sa i fer ki zot kapab annan “menm lantouzyas ziska lafen pour fer sir ki zot lesperans i realize.”—Ebre 6:11; Zekarya 4:6.

14. Konman ki Zezi ti averti tou Kretyen ki pe viv dan bann dernyen zour, konsernan bann danze ki pou teste zot lobeisans?

¹⁴ Gard antet osi, ki nou annan sipor pwisan Silo, ki ansanm avek son Papa pa pou les okenn lennmi—demon oubyen imen—teste nou lobeisans plis ki nou kapab siporte. (1 Korentyen 10:13) Anfet, pour ed nou dan nou lager spirityel, Zezi ti dekrir plizyer problenm spesifik ki nou pou fer fas avek pandan sa bann dernyen zour. I ti fer sa atraver set let ki i ti donnen dan en vizyon ki zapot Zan ti gannyen. (Revelasyon 1:10, 11) Zot ti kontyen plizyer konsey enportan pour bann Kretyen dan sa letan, me zot ankor pli aplikab dan “Zour Senyer,” ki’n konmanse depi 1914. Alor i apropriye, ki nou port latansyon lo sa bann mesaz!b

Evit Lendiferans, Limoralite, Lanmour Larzan

15. Akoz nou devret vey bann problenm ki ti afekte kongregasyon Efez, e ki mannyer nou kapab fer sa? (2 Pyer 1:5-8)

¹⁵ Zezi ti adres son premye let avek kongregasyon Efez. Apre ki i ti felisit sa kongregasyon pour son perseverans, Zezi ti deklare: “Me sa ki mon annan kont ou, ki ou’n perdi ou premye lanmour.” (Revelasyon 2:1-4) Ozordi, serten Kretyen ki ti byen aktif oparavan in osi perdi sa gran lanmour ki zot ti deza annan pour Bondye. Sa i kapab afeblir relasyon en dimoun avek Bondye e i devret ganny adrese deswit. Ki mannyer en dimoun i kapab reganny en tel lanmour? Par letid Labib regilye, asiste renyon, lapriyer, ek meditasyon. (1 Zan 5:3) I vre, nou bezwen ‘fer tou nou zefor’ pour kapab fer sa, me i en zefor ki vo lapenn fer. (2 Pyer 1:5-8) Si ler nou fer en egzaminasyon onnet lo nou menm, nou vwar ki nou lanmour in diminyen, koriz sa sitiasyon deswit, an akor avek konsey Zezi: “Alor mazinen kote ou’n sorti pour tonbe, detourn ou avek ou bann pese, e pratik sa bann aksyon ki ou ti pe fer okonmansman.”—Revelasyon 2:5.

16. Ki lenfliyans ki ti en danze pour spirityalite bann dimoun dan kongregasyon Perganm ek Tyatir, e akoz sa ki Zezi ti dir zot i apropriye pour nou ozordi?

¹⁶ Bann Kretyen an Perganm ek Tyatir ti ganny felisite pour zot fidelite, perseverans, ek devouman. (Revelasyon 2:12, 13, 18, 19) Me zot ti ganny enfliyanse par serten dimoun ki ti pe demontre menm move leta lespri ki Balaam ek Zezabel. Sa de dimoun ti azir konman bann move lenfliyans dan ansyen Izrael par mwayen imoralite seksyel ek ladorasyon Baal. (Nonm 31:16; 1 Lerwa 16:30, 31; Revelasyon 2:14, 16, 20-23) Me ki nou pou dir konsernan nou letan—“Zour Senyer”? Eski sa bann move lenfliyans i evidan ozordi? Wi, akoz limoralite i lakoz prensipal ki fer bann frer ek ser ganny ekskli parmi pep Bondye. Alor i enportan, ki nou evite asosye avek nenport dimoun, ki swa dan kongregasyon oubyen an deor, ki kapab vin en move lenfliyans pour nou! (1 Korentyen 5:9-11; 15:33) Sa bann ki anvi obeir Silo pou osi rezet bann divertisman ki pa an akor avek standar moral onivo, osi byen ki pornografi swa dan liv oubyen lo Internet.—Amos 5:15; Matye 5:28, 29.

17. Ki mannyer sa bann dan kongregasyon Sard ek Laodise ti konsider zot lekor, me konman Zezi ti vwar zot?

¹⁷ Eksepte detrwa endividi, kongregasyon Sard pa ti resevwar okenn felisitasyon. I ti annan “repitasyon,” oubyen laparans, ki i vivan, me i ti’n vin telman fre spirityelman ki pour Zezi i ti’n “mor.” Obeir bon nouvel ti’n preske vin en routin pour zot. Zezi ti vreman denons zot! (Revelasyon 3:1-3) Kongregasyon Laodise ti dan en sitiasyon parey. I ti fer vantar konsernan larises materyel, an dizan, “mon ris,” pourtan anver Kris i ti “mizerab, pov, aveg e touni.”—Revelasyon 3:14-17.

18. Ki mannyer en dimoun i kapab evite vin fre spirityelman dan lizye Bondye?

¹⁸ Ozordi osi, serten Kretyen ki ti fidel oparavan in vin dezobeisan. Petet zot in les lespri lemonn fer zot nepli konsyan ki nou pe viv dan en letan kritik, ki fer ki zot nepli tro enterese avek bann keksoz spirityel parey letid Labib, lapriyer, renyon Kretyen, ek predikasyon. (2 Pyer 3:3, 4, 11, 12) I vreman enportan ki sa bann dimoun koumsa i obeir Kris par envesti dan bann larises spirityel—wi, “aste avek [Kris] lor ki’n teste dan dife”! (Revelasyon 3:18) En tel larises i enkli vin ris dan ‘fer sa ki byen, ris an bonn aksyon, zenere e touzour pare pour partaz avek lezot.’ Si nou envesti dan sa bann resours spirityel, nou ‘ava anmas en bon e solid trezor pour lavenir, e koumsa nou ava ganny vre lavi.’—1 Timote 6:17-19.

Ganny felisite pour zot Lobeisans

19. Ki felisitasyon ek lankourazman Zezi ti donn bann Kretyen an Smirn ek Filadelfi?

¹⁹ Kongregasyon Smirn ek Filadelfi ti egzanpler pour zot lobeisans, akoz Zezi pa ti repros zot dan son let. Pour sa bann an Smirn i ti dir: “Mon konn ou bann soufrans, ek ou povrete, me pourtan ou ris.” (Revelasyon 2:9) Sa i en gran diferans avek bann an Laodise ki ti fer vantar avek larises lemonn, me ki ti an realite pov! Byensir, Dyab pa ti kontan pour vwar okenn dimoun pe montre fidelite ek lobeisans anver Kris. Alor, Zezi ti averti: “Pa per pour sa ki ou pou soufer. Gete, dyab pou anvoy byento serten antre zot dan prizon, pour teste zot, e zot pou bezwen soufer pandan dis zour. Reste fidel ziska lanmor, e mon a donn ou kouronn lavi.” (Revelasyon 2:10) Pareyman, Zezi ti felisit sa bann an Filadelfi, an dizan: “Ou’n obei mon parol e ou’n reste fidel avek mwan. Mon pe vini byento. Gard byen for sa ki ou posede pour ki personn pa aras ou ou kouronn.”—Revelasyon 3:8, 11.

20. Dan nenport sirkonstans ki egziste ozordi, ki mannyer plizyer milyon in gard parol Zezi?

²⁰ Dan “Zour Senyer” ki ti konmans an 1914, bann Kretyen fidel ki pou viv dan lesyel ek sa plizyer milyon ki pou viv lo later, in osi gard parol Zezi par travay dir dan predikasyon e par reste fidel. Parey zot bann frer dan premye syek, serten in soufer akoz zot obeir Kris, menm ganny anprizonnen e met dan bann kan konsantrasyon. Lezot in gard parol Zezi par viv en lavi senp, kantmenm zot antoure avek larises ek vorasite. (Matye 6:22, 23) Wi, dan tou kalite sirkonstans ek kondisyon, par zot lobeisans bann vre Kretyen i kontinyen rezwir leker Zeova.—Proverb 27:11.

21. (a) Ki lobligasyon spirityel ki lesklav pou kontinyen akonpli? (b) Ki mannyer nou kapab montre ki nou vreman anvi obei Silo?

²¹ Anmezir ki nou apros gran ladetres, “lesklav fidel e pridan” i reste determinen pour pa konpromet zot lobeisans anver zot Met, Kris. Sa i enkli prepar nouritir spirityel kan i ler pour pep Bondye. Alor annou kontinyen apresye lorganizasyon teokratik merveye Zeova e sa ki i fourni. Dan sa fason, nou demontre nou soumisyon avek Silo, ki pou rekonpans tou dimoun ki obeir li avek lavi eternel.—Matye 24:45-47, NW; 25:40; Zan 5:22-24.

[Not anba lo paz]

Eski ou rapel?

• Dapre sa ki Zakob ti profetize avan son lanmor, ki rol Zezi ti pou zwe?

• Konman nou demontre ki nou rekonnet Zezi konman Silo, e ki leta lespri nou bezwen evite?

• Ki konsey aplikab pour nou letan ki trouve dan bann let adrese avek sa set kongregasyon dan Revelasyon?

• Dan ki fason nou kapab imit sa bann dimoun dan ansyen kongregasyon Smirn ek Filadelfi?

[Portre lo paz 28]

Zeova i beni son pep akoz zot obeir son “lesklav” fidel

[Portre lo paz 29]

Lenfliyans Satan i fer li difisil pour obeir Bondye

[Portre lo paz 31]

En bon relasyon avek Zeova i ed nou pour obeir