¿Chuqui miʼ yʌl jiñi Biblia tiʼ tojlel jiñi ángelob?

Jehová yom chaʼan mi laj cʌn jiñi i familia am bʌ ti panchan. I ti jiñi i familia yaʼ ochem jaʼel jiñi ángelob, muʼ bʌ i subentelob jaʼel bajcheʼ «i yalobilob Dios» (Job 38:7). ¿Chuqui miʼ yʌl jiñi Biblia tiʼ tojlel jiñi ángelob? ¿Bajcheʼ miʼ coltañoñobla? ¿Luʼ ochemoʼ ba tiʼ familia Dios jiñi ángelob?

1. ¿Majquiyob jiñi ángelob?

Jehová tsiʼ mele (pʌtʌ) jiñi ángelob cheʼ bʌ maxto i mele jiñi Pañimil. Tiʼ pejtelelob espíritujob i chumulob ti panchan (Hebreos 1:​14). An cabʌl ángelob i mach junlajalobic (Apocalipsis 5:​11). Tiʼ pejtelelob miʼ jacʼbeñob i tʼan Jehová i miʼ melob chuqui miʼ yʌl (Salmo 103:​20). Ti wajali, Dios tsiʼ cʼʌñʌ jiñi ángelob chaʼan miʼ subob chuqui miʼ ñaʼtan i chaʼan miʼ coltan i tejclum. Ili ora, jiñi ángelob miʼ coltañob jaʼel jiñi xñoptʼañob chaʼan miʼ mejlel i tajob jiñi yomoʼ bʌ i cʌn Dios.

2. ¿Majquiyob jiñi Satanás yicʼot i xibajob?

An ángelob mach bʌ xucʼulobic tsaʼ ajñiyob tiʼ tojlel Jehová. Jiñi ñaxam bʌ tsaʼ bʌ i contraji Dios jiñʌch «jiñi muʼ bʌ i subentel ti Diablo yicʼot Satanás, woli bʌ i lotin pejtelel lac piʼʌlob ti pañimil» (Apocalipsis 12:9). Satanás tsiʼ mulaj chaʼan miʼ yumʌntel, jin chaʼan tsiʼ loti jiñi ñaxam bʌ wiñic yicʼot xʼixic chaʼan miʼ temob i bʌ yicʼot. Ti wiʼil, tsiʼ loti jaʼel jiñi yambʌ ángelob, tsaʼ bʌ cʼotiyob ti cʌjñel bajcheʼ xibajob. Jehová tsiʼ chocoyob loqʼuel yaʼ ti panchan i tsaʼ jubiyob tilel wʌʼ ti Pañimil, i mi caj i jisʌntelob (pejcan Apocalipsis 12:​9, 12).

3. ¿Bajcheʼ miʼ ñopob i lotiñonla jiñi Satanás yicʼot i xibajob?

Satanás yicʼot jiñi i xibajob miʼ cʼʌñob jiñi espiritismo chaʼan miʼ lotiñob cabʌl lac piʼʌlob, i cheʼ bajcheʼ jiñi miʼ pejcañob jiñi xibajob. Jumpʼejl ejemplo, an muʼ bʌ i pejcañob jiñi astrólogojob, adivinojob, xwujtob o xtsʼʌcayajob. An yambʌlob muʼ bʌ i sʌclañob tsʼac tac ochem bʌ tiʼ chaʼan bʌ xibajob. I an muʼ bʌ i subeñoñobla chaʼan miʼ mejlel lac pejcan jiñi chʌmeñoʼ bʌ. Pero Jehová miʼ ticʼonla: «Mach majliquetla baʼan jini payxo xʼaltʼañob [o muʼ bʌ i pejcañob xibajob] chaʼan mi laʼ cʼajtiben i sujmlel chuqui tac miʼ yujtel» (Levítico 19:​31). Jehová miʼ subeñonla iliyi come mach yomic chaʼan Satanás yicʼot i xibajob miʼ ticʼlañoñobla, come i contrajob i yomob i ticʼlañonla.

LAʼ LAC ÑUMEN ÑAʼTAN

4. Jiñi ángelob miʼ coltañob jiñi lac piʼʌlob chaʼan miʼ cʌñob Jehová

Jiñi ángelob maʼañic miʼ subeñob wen tʼan jiñi lac piʼʌlob, pero mucʼʌch i coltañob jiñi i wiñicob Dios chaʼan miʼ mejlelob i taj jiñi yomoʼ bʌ i cʌn Dios. Pejcanla Apocalipsis 14:​6, 7 i tem alʌla iliyi:

• ¿Chucoch i cʼʌjñibal lac chaʼan i coltaya jiñi ángelob chaʼan mi lac chaʼlen subtʼan?

• ¿Muʼ ba i yʌqʼueñet a tijicñʌyel cheʼ a wujil chaʼan jiñi ángelob miʼ mejlelob i coltañonla lac taj jiñi yomoʼ bʌ i ñʌchʼtañob chaʼan jiñi Biblia? ¿Chucoch?

5. Mach a wotsan a bʌ ti jiñi espiritismo yicʼot ti yan tac bʌ i chaʼan bʌ xiba

Satanás yicʼot i xibajob i contrajob Jehová, yicʼot laj contrajob jaʼel. Pejcanla Lucas 9:​38-​42 i tem alʌla iliyi:

• ¿Bajcheʼ miʼ ticʼlʌntelob jiñi lac piʼʌlob ti jiñi xibajob?

Mach yomic mi la cotsan lac bʌ tiʼ chaʼan bʌ xibajob come miʼ mejlel i ticʼlañoñobla. Pejcanla Deuteronomio 18:​10-​12 i tem alʌla iliyi:

• ¿Bajcheʼ miʼ ñopob i pejcañonla yicʼot i ticʼlañoñobla jiñi xibajob? ¿Chuqui tac ñʌmʌl ti mejlel yaʼ ti a lumal i chaʼan tac bʌ xiba?

• ¿Weñʌch ba maʼ wubin cheʼ bʌ Dios miʼ yʌl chaʼan mach yomic mi la cotsan lac bʌ tiʼ chaʼan tac bʌ xiba? ¿Chucoch?

Qʼuelela jiñi VIDEO i tem alʌla iliyi:

VIDEO: «Pʌsʌ laʼ bʌ tiʼ contra xiba» (5:​02)

• ¿Chucoch mach weñic maʼ wʌl jiñi tsaʼ bʌ i cʌchbe tiʼ cʼʌb i yalʌl Palesa?

• ¿Chuqui tsiʼ mele Palesa chaʼan jiñi xibajob maʼañic miʼ bej ticʼlañob?

Jiñi i sujm bʌ xñoptʼañob maʼañic baʼ ora an i yotsayob i bʌ tiʼ chaʼan bʌ xibajob. Pejcanla Hechos 19:​19 yicʼot 1 Corintios 10:​21, i tem alʌla iliyi:

• ¿Chucoch yom maʼ choc o maʼ pul mi an a chaʼan i chaʼan tac bʌ xibajob?

6. Mʌlben Satanás yicʼot i xibajob

I yum jiñi xibajob jiñʌch Satanás. Pero jiñi xucʼul bʌ ángelob añob tiʼ wenta jiñi arcángel Miguel, jiñʌch yambʌ i cʼabaʼ Jesús. ¿Bajcheʼ cʼamel i pʼʌtʌlel jiñi Miguel? Pejcanla Apocalipsis 12:​7-9 i tem alʌla iliyi:

• ¿Majquiyob jiñi ñumen pʼʌtʌloʼ bʌ: Jimba Miguel yicʼot i yángelob, o Satanás yicʼot i xibajob?

• ¿Yom ba miʼ bʌcʼñañob Satanás yicʼot i xibajob maʼ wʌl jiñi muʼ bʌ i tsajcañob Cristo?

Jatet miʼ mejlel a mʌlben Satanás yicʼot i xibajob. Pejcanla Santiago 4:7 i tem alʌla iliyi:

• ¿Chuqui miʼ mejlel a mel chaʼan jiñi Satanás yicʼot i xibajob maʼañic miʼ ticʼlañet?

TSAʼ BɅ LAJ CɅÑɅ

Jiñi xucʼuloʼ bʌ ángelob miʼ coltañoñobla. Pero Satanás yicʼot i xibajob i contrajob Jehová, i miʼ cʼʌñob jiñi espiritismo chaʼan miʼ lotiñoñobla.

¿Chuqui tsaʼ cʌñʌ?

• ¿Chuqui miʼ melob jiñi xucʼuloʼ bʌ ángelob chaʼan miʼ coltañob jiñi lac piʼʌlob chaʼan miʼ cʌñob Jehová?

• ¿Majquiyob jiñi Satanás yicʼot i xibajob?

• ¿Chucoch mach yomic maʼ wis otsan a bʌ tiʼ chaʼan tac bʌ jiñi xibajob?

CɅÑɅ YAN TAC BɅ

Qʼuele chucoch Jesús jiñʌch jiñi arcángel Miguel.

«¿Majqui jiñi arcángel Miguel?» (Tema am bʌ ti jw.org)

Qʼuele chuqui miʼ pʌs chaʼan añʌch jiñi Diablo.

«¿Am ba jiñi Diablo?» (Tema am bʌ ti jw.org)

Qʼuele chuqui tsiʼ mele juntiquil xʼixic chaʼan maʼañix miʼ chʌn ticʼlʌntel ti xibajob.

«Tsiʼ taja jiñi i sujmlel i cuxtʌlel» (Lac Tsictesʌbentel, 1 i chaʼan julio, 1993)

Qʼuele bajcheʼ miʼ cʼʌn Satanás jiñi espiritismo chaʼan miʼ lotin lac piʼʌlob.

«Jiñi i sujmlel chaʼan jiñi magia, hechicería yicʼot brujería» (¿Tsaʼix baʼ taja jiñi bij muʼ bʌ i pʌyet majlel a taj jiñi cuxtʌlel mach bʌ añic i jilibal?, parte 5)