2 Mose

39 Wotsɔ ka blɔtɔ, alẽfuka si wode ama aɖabɛ dzĩtɔe, kple ka dzĩ+ lɔ̃ awuwo nyuie be woatsɔ awɔ subɔsubɔdɔ le kɔkɔeƒe la. Wolɔ̃ Aron+ ƒe awu kɔkɔeawo abe ale si tututu Yehowa de se na Mose ene.

2 Eye wòtsɔ sika, ka blɔtɔ, alẽfuka si wode ama aɖabɛ dzĩtɔe, ka dzĩ kple ɖeti ɣi biɖibiɖi dada lɔ̃ kɔmewu+ la. 3 Woƒo sika gbabɛ eye wodzee lɛlɛlɛ be aɖaŋuvɔlɔ̃lawo natsɔe akpe ɖe ka blɔtɔ, alẽfuka si wode ama aɖabɛ dzĩtɔe, ka dzĩ kple ɖeti ɣi biɖibiɖi ŋu alɔ̃e. 4 Wowɔ abɔtaɖonuwo nɛ, eye wokpe wo le eƒe abɔta eveawo dzi. 5 Eye wotsɔ nu mawo ke, siwo nye sikaka, ka blɔtɔ, alẽfuka si wode ama aɖabɛ dzĩtɔe, ka dzĩ kple ɖeti ɣi biɖibiɖi dada lɔ̃ alidziblanu si le kɔmewu la ŋu be woatsɔ ablae;+ wowɔe abe ale si tututu Yehowa de se na Mose ene.

6 Eye wotsɔ sika ɖo to na oniks-kpe eveawo, eye woɖe Israel viwo ƒe ŋkɔwo ɖe wo dzi abe ale si woŋlɔa nu ɖe nutrenu dzi ene.+ 7 Eye wòtsɔ wo ɖo kɔmewu la ƒe abɔtaɖonuawo dzi be woanye ŋkuɖodzikpewo na Israel-viwo,+ abe ale si tututu Yehowa de se na Mose ene. 8 Azɔ etsɔ ka siwo wotsɔ lɔ̃ kɔmewu la ke lɔ̃ akɔtaɖonu+ la aɖaŋutɔe; sika, ka blɔtɔ, alẽfuka si wode ama aɖabɛ dzĩtɔe, ka dzĩ kple ɖeti ɣi biɖibiɖi dada wòtsɔ lɔ̃e.+ 9 Wowɔ akɔtaɖonu la ale be esi woŋe eme ɖe eve la, ele dzogoe ene me, edidi asi ɖeka,* eye wòkeke asi ɖeka. 10 Eye wotsɔ kpe xɔasiwo ɖo eŋu le agbaka ene me. Agbaka gbãtɔ nye rubi, topaz kple emerald. 11 Agbaka evelia nye nofek, safir kple yaspis. 12 Agbaka etɔ̃lia nye lesem,* agat* kple ametist. 13 Eye agbaka enelia nye krisolit, oniks kple yasifi. Wotsɔ sika ɖo to na wo. 14 Kpeawo le Israel viŋutsu wuieveawo ƒe ŋkɔwo nu. Ŋkɔɖelawo ɖe ŋkɔawo ɖe wo dzi, ŋkɔ ɖe sia ɖe le tsitre ɖi na to wuieveawo dometɔ ɖeka.

15 Eyome wotsɔ sika nyuitɔ gbi ka wòle abe kɔsɔkɔsɔ ene ɖe akɔtaɖonu la ŋu.+ 16 Wowɔ sikagɛ ɖe to si woɖo na kpe eveawo la ŋu, eye wogawɔ sikasigɛ eve hetsɔ ɖo akɔtaɖonu la ƒe dzogoe eveawo dzi. 17 Emegbe wotsɔ sikaka eveawo to asigɛ eveawo me le akɔtaɖonu la ƒe dzogoewo dzi. 18 Eye wotsɔ ka eveawo ƒe nugbɔ eveawo to asigɛ eveawo me hetsɔ wo ku kɔmewu la ƒe abɔtaɖonuawo le ŋgɔ. 19 Emegbe wotu sikasigɛ eve bubu tsɔ de akɔtaɖonu la ƒe dzogoe eve mamlɛawo le eƒe akpa si le kɔmewua dzi, le eme gome.+ 20 Azɔ wogatu sikasigɛ eve bubu tsɔ de kɔmewu la ŋgɔ le eƒe abɔtaɖonu eveawo ƒe anyime, wògogo teƒe si wotɔe ɖe kɔmewu la dzi le, le alidziblanu la tame. 21 Eyome wogbi ka blɔtɔ tsɔ to akɔtaɖonu la ƒe asigɛawo me hetsi ɖe kɔmewu la ƒe asigɛawo ŋu, be wòalé akɔtaɖonu la ɖe kɔmewu la dzi le alidziblanu la tame, ale be magaʋã o; wowɔe abe ale si tututu Yehowa de se na Mose ene.

22 Emegbe etsɔ ka blɔtɔ ɖeɖe lɔ̃ awu ʋlaya si ŋu abɔ mele o la.+ 23 Woɖe kɔme na awu ʋlaya si ŋu abɔ mele o la ɖe eƒe titina wòle abe gawu ƒe kɔme ene. Woƒo to na kɔmea va kpe, be wòagavuvu o. 24 Azɔ wotsɔ ka blɔtɔ, alẽfuka si wode ama aɖabɛ dzĩtɔe kple ka dzĩ, siwo wogbi ɖekae la, lɔ̃ yevuboɖawo ɖe awua toga le ete. 25 Wotsɔ sika nyuitɔ wɔ nyawowoewo hã, eye wotsi wo ɖe awu ʋlaya si ŋu abɔ mele o la toga le ete godoo va kpe, le yevuboɖaawo domee; 26 sikanyawowoe ɖeka yevuboɖa ɖeka, sikanyawowoe ɖeka yevuboɖa ɖeka le awu ʋlaya si ŋu abɔ mele o si woado asubɔ la toga, le ete godoo va kpe; wowɔe abe ale si tututu Yehowa de se na Mose ene.

27 Eyome avɔlɔ̃la tsɔ ɖeti ɣi biɖibiɖi lɔ̃ awu ʋlayawo na Aron kple viaŋutsuwo,+ 28 wotsɔ ɖeti ɣi biɖibiɖi lɔ̃ tablanu+ kple atsyɔ̃tablavɔwo,+ eye wotsɔ ɖeti ɣi biɖibiɖi dada lɔ̃ atakpui ɣiwo.*+ 29 Eyome wotsɔ ɖeti ɣi biɖibiɖi, ka blɔtɔ, alẽfuka si wode ama aɖabɛ dzĩtɔe kple ka dzĩ lɔ̃ alidziblanu la; wowɔe abe ale si tututu Yehowa de se na Mose ene.

30 Mlɔeba wotsɔ sika nyuitɔ wɔ ga falɛ keklẽ la, si nye adzɔgbeɖeɖe ƒe dzesi kɔkɔe* la, eye wona ŋkɔɖelawo ɖe nuŋɔŋlɔ ɖe edzi be: “Kɔkɔenyenye nye Yehowa tɔ.”+ 31 Eye wogbi ka blɔtɔ tsɔ lée ɖe tablanu la dzi; wowɔe abe ale si tututu Yehowa de se na Mose ene.

32 Ale wowu avɔgbadɔ si nye takpegbadɔ la ƒe dɔ blibo la katã nu; Israel-viwo wɔe abe ale si tututu Yehowa de se na Mose ene.+ Nenema pɛpɛpɛ wowɔe.

33 Eyome wofɔ avɔgbadɔ+ la ƒe nuwo katã va Mose gbɔ: agbadɔvɔ+ la kple eŋu nuwo katã, eƒe gaviwo,+ eƒe ʋuƒowo,+ eƒe xɔblatiwo,+ eƒe sɔtiwo kple eƒe anyinɔwo;+ 34 agbogbalẽ si wode ama dzĩ+ kple nyogbalẽ siwo woatsɔ agba edzi, xɔmetsovɔ la;+ 35 Ðaseɖiɖiɖaka la, eŋu kpowo+ kple nutunu+ la; 36 kplɔ̃ la, eŋu nuwo+ katã kple ŋkumeɖobolo la; 37 akaɖiti si wotsɔ sika nyuitɔ wɔ kple eƒe akaɖigbɛ+ siwo le agbaka me, eŋu nuwo+ katã kple ami si woade akaɖigbɛ la me;+ 38 sikavɔsamlekpui+ la, ami kɔkɔe+ la, atike ʋeʋĩ+ la, agbadɔ la ƒe mɔnuvɔ+ la; 39 akɔblivɔsamlekpui+ la, eƒe akɔbligaɖɔ la, eŋu kpowo+ kple eŋu nuwo+ katã, ze la kple eƒe zɔ;+ 40 xɔxɔnu la ŋu vɔwo, eƒe kpɔtiwo kple eƒe anyinɔwo,+ xɔxɔnu la ƒe mɔnuvɔ,+ eƒe kawo kple eƒe tsyotiwo,+ kple nu siwo katã woazã le avɔgbadɔ, si nye takpegbadɔ la, me dɔwo wɔwɔ me; 41 awu siwo wolɔ̃ nyuie be woatsɔ awɔ subɔsubɔdɔ le kɔkɔeƒe la, nunɔla Aron+ ƒe awu kɔkɔewo kple viaŋutsuwo ƒe awu siwo woado atsɔ awɔ nunɔladɔwo.

42 Israel-viwo wɔ dɔ blibo la katã abe ale si tututu Yehowa de se na Mose ene.+ 43 Mose lé ŋku ɖe dɔ blibo la ŋu eye wòkpɔe be wowɔe abe ale si tututu Yehowa de see ene; eye Mose yra wo.