SAPIT 7

Sa ki Bondye in Fer pour Sov Limanite

 1, 2. (a) Konman ki en zofisye larme Romen ti kapab rekonnet ki sennla Garson Bondye? (b) Akoz Zeova ti permet ki Zezi i mor?

EN APRE-MIDI prentan, pres 2,000 an pase, en zofisye larme Romen ti pe get trwa zonm ki ti pe agoniz dousman ver lanmor. Sa solda ti sirtou remark enn antre zot—Zezi Kri. Zezi ti’n ganny kloute lo en poto dibwa. Omoman ki son lanmor ti pe aprose, lesyel midi ti nwarsi. Kan i ti mor, later ti tranble vyolanman e sa solda ti kriye: “Vreman sa zonm ti Garson Bondye.”—Mark 15:39.

² Garson Bondye! Sa solda ti annan rezon. I ti’n fek temwanny levennman pli enportan ki ti a zanmen arive lo later. Plizyer fwa oparavan, Bondye li menm ti’n deza apel Zezi, son Garson byenneme. (Matye 3:17; 17:5) Me akoz Zeova ti permet ki son Garson i mor? Parski sa ti lemwayen ki Bondye ti’n prevwar pour sov laras imen dan pese ek lanmor.

SWAZIR POUR EN PLAN SPESYAL

 3. Akoz ti apropriye ki sel Garson Bondye, i ganny swazir pour realiz en plan spesyal konsernan limanite?

³ Parey nou’n aprann oparavan dan sa liv, Zezi ti annan en legzistans pre-imen. I ganny apele “sel Garson Bondye” akoz Bondye ti kree li direkteman. Answit Bondye ti servi Zezi pour anmenn tou lezot keksoz an egzistans. (Zan 3:18; Kolosyen 1:16) Zezi ti vreman atase avek bann imen. (Proverb 8:30, 31) Alors i pa sirprenan ki Zeova ti swazir son “sel Garson” pour realiz en plan spesyal kan limanite ti trouv li anba kondannasyon lanmor!

 4, 5. Ki Labib ti revele konsernan sa Semans Mesyanik, avan ki Zezi ti vin lo later?

⁴ Kan i ti pas santans lo Adan, Ev ek Satan dan zarden Edenn, Bondye ti koz lo sa fitir Sover konman en “semans.” Sa Semans, oubyen posterite, ti pou vin fer disparet bann domaz terib provoke par Satan Dyab, sa “serpan lantikite.” An realite, sa Semans promiz ti pou kraz Satan e tou sa bann ki’n swiv li.—Zenez 3:15; 1 Zan 3:8; Revelasyon 12:9.

⁵ Diran bann syek, Bondye ti gradyelman revel plis lenformasyon lo sa Semans, ki’n osi ganny apele Mesi. Parey sa tablo lo paz 37 i montre, en kantite profesi ti donn bann detay lo plizyer laspe son lavi lo later. Par egzanp, i ti pou sibir bann tretman sever pour ranpli son rol dan plan Bondye.—Izai 53:3-5.

AKOZ MESI TI POU BEZWEN MOR

 6. Dapre Danyel 9:24-26, ki Mesi ti pou akonpli, e konman?

⁶ Sa profesi rikorde dan Danyel 9:24-26 ti predir ki Mesi—sa Enn swazir par Bondye—ti pou akonpli en gran plan. I ti pou vin lo later pour “termin transgresyon, e pour fer fini pese, e pour fer propisyasyon pour fot, e pour anmenn lazistis” pour touzour. Mesi ti pou retir kondannasyon lanmor lo bann imen fidel. Me ki mannyer i ti pou fer sa? Sa profesi i eksplike ki i ti pou ganny “retranse,” setadir ganny met amor.

 7. Akoz bann Zwif ti ofer sakrifis zannimo e ki sa bann sakrifis ti pe anonse?

⁷ Bann Izraelit letan lontan ti familye avek sa lide ki fot i bezwen ganny kouver. Dan zot ladorasyon anba Lalwa ki Bondye ti donn zot atraver Moiz, zot ti regilyerman ofer bann sakrifis zannimo. Sa ti rapel lepep Izrael ki bann imen i bezwen en keksoz pour fer propisyasyon oubyen kouver zot pese. Lapot Pol ti rezim sa prensip par sa bann mo swivan: “San versman disan napa pardon pese.” (Ebre 9:22) Bann Kretyen pa anba Lalwa Mozaik avek son bann lobligasyon, tel ki bann sakrifis. (Romen 10:4; Kolosyen 2:16, 17) Zot osi konnen ki bann sakrifis zannimo pa kapab anmenn pardon konplet e permanan, pour zot pese. Sa bann lofrann sakrifisyel ti plito anons en sakrifis avek en pli gran valer—sa ki pour Mesi oubyen Kris. (Ebre 10:4, 10; vwar Galat 3:24) Ankor, ou kapab demande, ‘Eski ti vreman neseser pour Mesi mor?’

 8, 9. Ki bann keksoz presye ki Adan ek Ev ti perdi e ki mannyer zot aksyon in afekte zot desandans?

⁸ Wi, Mesi ti bezwen mor pour ki limanite i ganny sove. Pour konpran akoz, nou bezwen rapel sa ki ti arive depi konmansman, dan zarden Edenn, e esey sezi gravite sa ki Adan ek Ev ti perdi kan zot ti rebel kont Bondye. Lavi eternel ti devan zot! Etan bann zanfan Bondye, zot ti osi antretenir en relasyon direk avek li. Me kan zot ti rezet dominasyon Zeova, zot ti perdi tousala e zot ti anmenn pese ek lanmor lo laras imen.—Romen 5:12.

⁹ I ti konmsi nou premye paran ti’n gaspiy en gran fortin e ti’n met zot lekor dan en gro det. Adan ek Ev ti pas sa det avek zot desandans. Vi ki nou pa’n ne parfe e san pese, nou tou nou peser e nou mor. Kan nou malad oubyen nou dir en keksoz blesan ki nou swete nou pa ti’n dir, nou pe sibir bann lefe sa det ki nou’n erite—lenperfeksyon imen. (Romen 7:21-25) Nou sel lespwar, i enplik reganny sa ki Adan ti perdi. Me selman, lo nou menm nou pa kapab ganny en lavi imen parfe. Vi ki tou bann imen enparfe i komet pese, nou tou nou merit lanmor, e non pa lavi.—Romen 6:23.

10. Kwa ki ti neseser pour reaste sa ki Adan ti’n perdi?

¹⁰ Toutfwa, eski en keksoz pa ti pou kapab ganny ofer an lesanz sa lavi ki Adan ti perdi? Standar lazistis Bondye, i demann lekivalans: “nanm pour nanm.” (Egzod 21:23) Alor en lavi ti pou bezwen ganny ofer pour pey pour sa lavi ki ti’n ganny perdi. Me lavi nenport ki imen pa ti pou sifi. Konsernan bann imen enparfe, Psonm 49:7, 8 i dir: “Okenn ant zot, pa zanmen kapab reaste en frer, ni donn Bondye en ranson pour li (e sa pri redanpsyon pour zot nanm i sitan presye ki, vreman, i fer defo pour letan endefini).” Alor, eski nou dan en sitiasyon dezespere? Pa ditou.

11. (a) Ki sa mo “ranson” i sinifye dan langaz Ebre? (b) Lekel sa sel dimoun ki ti pou kapab reaste limanite, e akoz?

¹¹ Dan langaz Ebre, sa mo ki’n ganny tradwir “ranson” i vedir en sonm ki’n ganny peye pour reaste en kaptif e i osi endike ki sa sonm i bezwen ekivalan. Zis en zonm avek en lavi imen parfe, ki ti pou kapab ofer lekivalans sa ki Adan ti perdi. Zezi Kri ti sa sel zonm parfe ki ti ne lo later, apre Adan. Se pour sa rezon ki Labib i apel Zezi “dernyen Adan” e i asir nou ki Kris in “donn son prop lekor konman pri pour sov limanite.” (1 Korentyen 15:45; 1 Timote 2:5, 6) Alor ki Adan in pas lanmor avek son bann zanfan, leritaz ki Zezi i transmet, se lavi eternel. Premye Korentyen 15:22 i eksplike: “Parey tou dimoun i mor dan Adan, demenm dan Kris tou pou reviv.” Alors i byen apropriye ki Zezi in ganny apele “Papa Eternel.”—Izai 9:6, 7.

KI MANNYER SA RANSON TI GANNY PEYE

12. Kan ki Zezi ti vin Mesi, e ki kalite lavi i ti anmennen apre sa?

¹² Lotonn lannen 29 N.L., Zezi ti al kot son parante Zan, pour ganny batize e ensi prezant son lekor pour akonpli lavolonte Bondye. Sa lokazyon, Zeova ti swazir Zezi par mwayen lespri sen. Zezi ti alor vin Mesi, oubyen Kris, sa enn apwente par Zeova. (Matye 3:16, 17) Apre sa, Zezi ti antreprann son minister ki ti pou dir pour trwa-z-an edmi. I ti vwayaz partou dan son pei natal, pour pres Rwayonm Bondye e rasanble bann disip fidel. Toutfwa, parey ti’n ganny predir, i pa ti tarde pour rankontre lopozisyon.—Psonm 118:22; Akt 4:8-11.

13. Ki bann levennman ki ti anmenn ver lanmor Zezi, konman en zonm fidel?

¹³ Avek kouraz, Zezi ti denons lipokrizi bann sef relizye e zot ti sey met li amor. Finalman zot ti prepar en vilen konplo ki ti enplik traizon, arestasyon ki pa valid, zizman ilegal e fo lakizasyon konmkwa i ensit azitasyon kont leta. Zot ti kalot li, kras lo li, monk li, e bat li avek en fwet ki desir laser. Gouverner Romen, Pons Pilat, ti apre kondann li amor lo en poto siplis. I ti ganny kloute lo en poto dibwa e i ti reste anpandan lo la. Sak respirasyon ti ekstrememan douloure e ti pran plizyer er-d-tan pour li mor. Ziska lafen son leprev, Zezi ti gard son lentegrite parfe anver Bondye.

14. Akoz Bondye ti permet ki son Garson i soufer e mor?

¹⁴ Ti alor, le 14 Nizan lannen 33 N.L. ki Zezi ti donn son lavi “konman en pri pour liberasyon bokou dimoun.” (Mark 10:45; 1 Timote 2:5, 6) Dan lesyel, Zeova ti kapab vwar son garson byenneme pe soufer e mor. Akoz Bondye ti permet en keksoz sitan terib arive? Se parski i kontan bann imen. Zezi ti dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Lanmor Zezi i osi ansenny nou ki Zeova i en Bondye lazistis parfe. (Deterononm 32:4) Serten i kapab demande akoz ki Zeova pa ti renons son bann prensip lazistis, ki enplik nanm pour nanm, e inyor sa konpansasyon ki ti bezwen pey pour move kondwit Adan. Rezon pour sa, se ki Zeova i touzour swiv e soutenir son bann lalwa, menm si sa i kout li bokou.

15. Vi ki i ti pou enzis pour les Zezi mor pour touzour, ki Zeova ti fer?

¹⁵ Lazistis Zeova ti osi demande ki lanmor Zezi i annan en lafen rezwisan. Apre tou, eski ti pou zis, pour les Zezi, li ki ti’n reste fidel, dormi pour touzour dan lanmor? Byensir non! Lekritir Ebraik ti’n profetize ki sa fidel serviter Bondye, pa ti pou reste dan latonm. (Psonm 16:10; Akt 13:35) I ti dormi dan lanmor e son trwazyenm zour Zeova ti resisit li pour lavi, dan laform en lespri pwisan.—1 Pyer 3:18.

16. Ki Zezi ti fer kan i ti retourn dan lesyel?

¹⁶ Ler i ti mor, Zezi ti renons son lavi imen pour touzour. Enn fwa ki i ti reganny lavi dan lesyel, i ti vin en lespri ki donn lavi. Deplis, an montan dan sa parti pli sen dan liniver, i ti retrouv son Papa byenneme e i ti ofisyelman prezant Li valer son lavi imen parfe. (Ebre 9:23-28) Valer sa lavi presye ti alor kapab ganny aplike an faver bann imen obeisan. Ki sa i sinifye pour ou?

RANSON ZEZI E OU MENM

17. Konman ki nou kapab benefisye avek pardon, lo baz sakrifis ranson Kris?

¹⁷ Konsider trwa fason ki sakrifis ranson Kris, i benefisye ou menm konmela. Premyerman, i anmenn pardon pour pese. An egzersan lafwa dan sa disan ki Zezi ti verse, nou annan “delivrans par son disan,” wi, “pardon nou pese.” (Efezyen 1:7) Alor, menm si nou’n komet en pese grav, nou kapab demann Bondye pour pardonn nou, onon Zezi. Si nou vreman repantir, Zeova i fer nou benefisye valer sakrifis ranson son Garson. Bondye i pardonn nou, i akord nou benediksyon en bon konsyans, olye egziz lapenn lanmor ki nou anmenn lo nou akoz pese.—Akt 3:19; 1 Pyer 3:21.

18. Ki mannyer sakrifis Zezi i donn nou en lespwar?

¹⁸ Dezyenmman, sakrifis ranson Zezi i fondman nou lespwar pour lavenir. Dan en vizyon, lapot Zan ti vwar “en gran lafoul, ki personn pa ti kapab konte” ki ti pou sirviv lafen, katastrofik e tre pros, sa sistenm. Akoz zot pou sirviv tandis ki bokou lezot pou ganny detrir par Bondye? En lanz ti dir Zan ki sa gran lafoul in “lav zot rob e blansi li dan disan Lanyo,” Zezi Kri. (Revelasyon 7:9, 14) Tan ki nou egzers lafwa dan disan Zezi e ki nou viv an konformite avek bann lobligasyon divin, nou pou reste pir dan lizye Bondye e nou pou annan lespwar lavi eternel.

19. Konman ki sakrifis Kris i prouve ki Zezi ek son Papa i kontan ou?

¹⁹ Trwazyenmman, sakrifis ranson Zezi i pli gran laprev lanmour Zeova. Lanmor Kris ti eksprim ouvertman sa de akt lanmour pli ekstraordiner dan listwar liniver: (1) lanmour Bondye an anvoyan son garson pour mor pour nou; (2) lanmour Zezi, ki’n ofer li volonterman konman en ranson. (Zan 15:13; Romen 5:8) Nou tou endividyelman nou kapab benefisye avek sa lanmour, si nou egzers vreman lafwa. Lapot Pol ti dir: “Garson Bondye ki’n kontan mwan e ki’n donn son lavi pour mwan.”—Galat 2:20: Ebre 2:9; 1 Zan 4:9, 10.

20. Akoz nou devret egzers lafwa dan sakrifis ranson Zezi?

²⁰ Alors, annou montre nou rekonesan pour lanmour ki Bondye ek Kris in demontre, an egzersan lafwa dan sakrifis ranson Zezi. En tel latitid pou anmenn ver lavi eternel. (Zan 3:36) Toutfwa nou delivrans i pa ti rezon pli enportan pour Zezi vin lo later e mor. Non, son preokipasyon prensipal ti en keksoz pli enportan, enn ki iniversel. Parey nou pou vwar dan sapit swivan, sa size i konsern nou tou parski i montre akoz Bondye i permet mesanste ek soufrans persiste pour sitan lontan dan sa monn.

ESTE OU KONNESANS

Akoz Zezi ti bezwen mor pour sov limanite?

Ki mannyer sa ranson ti ganny peye?

Konman ou menm ou benefisye avek sa ranson?

[Portre lo paz 67]