Biblia Ƒe Nukpɔsusu

Aleke Wòle Be Míado Gbe Ðae Na Mawu?

MƆNUKPƆKPƆ gã aɖee wònye be míaƒo nu kple Ŋusẽkatãtɔ la agblɔ míaƒe dzimenyawo nɛ. Ke hã, ame geɖe menya ale si woado gbe ɖae o, eye ame bubuwo hã ƒe didie nye be yewoƒe gbedodoɖawo naganyo ɖe edzi. Edze ƒãa be Yesu Kristo yomedzela gbãtɔwo dometɔ aɖewo hã di be yewoanya ale si yewoana yewoƒe gbedodoɖawo naganyo ɖe edzi. Wo dometɔ ɖeka gblɔ nɛ be: “Aƒetɔ, fia gbedodoɖa mí.” (Luka 11:1) Eya ta Yesu fia kpɔɖeŋugbedodoɖa aɖe wo, si amewo yɔna be Aƒetɔ Ƒe Gbedodoɖa alo Mía Fofo Si Le Dziƒo. Gbedodoɖa kpokploe lédziname ma kpena ɖe mía ŋu be míanya ale si míaƒo nu na Mawu le mɔ si sɔ nu, eye wòganana míesea Biblia ƒe nyati vevitɔ gɔme ɖe edzi.

Yesu Ƒe Kpɔɖeŋugbedodoɖa La

Yesu gblɔ be: “Miawo mido gbe ɖa ale: Mía Fofo, si le dziƒowo! Wò ŋkɔ ŋuti nakɔ! Wò fiaɖuƒe nava! Woawɔ wò lɔlɔ̃nu le anyigba dzi, sigbe ale si wowɔna le dziƒo ene! Na míaƒe nuɖuɖu, si asu mía nu egbe la mí! Eye nàtsɔ míaƒe vodadawo ake mí, sigbe ale si míawo hã míetsɔna kea ame siwo daa vo ɖe mía ŋuti la ene! Eye mègakplɔ mí yi ɖe tetekpɔ me o; ke ɖe mí tso vɔ̃ɖitɔ la si me!”—Mateo 6:9-13, Eʋegbe Biblia.

De dzesii be Yesu gblɔ be: “Miawo mido gbe ɖa ale.” Nu kae esia fia? Yesu medi be ye yomedzelawo nasrɔ̃ nya mawo agbugbɔ anɔ gbɔgblɔm o. Nya lae nye be, egblɔe do ŋgɔ teti be woatsri nuwɔna ma. (Mateo 6:7) Ðe wòto gbedodoɖa sia dzi le nu siwo wòle be míabu nu veviwoe la fiam mí—si nye nu siwo le vevie le Mawu ŋkume, ke menye le míawo ŋkume o. Ele be míase Yesu ƒe nyawo gɔme hafi ate ŋu akpɔ nu siwo nye vevitɔwo la adze sii. Azɔ na míadzro eƒe nya siawo me ɖekaɖeka.

Gɔmesese Si Le Kpɔɖeŋugbedodoɖa La Ŋu

“Mía Fofo, si le dziƒowo! Wò ŋkɔ ŋuti nakɔ!” Esɔ ŋutɔ be Yesu yɔ Mawu be “Fofo,” elabena elɔ̃ mí eye wòkpɔa mía ta abe ale si vifofo nyuiwo hã wɔnɛ ene. Ŋkɔ ŋutɔŋutɔ le esi, si nye Yehowa, eye mele be míatɔtɔ eƒe ŋkɔ sia kple eƒe bubuŋkɔ bubuwo abe Ŋusẽkatãtɔ, Mawu kple Aƒetɔ ene o.a (Psalmo 83:19) Nu ka tae wòle be míana Mawu ƒe ŋkɔ, si ɖe Ame si wònye fia la, nanɔ kɔkɔe? Ele be míawɔ esia le esi wodo vlo eƒe ŋkɔ la heƒo ɖii ta.

Ame aɖewo bua fɔ Mawu ɖe woƒe kuxiwo ta, evɔ wònye amegbetɔwo loo alo nuɖiɖeame gbɔe kuxiawo anya tso hafi. (Lododowo 19:3; Nyagblɔla 9:11) Ame bubuwo tso Mawu nu be egbɔe dzɔdzɔmefɔkuwo tso. Ke hã, Biblia gblɔ be ‘womate ŋu atsɔ nu vɔ̃ɖiwo ate Mawu akpɔ o, eye eya ŋutɔ hã metea ame aɖeke kpɔna o.’ (Yakobo 1:13) Azɔ hã subɔsubɔha geɖewo fiaa nu be Mawu wɔa fu ame vɔ̃ɖiwo le dzo mavɔ me, evɔ nufiafia sia nye bubumademade lɔlɔ̃ ƒe Mawu la ŋu. (Yeremiya 19:5; 1 Yohanes 4:8) Romatɔwo 6:23 gblɔ be, ‘nu vɔ̃ la ƒe fetue nye ku,’ ke menye funyafunya wɔwɔ ame tegbee o!b

“Wò fiaɖuƒe nava!” Dziɖuɖu ŋutɔŋutɔe Mawu ƒe Fiaɖuƒea nye, eye eƒe Fia ye nye Yesu Kristo. Eteƒe madidi o, aɖu anyigba blibo la katã dzi. Daniel 7:14 gblɔ be: “Wotsɔ ŋusẽ, bubu kple dziɖuɖu nɛ.” Mawu ƒe Fiaɖuƒea ‘ava’ nenye be etsrɔ̃ amegbetɔwo ƒe dziɖuɖuwo katã eye wòdze anyigba bliboa dzi ɖuɖu gɔme.—Daniel 2:44.

“Woawɔ wò lɔlɔ̃nu le anyigba dzi, sigbe ale si wowɔna le dziƒo ene!” Amegbetɔƒomea awɔ Mawu ƒe lɔlɔ̃nu ne eƒe Fiaɖuƒea le dzi ɖum. Esia ana ŋutifafa vavãtɔ naxɔ aƒe ɖi eye amewo katã awɔ ɖeka asubɔ Mawu le nyateƒe me. Dunyahehe kple alakpasubɔsubɔ si dea mama amewo dome la maganɔ anyi o. Nyaɖeɖefia 21:3, 4 gblɔ le kpɔɖeŋunyagbɔgblɔ nu be, “Mawu ƒe agbadɔ la [anɔ] amegbetɔwo gbɔ,” eye wòyi edzi gblɔ be, “eye wòatutu aɖatsi sia aɖatsi ɖa le woƒe ŋkume, eye ku maganɔ anyi o, eye konyifafa kple ɣlidodo kple vevesese hã maganɔ anyi o. Nu siwo nɔ anyi tsã la nu va yi.”

“Na míaƒe nuɖuɖu, si asu mía nu egbe la mí!” Esi Yesu tsɔ Mawu ƒe ŋkɔ kple eƒe Fiaɖuƒea ɖo nɔƒe gbãtɔ vɔ la, etrɔ susu ɖe míaƒe nuhiahiãwo ŋu azɔ. Nya siwo wògblɔ la fia be míagatsi dzimaɖi ɖe nu siwo wu esiwo míehiã “egbe” la yome titi ŋu o. Ke boŋ ele be míawɔ ɖe aɖaŋuɖoɖo si le Lododowo 30:8 dzi be: “Mègana ahedada kple hotsuim o; na maɖu nye nu, si nye tɔnye.”

‘Tsɔ míaƒe vodadawo ke mí, sigbe ale si míawo hã míetsɔna kea ame siwo daa vo ɖe mía ŋuti la ene!’ Wogatea ŋu ɖea nya “vodadawo” si wozã le afi sia gɔme be “fewo.”c Ele be mí katã míaɖo to Mawu bliboe. Eya ta ne míegbe toɖoɖoe, alo míewɔ nu vɔ̃ ɖe eŋu la, ele ko abe ɖe míenyi fe le eŋu ene. Gake Yehowa lɔ̃na faa be yeatsɔ míaƒe vodadawo ake nenye be míawo hã míetsɔna kea ame siwo daa vo ɖe mía ŋu la tso dzi me faa.—Mateo 18:21-35.

“Mègakplɔ mí yi ɖe tetekpɔ me o; ke ɖe mí tso vɔ̃ɖitɔ la si me!” “Vɔ̃ɖitɔ la” ye nye Satana Abosam, ame si wogayɔna hã be “Tela la.” (Mateo 4:3) Esi míenye ame madeblibo siwo gbɔdzɔ ta la, míehiã Mawu ƒe kpekpeɖeŋu hafi ate ŋu atsi tre ɖe Satana kple ame siwo le eƒe ŋusẽ te la ŋu.—Marko 14:38.

Neva eme be Yesu ƒe kpɔɖeŋugbedodoɖa la nakpe ɖe ŋuwò nàkpɔ nu siwo le vevie wu la adze sii bene wò gbedodoɖawo naganyo ɖe edzi. Ke aleke Yesu ƒe kpɔɖeŋugbedodoɖa la ganana míesea Biblia ƒe nyati vevitɔ gɔme ɖe edzi wu? Abe ale si wòdze le Yesu ƒe nyawo me ene la, Biblia la ƒe nyati vevitɔe nye Mawu ƒe ŋkɔ kɔkɔe la ŋu kɔkɔ, vɔ̃ɖinyenye ɖe sia ɖe ɖeɖeɖa, kple ale si Mawu ƒe Fiaɖuƒea aɖu anyigba la dzi le ŋutifafa me. Nufiame nyui kawo gbegbee nye esi Yesu de eƒe kpɔɖeŋugbedodoɖa la me!—g12-E 02.

[Etenuŋɔŋlɔwo]

ÈBU NYA SIA ŊU KPƆA?

● Nu kae Yesu wɔnɛ esi wògblɔ be: “Miawo mido gbe ɖa ale”?—Mateo 6:9.

● Zi geɖe la, nu kawo ŋue wòle be míatsi dzi ɖo abia gbã le míaƒe gbedodoɖawo me?—Mateo 6:9, 10.

● Nu kawoe wotsɔ sɔ kple “fewo,” eye nu ka tae wòle be míatsɔ ake ame siwo da vo ɖe mía ŋu?—Mateo 6:12.

[Nɔnɔmetata si le axa 11]

Yesu ƒe kpɔɖeŋugbedodoɖa la ate ŋu akpe ɖe ŋuwò nàtsɔ nu siwo le vevie le Mawu ŋkume, ke menye le wò ŋkume o, la aɖo nɔƒe gbãtɔ