Je ná di be̱ eyembilan a bwam ońola bane̱ ke̱ di tingame̱ na nje ye bwam na ke̱ di mano̱ngo̱ bedomsedi be se̱medi o bete̱sedi ba Bibe̱l. Jokwa l’Eyal’a Loba di mabola ná dube̱ lasu di bate be̱ ngińa, di sikime̱ye̱ pe̱ o mbale̱. Di si me̱nde̱ sousabe̱ na belēdi ba mpoṅ na mo̱nge̱le̱ ma mpenga ma nin wase. (Efe. 4:14; Yak. 1:6-8) Di me̱nde̱ pe̱ we̱le̱ jongwane̱ ba ba be̱n mitakisan. (1 Tes. 3:2, 3) Batudu bangame̱n be̱ bato ba bi jaleye̱ ńolo, be ye̱ne̱ n’ede̱mo a bwam na skwe̱. Ba mongwane̱ bane̱ o be̱ pī na o tingame̱ na dube̱ labu, yete̱na ba “tingame̱ o eyal’a mbale̱.” (Tito 1:9; 1 Tim. 3:1-3) Eyembilan a batudu na mbadi ba mombweano̱ bate̱ dikalo e mongwane̱ ban o jukea o ndongame̱n, o te̱ dikalo, na o jokwa Eyal’a Loba ponda ye̱se̱. Bonasango be te̱ o bete̱medi be mabwese̱ babo̱ bo̱ngo̱, batudu be ná bongwane̱ babo̱ o lakisane̱ Yehova na makaki mao. w24.06 31 § 16-18

Niponda Yesu a tano̱ o wase, okwe̱le̱ bato ná Sango ao a le̱le̱me̱ o lakise̱ biso̱ ke̱ di boli bobe. Jombweye munia ma muna nu pimbedi. Y’eso̱mb’a moto e po̱si o jasumwe̱ o mboa, na mo̱ e botea be̱ne̱ longe̱ la bobe; nde ombusa ponda, “teten e ta ńumba mo̱” na mo̱ e timba o mboa. Nje sango ao a bolino̱ e? Yesu mo̱ ná ke̱ nu muna “a dia etum wone̱, na sango e̱ne̱ mo̱, . . . , a ńa mīla, a sokane̱ mo̱, a sopa mo̱.” Jo̱nge̱le̱ la nu muna di ta nde ná a baise̱ sango ná a no̱nge mo̱ ka mō̱ ńa baboledi bao; nde sango ao a bele̱ nde mo̱ ná “mun’am” emea pe̱te̱ o kasa mo̱ k’elong’a mbia. Sango ao a kwali ná: “A ta a pimbea, nde a diabe̱.” (Lukas 15:11-32) Ponda Yesu a tano̱ o mo̱ń, e̱n ngedi jita ne̱ni Sango ao a lakise̱no̱ jita la babole̱ bobe bena bate̱le̱. Mu munia ma Yesu mu malo̱ko̱ jita, mu malee̱ pe̱ nate̱na njika dikala Sango asu Yehova, eno̱ ndedi! w24.08 11 § 11-12

Kriste̱n ńe jangwa e mabola nje ye̱se̱ ye o ngud’ao o no̱ngo̱ bedomsedi ba bwam be bowan na jo̱nge̱le̱ la Yehova. Ni Kriste̱n e memba ná to̱ lambo o longe̱ lao di titi mweńa buka mulatako mao na Yehova. E si mano̱ngo̱ mo̱me̱ne̱ mweńa buka dime̱ne̱ ebanja e memba ná e si bi mambo me̱se̱. E malee̱ pe̱ ná e lakisane̱ Yehova na kane̱ mo̱ ponda te̱ na sibise̱ la ńolo o kusane̱ mo̱ bediedi. Di memba ná jangame̱n benga kane̱ Yehova to̱ e be̱ nde ná di mo̱nge̱le̱ ná di dongame̱n o bola mambo mō̱ na biso̱me̱ne̱. Jangame̱n so̱ te̱ no̱ngo̱ bedomsedi ba mweńa di kane̱ Yehova ná di kusane̱ mo̱ bediedi na mbaki ná a bi nje ye bwam ońol’asu. Je muńe̱nge̱ jita ná Yehova a weki biso̱ o mbadi jeno̱ ná jembilane̱ bede̱mo bao. (Bbt. 1:26) Mbale̱ ńe nde ná di titi ná jembilane̱ Yehova o mbadi ńe ke̱nge̱nge̱.—Yes. 55:9. w25.03 11-12 § 13; 13 § 17-18