Apros avek Bondye

I demontre loner anver nou par donn nou liberte pour swazir

2 LERWA 18:1-7

PARAN i sipoze demontre en bon legzanp pour zot zanfan. Paran ki annan en bon lenfliyans lo son zanfan i kapab ed li pour devlop bann kalite ki annan bokou valer e pour pran bann bon desizyon dan lavi. Malerezman, i annan bokou paran ki les en move legzanp pour zot zanfan. Eski sa i vedir ki sa bann zanfan pa pou reisi dan lavi? Zeova i demontre loner anver nou par donn sakenn de nou liberte pour swazir. Sa i sir e vre. Annou egzamin legzanp Izkiya ki ganny trouve dan 2 Lerwa 18:1-7.

Izkiya ti “garson Aaz lerwa Zida.” (Verse 1) Aaz ti fer son pep vir ledo kont vre ladorasyon. Sa move lerwa ti ador Baal e sa kalite ladorasyon ti enkli fer sakrifis imen. I ti menm touy enn oubyen plizyer frer Izkiya. Aaz ti ferm laport tanp e i ti “fer bann lotel pour li dan tou kwen Zerizalenm.” I “ti ofans Zeova.” (2 Kronik 28:3, 24, 25) I kler ki papa Izkiya ti vreman pa bon. Me eski Izkiya ti pou kapab evite fer menm fot parey son papa?

Apre ki Izkiya ti ranplas son papa lo tronn, i ti montre ki i pa ti pou les sa move legzanp ki son papa ti’n lese determinen ki kalite dimoun i ti pou vini. Izkiya “ti kontinyen fer sa ki ti byen dan lizye Zeova.” (Verse 3) Izkiya ti met son konfyans dan Zeova e “ti napa personn parey li parmi tou bann lerwa Zida.” (Verse 5) Pandan premye lannen son renny, sa zenn lerwa ti konmans en kanpanny spirityel. I ti retir tou sa bann oter kot bann zidol payen ti ganny adore. I ti reouver tanp e vre ladorasyon ti reganny met an plas. (Verse 4; 2 Kronik 29:1-3, 27-31) Izkiya ti “reste atase avek Zeova . . . , e Zeova ti montre ki i ti avek li.”—Verse 6, 7.

Kwa ki ti ed Izkiya pour pa swiv move legzanp son papa? Nou pa konn bokou lo manman Izkiya, Abiya. Me eski i posib ki son manman ti annan en bon lenfliyans lo son garson? Eski legzanp Izai, ki ti konmans profetize avan ki Izkiya ti ne, ti annan en bon lenfliyans lo sa zenn prens?a Labib pa dir. Me sa ki nou konnen se ki Izkiya ti swazir pour viv en lavi ki ti vreman diferan avek sa ki pour son papa.

Legzanp Izkiya i ankourazan pour tou bann ki’n annan en lanfans difisil akoz zot paran pa’n demontre en bon legzanp. Nou pa kapab sanz sa ki’n pase; nou pa kapab efas bann move keksoz ki nou’n eksperyanse. Me sa pa vedir ki nou pa pou zanmen reisi. Nou kapab fer bann swa ozordi ki pou kapab fer nou ganny en lavenir ere. Nou kapab swazir pour kontan e fer plezir sa vre Bondye, Zeova, parey Izkiya ti fer. Sa desizyon pou fer nou ganny en lavi satisfezan la konmela, e nou pou kapab ganny lavi eternel dan nouvo lemonn Bondye. (2 Pyer 3:13; Revelasyon 21:3, 4) Nou merit annan bokou rekonesans pour Zeova ki’n donn nou sa zoli kado, setadir liberte pour swazir!

[Not anba lo paz]