Onor bann ki merite

 1. Akoz serten dimoun i merit ganny onore e ki nou pou aprann dan sa lartik?

KI MANNYER nou onor bann dimoun? Nou fer sa par donn zot en latansyon spesyal e par demontre respe pour zot. Normalman, nou onor bann ki’n fer en keksoz ki merit ganny onore oubyen bann ki annan en travay ouswa pozisyon enportan. Dan sa lartik, nou pou aprann lekel ki nou devret onore e akoz.

2, 3. (a) Akoz Zeova i sa enn ki espesyalman bezwen ganny onore? (Vwar portre o konmansman sa lartik.) (b) Lekel sa Pti Mouton ki ganny mansyonnen dan Revelasyon 5:13 e akoz nou devret onor li?

² Revelasyon 5:13 i dir ki “sa Enn ki lo tronn” e “sa Pti Mouton” i merit ganny onore. “Sa Enn ki lo tronn” pe refer avek Zeova. Dan Revelasyon sapit 4, bann kreatir dan lesyel i donn nou en rezon akoz Zeova, “sa Enn ki viv pour touzour e touzour,” i merit ganny onore. Zot dir: “Zeova nou Bondye, ou merit laglwar, loner ek pwisans, parski ou’n kree tou keksoz e akoz ou lavolonte, zot in vin an egzistans e zot in ganny kree.”​—Revelasyon 4:9-11.

³ “Sa Pti Mouton” ki ganny mansyonnen dan Revelasyon 5:13 i Zezi Kri. Ki mannyer nou konnen? Ler Zezi ti lo later, i ti ganny apele “Pti Mouton Bondye ki tir pese lemonn.” (Zan 1:29) Lekel sa lot lerwa ki’n deza volonterman donn son lavi konman en ranson pour son bann sitwayen? Sa i sirman en bon rezon pour onor Zezi. I merit loner akoz “i Lerwa sa bann ki pe dirize konman lerwa e Senyer sa bann ki pe dirize konman senyer.” (1 Timote 6:14-16) Petet ou santi ou parey sa bann kreatir dan lesyel ki sante: “Sa Pti Mouton ki ti ganny touye i diny pour ganny pwisans, larises, lasazes, lafors, loner, laglwar ek benediksyon.”​—Revelasyon 5:12.

 4. Akoz i ti pou saz pour nou onor Zeova ek Kris?

⁴ Zan 5:22, 23 i dir ki Zeova in apwent Kris konman ziz lo tou imen. Sa i rezon prensipal akoz nou devret onor Zezi. Ler nou fer sa, nou pe osi onor Zeova. Ler nou swazir pour onor Zezi ek son Papa, nou kapab ganny lavi eternel.​—Lir Psonm 2:11, 12 NWT.a Vwar not.

 5. Akoz tou dimoun i merite ganny en serten loner ek respe?

⁵ Bondye ti kree bann imen “dan son resanblans”. (Zenez 1:27, NWT) Sa i vedir ki laplipar dimoun i annan sa abilite pour demontre bann kalite parey sa ki pour Bondye. Par egzanp, bann imen i kapab demontre lanmour, labonte ek konpasyon. Bann imen ti osi ganny kree avek en konsyans, sa abilite pour konn sa ki byen ouswa sa ki mal, pour onnet ouswa dezonnet e pour konn sa ki apropriye oubyen sa ki pa apropriye. (Romen 2:14, 15) Laplipar dimoun i kontan bann keksoz ki prop e zoli e zot anvi viv anpe avek lezot. Sa pa en sirpriz, akoz Zeova i en Bondye lord ek lape. I kler ki tou dimoun ti ganny kree avek sa abilite pour imit Zeova dan en fason ou en lot. Pour sa rezon, zot merite ki nou donn zot loner ek respe.​—Psonm 8:5.

6, 7. Ki mannyer Temwen Zeova i diferan avek lezot dimoun ler pe onor lezot?

⁶ Nou konnen ki lezot dimoun i devret ganny onore, me i kapab difisil pour nou konnen ki kalite e ki kantite loner pour donn zot. Sa i parski sa lemonn Satan i annan en gran lenfliyans lo laplipar dimoun enparfe. Plizyer dimoun i fer bann zonm ek fanm vin zot zidol. Olye donn zot sa loner ek respe ki Zeova i demande, zot donn sa bann dimoun tro bokou loner e tret zot parey en bann bondye. Zot kapab imit fason sanze, kondwit, konportman bann dirizan politik ek sef relizye, bann atlet, bann akter dan film ek lezot selebrite.

⁷ Bann vre Kretyen i konnen ki i mal pour onor bann imen ziska sa degre. Parmi tou sa dimoun ki’n deza egziste, zis Zezi ki’n kit en legzanp parfe pour nou imite. (1 Pyer 2:21) Nou bezwen rapel ki “tou dimoun in fer pese e zot pa arive reflekte laglwar Bondye.” (Romen 3:23) Napa en imen ki merit ganny adore. Ler nou donn imen plis loner ki nou devret donnen, Zeova pa kontan.

8, 9. (a) Ki mannyer bann Temwen Zeova i vwar bann zofisye gouvernman? (b) Kan ki nou pa devret obei bann zofisye gouvernman?

⁸ I annan serten dimoun ki dapre zot pozisyon zot merite ganny nou loner ek respe. Par egzanp, mazin bann zofisye gouvernman e sa ki zot fer pour ou. Zot ede gard bann vwazinaz an sekirite e pran swen avek zot sitwayen. Zot travay i anmenn plizyer byenfe. Zapot Pol ti dir ki nou devret “soumet avek bann lotorite” gouvernman. I ti osi dir ki nou devret swiv zot bann lalwa: “Donn zot sa ki zot demande: pey taks avek sa ki demann taks” e “onor sa enn ki demann loner.”​—Romen 13:1, 7.

⁹ Konman bann Temwen Zeova, nou fer tou sa ki nou kapab pour montre avek bann zofisye gouvernman ki nou annan respe pour zot. Byensir, sak pei i annan son prop koutim, alor sa ki en zofisye i ekspekte avek nou dan en pei i kapab diferan dan en lot pei. Kantmenm sa, nou korpere avek bann zofisye gouvernman ler zot pe fer zot travay. Par kont, si zot demann nou pour fer en keksoz ki pou fer nou dezobei Zeova, nou pa kapab fer sa. Dan sa bann tel ka, nou obei e onor Zeova plito ki bann zonm.​—Lir 1 Pyer 2:13-17.

10. Ki mannyer bann serviter Zeova dan lepase in kit en bon legzanp pour nou?

¹⁰ Nou kapab aprann avek bann serviter Zeova dan lepase ki ti demontre loner pour bann gouvernman ek zot bann zofisye. Zozef ek Mari i en bon legzanp. Ler bann Romen ti anvi konn lakantite dimoun ki ti pe viv dan pei, Zozef ek Mari ti al Betleenm pour al anrezistre, menm si Mari ti pros pour ganny pti baba. (Lik 2:1-5) Zapot Pol i en lot legzanp en dimoun ki ti respekte bann dirizan imen. Ler i ti ganny akize pour fer en keksoz mal, i ti defann son lekor avek respe devan Lerwa Erod Agripa e devan Festis, ki ti gouverner provens Zide dan lanpir Romen.​—Akt 25:1-12; 26:1-3.

11, 12. (a) Akoz nou pa donn bann sef relizye en loner spesyal? (b) Ki ti arive ler en Temwen ki sorti Lotris ti demontre respe pour en politisyen?

¹¹ Ki nou pou dir konsernan bann sef relizye? Eski nou merit donn zot en loner spesyal? Nou donn zot menm loner ki nou ti pou donn nenport ki dimoun. Alor, menm si zot ekspekte en loner spesyal, i ti pou mal pour nou donn zot. Akoz? Parski fo larelizyon pa ansenny laverite konsernan Bondye ek son Parol, Labib. Zezi ti kritik bann ansenyan dan fo larelizyon e apel zot bann ipokrit e bann move dirizan. (Matye 23:23, 24) De lot kote, i pa ti pou mal pour nou demontre respe ek loner spesyal anver bann zofisye gouvernman. Parski i sanmenm rezon ki’n fer nou parfwa ganny led avek zot.

¹² Annou pran par egzanp Dokter Heinrich Gleissner ki ti en politisyen sorti Lotris. Pandan Dezyenm Lager Mondyal, i ti ganny arete par bann Nazi. Ler i ti ganny mete lo en tren pour al dan en kan konsantrasyon, i ti zwenn Leopold Engleitner, en Temwen devoue ki sorti Lotris. Avek respe, Frer Engleitner ti eksplik son krwayans avek Dokter Gleissner, ki ti ekout li atantivman. Ler lager ti terminen, Gleissner ti servi son pozisyon pour toultan ed bann Temwen Lotris. Petet ou konn lezot legzanp bann bon keksoz ki’n arive akoz bann Kretyen ki’n demontre respe pour bann zofisye gouvernman.

13. Lekel ki espesyalman merit nou loner ek respe e akoz?

¹³ Nou bann frer ek ser i merit nou loner ek respe. Sa i aplik sirtou pour bann frer ki annan bann responsabilite, tel parey bann ansyen, sirveyan rezyonal, manm Komite Biro Brans e bann manm Konsey Direkter. (Lir 1 Timote 5:17.) Zot tou zot pran swen avek pep Bondye e Labib i refer avek sa bann serviter konman “bann zonm konman kado.” (Efezyen 4:8) I fer sans alor ki nou pou onor e respekte zot ki swa zot nasyonalite, ledikasyon, ran sosyal ouswa zot sityasyon finansyel. Bann premye Kretyen in kit en bon legzanp pour nou. Zot ti onor bann zonm ki ti annan bann responsabilite e ozordi nou osi nou fer parey zot. Ler nou avek sa bann zonm, nou pa tret zot konmsi zot bann lanz, savedir bann ki annan pwisans ekstraordiner, me nou onor e annan respe zot pour zot bann travay dir ek zot limilite.​—Lir 2 Korentyen 1:24; Revelasyon 19:10.

14, 15. Ki mannyer bann ansyen dan kongregasyon i diferan avek plizyer parmi bann sef relizye?

¹⁴ Sa bann ansyen i parey bann berze ki annan limilite. Zot pa anvi ganny trete konman bann selebrite. Zot vreman diferan avek en kantite parmi bann sef relizye ozordi, osi byen ki bann sef relizye dan letan Zezi. I ti dir konsernan zot: “Zot kontan premye plas dan bann dinen e zot asiz devan dan sinagog. Zot kontan ler dimoun i salye zot avek respe dan bazar.”​—Matye 23:6, 7.

¹⁵ Bann ansyen i obei parol Zezi: “Pa les personn apel zot Ansenyan, parski i annan en sel Ansenyan e zot tou zot frer. Deplis, pa apel personn lo later papa parski zot annan en sel Papa, sa Enn ki dan lesyel. Osi pa apel personn sef, parski zot annan en sel Sef, Kris. Sa ki pli gran parmi zot i bezwen vin zot serviter. Sa ki oule ganny onore pou ganny abese e sa ki abes son lekor pou ganny onore.” (Matye 23:8-12) Ler bann ansyen dan bann kongregasyon partou dan lemonn i annan limilite e zot obei parol Zezi, zot bann frer ek ser pou kontan, respekte e onor zot.

16. Akoz nou devret fer bokou zefor pour kontinyen demontre loner?

¹⁶ I kapab pran letan pour nou aprann ki mannyer pour onor lezot. Sa ti osi leka pour bann vre Kretyen. (Akt 10:22-26; 3 Zan 9, 10) Me i vo lapenn fer li. Ler nou onor lezot dan lafason ki Zeova i anvi nou fer li, nou pou resevwar bokou byenfe.

17. Ler bann dimoun ki annan lotorite i ganny onore, ki serten byenfe sa i anmennen?

¹⁷ Ler nou onor e respekte dimoun ki annan lotorite dan nou kominote, sa i pous zot pour defann nou drwa pour prese. Zot menm kapab annan en pwennvi pozitif konsernan nou predikasyon. La sa ki ti arive detrwa lannen pase Lalmanny, ler en pionye ki apel Birgit ti al seremoni graduation son fiy. Bann ansenyan ti dir Birgit ki i ti en plezir pour annan bann zanfan Temwen dan laklas diran bann lannen ki’n pase. Zot ti santi ki bann zanfan Temwen in fer lekol vin en meyer landrwa. Birgit ti dir zot, “Nou bann zanfan in ganny ansennyen pour annan bann kondwit dapre standar Bondye e sa i enkli demontre respe ek loner pour zot bann ansenyan.” En ansenyan ti dir ki si tou bann zanfan ti parey bann Temwen, travay bann ansenyan ti pou enn fasil. Zot ti telman annan en pwennvi pozitif lo bann zanfan Temwen, ki detrwa semenn pli tar, enn parmi sa bann ansenyan ti asiste en lasanble.

18, 19. Ki nou devret rapel ler nou pe demontre loner pour bann ansyen?

¹⁸ Bann prensip ki ganny trouve dan parol Bondye i kapab ed nou pour konpran ki mannyer pour onor bann ansyen dan kongregasyon. (Lir Ebre 13:7, 17.) Nou kapab e nou devret felisit zot pour zot travay dir. Ler nou korpere avek bann gidans ki bann ansyen i donnen, sa pou ed zot pour travay dan lazwa. Labib i dir ki nou devret imit zot lafwa. Me sa pa vedir ki nou devret esey kopi egzakteman lafason ki en ansyen i sanze, koze e ansennyen. Si nou ti pou fer sa, i ti pou paret konmsi nou pe swiv zonm olye Kris. Nou pa devret oubliye ki bann ansyen i enparfe parey nou menm.

¹⁹ Ler nou onor, respekte e pa tret bann ansyen parey bann selebrite, sa pou ed zot. Ki mannyer sa? I pou fasil pour zot kontinyen annan limilite e evite mazinen ki zot pli bon ki lezot ouswa ki tou sa ki zot fer i toultan byen.

20. Ki byenfe nou gannyen ler nou onor lezot?

²⁰ Ler nou onor lezot sa i ed nou pour evite vin orgeye e i ed nou pour kontinyen annan limilite ler nou ganny latansyon spesyal. I osi en proteksyon pour nou, parski i ed nou pour evite tonbe si en dimoun ki nou respekte i fer en keksoz ki dezapwent nou. En lot byenfe, i ki sa i gard nou ini avek lorganizasyon Zeova. Sa lorganizasyon pa donn okenn imen loner an plis ki zot merite.

21. Ki sa byenfe pli enportan ki nou gannyen ler nou onor lezot?

²¹ Ler nou onor lezot nou fer plezir Bondye e sa, i sa byenfe pli enportan ki nou gannyen. Nou pe fer sa ki i anvi nou fer e nou pou reste fidel avek li. Alor, Zeova i ava kapab reponn Satan ki ti dir ki personn pa kapab reste fidel avek li. (Proverb 27:11) Laplipar dimoun dan lemonn pa konn sa bon fason pour onor lezot. Pa nou vreman rekonesan, ki nou konnen ki mannyer pour demontre loner dan lafason ki Zeova i anvi nou fer!