PWEN 2

Koz dan en fason natirel

2 Korentyen 2:17

KI OU BEZWEN FER: Koz dan en fason natirel e senser parey dan en konversasyon, sa pou montre ki mannyer ou santi anver sa size e anver ou lodyans.

KI MANNYER POUR FER LI:

Priye e prepar byen. Priye pour ki ou kapab konsantre, pa lo ou, me lo ou mesaz. Bann pwen prensipal ki ou pou koz lo la i devret byen kler dan ou lespri. Servi ou prop mo pour eksprim ou. Pa bezwen repet mo pour mo parey i aparet dan en liv.

Si ou bezwen lir Labib oubyen en lot liv, prepar byen pour ki ou kapab fasilman lir. Si ou pe lir sa ki lezot dimoun in dir, fer li avek santiman, me pa tro egzazere.
Koz avek senserite. Mazinen akoz dimoun i bezwen ekout sa mesaz. Konsantre lo sa bann dimoun, koumsa zot pou vwar ki ou fason debout oubyen asize, ou bann zes ek lekspresyon lo figir i demontre lanmour e ki ou senser e amikal.

I annan en diferans ant koz dan en fason natirel e koz dan en fason ki tro familye ki kapab montre en mank respe pour lodyans. Koz dan en fason kler e koz byen ou langaz pour ki dimoun i annan respe pour sa mesaz.
Get ou lodyans. Si i pa en mank respe dan ou pei, ou kapab get dimoun dan zot figir. Ler ou fer en diskour devan en lodyans, get en dimoun alafwa olye get tou dimoun an zeneral.