Dɔwɔwɔwo

2 Le Pentekoste Ŋkekenyuia+ dzi la, wo katã woƒo ƒu ɖe teƒe ɖeka. 2 Kasia wose nane ƒe ɖiɖi tso dziƒo abe yaƒoƒo sesẽ aɖe ene, eye wòxɔ aƒe si me wole la katã me.+ 3 Eye wokpɔ nane si le abe dzoƒaɖewo ene la va dze ɖe wo dometɔ ɖe sia ɖe dzi ɖekaɖeka, 4 eye gbɔgbɔ kɔkɔe yɔ wo katã taŋ,+ eye wode asi gbe vovovowo dodo me, abe ale si gbɔgbɔ la dee nu na wo ene.+

5 Ɣemaɣi la, Yudatɔ mawuvɔ̃la siwo tso dukɔ sia dukɔ me le dziƒoa te la nɔ Yerusalem.+ 6 Eya ta esi gbe sia ɖi la, ame gbogbo aɖe va ƒo ƒu, eye woƒe nu ku, elabena wo dometɔ ɖe sia ɖe see wole eya ŋutɔ degbe dom. 7 Le nyateƒe me la, wotsi yaa eye wogblɔ be: “Kpɔ ɖa, menye Galileatɔwoe+ ame siawo katã, siwo le nu ƒom la nye oa? 8 Ke aleke wɔ mía dometɔ ɖe sia ɖe le eya ŋutɔ degbe sem? 9 Partiatɔwo, Mediatɔwo,+ Elamtɔwo,+ ame siwo tso Mesopotamia, Yudea, Kapadokia, Ponto, Asia nutowo me,+ 10 Frigia, Pamfilia, Egipte, Libia nuto siwo le Kirene gbɔ, kple amedzro siwo tso Roma, Yudatɔwo kple ame siwo trɔ dzi me zu Yudatɔwo siaa,+ 11 Kretatɔwo, kple Arabiatɔwo, wole nu ƒom tso Mawu ƒe nu dzɔtsuwo ŋu le mía degbe me míele sesem.” 12 Ɛ̃, wo katã woƒe mo wɔ yaa, wotɔtɔ, eye wonɔ wo nɔewo biam be: “Nu sia gɔme ɖe?” 13 Ke ame bubuwo ɖu fewu le wo ŋu gblɔ be: “Wain yeyee le wo mum.”

14 Ke Petro kple Ame Wuiɖekɛawo+ tsi tsitre, eye wòkɔ gbe dzi ƒo nu na wo be: “Yudea ŋutsuwo kple mi Yerusalem nɔlawo katã, minya esia, eye miɖo to miase nye nyawo. 15 Le nyateƒe me la, menye ahae ame siawo mu abe ale si miele esusum ene o, elabena ŋkekea ƒe gaƒoƒo etɔ̃lia* koe nye esia. 16 Ke boŋ nya si wogblɔ ɖi to nyagblɔɖila Yoel dzie nye esi: 17 ‘Mawu gblɔ be, “Le ŋkeke mamlɛawo me la, matrɔ nye gbɔgbɔ la ƒe ɖe akɔ ɖe ŋutilã ƒomeviwo katã dzi, eye mia viŋutsuwo kple mia vinyɔnuwo agblɔ nya ɖi, miaƒe ɖekakpuiwo akpɔ ŋutegawo, eye miaƒe amegãɖeɖiwo aku drɔ̃ewo,+ 18 eye matrɔ nye gbɔgbɔ la ƒe ɖe akɔ ɖe nye kluviwo kple nye kosiwo gɔ̃ hã dzi le ŋkeke mawo me, eye woagblɔ nya ɖi.+ 19 Mana nukunuwo nadze le dziƒo kple dzesiwo le anyigba dzi, ʋu kple dzo kpakple dzudzɔ babla kɔtɔɔ. 20 Ɣe ado viviti, eye ɣleti azu ʋu, hafi Yehowa* ƒe ŋkeke gã si nye atsyɔ̃ŋkeke la nava ɖo. 21 Eye ame sia ame si yɔa Yehowa* ƒe ŋkɔ la, woaɖee.” ’+

22 “Israel ŋutsuwo, mise nya siawo: Yesu, Nazaretetɔ la, nye ame si Mawu ɖe fia mi gaglãa. Mawu to ŋusẽdɔwo, nukunuwo kple dzesi siwo wòwɔ to edzi le mia dome la dzi ɖee fia,+ abe ale si miawo ŋutɔwo mienyae ene. 23 Ame sia, si wode asi le Mawu ƒe tameɖoɖo kple nunyanya do ŋgɔ nu+ la, mieto sedzimawɔlawo dzi hee ɖe ati ŋu, eye miewui.+ 24 Ke Mawu fɔe ɖe tsitre+ esi wòɖee tso ku me,* elabena ku mete ŋu yi edzi lée ɖi o.+ 25 Elabena David gblɔ le eŋu be: ‘Metsɔa Yehowa* ɖoa ŋkunyeme ɖaa, elabena ele nye ɖusime, be magaʋã akpɔ o. 26 Esia tae nye dzi kpɔ dzidzɔ, eye nye aɖe tso aseye. Eye manɔ* mɔkpɔkpɔ me; 27 elabena màgblẽm* ɖe Tsiẽƒe* o, eye màɖe mɔ be ame si wɔa nuteƒe na wò la nanyunyɔ o.+ 28 Èna menya agbemɔ la; àtsɔ dzidzɔ gã aɖi ƒo nam le ŋkuwòme.’+

29 “Ŋutsuwo, nɔviwo, mina maƒo nu na mi faa tso tɔgbui David ŋu, be eku, eye woɖii,+ eye eƒe yɔdo le mía dome va se ɖe egbe sia. 30 Esi wònye nyagblɔɖila eye wònya be Mawu do ŋugbe na ye heka atam tsɔ ɖo kpe edzi be yeana yeƒe dzidzimeviwo* dometɔ ɖeka nanɔ yeƒe fiazikpui dzi+ ta la, 31 ekpɔ Kristo la ƒe tsitretsitsi do ŋgɔ, eye wòƒo nu tso eŋu be womegblẽe ɖe Tsiẽƒe* o, eye eƒe ŋutilã hã menyunyɔ o.+ 32 Mawu fɔ nenem Yesu sia ɖe tsitre, eye mí katã míenye esia ƒe ɖasefowo.+ 33 Eya ta esi wodoe ɖe dzi wòyi ɖale Mawu ƒe ɖusime,+ eye wòxɔ gbɔgbɔ kɔkɔe si ŋugbe wodo la tso Fofo la gbɔ+ ta la, etrɔ nu si kpɔm miele hele sesem la kɔ ɖi. 34 Elabena David melia yi dziƒo o, ke boŋ eya ŋutɔ gblɔ be, ‘Yehowa* gblɔ na nye Aƒetɔ be: “Bɔbɔ nɔ nye ɖusime, 35 va se ɖe esime matsɔ wò futɔwo awɔ wò afɔɖodzinui.” ’+ 36 Eya ta Israel ƒe aƒe blibo la nanyae nyuie be, Mawu ɖo Yesu sia si miehe ɖe ati ŋu+ la wòzu Aƒetɔ+ kple Kristo.”

37 Esi wose nya siawo la, etɔ dzi na wo, eye wogblɔ na Petro kple apostolo susɔeawo be: “Ŋutsuwo, nɔviwo, nu kae míawɔ?” 38 Petro gblɔ na wo be: “Mitrɔ dzi me,+ eye mina woanyrɔ mia dometɔ ɖe sia ɖe+ ɖe Yesu Kristo ƒe ŋkɔ me be woatsɔ miaƒe nu vɔ̃wo ake mi,+ eye miaxɔ gbɔgbɔ kɔkɔe ƒe nunana faa la. 39 Elabena miawo kple mia viwo kpakple ame siwo katã le adzɔge ʋĩi, ame siwo katã Yehowa* mía Mawu la ayɔ va eɖokui gbɔ+ la, tɔe nye ŋugbedodo+ la.” 40 Eye wògagblɔ nya bubu geɖewo tsɔ ɖi ɖase na wo tsitotsito, eye wòyi edzi xlɔ̃ nu wo be: “Mina woaɖe mi tso dzidzime gɔglɔ̃ sia me.”+ 41 Ale wonyrɔ ame siwo xɔ eƒe nya la kple dzi blibo,+ eye wotsɔ ame* anɔ akpe etɔ̃ kpe ɖe wo ŋu gbe ma gbe.+ 42 Eye woyi edzi lé fɔ ɖe apostoloawo ƒe nufiafiawo ŋu vevie, wodea ha ɖekae,* ɖua nu ɖekae,+ eye wonɔa gbedodoɖa dzi.+

43 Nyateƒee, vɔvɔ̃ ɖo amewo* katã, eye nukunu kple dzesi geɖewo nɔ eme vam to apostoloawo dzi.+ 44 Ame siwo katã va zu xɔsetɔwo la nɔ afi ɖeka, eye wowɔa nuwo katã ɖe du, 45 wodzraa woƒe nunɔamesiwo+ kple woƒe nuwo, eye womaa nu siwo wokpɔ la na wo katã, ame sia ame ɖe eƒe hiahiã nu.+ 46 Eye wonɔa gbedoxɔa me gbe sia gbe kple tame ɖeka, woɖua nu le aƒe vovovowo me, eye wotsɔa dzidzɔ gã kple dzimekɔkɔ maa woƒe nuɖuɖu kple wo nɔewo faa, 47 nɔa Mawu kafum, eye dukɔ blibo la vea wo nu. Azɔ hã, Yehowa* tsɔa ame siwo xɔm wole ɖe agbe la kpena ɖe wo ŋu gbe sia gbe.+