Kestyon Lekter

David ti ekrir ki i pa ti’n “vwar okenn dimoun drwat ganny abandonnen, ni menm son bann zanfan pe rod dipen.” Alor i ti koz an zeneral baze lo son prop leksperyans. I ti byen konnen ki Bondye i toultan pran swen avek son pep. (Ps. 37:25) Me parol David pa vedir ki napa en adorater ki’n deza mank sa ki i bezwen oubyen ki pou mank sa ki i bezwen.

I ti annan bann letan kot David li menm ti pas atraver bann difikilte. Enn sa moman ti ler i ti pe sov Sail. David ti napa bokou manze e i ti demann dipen pour li ek bann ki ti avek li. (1 Sam. 21:1-6) Alor dan sa ka, David ti “pe rod dipen.” Par kont, dan sa sityasyon kritik i ti konnen ki Zeova pa ti’n abandonn li. An realite, napa okenn par kot nou lir ki David ti bezwen mandyan pour ganny manze pour sirviv.

Dan Matye 6:33 Zezi i donn nou lasirans ki Bondye pou pran swen avek bezwen son bann serviter fidel ki met lentere Rwayonm premye dan zot lavi. Zezi ti ankouraz nou pour “rod plito Rwayonm Bondye ek son lazistis, e limenm i a donn zot anplis tou lezot keksoz [enkli manze, keksoz pour bwar ek lenz] osi.” Par kont, Zezi ti osi endike ki akoz persekisyon i kapab ki son “bann frer” pou lafen. (Mat. 25:35, 37, 40) Sanmenm ki ti arive avek zapot Pol. Par ler i ti lafen e swaf.​—2 Kor. 11:27.

Zeova i dir nou ki nou pou ganny persekite dan plizyer fason. I kapab permet nou pour mank en serten keksoz anmezir ki nou ede pour reponn bann lakizasyon par Dyab. (Zob 2:3-5) Par egzanp, serten nou bann frer ek ser parey bann ki ti ganny mete dan bann kan konsantrasyon Nazi ti vwar zot an danze akoz persekisyon. Pour kas lentegrite bann Temwen zot ti esey en taktik kriyel, sa se pour pa donn zot ase manze. Bann Temwen fidel ti kontinyen obeir Zeova e i pa ti abandonn zot. I ti permet zot sibir sa leprev, zis parey i les tou bann Kretyen pas atraver diferan leprev. Par kont, napa okenn dout ki Zeova i siport tou bann ki soufer pour son non. (1 Kor. 10:13) Nou kapab gard antet sa parol dan Filipyen 1:29: “Zot in ganny privilez pour servi Kris, pa zis pour krwar li, me osi pour soufer pour li.”

Zeova i promet ki i pou avek son bann serviter. Par egzanp, Izai 54:17 i dir: “Napa okenn zarm ki ganny formen kont ou ki pou reisi.” Sa promes ek lezot promes i garanti ki pep Bondye i ganny proteze konman en group. Me konman en endividi en Kretyen i kapab pas atraver bann leprev menm ziska kot i mor.