SAPIT 10

Rwayonm Bondye Pe Dominen

 1, 2. Konman ki dominasyon bann gouvernman imen pa’n vreman en sikse?

PETET in deza ariv ou sa leksperyans kot ou’n aste en lekipman e apre ou dekouver ki i pa marse. Sipoze, ou’n apel kelken pour repar li me apenn ki i’n fini “aranze,” sa lekipman i kas ankor. Pa i dezapwentan!

² I koumsa menm avek bann gouvernman imen. Bann imen in touzour anvi en gouvernman ki pou asir lape ek boner. Pourtan, bann gran zefor pour repar bann defayans dan lasosyete pa’n vreman en sikse. En gran kantite trete lape in ganny fer—e apre kase. Deplis, ki sa gouvernman ki’n kapab elimin lapovrete, prezidis, krim, maladi ek dezas ekolozik? Dominasyon zonm pa kapab ganny repare. Menm Lerwa saz Izrael, Salomon, ti poz sa kestyon: “Konsernan zonm tire dan sirfas later, konman i kapab disern son semen?”—Proverb 20:24.

 3. (a) Ki ti tenm predikasyon Zezi? (b) Ki mannyer serten i dekrir Rwayonm Bondye?

³ Me pa perdi lespwar! En gouvernman mondyal e stab pa zis en rev. I ti tenm predikasyon Zezi. I ti apel li “rwayonm Bondye” e i ti ansenny son bann disip pour priy pour sa Rwayonm. (Lik 11:2; 21:31) Byensir, Rwayonm Bondye i parfwa ganny mansyonnen dan bann group relizye. An realite, plizyer milyon dimoun i mansyonn li sak zour kan zot resit lapriyer model Notre Père. Me kan zot ganny poze sa kestyon, “Kisisa Rwayonm Bondye?” zot reponn dan diferan fason. Serten i dir: “I dan ou leker.” Lezot i apel li lesyel. Me parey nou pou vwar, Labib i eksplik klerman kisisa sa Rwayonm.

EN RWAYONM KI ANNAN EN PLAN

 4, 5. Akoz Zeova in deside prodwir en nouvo lekspresyon son dominasyon, e ki sa pou akonpli?

⁴ Zeova Bondye in touzour Lerwa oubyen Met Siprenm liniver. I okip sa pozisyon eleve parski i Kreater tou keksoz. (1 Kronik 29:11; Psonm 103:19; Akt 4:24) Me sa Rwayonm ki Zezi ti koz lo la, i segonder, anba dominasyon iniversel Bondye. Sa Rwayonm Mesyanik i annan en plan spesifik. Lekel?

⁵ Parey i’n ganny eksplike dan Sapit 6, premye koup imen ti rebel kont lotorite Bondye. Akoz sa bann kestyon ki ti ganny souleve, Zeova ti deside met an plas en nouvo lekspresyon son dominasyon. I ti anons son lentansyon pour prodwir en “semans” ki ti pou ekraz latet Satan, sa serpan, e efas tou lefe pese ki limanite in erite. Sa “semans” prensipal i Zezi Kri e “rwayonm Bondye” i sa lenstriman ki pou defet Satan konpletman. Par mwayen sa Rwayonm, Zezi Kri pou fer ki later i ganny gouvernen ankor lo non Zeova e i pou zistifye drwa Bondye pour egzers son dominasyon pour touzour.—Zenez 3:15; Psonm 2:2-9.

 6, 7. (a) Kote sa Rwayonm i ete, e lekel son Lerwa ek son bann dirizan asosye? (b) Lekel bann size sa Rwayonm?

⁶ Dapre en tradiksyon parol Zezi ki i ti adres avek bann Farizyen mesan, i ti dir: “Rwayonm Bondye i anndan ou.” (Lik 17:21, King James Version) Eski Zezi ti oule dir ki Rwayonm ti dan leker mesan sa bann zonm koronpi? Non. En tradiksyon pli egzakt sa teks orizinal Grek i lir koumsa: ‘Rwayonm Bondye i deza parmi zot.’ (Nouvo Testaman) Zezi ki ti parmi zot, ti pe alor refer lo li menm konman sa fitir Lerwa. Byen diferan avek kondisyon en leker, Rwayonm Bondye i en gouvernman reel an fonksyon, avek en dirizan ek son bann size. Vi ki i ganny apele “rwayonm lesyel” ek “rwayonm Bondye,” i alor en gouvernman seles. (Matye 13:24; Lik 8:10) Dan en vizyon, profet Danyel ti vwar sef sa Rwayonm, “kelken ki resanble en fis-de-lonm,” ganny anmennen devan Bondye Tou Pwisan. I ti resevwar “dominasyon [dirab], dinite ek rwayonm, pour ki bann pep, kominote nasyonal ek bann lalang, zot tou zot servi li.” (Danyel 7:13, 14) Lekel sa Lerwa? Zezi Kri i ganny apele “Fis-de-Lonm” dan Labib. (Matye 12:40; Lik 17:26) Wi, Zeova in apwent son Garson Zezi Kri konman Lerwa.

⁷ Zezi pa gouvern li tousel. I annan avek li, 144,000 ki’n ganny ‘aste lo later’ pour vin bann lerwa asosye ek bann pret. (Revelasyon 5:9, 10; 14:1, 3; Lik 22:28-30) Bann size sa Rwayonm pou vin en fanmiy imen mondyal ki soumet anba direksyon Kris. (Psonm 72:7, 8) Me ki mannyer nou kapab asire ki sa Rwayonm pou vreman zistifye dominasyon Bondye e reetablir bann kondisyon paradi lo later?

RWAYONM BONDYE I EN REALITE

 8, 9. (a) Ki legzanp nou kapab pran pour montre ki bann promes Rwayonm Bondye i diny konfyans? (b) Akoz nou kapab asire ki Rwayonm Bondye i en realite?

⁸ Sipoze en dife in detrir ou lakaz. Aprezan, en zanmi ki annan lemwayen pour fer li, i promet pour ed ou rekonstrir ou lakaz e nouri ou fanmiy. Si sa zanmi in touzour koz laverite avek ou, eski ou pa ti a krwar li? Sipoze son lannmen ler ou antre sorti travay, ou vwar bann travayer in deza konmans netway bann debri dife e manze in ganny anmennen pour ou fanmiy. San dout ou ti a konvenki ki avek letan, tou keksoz i a retourn parey avan e ki menm ou sitiasyon i a amelyore.

⁹ Pareyman, Zeova i asir nou ki son Rwayonm i en realite. Parey liv Ebre dan Labib i fer nou vwar, dan plizyer laspe, Lalwa ti en lonbraz Rwayonm Bondye. (Ebre 10:1) Rwayonm teres Izrael in osi reprezant profetikman ki mannyer Rwayonm Bondye ti pou ete. I pa ti en gouvernman ordiner vi ki son bann dirizan ti asiz lo “tronn Zeova.” (1 Kronik 29:23) Deplis, i’n ganny profetize: “Lesept pa pou ekarte avek Zida, ni baton komannman ant son lipye, ziska ki Silo i vini; e lobeisans lepep pou apartenir pour li.” (Zenez 49:10)a Wi, se dan laliny lerwa Zida ki Zezi, Lerwa permanan gouvernman Bondye, ti pou ne.—Lik 1:32, 33.

10. (a) Kan ki fondman Rwayonm Mesyanik Bondye ti ganny poze? (b) Ki travay enportan ki bann fitir lerwa asosye Zezi ti pou dirize lo later?

¹⁰ Fondman Rwayonm Mesyanik Bondye ti ganny poze kan bann zapot Zezi ti ganny swazir. (Efezyen 2:19, 20; Revelasyon 21:14) Zot ti bann premye dan sa 144,000 ki ti pou rennyen dan lesyel konman bann lerwa asosye avek Zezi Kri. Diran zot lavi lo later, sa bann fitir lerwa asosye ti pou diriz en kanpanny temwannyaz, an konformite avek komannman Zezi: “Ale e fer tou pep vin mon bann disip. Batiz zot o non di-Per, di-Fis e di-Sent-Espri.”—Matye 28:19.

11. Konman ki predikasyon sa Rwayonm pe ganny akonpli dan nou lepok, e ki son rezilta?

¹¹ Sa komannman pour fer disip pe ozordi ganny obzerve lo en lesel eksepsyonnel. Temwen Zeova pe proklanm sa bon nouvel lo sa Rwayonm partou lo later, an armoni avek parol profetik Zezi: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Zot pe osi partisip dan en gran progranm ledikasyon, ki form parti predikasyon sa Rwayonm. Tou bann ki soumet anba lalwa ek prensip Rwayonm Bondye, pe deza eksperyans en lape ek linite ki bann gouvernman imen pa kapab etabli. Tou sa i montre klerman ki Rwayonm Bondye i en realite!

12. (a) Akoz i apropriye pour apel bann proklanmater sa Rwayonm, Temwen Zeova? (b) Ki mannyer Rwayonm Bondye i diferan avek bann gouvernman zonm?

¹² Zeova ti dir avek bann Izraelit: “Zot mon bann temwen, . . . wi mon serviter ki mon’n swazir.” (Izai 43:10-12) Zezi, “Temwen Fidel,” ti anons sa bon nouvel lo Rwayonm, avek zel. (Revelasyon 1:5; Matye 4:17) I alor apropriye ki dan nou lepok, bann predikater sa Rwayonm i port sa non, swazir par Bondye, Temwen Zeova. Me akoz bann Temwen i konsakre otan letan ek zefor pour koz avek lezot lo Rwayonm Bondye? Zot fer sa akoz sa Rwayonm i sel lespwar pour limanite. Bann gouvernman imen i tonbe to-ou-tar, me i pa pou zanmen leka avek Rwayonm Bondye. Zezi, sef sa Rwayonm, i ganny apele “Prens Lape” dan Izai 9:6, 7, ki azoute: “Avek labondans dominasyon prens e avek lape pou napa lafen.” Rwayonm Bondye pa parey gouvernman zonm ki tanporer. Annefe, Danyel 2:44 i dir: “Bondye lesyel pou etabli en rwayonm ki pa pou zanmen ganny detrir. E sa rwayonm li menm pa pou pas avek okenn lezot pep. . . . I pou dire pour letan endefini.”

13. (a) Nonm serten problenm ki Rwayonm Bondye pou regle. (b) Akoz nou asire ki bann promes Bondye pou ganny akonpli?

¹³ Lekel sa lerwa imen ki ti a reisi elimin lager, kriminalite, maladi, lafamin ek problenm lakaz? Deplis, ki sa dirizan ki ti a kapab resisit bann mor? Rwayonm Bondye ek son Lerwa pou regle sa bann problenm. Sa Rwayonm pa pou inefikas parey en lekipman ki pa fonksyonn byen e ki bezwen reparasyon tanzantan. Plito, Rwayonm Bondye pou atenn son lobzektif, parski Zeova i promet: “Mon parol ki sorti dan mon labous . . . pa pou retourn ver mwan san rezilta, me i pou sertennman fer sa ki mon’n pran plezir, e i pou annan en sikse serten dan sa ki mon’n anvoy li.” (Izai 55:11) Wi, plan Bondye pou ganny akonpli. Me kan ki Rwayonm Bondye ti devret konmans son dominasyon?

DOMINASYON SA RWAYONM—KAN?

14. Ki mal konprenezon ki bann disip Zezi ti annan konsernan sa Rwayonm, me ki Zezi ti konnen konsernan son dominasyon?

¹⁴ “Senyer, eski la aprezan, ou pou retabli rwayonm Izrael?” Sa kestyon ki ti ganny poze par bann disip Zezi, i revele ki dan sa lepok, zot pa ti ankor konn bi Rwayonm Bondye e sa letan fikse kot i ti pou konmans egzers son dominasyon. Zezi ti konsey zot pour pa preokip zot avek sa letan, an dizan: “I pa neseser pour zot konn ler ek moman ki mon Papa in fikse par son prop desizyon.” Zezi ti konnen ki son dominasyon lo later ti’n ganny rezerve pour lavenir, en bon pe letan apre son rezireksyon ek son lasansyon dan lesyel. (Akt 1:6-11; Lik 19:11, 12, 15) Lekritir ki ti’n anons sa bann keksoz. Konman?

15. Ki leklersisman Psonm 110:1 i donnen konsernan sa moman ki Zezi ti pou konmans dominen?

¹⁵ An apelan Zezi son “Senyer,” dan en fason profetik, Lerwa David ti dir: “Deklarasyon Zeova pour mon Senyer: ‘Asiz lo mon kote drwat. Ziska ki mon fer tou ou bann lennmi vin en marspye anba ou lipye.’” (Psonm 110:1; konpar avek Akt 2:34-36.) Sa profesi i endike ki dominasyon Zezi pa ti pou konmans deswit apre son lasansyon dan lesyel. Plito, i ti pou espere dan kote drwat Bondye. (Ebre 10:12, 13) Pour konbyen letan i ti pou espere? Kan son dominasyon ti pou konmanse? Labib i ed nou pour trouv larepons.

16. Ki ti arive an 607 A.N.L., e ki rapor sa levennman ti annan avek Rwayonm Bondye?

¹⁶ Zerizalenm ti sa sel lavil lo later, ki Zeova ti plas son non lo la. (1 Lerwa 11:36) I ti osi kapital en rwayonm teres, ki ti aprouve par Bondye e ki ti lonbraz Rwayonm seles Bondye. Alor, destriksyon Zerizalenm par bann Babilonnyen an 607  A.N.L., ti annan en gran lenportans. Sa levennman ti mark konmansman en lenteripsyon diran lekel Bondye ti pou nepli egzers dominasyon direk lo son pep lo later. Apepre sis syek plitar, Zezi ti endike ki sa peryod ti ankor pe dire, parske i ti deklare: “Zerizalenm pou ganny kraz anba lipye bann nasyon etranze, ziska ki letan [fikse, NW] bann nasyon etranze i ava’n fini.”—Lik 21:24.

17. (a) Kisisa ‘letan fikse bann nasyon,’ e ki kantite letan i ti pou dire? (b) Kan ki ‘letan fikse bann nasyon’ ti konmanse e terminen?

¹⁷ Diran ‘letan fikse bann nasyon,’ bann gouvernman imen ti pou ganny tolere pour enteronp dominasyon ki Bondye i aprouve. Sa peryod ti konmans avek destriksyon Zerizalenm an 607  A.N.L. e Danyel ti endike ki i ti pou dire pour “set letan.” (Danyel 4:23-25) Ki longer sa i ete? Labib i montre ki trwa “letan” ek en lanmwatye i egal avek 1,260 zour. (Revelasyon 12:6, 14) De fwa sa peryod oubyen set letan, i alor ariv 2,520 zour. Me okenn levennman remarkab pa ti arive alafen sa kourt peryod letan. Sepandan, kan nou aplik sa lareg “en zour pour en lannen” avek profesi Danyel e nou kont 2,520 lannen apartir lannen 607 A.N.L., nou ariv 1914 N.L.—Nonm 14:34; Ezekyel 4:6.

18. Ki Zezi ti fer zis apre ki i ti resevwar pouvwar rwayal, e ki mannyer sa ti afekte later?

^{18 E}ski Zezi ti konmans rennyen dan lesyel, sa letan? Bann rezon biblik pour konfirm sa, pou ganny diskite dan sapit swivan. Natirelman, konmansman dominasyon Zezi pa ti pou marke par lape imedya lo later. Revelasyon 12:7-12 i montre ki zis apre ki i ti pou resevwar sa Rwayonm, Zezi ti pou retir Satan ek bann lanz demon dan lesyel. Sa ti pou anmenn maler lo later me i rekonfortan pour aprann ki Dyab i annan zis “en pti pe letan.” Byento nou pou rezwir, pa selman akoz Rwayonm Bondye i dominen me osi akoz i pou anmenn bann benediksyon pour later e pour bann imen obeisan. (Psonm 72:7, 8) Ki mannyer nou konnen ki sa pou arive byento?

[Not anba lo paz]

TESTE OU KONNESANS

Kisisa Rwayonm Bondye, e apartir kote i egzers son dominasyon?

Lekel ki rennyen dan sa Rwayonm, e lekel son bann size?

Konman ki Zeova in asir nou ki son Rwayonm i en realite?

Kan ‘letan fikse bann nasyon’ ti konmanse e terminen?

[Bwat lo paz 94]

SERTEN LEVENNMAN ENPORTAN KI RELYE AVEK RWAYONM BONDYE

• Zeova i anons son plan pour prodwir en “semans” ki ti pou ekraz latet sa Serpan, Satan Dyab.—Zenez 3:15.

• An 1943 A.N.L., Zeova i endike ki sa “semans” ti pou en imen dan desandans Abraam.—Zenez 12:1-3, 7; 22:18.

• Lalyans Lalwa ki ti ganny donnen avek Izrael an 1513 A.N.L., i “en lonbraz bann bon keksoz ki pe vini.”—Egzod 24:6-8; Ebre 10:1.

• Rwayonm teres Izrael, i konmanse an 1117 A.N.L. e i prolonz dan laliny David.—1 Samyel 11:15; 2 Samyel 7:8, 16.

• Zerizalenm i ganny detrir an 607 A.N.L., e ‘letan fikse bann nasyon’ i konmanse.—2 Lerwa 25:8-10, 25, 26; Lik 21:24.

• Lannen 29 N.L., Zezi i ganny swazir pour vin Lerwa apwente par Bondye e i antreprann son minister lo later.—Matye 3:16, 17; 4:17; 21:9-11.

• Lannen 33 N.L., Zezi i mont osyel e la i espere dan kote drwat son papa ziska ki son renny i konmanse.—Akt 5:30, 31; Ebre 10:12, 13.

• Zezi i ganny entronize dan Rwayonm seles an 1914 N.L., lannen kot ‘letan fikse bann nasyon’ i terminen.—Revelasyon 11:15.

• Satan ek son bann demon i ganny zete dan zalantour later e sa i ogmant maler pour limanite.—Revelasyon 12:9-12.

• Zezi i diriz predikasyon sa bon nouvel lo Rwayonm Bondye dan lemonn antye.—Matye 24:14; 28:19, 20.