Kontinyen servi Zeova avek tou ou leker

“Mon garson, aprann konn Bondye ou papa e servi li avek tou ou leker.”​—1 KRON. 28:9.

ROD LAREPONS SA BANN KESTYON:

Kwa sa leker senbolik?

Ki nou kapab fer pour egzamin nou leker?

Ki mannyer nou kapab kontinyen servi Zeova avek tou nou leker?

1, 2. (a) Ki parti lekor ki Parol Bondye i souvan refer avek dan en sans senbolik plis ki lezot parti lekor? (b) Akoz i vreman enportan ki nou konpran ki leker i reprezante dan Labib?

PAROL BONDYE i souvan refer avek bann parti lekor dan en sans senbolik. Par egzanp, Zob ti dir: “Mon pa’n fer nanryen vyolan avek mon lanmen.” Lerwa Salomon ti dir: “En bon rapor i fer lezo gra.” Zeova ti asir Ezekyel: “Mon’n fer ou fron vin . . . pli dir ki en ros.” Zapot Pyer ti dir sa lo Bondye: “Son zorey i ouver pour ekout zot lapriyer.”​—Zob 16:17; Prov. 15:30; Ezek. 3:9; 1 Pyer 3:12.

² Me, i annan en parti lekor ki Labib i souvan refer avek dan en sans senbolik plis ki okenn lezot parti lekor. I sa parti lekor ki ganny mansyonnen dan lapriyer Ana, en madanm fidel: “Mon leker i dan en gran lazwa akoz Zeova.” (1 Sam. 2:1) Anfet, bann ekriven Labib i servi sa mo leker apepre mil fwa e preski toultan, dan en sans senbolik. I vreman enportan ki nou konpran ki “leker” i reprezante akoz Labib i dir ki nou devret protez li.​—Lir Proverb 4:23.a

KWA SA LEKER SENBOLIK?

 3. Ki mannyer nou kapab konpran ki sa mo “leker” i reprezante dan Labib? Donn legzanp.

³ Menm si Labib pa donn en definisyon presi pour sa mo “leker,” i ed nou pour konpran son sinifikasyon. Dan ki sans? Pour donn en legzanp, mazin en zoli mozaik ki’n ganny fer avek en ta pti bout seramik. Si ou get sa mozaik dan lwen, ou pou remarke ki tou sa bann pti bout seramik ansanm i form en zoli portre. Pareyman, si nou pran letan pour get tou bann verse Labib kot sa mo “leker” i ganny servi, nou pou konpran ki tou sa bann verse ansanm i form en portre. Ki portre?

 4. (a) Ki sa mo “leker” i reprezante dan Labib? (b) Ki sinifikasyon parol Zezi dan Matye 22:37?

⁴ Bann ekriven Labib ti servi sa mo “leker” pour dekrir tou sa ki en dimoun i ete anndan. I anglob bann laspe parey son dezir, panse, personnalite, latitid, abilite, motivasyon ek lobzektif. (Lir Deterononm 15:7; Proverb 16:9b; Akt 2:26.) Dapre en referans, “leker” i enplik tou laspe dan en dimoun. Par kont, dan serten ka, sa mo “leker” i annan en sans pli spesifik. Par egzanp, Zezi ti dir: “Kontan Senyer ou Bondye avek tou ou leker, avek tou ou lam, e avek tou ou lespri.” (Mat. 22:37) Dan sa konteks, “leker” pe refer avek lemosyon, dezir ek santiman sa dimoun ki nou ete anndan. Dan sa verse, Zezi ti mansyonn leker, nanm ek lespri separeman akoz i ti oule met lanfaz lo lefet ki nou bezwen eksprim nou lanmour pour Zeova avek nou santiman e osi atraver nou fason viv ek nou lentelizans. (Zan 17:3; Efe. 6:6) Me kan sa mo “leker” i ganny servi tousel, i pe refer avek tou laspe dan en dimoun.

AKFER PROTEZ NOU LEKER

 5. Akoz nou anvi fer tou pour servi Zeova avek tou nou leker?

⁵ An rapor avek leker, Lerwa David ti rapel Salomon: “Mon garson, aprann konn Bondye ou papa e servi li avek tou ou leker e avek lazwa; parski Zeova pe egzamin tou leker, e i konn tou panse ek lentansyon.” (1 Kron. 28:9) Vreman, Zeova i sa Enn ki egzamin leker tou dimoun, enkli pour nou osi. (Prov. 17:3; 21:2) Sa ki i vwar dan nou leker i annan en gro lenpak lo nou relasyon avek li e lo nou lavenir. Alor, nou annan bon rezon pour swiv konsey David par fer nou mye pour servi Zeova avek tou nou leker.

 6. Ki nou devret rekonnet an rapor avek nou determinasyon pour servi Zeova?

⁶ Bann aktivite ki nou fer avek devouman pour Zeova i montre si nou vreman annan en gran dezir pour servi li avek tou nou leker. An menm tan, nou rekonnet presyon ki lemonn Satan i met lo nou e nou tandans enparfe i kapab enfliyans nou en kantite e anpes nou servi Zeova avek tou nou leker. (Zer. 17:9; Efe. 2:2) Alor, pour vwar si nou determinasyon pour servi Zeova pa pe afeblir, andotmo ki nou pe reste vizilan, nou bezwen kontinyelman egzamin nou leker o profon. Ki mannyer nou kapab fer sa?

 7. Kwa ki montre sa ki dan nou leker?

⁷ Zis parey leker en pye dibwa, nou personnalite ouswa sa ki nou ete anndan, personn pa trouve. Me, parey Zezi ti dir dan son Sermon lo Montanny, pour kapab konn kondisyon en pye dibwa, fodre nou get son fri. Dan sa menm fason, tou sa ki nou fer i montre klerman sa ki vreman dan nou leker. (Mat. 7:17-20) Annou vwar en legzanp ki demontre sa.

EN BON FASON POUR EGZAMIN LEKER

 8. Ki mannyer parol Zezi dan Matye 6:33 i relye avek sa ki dan nou leker?

⁸ Pli boner dan sanmenm sa sermon, Zezi ti dir son lodyans ki zot devret fer pour demontre ki zot annan sa dezir pour servi Zeova avek tou zot leker. I ti dir: “Rod plito Rwayonm Bondye ek son lazistis, e limenm i a donn zot anplis tou lezot keksoz osi.” (Mat. 6:33, nou ki’n met an italik.) Atraver sa ki nou met premye dan nou lavi, nou montre ki kalite lanvi, panse ek lobzektif i annan dan nou leker. En bon fason pour vwar si nou pe servi Bondye avek tou nou leker se par egzamin nou priyorite dan lavi.

 9. Ki Zezi ti envit serten dimoun pour fer e ki zot reaksyon ti montre?

⁹ Zis apre ki Zezi ti’n dir son bann disip “rod plito Rwayonm Bondye,” en lensidan ti arive ki montre ki sa ki en dimoun i met premye dan son lavi, sanmenm sa ki dan son leker. Lik ti entrodwir sa ki ti arive an dizan ki Zezi ti “[“determinen pour,” NW] al Zerizalenm,” menm si i ti konnen ki ti pou ariv li laba. Ler i ti “pe ale” lo semen Zerizalenm avek son bann zapot, Zezi ti zwenn bann zonm e i ti dir zot: “Swiv mwan.” Sa bann zonm ti pare pour aksepte lenvitasyon Zezi, me lo serten kondisyon. Enn sa zonm ti dir: “Les mwan al anter mon papa avan.” En lot ti dir: “Mon pou swiv ou, me les mwan al dir orevwar bann ki dan lakour [“avan,” NW].” (Lik 9:51, 57-61, nou ki’n met an italik.) Pa i annan en gran diferans ant determinasyon Zezi pour servi Bondye avek tou son leker ek sa bann zonm ki ti pare pour servi Bondye lo en serten kondisyon. Lefet ki zot ti pe met sa ki ti enportan pour zot premye plito ki Rwayonm Bondye, zot ti pe montre ki zot leker pa ti tou pour Bondye.

10. (a) Ki mannyer bann disip Kris in reazir anver lenvitasyon Zezi? (b) Ki legzanp Zezi ti servi?

¹⁰ Kontrerman avek sa bann dimoun ki ti’n kapab vin disip Zezi, nou nou’n aksepte lenvitasyon Zezi pour vin son disip e aprezan nou pe servi Zeova tou le zour. Dan sa fason, nou demontre nou santiman anver Zeova. Pourtan, menm si nou vreman aktif dan kongregasyon, nou bezwen konnen ki i annan en danze ki kapab afekte nou leker. Ki sa danze? Dan sa menm konversasyon avek sa bann zonm, Zezi ti revel sa danze an dizan: “Nenport ki ki konmans travay e get deryer li, i pa bon pour Rwayonm Bondye.” (Lik 9:62) Ki leson nou tire avek sa legzanp?

ESKI NOU “RESTE ATASE AVEK SA KI BYEN”?

11. Ki ti arive avek travay sa fermye dan legzanp Zezi e akoz?

¹¹ Pour arive pli byen konpran sa legzanp ki Zezi ti servi, annou azout detrwa pti detay. Meton en fermye pe labour later. Anmezir i pe fer son louvraz, i pe toultan mazin son lakour kot i annan son fanmir, zanmi, manze, lanmizik, lanmizman ek lonbraz. I vreman anvi sa bann keksoz. Apre ki i’n travay lo en bon pti bout later, sa fermye i santi en lanvi enkrwayab pour sa bann keksoz e en sel kou i vire e “get deryer li.” Menm si i annan ankor bokou pour fer dan plantasyon, sa fermye pe ganny distrer e sa i annan en move lefe lo son travay. Sirman propriyeter sa later pou dezapwente akoz sa fermye pa’n persevere.

12. Ki mannyer en Kretyen dan nou letan ti kapab vin parey sa zonm ki pe labour en plantasyon?

¹² Annou aprezan egzamin en legzanp modern ki en pe parey sityasyon sa fermye. Sa fermye i kapab pe reprezant en Kretyen ki paret pe fer byen dan laverite, me ki an realite son spirityalite i an danze. Meton en frer i asiste tou son renyon e partisip regilyerman dan predikasyon. Prezan, fer konmsi i kontinyelman mazin lo serten fason viv sa lemonn ki i vwar atiran e dan son leker i vreman anvi viv parey zot. Avek letan, menm si i’n servi Bondye pour plizyer lannen, son dezir pour bann keksoz lemonn i kapab sitan for ki i vire e “get deryer li.” Menm si i ankor annan bokou louvraz pour fer dan minister, i pa pe kontinyen ‘atas for avek parol lavi’ e son devouman dan predikasyon i diminyen. (Fili. 2:16) Zeova, “Propriyeter rekolt” i sagren ler i vwar en dimoun koumsa ki napa ase landirans.​—Lik 10:2.

13. Servi Bondye avek tou nou leker i enplik kwa?

¹³ Leson i kler. I byen si nou pe partisip regilyerman dan bann bon aktivite parey asiste renyon e partisip dan predikasyon. Me selman, servi Zeova avek tou nou leker i enplik bokou plis ki sa. (2 Kron. 25:1, 2, 27) Si dan fon son leker, en Kretyen pe kontinyen kontan bann keksoz ki “deryer,” andotmo fason viv sa lemonn, i pros pou perdi laprouvasyon Bondye. (Lik 17:32) Si nou vreman “deteste sa ki mal e reste atase avek sa ki byen,” nou pou “bon pour Rwayonm Bondye.” (Rom. 12:9; Lik 9:62) Alor, nou tou nou devret fer sir ki napa nanryen dan lemonn Satan ki pou anpes nou servi Zeova avek tou nou leker ki swa sa lemonn i gou ouswa itil.​—2 Kor. 11:14; lir Filipyen 3:13, 14.

RESTE VIZILAN!

14, 15. (a) Dan ki fason Satan pe esey enfliyans nou leker? (b) Donn legzanp pour montre kwa ki fer bann taktik Satan sitan danzere.

¹⁴ Lanmour pour Zeova ki ti motiv nou pour dedye nou lavi avek li. Depi sa e pour plizyer lannen, bokou nou in determinen pour servi Zeova avek tou nou leker. Toudmenm, sa pa vedir ki Satan in fini avek nou. I ankor pe target en keksoz. Ou konnen kwa? Nou leker. (Efe. 6:12) Byensir, Satan i konnen ki kekfwa i pa pou fasil pour nou kit Zeova en sel kou. Pour sa rezon, i servi sa lemonn pour anbet nou e dousman dousman nou devouman pour Bondye i afebli. (Lir Mark 4:18, 19.) Akoz sa taktik Satan i mars sitan byen?

¹⁵ Pour konn larepons, annou pran en legzanp. Fer konmsi ou pe lir en liv anba en lalimyer ki son glob i 100 wat me apre sa glob i brile. En sel kou, partou i fernwanr e deswit ou konnen ki glob in brile, alor ou sanz li. Lalimyer i ekler sa lasanm ankor en kou. Son lannmen, ou servi sa menm lalimyer pour ou lir. Selman, san ki ou’n remarke, en dimoun in ranplas sa glob 100 wat avek enn 95 wat. Eski ou ti pou remark diferans? Manke non. Meton son lannmen en dimoun i sanz sa glob ankor e i met enn ki 90 wat prezan. Tre probab ou pa pou remarke menm. Akoz? Parski sa laklerte in ganny redwir gradyelman. Pareyman, sa lemonn Satan i kapab fer nou perdi nou devouman ptitapti. Si sa i arive, i pou konmsi Satan in reisi diminyen nou devouman dan servis Zeova ki ti parey sa glob 100 wat. Si i pa vizilan, en Kretyen i kapab menm pa remark sa sanzman ki pe arive ptitapti.​—Mat. 24:42; 1 Pyer 5:8.

LAPRIYER I VREMAN ENPORTAN

16. Ki mannyer nou kapab reziste bann taktik Satan?

¹⁶ Ki mannyer nou kapab reziste kont bann taktik Dyab e servi Zeova avek tou nou leker? (2 Kor. 2:11) Lapriyer i vreman enportan. Pol ti ankouraz bann Kretyen pour “reziste kont tou bann riz Dyab.” Apre i ti dir: “Fer tousala dan lapriyer an sipliyan Bondye pour son led. Priye dan tou sirkonstans.”​—Efe. 6:11, 18; 1 Pyer 4:7.

17. Ki leson nou aprann atraver lapriyer Zezi?

¹⁷ Pour arive reziste Satan, i byen pour nou imit latitid Zezi an rapor avek lapriyer. I ti vreman anvi kontinyen servi Zeova avek tou son leker. Remark par egzanp sa ki Lik ti dir lo lafason ki Zezi ti priye sa zour swar avan son lanmor. I ti ekrir: “Dan son lagoni, i ti priy plis ankor [oubyen “avek plis lentansite ankor,” NW].” (Lik 22:44) Zezi ti priy bokou oparavan, me sa zour, akoz i ti pe al fer fas avek pli gro tes dan son lavi, i ti priy avek “plis lentansite ankor” e Bondye ti reponn son lapriyer. Legzanp Zezi i montre ki lapriyer i annan diferan degre lentansite. Pli nou rankontre bann leprev difisil e fer fas avek bann taktik Satan, pli nou devret priy Zeova avek “plis lentansite.”

18. (a) Ki nou devret demann nou lekor konsernan lapriyer ek akoz? (b) Ki bann fakter ki kapab annan en lefe lo nou leker e dan ki fason? (Vwar bwat lo paz 22.)

¹⁸ Ki lefe bann lapriyer koumsa i kapab annan lo nou? Pol ti dir: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker.” (Fili. 4:6, 7, nou ki’n met an italik.) Wi, nou bezwen priy souvan e avek lentansite si nou anvi servi Zeova avek tou nou leker. (Lik 6:12) Alor, demann ou lekor: ‘Eski mon priy regilyerman e avek lentansite?’ (Mat. 7:7; Rom. 12:12) Larepons sa kestyon pou montre si ou annan sa dezir senser pour servi Bondye.

19. Ki ou determinen pour fer pour kontinyen servi Zeova avek tou ou leker?

¹⁹ Parey nou’n vwar, sa ki nou met premye dan nou lavi i kapab revel bokou lo nou leker. Nou anvi fer sir ki ni bann keksoz ki nou’n kit deryer, ni bann taktik Satan pa pou diminyen nou determinasyon pour servi Zeova avek tou nou leker. (Lir Lik 21:19, 34-36.) Alor, parey David, annou kontinyen sipliy Zeova pour ‘inifye nou leker.’​—Ps. 86:11.

[Not anba lo paz]

[Portre lo paz 22]

TRWA FAKTER KI ANNAN LEFE LO NOU LEKER

Zis parey nou pran prekosyon pour pran swen avek nou leker, nou devret pran prekosyon pour gard nou leker senbolik an bonn sante. Egzamin sa trwa fakter:

1 Nouritir: Nou bezwen manz bann manze nourisan pour ki nou leker i reste an bonn sante. Pareyman, nou bezwen fer sir ki nou ganny ase nouritir spirityel solid atraver letid personnel, meditasyon e asiste renyon.​—Ps. 1:1, 2; Prov. 15:28; Ebr. 10:24, 25.

2 Legzersis: Pour reste an bonn sante, nou leker parler i bezwen bat vit. Pareyman, partisip dan predikasyon avek devouman, petet par fer plis dan nou minister, i kapab kit nou leker senbolik an bonn sante.​—Lik 13:24; Fili. 3:12.

3 Lanvironnman: Sa move lanvironnman ki nou bezwen travay e viv ladan i kapab met nou leker senbolik e literal anba en kantite presyon. Me, nou kapab redwir sa presyon si nou asosye pli souvan posib avek nou bann konpanyon Kretyen ki vreman enterese avek nou e ki servi Bondye avek tou zot leker. ​—Ps. 119:63; Prov. 13:20.