Sapit Ven

Gard antet Zour Zeova

 1. Ki mannyer ou ti santi kan ou ti aprann pour premye fwa ki nou pros pour ganny delivre dan tou bann problenm sa vye sistenm?

ENN bann premye keksoz ki ou ti aprann dan Labib se ki plan Zeova i ki later antye i vin en paradi. Dan sa nouvo monn, lager, krim, lapovrete, maladi, soufrans, ek lanmor pou nepli egziste. Menm bann mor pou resisite. Pa sa i en lespwar merveye! Lakonplisman tou sa bann keksoz i ganny aksantye par levidans ki prezans envizib Zezi konman Lerwa ki pe dirize ti konmans an 1914 e ki depi sa nou dan bann dernyen zour sa monn mesan. Alafen sa bann dernyen zour, Zeova pou detri sa sistenm e ranplas li avek sa nouvo monn ki i’n promet!

 2. Kisisa “zour Zeova”?

² Labib i apel sa destriksyon ki pe vini “zour Senyer [“zour Zeova,” NW].” (2 Pyer 3:10) Sa i “zour lakoler Zeova” kont lemonn Satan. (Tsefanya 2:3) I pou ariv lo son pwen final dan ‘lager sa gran zour Bondye . . . , ki apel Armagedon dan langaz Ebre,’ dan ki “bann lerwa lo later antye” i ganny detri. (Revelasyon 16:14, 16) Eski ou fason viv i demontre ou konviksyon ki sa “zour Zeova” i pros?—Tsefanya 1:14-18; Zeremi 25:33.

 3. (a) Kan ki zour Zeova pou arive? (b) Kwa ki prouve ki i byen ki Zeova pa’n revel “sa zour, oubyen sa ler”?

³ Labib pa dir nou dat egzakt kan Zezi Kri pou vin konman sa enn ki Zeova in anvoye pour egzekit zizman kont sistenm Satan. “Me kan sa zour, oubyen sa ler pou arive personn pa konnen, ni bann lanz dan lesyel, ni Fis-de-Lonm, me zis Bondye Papa,” Zezi ti dir. (Mark 13:32) Sa bann ki pa vreman kontan Zeova, pou annan sa tandans pour anvoy sa zour pour plitar dan zot lespri e pour preokip zot avek bann aktivite toulezour. Me sa bann ki vreman kontan Zeova pou servi li avek tou zot nanm, san trakase kan lafen sa sistenm mesan pou arive.—Psonm 37:4; 1 Zan 5:3.

 4. Ki Zezi ti dir konman en lavertisman?

⁴ Konman en lavertisman pour tou bann ki kontan Zeova, Zezi i dir: “Fer atansyon, veye, parski zot pa konnen kan sa ler pou arive.” (Mark 13:33-37) I enplor nou pour pa les manze ek bwar oubyen “traka lavi” pran tro bokou nou latansyon ki nou oubliye ki nou pe viv dan en letan vreman irzan.—Lik 21:34-36; Matye 24:37-42.

 5. Parey Pyer ti eksplike, ki zour Zeova pou anmennen?

⁵ Pareyman, Pyer ti konsey nou pour gard antet prezans zour Zeova, “sa zour kan lesyel pou alimen e ganny detri, e tou bann eleman pou fonn avek dife!” Tou bann gouvernman imen—“lesyel”—pou ganny detri, ensi ki sa move sosyete imen an zeneral—“later”—ek son bann “eleman,” setadir bann fason panse ek aktivite sa monn mesan, tel parey son latitid endepandan avek Bondye ek son fason viv materyalis e imoral. Zot pou ganny ranplase par en “nouvo lesyel [Rwayonm seles Bondye] ek en nouvo later [en nouvo sosyete lo later]” dan ki “pou annan lazistis.” (2 Pyer 3:10-13) Sa bann boulversman mondyal pou konmans soudennman e en zour ek en ler ki personn pa pe ekspekte.—Matye 24:44.

Reste Vizilan pour idantifye sa Siny

 6. (a) Ziska ki degre larepons ki Zezi ti donn son bann disip i aplik avek lafen sistenm Zwif? (b) Ki porsyon dan larepons Zezi ki port latansyon lo bann levennman ek latitid ki’n annan depi 1914 an montan?

⁶ Dan sa lepok ki nou pe viv, nou devret konn byen bann detay sa siny konpoze ki idantifye bann dernyen zour—“konklizyon sa sistenm.” Gard antet ki kan Zezi ti reponn kestyon son bann disip, ki ganny rikorde dan Matye 24:3 (NW), serten sa bann keksoz ki i ti dekrir dan verse 4 ziska 22 ti ganny akonpli lo sistenm Zwif lo en pti lesel ant lannen 33 ek 70 N.L. Me sa profesi in trouv son lakonplisman pli konplet dan nou letan depi 1914, pandan ‘prezans Kris ek konklizyon sa sistenm.’ Matye 24:23-28 i dir sa ki ti pou arive depi lannen 70 N.L. ziska prezans Kris. Bann levennman ki ganny dekrir dan Matye 24:29–25:46 i ariv pandan letan lafen.

 7. (a) Akoz nou devret personnelman veye konman ki bann levennman aktyel pe akonpli sa siny? (b) Reponn sa bann kestyon alafen paragraf, par montre konman sa siny in ganny akonpli depi 1914.

⁷ Nou devret personnelman obzerv byen bann levennman ek latitid ki akonpli sa siny. Relye sa bann keksoz avek profesi Labib pou ed nou pour gard antet zour Zeova. I pou osi ed nou pour vin pli konvenkan ler nou pe averti lezot ki sa zour i tre pros. (Izai 61:1, 2) Avek sa bann lobzektif antet, annou reviz sa bann kestyon swivan ki met lanfaz lo serten parti sa siny, parey i ganny rikorde dan Matye 24:7 ek Lik 21:10, 11.

Dan ki fason ekstraordiner nou’n vwar ‘lager nasyon kont nasyon, rwayonm kont rwayonm’ ganny akonpli depi 1914 parey ti’n ganny predir? Konsernan bann lager, ki’n arive depi sa?

An 1918, ki lepidemi ki ti pran bokou lavi plis ki Premye Lager Mondyal? Kantmenm zonm i annan konnesans dan domenn lasante, ki bann maladi ki ankor pe touy plizyer milyon dimoun?

Ziska ki degre lafamin in afekte later kantmenm bann progre syantifik dan sa dernyen syek?

Kwa ki konvenk ou ki bann kondisyon ki 2 Timote 3:1-5, ek 13 i mansyonnen, pa pe dekrir fason ki lavi in toultan ete, me lafason ki bann move kondisyon in agrave ofiramezir ki nou apros lafen sa bann dernyen zour?

Separasyon bann Dimoun

 8. (a) Kwa ankor ki ganny dekrir dan Matye 13:24-30, 36-43, ki Zezi ti asosye avek konklizyon sa sistenm? (b) Ki ilistrasyon Zezi i vedir?

⁸ I annan lezot levennman enportan ki Zezi ti asosye avek konklizyon sa sistenm. Enn parmi se separasyon “pep Rwayonm” avek “pep ki pour dyab.” Zezi ti koz lo sa dan son parabol konsernan en plantasyon dible ki en lennmi ti senm move zerb ladan. Dan son ilistrasyon, “dible” i reprezant bann vre Kretyen swazir. “Move zerb” i sa bann ki pretann ki zot Kretyen me ki demontre ki zot sa “pep ki pour dyab” akoz zot atase avek sa monn ki Dyab i dirize. Zot in ganny separe avek “pep Rwayonm [Bondye]” e zot in ganny marke pour destriksyon. (Matye 13:24-30, 36-43) Eski sa separasyon in fini arive?

 9. (a) Apre Premye Lager Mondyal, ki sa gran separasyon ki ti arive parmi tou sa bann ki ti pretann ki zot Kretyen? (b) Konman ki bann Kretyen swazir ti donn levidans ki zot ti bann vre serviter Rwayonm?

⁹ Apre Premye Lager Mondyal, ti annan en separasyon pour tou sa bann ki ti deklare ki zot Kretyen dan de group: (1) Bann sef relizye Kretyente avek son bann fidel, ki ti demontre zot sipor pour Lasosyete bann Nasyon (ki aprezan Nasyon Ini) anmenmtan ki zot siport zot prop nasyon, e (2) bann vre Kretyen dan sa letan apre lager, ki ti donn zot sipor total Rwayonm Mesyanik Bondye, non pa bann nasyon sa monn. (Zan 17:16) Zot ti demontre ki zot bann vre serviter Rwayonm Bondye par partisip dan predikasyon “sa Bonn Nouvel Rwayonm” partou lo later. (Matye 24:14) Avek ki rezilta?

10. Ki ti premye rezilta aktivite predikasyon Rwayonm?

¹⁰ Premyerman, ti annan rasanbleman larestan Kretyen ki’n ganny swazir par lespri Bondye, ki annan lesperans pour viv avek Kris pour fer parti sa Rwayonm seles. Kantmenm zot ti’n ganny disperse partou dan bann pei, zot ti ganny rasanble dan en lorganizasyon ki ini. Sa bann Kretyen swazir i pros pour fini ganny sele.—Revelasyon 7:3, 4.

11. (a) Ki travay rasanbleman ki pe kontinyen, e an armoni avek ki profesi? (b) Ki lakonplisman sa profesi i sinifye?

¹¹ Apre, anba direksyon Kris, rasanbleman “en gran lafoul . . . sorti dan tou nasyon, tribi, pep ek lalang” ti konmanse. Zot form ‘lezot mouton’ ki pou sirviv sa ‘gran ladetres’ pour antre dan nouvo monn Bondye. (Revelasyon 7:9, 14; Zan 10:16) Travay predikasyon Rwayonm Bondye avan lafen pe kontinyen ziska dan nou letan. Sa gran lafoul lezot mouton, ki aprezan annan plizyer milyon zot, pe fidelman ed sa larestan Kretyen swazir pour pibliy sa mesaz Rwayonm enportan. Dimoun dan tou nasyon pe antann sa mesaz.

Ki Lavenir i rezerve?

12. Ki kantite travay predikasyon i ankor annan pour fer avan ki zour Zeova i arive?

¹² Tou sa bann levidans ki’n ganny mansyonnen pli boner i endike ki nou pros avek lafen sa bann dernyen zour e ki zour Zeova i pros. Me eski i ankor annan bann profesi ki pou ganny akonpli avan ki sa zour efreyan i konmanse? Wi. Premyerman, separasyon bann dimoun an rapor avek zot pozisyon vizavi sa Rwayonm pa ankor fini. Konmela i annan en ogmantasyon dan nouvo disip dan serten pei kot avan nou’n eksperyans lopozisyon entans pour plizyer lannen. Menm kot bann dimoun i rezet sa bon nouvel, mizerikord Zeova pe ganny demontre par sa temwannyaz ki nou pe donnen. Alor, annou kontinyen fer sa travay! Zezi i asir nou ki kan sa travay i fini, lafen pou arive.

13. Parey i ganny rikorde dan 1 Tesalonisyen 5:2, 3, ki levennman remarkab ki pou arive, e ki i pou vedir pour nou?

¹³ En lot profesi Labib remarkab i predir ki: “Kan dimoun i ava pe dir: ‘Tou i an-pe e an sekirite,’ alor en sel kou destriksyon pou tonm lo zot, parey douler lakousman ki sezi en madanm ansent, e personn pa pou sape.” (1 Tesalonisyen 5:2, 3) Nou bezwen espere pour vwar dan ki fason sa deklarasyon “tou i an-pe e an sekirite” pou ganny fer. Me sertennman i pa pou vedir ki bann sef lemonn pou’n arive vreman rezourd problenm limanite. Sa bann ki gard zour Zeova antet pa pou ganny anbete par sa deklarasyon. Zot konnen ki imedyatman apre, en destriksyon souden pou vini.

14. Ki levennman ki pou arive pandan gran ladetres, e dan ki lord?

¹⁴ Okonmansman gran ladetres, bann sef lemonn pou tourn kont Gran Babilonn, lanpir iniversel fo relizyon, e pou detri li. (Matye 24:21; Revelasyon 17:15, 16) Apre sa, bann nasyon pou tourn kont sa bann ki siport souvrennte Zeova, e sa pou provok lakoler Zeova kont bann gouvernman politik ek zot bann siporter, ki pou anmenn destriksyon total lo zot. Sa pou Armagedon, pwen final gran ladetres. Apre, Satan ek son bann demon pou ganny zete dan labim, kot zot pa pou enfliyans limanite ankor. Sa pou konklir zour Zeova kot son non pou ganny sangtifye.—Ezekyel 38:18, 22, 23; Revelasyon 19:11–20:3.

15. Akoz i pa pou saz pour dir ki zour Zeova i ankor tre lwen?

¹⁵ Lafen sa sistenm pou vin egzakteman dapre letan ki Bondye in progranmen. I pa pou an retar. (Abakouk 2:3) Rapel ki, destriksyon Zerizalenm an 70 N.L. ti vin vitman, kan bann Zwif pa ti pe ekspekte li, kan zot ti panse ki danze ti’n fini pase. E ansyen Babilonn? I ti pwisan, konfidan, e ekipe avek bann gro gro miray. Me i ti tonbe dan en sel nwit. Dan sa menm mannyer, destriksyon souden pou vin lo sa sistenm mesan. Kan i vini, annou les Zeova trouv nou ini dan vre ladorasyon, pe gard antet son zour.

Revizyon

• Akoz i tre enportan pour gard antet zour Zeova? Ki mannyer nou kapab fer sa?

• Konman ki separasyon bann dimoun ki pe arive i konsern nou personnelman?

• Ki pou arive avan zour Zeova i konmanse? Alor, ki nou devret pe fer personnelman?

[Portre lo paz 180, 181]

Byento bann dernyen zour pou fini avek destriksyon sistenm Satan