Juan

8 12 Cheʼ jiñi Jesús tsiʼ chaʼ pejcayob. Tsiʼ yʌlʌ: «Joñon jiñi i sʌclel pañimil. Jiñi muʼ bʌ i tsajcañon maʼañic baʼ ora miʼ cajel ti xʌmbal baqui icʼyochʼan, mi caj i taj jiñi sʌclel muʼ bʌ i yʌcʼ cuxtʌlel». 13 Jin chaʼan jiñi fariseojob tiʼ subeyob: «Woli a bajñel acʼ a bʌ ti cʌjñel. Mach i sujmic jiñi woli bʌ a sub». 14 Jesús tsiʼ jacʼbeyob: «Anquese woli c bajñel aqʼueʼ c bʌ ti cʌjñel, i sujmʌch chuqui mic sub come cujil baqui tilemon yicʼot baqui mi caj c majlel. Pero jatetla mach laʼ wujilic baqui tilemon yicʼot baqui mi caj c majlel. 15 Jatetla mi laʼ chaʼlen meloñel cheʼ bajcheʼ i ñaʼtʌbal lac piʼʌl, joñon maʼañic majqui tiʼ tojlel mic chaʼlen meloñel. 16 I cheʼ muqʼuic c chaʼlen meloñel, jiñi c meloñel xucʼulʌch tiʼ sujmlel come mach c bajñelic, jiñi Tatʌl, jiñi tsaʼ bʌ i chocoyon tilel, an yicʼoton. 17 Cheʼ jaʼel, yaʼ ti laʼ Mandar tsʼijbubil: ‹Chuqui miʼ sub chaʼtiquil lac piʼʌl i sujmʌch›. 18 Joñoñʌch muʼ bʌ cʌcʼ c bʌ ti cʌjñel, i miʼ yʌcʼon ti cʌñol jaʼel jiñi Tatʌl, jiñi tsaʼ bʌ i chocoyon tilel». 19 Cheʼ jiñi tsiʼ cʼajtibeyob: «¿Baqui an jiñi a Tat?». Jesús tsiʼ jacʼbeyob: «Jatetla mach laʼ cʌñʌyoñic mi laʼ cʌñʌyic jiñi c Tat. Cheʼ laʼ cʌñʌyoñic, laʼ cʌñʌ c Tat jaʼel». 20 Tsiʼ yʌlʌ ili tʼan tac yaʼ baqui an jiñi caja baqui miʼ yotsʌntel taqʼuin, cheʼ bʌ woli ti cʌntesa yaʼ ti templo. Pero maʼañic majqui tsiʼ chucu come maxto cʼotemic i yorajlel.

21 Jin chaʼan tsiʼ chaʼ subeyob: «Joñon mi caj c majlel, i jatetla mi caj laʼ sʌclañon, pero mi caj laʼ chʌmel cheʼ xmulilettola. Yaʼ baqui mi caj c majlel, maʼañic mi laʼ mejlel ti majlel». 22 Jiñi judíojob tsaʼ caji i yʌlob: «Maʼañic mi caj i tsʌnsan i bʌ, ¿o mucʼʌch ba? Come woliʼ yʌl: ‹Yaʼ baqui mi caj c majlel, maʼañic mi laʼ mejlel ti majlel›». 23 Cheʼ jiñi tsiʼ yʌlʌ: «Jatetla chʼoyoletla wʌʼ ti lum, joñon tilemon ti chan. Jatetla i chaʼañetla ili pañimil, joñon mach i chaʼañoñic ili pañimil. 24 Jin chaʼan tsaʼ c subeyetla: ‹Mi caj laʼ chʌmel cheʼ xmulilettola›. Come mi maʼañic mi laʼ ñop chaʼan joñon jiñi yom bʌ miʼ tilel, mi caj laʼ chʌmel cheʼ xmulilettola». 25 Jin chaʼan tsaʼ caji i cʼajtibeñob: «Ixcu jatet, ¿majquiyet?». Jesús tsiʼ jacʼbeyob: «¿Chucochto mic pejcañetla? 26 Cabʌl chuqui yom mi cʌl ti laʼ tojlel yicʼot yom bʌ mic chaʼlen meloñel tiʼ tojlel. Tiʼ sujm, jiñi tsaʼ bʌ i chocoyon tilel xucʼul ti jiñi i sujmlel, i joñon mi cʌl ti pañimil jiñi tsaʼ tac bʌ cubi tiʼ tojlel». 27 Pero maʼañic tsiʼ ñaʼtayob chaʼan jin woliʼ tajbeñob ti tʼan jiñi Tatʌl. 28 Cheʼ jiñi Jesús tsiʼ yʌlʌ: «Cheʼ bʌ jatetla tsaʼix laʼ letsa* ti teʼ jiñi i Yalobil wiñic, mi caj laʼ ñaʼtan chaʼan joñoñʌch jiñi yom bʌ miʼ tilel yicʼot chaʼan maʼañic mic mel chuqui bajñel com, jiñi muʼ bʌ cʌl jiñʌch tsaʼ bʌ i pʌsbeyon jiñi Tatʌl. 29 I jiñi tsaʼ bʌ i chocoyon tilel añʌch yicʼoton, maʼañic bajñel cʌybil i chaʼañon come tiʼ pejtelel ora mic mel chuqui miʼ mulan». 30 Cheʼ bʌ wolito i yʌl iliyi, cabʌlob tsaʼ bʌ i ñopoyob tiʼ tojlel.

31 Cheʼ jiñi, Jesús tsaʼ caji i suben jiñi judíojob tsaʼ bʌ i ñopoyob tiʼ tojlel: «Mi mucʼʌch laʼ chʌn ajñel tij cʌntesa tac,* xcʌntʼañetla c chaʼan tiʼ sujm, 32 mi caj laʼ cʌn jiñi i sujmlel, i jiñi i sujmlel mi caj i yʌqʼuetla ti cojlel». 33 Tsiʼ jacʼbeyob: «I pʼolbalon lojon Abrahán i maʼañic baʼ ajñemon lon bajcheʼ xyaj eʼtel i chaʼan mi juntiquilic lac piʼʌl. ¿Chucoch maʼ wʌl: ‹Mi caj laʼ cojlel›?». 34 Jesús tsiʼ jacʼbeyob: «Tiʼ sujm mic subeñetla chaʼan pejtelel muʼ bʌ i chaʼlen mulil xyaj eʼtelʌch i chaʼan jiñi mulil. 35 Cheʼ jaʼel, jiñi xyaj eʼtel mach tiʼ pejtelelic ora miʼ cʌytʌl tiʼ yotot i yum, pero jiñi i yalobil i yum tiʼ pejtelelʌch ora miʼ cʌytʌl. 36 Jin chaʼan, mi jiñi i Yalobil miʼ yʌqʼuetla ti cojlel, mucʼʌch caj laʼ cojlel tiʼ sujm. 37 Joñon cujil chaʼan i pʼolbaletla Abrahán, pero woli laʼ ñop laʼ tsʌnsañon come jiñi c tʼan tac maʼañic woliʼ colel ti laʼ tojlel. 38 Joñon mi cʌl chuqui tac tsaʼ j qʼuele cheʼ bʌ yaʼañon quicʼot c Tat. Pero jatetla mi laʼ mel chuqui tac tsaʼ laʼ wubi tiʼ tojlel laʼ tat». 39 Jin chaʼan tsiʼ yʌlʌyob: «Jiñi lon c tat jiñʌch Abrahán». Jesús tiʼ subeyob: «Cheʼ i yalobileticla Abrahán, mi laʼ mel chuqui tac tsiʼ mele Abrahán. 40 Pero joñon, juntiquil wiñic tsaʼ bʌ i subeyetla jiñi i sujmlel tsaʼ bʌ i yubi ti Dios, laʼ wom laʼ tsʌnsañon. Abrahán maʼañic tsiʼ mele jiñi. 41 Jatetla mi laʼ mel jiñi tsaʼ bʌ i mele laʼ tat». Tsiʼ jacʼbeyob: «Joñon lon mach tiʼ cajic tsʼiʼlel* tsaʼ lon quila pañimil, juntiquil jach lon c Tat, jiñʌch Dios».

42 Jesús tsiʼ jacʼbeyob: «Cheʼ jiñic Dios laʼ Tat, mi laʼ cʼuxbiñon come Dios jiñʌch tsaʼ bʌ i chocoyon tilel i jin chaʼan wʌʼañoñi. Mach tic bajñel pusicʼalic tsaʼ tiliyon, jiñʌch tsiʼ chocoyon tilel. 43 ¿Chucoch maʼañic mi laʼ chʼʌmben i sujm jiñi woli bʌ cʌl? Tiʼ caj maʼañic miʼ mejlel laʼ ñʌchʼtan jiñi c tʼan. 44 Jatetla i yalobiletla jiñi laʼ tat, jiñi Diablo, i laʼ wom laʼ mel chuqui yom jiñi laʼ tat. Xtsʌnsajʌch cʼʌlʌl tiʼ tejchibal. Mach xucʼulic tsaʼ ajñi ti jiñi i sujmlel come jiñi i sujmlel maʼañic tiʼ tojlel. Miʼ chaʼlen lot come jiñʌch am bʌ tiʼ pusicʼal. Juntiquilʌch xlot yicʼot i tatʌch jiñi lot. 45 Pero, come joñon woli c subeñetla i sujmlel, maʼañic mi laʼ ñopbeñon. 46 ¿Majqui ti laʼ tojlel miʼ mejlel i pʌs chaʼan tsaʼ c chaʼle mulil? Mi i sujm chuqui woli cʌl, ¿chucoch maʼañic mi laʼ ñopbeñon? 47 Jiñi i chaʼañʌch bʌ Dios miʼ ñʌchʼtʌben i tʼan Dios. Jin chaʼan jatetla maʼañic mi laʼ ñʌchʼtan: Come mach i chaʼañeticla Dios».

48 Cheʼ bʌ jiñi judíojob tsiʼ yubiyob iliyi, tiʼ subeyob: «¿Mach ba i sujmic cheʼ bʌ mi lon cʌl ‹Juntiquilet samaritano yicʼot an a xibʌjlel›?». 49 Jesús tsiʼ jacʼbeyob: «Joñon maʼañic c xibʌjlel. Joñon woli cʌqʼuen i ñuclel c Tat, i jatetla maʼañic mi laʼ qʼuelon ti ñuc. 50 Pero joñon maʼañic woli c sʌclan c ñuclel, añʌch woli bʌ i sʌclan, i jiñʌch muʼ bʌ i chaʼlen meloñel. 51 Tiʼ sujm mic subeñetla chaʼan mi an majqui miʼ jacʼ jiñi c tʼan, maʼañic baʼ ora mi caj i chʌmel». 52 Jiñi judíojob tiʼ subeyob: «Wʌleʼli tsiquilix mi lon j qʼuel chaʼan an a xibʌjlel. Abrahán tsaʼ chʌmi i cheʼʌch jaʼel jiñi xʼaltʼañob, pero jatet maʼ wʌl: ‹Mi an majqui miʼ jacʼ jiñi c tʼan, maʼañic baʼ ora mi caj i chʌmel›. 53 ¿Ñumen ñuquet ba bajcheʼ jiñi lon c tat Abrahán, jiñi tsaʼ bʌ chʌmi? Jiñi xʼaltʼañob tsaʼʌch chʌmiyob jaʼel. ¿Majquiyet maʼ wʌl?». 54 Jesús tsiʼ jacʼʌ: «Cheʼ muqʼuic c bajñel ñuqʼuesan c bʌ, maʼañic i cʼʌjñibal jiñi c ñuclel. Jiñi muʼ bʌ i ñuqʼuesañon jiñʌch c Tat, jiñi laʼ Dios bʌ mi laʼ wʌl. 55 Pero jatetla mach laʼ cʌñʌyic, joñon j cʌñʌyʌch. I cheʼ muqʼuic cʌl chaʼan mach j cʌñʌyic, xloton bajcheʼ jatetla. Pero j cʌñʌyʌch i mic jacʼben i tʼan. 56 Abrahán, jiñi laʼ tat, tsiʼ wen taja i tijicñʌyel cheʼ bʌ tsiʼ chʌn ñaʼta chaʼan mi caj i qʼuel jiñi j qʼuiñilel, tsiʼ qʼuele i wen tijicña tsiʼ yubi». 57 Cheʼ jiñi, jiñi judíojob tiʼ subeyob: «Mi añiquix 50 a jabilel, ¿i tsaʼix a qʼuele Abrahán?». 58 Jesús tiʼ subeyob: «Tiʼ sujm mic subeñetla chaʼan cheʼ bʌ Abrahán maxto i yila pañimil, joñon añoñix». 59 Cheʼ jiñi tsiʼ chʼʌmʌyob xajlel tac* chaʼan miʼ julob Jesús, pero tsiʼ mujcu i bʌ i tsaʼ loqʼui yaʼ ti templo.