Promes Yifta

ESKI ou’n deza fer en promes e apre vwar li difisil pour garde? Sa zonm dan sa portre ti fer, e se pour sa rezon ki i tre sagren. Sa zonm i en ziz, i ti apel Yifta.

Yifta ti viv dan en letan kot bann Izraelit pa ti pe ador Zeova. Ankor enn fwa zot ti pe fer sa ki mal. Alor Zeova ti les bann Amonit fer zot ditor. Sa ti fer bann Izraelit kriy ver Zeova: ‘Nou’n fer pese kont ou. Silvouple, sov nou!’

Bann dimoun ti regrete pour sa bann move keksoz ki zot ti’n fer. Zot ti montre ki zot regrete par ador Zeova ankor. E ankor enn fwa Zeova ti ed zot.

Bann dimoun ti swazir Yifta pour lager kont bann move Amonit. Yifta ti vreman anvi Zeova ed li dan sa lager. Alor i ti promet Zeova: ‘Si ou fer mwan ranport laviktwar lo bann Amonit, mon pou donn ou sa premye dimoun ki sorti dan mon lakaz pour vin rankontre mwan kan mon retournen sorti lager.’

Zeova ti ekout promes Yifta, e i ti ed li pour ranport laviktwar. Eski ou konnen lekel sa premye dimoun ki ti vin rankontre li kan i ti retourn kot li. Ti son fiy, son sel zanfan. ‘Ar, mon fiy!’ Yifta ti kriye. ‘Ou vreman fer mwan tris. Me mon’n fer en promes avek Zeova, e mon pa kapab kas li.’

Kan son fiy ti aprann konsernan son promes, okonmansman li osi i ti sagren. Lefe ki i ti pou bezwen kit son papa ek son bann zanmi. Me i ti pou pas larestan son lavi servi Zeova dan son tabernak an Silo. Alor i ti dir avek son papa: ‘Si ou’n fer en promes avek Zeova, ou bezwen gard li.’

Alor fiy Yifta ti al Silo, e i ti pas larestan son lavi servi Zeova dan son tabernak. Kat zour tou le zan bann madanm Izrael ti al vizit li laba, e zot ti pas en bon letan ansanm. Bann dimoun ti kontan fiy Yifta akoz i ti en bon serviter Zeova.