Lekel Bondye?

1, 2. Ki kestyon dimoun i kontan demande?

BANN zanfan i kontan demann en ta kestyon. Ou eksplik zot me kantmenm sa zot demann ou, ‘Akoz?’ Menm si ou reponn zot, zot demann ou ankor, ‘Me akoz?’

² Nenport ki laz ki nou’n arive, nou tou nou demann kestyon. Petet nou kestyon i konsernan ki nou pou manze, ki nou pou mete, ki nou pou aste oubyen ki nou pou fer. Serten i annan bann kestyon enportan konsernan lavi ek lavenir. Me ler nou pa ganny en bon larepons, petet nou zis aret demann kestyon.

 3. Akoz bokou dimoun i krwar ki zot pa kapab trouv larepons bann kestyon enportan?

³ Eski ou krwar ki nou kapab trouv larepons bann kestyon enportan dan Labib? Serten i dir i posib me zot krwar ki i difisil pour konpran Labib. Zot krwar ki zis bann ansenyan oubyen bann pret ki kapab konn larepons. Tandis ki lezot i kanmi pour admet ki zot pa konn larepons. Me ou, ki ou panse?

4, 5. Ki kestyon enportan ou’n deza demann ou lekor? Akoz ou devret kontinyen rod larepons?

⁴ Petet ou’n deza demann ou lekor sa bann kestyon swivan: Akoz mon la lo later? Kot mon pou ale ler mon mor? Akoz nou soufer? Ki mannyer Bondye i ete? Zezi ti dir: “Kontinyen demande e zot pou gannyen, kontinyen rode e zot pou trouve, kontinyen tap laport e i pou ouver.” (Matye 7:7) Alor pa zanmen aret demann kestyon ziska ki ou trouv bann larepons ki fer sans.

⁵ Ou kapab asire ki si ou “kontinyen rode,” ou pou kapab trouv larepons ou bann kestyon dan Labib. (Proverb 2:1-5) I pa tro difisil pour konpran sa ki Labib i dir. Deplis, sa ki ou aprann pou ed ou viv en lavi pli ere la konmela e donn ou en zoli lespwar pour lavenir. Aprezan, annou koz lo en kestyon ki bokou dimoun i demann zot lekor.

 6. Akoz serten dimoun i krwar ki Bondye pa enterese avek zot soufrans?

⁶ Serten dimoun i krwar ki Bondye pa enterese avek nou. Zot dir sa akoz zot krwar ki si Bondye ti vreman enterese avek nou, lemonn ti pou konpletman diferan. I ti pou napa lager, laenn ek maler. Dimoun pa ti pou tonm malad, soufer en kantite e apre mor. Alor, ou kapab demande, ‘Si Bondye i enterese avek nou, akoz i pa anpes nou soufer?’

 7. (a) Dan ki sans serten sef relizye i ansenny dimoun ki Bondye pa kontan zot? (b) Akoz nou kapab asire ki Bondye pa responsab pour bann move keksoz ki arive?

⁷ Dan en sans osi, serten sef relizye i fer dimoun krwar ki Bondye pa kontan nou. Ler en maler i arive, zot dir ki i lavolonte Bondye, ki sanmenm sa ki Bondye ti oule. Me ler zot dir sa, i konmsi zot pe blanm Bondye. Par kont, Labib i montre nou ki Bondye pa zanmen fer sa ki mal. Zak 1:13 i dir nou ki Bondye pa zanmen fer nou soufer pour teste nou. I dir: “Personn pa devret dir ler i pas dan leprev: ‘Bondye ki pe teste mwan.’ Parski Bondye pa kapab ganny teste par sa ki mal e li menm i pa teste personn par sa ki mal.” Sa i vedir ki Bondye pa fer sa bann move keksoz arive menm si i pa anpes zot arive. (Lir Zob 34:10-12.) Annou pran en legzanp.

8, 9. Akoz i mal pour blanm Bondye pour nou bann problenm? Donn en legzanp.

⁸ Fer krwar en garson i reste avek son paran. Son papa i kontan li en kantite e i’n montre li ki mannyer pour fer bann bon desizyon. Me pli tar, sa garson i rebel kont son papa e kit lakour. I fer bann move keksoz e i tonm dan problenm. Eski ou ti pou blanm son papa pour sa ki’n arive akoz i pa’n anpes son garson kit lakour? Me non. (Lik 15:11-13) Parey sa papa, Bondye pa ti anpes bann imen rebel e fer sa ki mal. Alor ler en move keksoz i arive, toultan mazinen ki i mal pour blanm Bondye, akoz pa li ki responsab.

⁹ I annan en bon rezon akoz Bondye i ankor pe les bann move keksoz arive. Dan Sapit 11, ou pou aprann ki Labib i dir lo la. Me ou kapab asire ki Bondye i kontan nou e ki i pa devret zanmen ganny blanmen pour nou bann problenm. Anfet, zis Li ki kapab rezourd nou bann problenm.​—Izai 33:2.

10. Akoz nou kapab asire ki Bondye pou repar tou sa domaz ki bann move dimoun in fer?

¹⁰ Nou asire ki Bondye i anvi ed nou akoz i sen. (Izai 6:3) Tou sa ki i fer i pir, prop e bon. Alor nou kapab annan konfyans dan li. Bondye pa parey bann imen. Par ler bann imen i fer sa ki mal. Menm sa pli bon dirizan napa sa pouvwar pour repar tou sa domaz ki bann move dimoun in fer. Napa personn ki annan menm kantite pouvwar ki Bondye. Alor i kapab repar tou sa domaz ki bann move dimoun in fer e i pou fer li. I pou retir tou lemal pour touzour.​—Lir Psonm 37:9-11.

11. Ki mannyer Bondye i santi konsernan ou soufrans?

¹¹ Ki mannyer Bondye i santi ler i vwar tou sa ki pe arive dan lemonn e tou sa difikilte ki ou pe rankontre? Labib i dir ki Bondye “i kontan lazistis.” (Psonm 37:28) Alor, sa ki byen e sa ki mal i annan bokou lenportans pour li. I pa kontan vwar dimoun pe soufer. Labib i dir ki “i ti aflize” oubyen ki son leker ti fermal ler i ti vwar lemonn ranpli avek lemal. (Zenez 6:5, 6) Bondye pa’n sanze. (Malaki 3:6) Labib i dir ki Bondye i vreman enterese avek ou.​—Lir 1 Pyer 5:7.

12, 13. (a) Akoz nou annan lanmour e enterese avek lezot? Ki mannyer ou santi ler ou vwar tou sa soufrans dan lemonn? (b) Akoz nou kapab asire ki Bondye pou met en lafen avek tou soufrans ek lenzistis?

¹² Labib i osi dir ki Bondye in kree nou dan son resanblans. (Zenez 1:26) Sa i vedir ki Bondye in fer nou avek bann zoli kalite ki li osi i annan. Alor si ou leker i fermal ler ou vwar bann dimoun inosan pe soufer, sa i vedir ki leker Bondye i pli fermal ankor ler li i vwar sa! Ki mannyer nou konn sa?

¹³ Labib i dir ki “Bondye i lanmour.” (1 Zan 4:8) Tou sa ki Bondye i fer se akoz i kontan nou. Alor nou annan lanmour parski Bondye i annan lanmour. Mazin sa: Si ou ti kapab met en lafen avek tou soufrans ek lenzistis dan lemonn, eski ou ti pou fer li? Byensir, akoz ou kontan bann dimoun. Me Bondye? I pwisan e i kontan nou, alor i pou met en lafen avek tou soufrans ek lenzistis. Ou kapab asire ki tou sa bann promes Bondye ki nou’n koz lo la o konmansman sa liv pou vin vre! Me pour ou kapab krwar ki sa bann promes pou vin vre, ou bezwen konn plis lo Bondye.

14. Ki mannyer Bondye i apele e ki mannyer nou konnen ki nou devret servi son non?

¹⁴ Meton ou anvi vin zanmi avek en dimoun, pa ou ti pou bezwen konn son non? Pa li osi i ti pou bezwen konn ou non? Eski Bondye i annan en non? Bokou larelizyon i dir ki son non i Bondye oubyen Senyer me sa pa bann non. Zot zis bann tit, parey “prezidan” ouswa “dokter.” Bondye in dir nou ki i apel Zeova. Psonm 83:18 (New World Translation, NWT) i dir: “Dimoun i devret konnen ki ou, ki apel Zeova, zis ou tousel ki Tre O lo later antye.” Bann dimoun ki ti ekri Labib ti servi non Bondye plizyer milye fwa. Zeova i anvi ki ou konn e servi son non. I dir ou son non pour ki ou kapab vin son zanmi.

15. Ki sa non Zeova i vedir?

¹⁵ Non Bondye, setadir Zeova, i annan en gran sinifikasyon. I vedir ki Bondye i kapab akonpli son plan ek tou son bann promes. Napa nanryen ki pou kapab anpes li fer sa. Pour sa rezon, zis Zeova ki kapab annan sa non.a

16, 17. Eksplike ki savedir Bondye i (a) “Tou Pwisan.” (b) “Lerwa leternite.” (c) “Kreater.”

¹⁶ Dan Psonm 83:18, sa menm verse ki nou’n site pli boner, i dir sa lo Zeova: “Zis ou tousel ki Tre O.” An plis ki sa, Revelasyon 15:3 i dir: “Sa ki ou’n fer i gran e merveye, Zeova, Bondye Tou Pwisan. Ou ki Lerwa leternite, tou ou bann aksyon i drwat e vre.” Ki sa tit “Tou Pwisan” i vedir? I vedir ki Zeova i pli for ki tou. Sa tit “Lerwa leternite” i vedir ki Zeova in toultan egziste. Psonm 90:2 i eksplike ki i’n touzour egziste e i pou touzour egziste. Pa sa i enkrwayab!

¹⁷ I annan zis en Kreater, Zeova. Revelasyon 4:11 i dir: “Zeova nou Bondye, ou merit laglwar, loner ek pwisans, parski ou’n kree tou keksoz e akoz ou lavolonte, zot in vin an egzistans e zot in ganny kree.” Zis mazinen, Zeova in kree tou keksoz ki egziste, bann lanz, bann zetwal, bann fri ek bann pwason.

18. Akoz serten dimoun i krwar ki zot pa pou zanmen kapab vin zanmi Zeova? Ki Labib i dir lo la?

¹⁸ Ler serten dimoun i lir konsernan bann kalite ekstraordiner Bondye, zot per e zot dir, ‘Bondye i sitan for e bokou pli siperyer ki mwan, akoz i pou enterese avek mwan?’ Me eski se koumsa ki Bondye i anvi nou santi? Non, o kontrer Zeova i oule vin pros avek nou. Labib i dir ki “i pa lwen avek sakenn ant nou.” (Akt 17:27) Bondye i oule ki ou vin pros avek li e i promet ki an retour “i pou vin pros avek” ou.​—Zak 4:8.

19. (a) Ki mannyer ou kapab vin zanmi Bondye? (b) Ki kalite dan Zeova ki ou pli kontan?

¹⁹ Ki mannyer ou kapab vin zanmi Bondye? Zezi ti dir: “Pour ganny lavi eternel, zot bezwen aprann konn ou, sa sel vre Bondye e sa enn ki ou’n anvoye Zezi Kri.” (Zan 17:3) Kontinyen aprann e ou pou arive konn Zeova ek Zezi. Alor, ou pou kapab ganny lavi eternel. Par egzanp, ou’n aprann ki “Bondye i lanmour.” (1 Zan 4:16) Me Bondye i annan ankor lezot zoli kalite. Labib i dir ki Zeova i ‘annan pitye ek konpasyon, i pa ankoler vitman e i annan en kantite lanmour fidel e i toultan koz laverite.’ (Egzod 34:6, NWT) Zeova i ‘bon e i pare pour pardonnen.’ (Psonm 86:5) Bondye i pasyan e fidel. (2 Pyer 3:9; Revelasyon 15:4) Ler ou lir Labib, ou pou aprann bokou plis lo son bann zoli kalite.

20-22. (a) Ki mannyer nou kapab santi nou pros avek Zeova menm si nou pa kapab vwar li? (b) Ki ou devret fer si lezot i oule ki ou aret etidye Labib?

²⁰ Ki mannyer ou kapab vin pros avek Bondye menm si ou pa kapab vwar li? (Zan 1:18; 4:24; 1 Timote 1:17) Ler ou lir Labib, ou aprann konn Zeova e i pou vin reel pour ou. (Psonm 27:4; Romen 1:20) Pli ou aprann konn Zeova, pli ou pou kontan li e pli ou pou santi ou pros avek li.

²¹ Avek letan, ou pou arive konpran akoz Labib i dir ki Zeova i nou Papa. (Matye 6:9) Li ki’n donn nou lavi e i anvi ki nou annan sa pli bon lavi posib. Pa sanmenm sa ki en papa i anvi pour son zanfan akoz i kontan zot! (Psonm 36:9) Labib i montre ki nou kapab vin zanmi Zeova. (Zak 2:23) Zis mazin sa: Zeova, Kreater liniver, i anvi ki ou, ou vin son zanmi!

²² Petet serten dimoun pou anvi ki ou aret etidye Labib avek Temwen Zeova. Kekfwa akoz zot per ki ou pou sanz ou larelizyon. Me pa les personn anpes ou vin zanmi avek Zeova. Zeova i sa pli bon Zanmi ki ou kapab annan.

23, 24. (a) Akoz ou devret kontinyen demann kestyon? (b) Ki nou pou diskite dan Sapit 2?

²³ Ler ou etidye Labib, i pou annan serten keksoz ki ou pa tro tro konpran. Pa bezwen kanmi pour demann kestyon oubyen rod led. Zezi ti dir ki nou devret annan limilite parey bann zanfan. (Matye 18:2-4) Nou konn tre byen ki bann zanfan i demann en ta kestyon. Bondye i anvi ki ou konn larepons. Alor byen etidye Labib pour fer sir ki sa ki ou pe aprann i laverite.​—Lir Akt 17:11.

²⁴ Sa pli bon fason pour aprann konn Zeova se par etidye Labib. Dan Sapit 2, nou pou aprann akoz Labib i diferan avek tou lezot liv.