Zozye ti vin sef

MOIZ ti anvi al Kanaan avek bann Izraelit. Alor i ti demande: ‘Zeova les mwan travers Larivyer Zourden, e vwar sa bon pei.’ Me Zeova ti dir: ‘Ase! Pa mansyonn sa ankor!’ Eski ou konnen akoz Zeova i dir sa?

Akoz sa ki ti arive kan Moiz ti tap sa ros. Rapel, ki li ek Aaron pa ti onor Zeova. Zot pa ti dir bann dimoun ki se Zeova ki’n fer delo sorti dan sa ros. Se pour sa rezon ki Zeova ti dir ki i pa pou les zot antre an Kanaan.

Alor enn de mwan plitar apre ki Aaron ti’n mor, Zeova ti dir Moiz: ‘Pran Zozye, e fer li debout devan gran pret Eleazar ek bann dimoun. E la devan tou dimoun, dir zot ki Zozye i nouvo sef.’ Moiz ti fer egzakteman sa ki Zeova ti dir, parey ou kapab vwar dan sa portre.

Apre Zeova ti dir avek Zozye: ‘ Montre ki ou for, e pa bezwen per. Ou pou gid bann Izraelit dan pei Kanaan ki mon’n promet zot, e mon pou avek ou.’

Plitar Zeova ti demann Moiz pour mont anler lo Montanny Nebo dan pei Moab. La anler Moiz ti kapab get lo lot kote Larivyer Zourden e vwar sa zoli pei Kanaan. Zeova ti dir: ‘Sa i sa pei ki mon’n promet pour donn bann zanfan Abraam, Izaak ek Zakob. Mon’n les ou vwar li, me mon pa pou les ou antre dan sa pei.’

Moiz ti mor la anler lo Montanny Nebo. I ti annan 120 an. I ti ankor for, e i ti ankor kapab vwar byen kler. Bann dimoun ti vreman tris e zot ti plere akoz Moiz in mor. Me zot ti kontan pour annan Zozye konman zot nouvo sef.