Aksepte avek rekonnesans—Donn avek tou ou leker

ZEOVA, nou papa lanmour dan lesyel i enterese personnelman avek nou. Parol Bondye i asir nou ki i annan en profon lentere pour tou son bann serviter. (1 Pyer 5:7) En fason ki Zeova i demontre son lentere i atraver diferan led ki i donn nou pour nou servi li fidelman. (Iza. 48:17) Zeova i anvi ki nou benefisye avek led ki i donn nou, sirtou ler nou fer fas avek bann problenm ki fer nou soufer. Lalwa Moiz i demontre ki sa i vre.

Anba Lalwa Moiz, Zeova ti fourni led ranpli avek lanmour pour “sa enn ki aflize,” parey en orfelen, en vev ek en rezidan etranze. (Lev. 19:9, 10; Det. 14:29) I konnen ki serten parmi son bann serviter i bezwen led avek lezot frer ek ser. (Zak 1:27) Alor, napa enn son serviter ki devret ezite pour aksepte led avek sa bann ki Zeova in servi pour ed zot. Me kantmenm sa, ler nou aksepte led nou devret fer li avek sa bon leta lespri.

An menm tan, Parol Bondye i fer resorti ki pep Bondye i osi annan sa loportinite pour donnen. Mazin sa resi konsernan sa “pov vev” ki Zezi ti obzerve kot tanp Zerizalenm. (Lik 21:1-4) I tre probab ki i ti benefisye avek bann dispozisyon ranpli avek lanmour pour bann vev, ki ti ganny mansyonnen dan Lalwa ki ti sorti kot Zeova. Kantmenm i ti dan bezwen, dimoun pa rapel sa vev konman en dimoun ki ti resevwar, me plito konman en dimoun ki ti donnen. Akoz i ti pare pour donnen, sa ti’n bezwen donn li lazwa akoz Zezi ti dir: “I annan plis lazwa pour donnen ki pour resevwar.” (Akt 20:35) Avek sa laverite antet, ki mannyer ou kapab devlop sa labitid pour “donnen,” e ganny lazwa an retour?—Lik 6:38.

“Ki mon pou rann Zeova?”

Sa psalmis ti mazin dan li menm: “Ki mon pou rann Zeova pour tou son bann byenfe anver mwan? (Ps. 116:12) Ki byenfe i ti gannyen? Zeova ti soutenir li ler i ti eksperyans “soufrans ek sagrinasyon.” An plis ki sa, Zeova ti “sov li dan lanmor.” Aprezan i ti anvi “rann” Zeova an retour. Ki sa psalmis ti kapab fer pour Zeova? I ti dir: “Mon pou akonplir mon bann ve anver Zeova.” (Ps. 116:3, 4, 8, 10-14) I ti determinen pour gard tou bann promes ki i ti’n fer avek Zeova e akonplir tou son lobligasyon anver li.

Ou kapab fer parey. Ki mannyer? Par anmenn en lavi ki toultan an armoni avek bann Lalwa ek prensip Bondye. Alor, fer sir ki ou gard ou ladorasyon pour Zeova toultan premye plas dan ou lavi, e ki ou les lespri sen Bondye gid ou dan tou sa ki ou fer. (Ekle. 12:13; Gal. 5:16-18) An realite, ou pa pou zanmen kapab fini rann Zeova tou sa ki i’n fer pour ou. Me kantmenm sa, i vreman ‘rezwir leker Zeova’ ler i vwar ki ou pe servi li avek tou ou leker. (Prov. 27:11) Pa i vreman en zoli privilez pour fer plezir Zeova dan sa fason!

Kontribye pour byennet kongregasyon

San dout ou pou dakor ki kongregasyon in ed ou dan en kantite fason. Zeova i fourni manze spirityel annabondans atraver kongregasyon. Ou’n konn laverite ki’n fer ou rezet bann fo lansennyman e fer ou sorti dan fernwanr spirityel. (Zan 8:32) Dan bann renyon kongregasyon ek lasanble, ki ‘lesklav fidel e pridan’ i organize, ou ti ganny konnesans ki pou fer ou ganny lavi eternel dan paradi lo later kot pou napa douler ek soufrans. (Mat. 24:45-47) Eski ou kapab kont tou sa bann benediksyon ki ou’n gannyen e ki ou pou gannyen atraver kongregasyon Bondye? Ki ou kapab fer pour kongregasyon an retour?

Zapot Pol ti ekrir: “Tou bann diferan parti lekor i byen rasanble ansanm, e lekor antye i tenir ansanm par bann zwentir ki i posede. Alor kan sak parti i travay konman fodre, lekor antye i grandi e devlope par lanmour.” (Efe. 4:15, 16) Menm si sa verse i premyerman aplik pour bann Kretyen swazir, sa prensip i kapab aplik pour tou bann Kretyen ozordi. Wi, sak manm kongregasyon i kapab kontribye pour byennet ek devlopman kongregasyon. Dan ki fason?

Nou kapab fer sa si nou toultan fer bokou zefor pour ankouraz e batir lezot spirityelman. (Rom. 14:19) Nou kapab kontribye pour ki “lekor antye i grandi” par devlop sa fri lespri dan fason ki nou azir anver nou bann frer ek ser dan kongregasyon. (Gal. 5:22, 23) An plis ki sa, nou kapab rod bann loportinite pour “fer dibyen tou dimoun, sirtou nou bann frer dan lafwa.” (Gal. 6:10; Ebr. 13:16) Sak dimoun dan kongregasyon setadir, frer konman ser, zenn konman vye i kapab ede pour ‘ki lekor antye i devlope dan lanmour.’

Deplis nou kapab servi nou talan, lenerzi, ek resours pour partisip dan sa travay pour sov lavi, ki pe ganny akonplir par kongregasyon. Zezi ti dir: “Zot in resevwar pour nanryen.” Ki mannyer nou devret reazir? I ti dir: “Donn osi pour nanryen.” (Mat. 10:8) Alor nou devret partisip plennman dan sa travay predikasyon ki vreman enportan, e pour fer disip. (Mat. 24:14; 28:19, 20) Eski ou sityasyon i anpes ou fer plis? Pa bliye sa ki Zezi ti rakonte konsernan sa pov vev. I pa ti donn bokou. Me, Zezi ti dir ki i ti donn plis ki lezot. I ti donn dapre sa ki son sirkonstans ti permet li donnen.—2 Kor. 8:1-5, 12.

Resevwar avek en bon leta lespri

Toudmenm, parfwa ou kapab bezwen sipor kongregasyon. Pa zanmen ezite pour aksepte okenn led ki kongregasyon i ofer ou, ler ou fer fas avek presyon sa lemonn. Zeova in donn bann zonm kalifye e ki annan lentere pour “pran swen” avek kongregasyon e pour ed ou ler ou pas atraver bann leprev ek difikilte. (Akt 20:28) Bann ansyen ensi ki lezot dan kongregasyon i anvi konsol, siport e protez ou dan bann letan difisil.—Gal. 6:2; 1 Tesa. 5:14.

Me, fer sir ki ler ou ganny ede dan en serten fason, ou resevwar sa led avek en bon leta lespri. Touzour aksepte led ki ou gannyen avek rekonnesans. Konsider sa led ki ou gannyen sorti kot ou bann frer ek ser, konman en fason ki Bondye i demontre son labonte ekstraordiner. (1 Pyer 4:10) Akoz sa i enportan? Akoz nou pa anvi montre ki nou napa rekonnesans kan nou resevwar led, parey i leka pour bokou dimoun dan sa lemonn.

Annan lekilib e vin rezonnab

Dan son let ki zapot Pol ti ekrir kongregasyon Filip, konsernan Timote, i ti dir: “Personn pa’n partaz mon gran preokipasyon parey li, e pran sousi vreman pour zot byennet.” Me i ti osi azoute: “Tou lezot i pran traka zis pour zot bann zafer personnel e non pa pour lakoz Zezi-Kri.” (Fili. 2:20, 21) Par reflesir lo sa remark serye ki Pol ti fer, ki mannyer nou kapab evite vin tro konsernen avek nou “zafer personnel”?

Nou pa devret zanmen ekspekte tro bokou avek lezot dan kongregasyon kan nou demann zot pour ofer nou zot letan ek latansyon pour ed nou fer fas avek nou problenm. Akoz sa? Be zis mazin sa: San dout nou ti pou vreman apresye si en frer oubyen ser i ed nou lo plan materyel dan en ka kot nou fer fas avek en sityasyon irzan. Me eski nou ti pou ekspekte sa kalite led? Byensir non. Pareyman, menm si nou bann frer ek ser ki kontan nou i touzour pare pour ed nou, nou bezwen annan lekilib e vin rezonnab dan sa ki nou ekspekte zot fer pour nou, dapre sa ki zot kapab. Apre tou, nenport keksoz ki nou bann frer ek ser i fer pour ed nou fer fas avek bann moman difisil, nou ti pou kontan ki zot fer li volonterman.

San dout ou bann frer ek ser pou touzour pare pour ed ou. Kantmenm sa, parfwa, i pa pour posib pour zot donn ou sa led ki ou bezwen. Si sa i arive, ou kapab asire ki Zeova pou soutenir ou dan nenport ki leprev ki ou pas atraver, zis parey i ti fer pour sa psalmis.—Ps. 116:1, 2; Fili. 4:10-13.

Alor, pa ezite pour aksepte avek rekonnesans nenport provizyon ki Zeova i fer pour ou, sirtou ler ou pas dan problenm ek difikilte. (Ps. 55:22) Zeova i oule ki ou fer sa. Me, i osi anvi ki ou “donn avek lazwa.” Alor, ou devret donn “dapre sa ki [ou’n] deside,” dapre sa ki ou sirkonstans i permet ou fer pour soutenir vre ladorasyon. (2 Kor. 9:6, 7) Dan sa fason ou pou kapab fer sa de keksoz, setadir aksepte avek rekonnesans e donn avek tou ou leker.

[Bwat lo paz 32]

“Ki mon pou rann Zeova pour tou son byenfe anver mwan?”—Ps. 116:12.

▪ Rod loportinite pour “fer dibyen tou dimoun”

▪ Ankouraz e batir lezot spirityelman

▪ Partisip plennman dan sa travay predikasyon dapre sa ki ou sirkonstans i permet ou fer