Mikpɔ Nuteƒewɔla La Ða!

“Yehowa, amekae mavɔ̃ wò o, eye makafu wò ŋkɔ le esi wò ɖeka hɔ̃ koe nye nuteƒewɔla ta o?”—NYAÐEÐEFIA 15:4, NW.

1. Ðase kae J. F. Rutherford ɖi le C. T. Russell si teƒe wòxɔ ɖo ƒe nuteƒewɔwɔ ŋu?

JOSEPH F. RUTHERFORD, Gbetakpɔxɔ Habɔbɔa ƒe zimenɔla, si xɔ ɖe C. T. Russell teƒe le ƒe 1917 me la dze eƒe nyawo gɔme le Russell ƒe kuteƒe be: “Charles Taze Russell wɔ nuteƒe na Mawu, ewɔ nuteƒe na Kristo Yesu, ewɔ nuteƒe na Mesia ƒe fiaɖuƒe la. Ewɔ nuteƒe ɖaseɖe ememe—ẽ, ewɔ nuteƒe ɖaseɖe ku me ke.” Nyateƒee, emae nye bubudeameŋu nyui aɖe si woade Yehowa Mawu subɔla wɔnuteƒe ŋu. Bubu gã aɖeke megali míade ame aɖeke ŋu tsɔ wu be míagblɔ be eɖu dzi le nuteƒewɔwɔ ƒe dodokpɔa me, be ewɔ nuteƒe—ewɔ nuteƒe ɖaseɖe ememe ke, o.

2, 3. (a) Nukatae nuteƒewɔwɔ sesẽ? (b) Ame kawo hãe ho ɖe Kristotɔ vavãwo ŋu le woƒe agbagbadzedze be yewoawɔ nuteƒe me?

² Nuteƒewɔwɔ mele bɔbɔe o. Nukatae? Nusitae nye be nuteƒewɔwɔ tsia tre ɖe ɖokuitɔdidi ŋu. Amesiwo mewɔa nuteƒe na Mawu o wu dometɔ aɖewoe nye Kristodukɔa ƒe osɔfowo. Azɔ hã nuteƒemawɔmawɔ le srɔ̃ɖekadodoa me bɔ egbea wu ɣeyiɣi bubu ɖesiaɖe. Ahasiwɔwɔ bɔ. Nuteƒemawɔmawɔ bɔ ɖe asitsaxexea hã me. Wogblɔ na mí le esia ŋu be: “Dɔtɔwo kple dɔnyalagã geɖe . . . xɔe se be movitɔwo kple amefufluiwo koe wɔa nuteƒe na woƒe adzɔhawo egbea.” Womebua amesiwo wɔa “nuteƒe akpa” ɖe ɖeke me o. Adzɔhawo ƒe aɖaŋuɖoha aɖe ƒe zimenɔla ya gblɔe ale: “Ele be nàwɔ wò nuteƒe vevitɔ na ɖokuiwò ɖeka hɔ̃ ko.” Gake ne woƒo nu tso nuteƒewɔwɔ na ame ɖokui ŋu la, ena gɔmesese si le nya la ŋu trona. Ena míeɖo ŋku nya si wogblɔ le Mixa 7:2 dzi be: “Nuteƒewɔlawo nu yi le anyigba dzi.”

³ Le mɔ si ɖe dzesi wu sã nu la, Satana kple eƒe gbɔgbɔ vɔ̃wo ho ɖe mía ŋu, eye woɖoe kplikpaa be yewoana míagbe nuteƒewɔwɔ na Mawu. Ema tae wogblɔ na Kristotɔwo le Efesotɔwo 6:12 be: “Míele kame tem kple ʋu kpakple ŋutilã o, ke boŋ mía kple dziɖulanyenye kple ŋusẽ kple xexe sia me fia, siwo le fifi viviti sia me kpakple vɔ̃ɖinyenye ƒe gbɔgbɔ, siwo le dziƒonutowo me lae le kame tem.” Ẽ, ele be míawɔ ɖe nuxlɔ̃ame sia dzi be: “Minɔ mo xexi, minɔ ŋudzɔ; elabena miaƒe adikãtɔ, Abosam, le tsatsam abe dzata, si le gbe ɖem hele ame dim, be yeavuvu ami ene.”—Petro I, 5:8.

4. Nɔnɔme kawoe na nuteƒewɔwɔ sesẽna ŋutɔ?

⁴ Nusiwo hã na nuteƒewɔwɔ sesẽnae nye ɖokuitɔdidi ƒe dzodzro siwo dome míenyi tso mía dzilawo gbɔ, abe alesi wogblɔe le Mose I, 8:21 ene be: “Ame ƒe dzimesusu enye vɔ̃”—eye wòdia eɖokui tɔ—“tso ɖevime ke.” Kuxi si me apostolo Paulo ʋu be ele ye ŋu la le mí katã ŋu: “Menye nu nyui, si melɔ̃na la, mewɔna o, ke nuvɔ̃, si nyemelɔ̃na o la, eya ke mewɔna boŋ.”—Romatɔwo 7:19.

Nuteƒewɔwɔ Nye Nu Tɔxɛ Aɖe

5, 6. Nya kae woate ŋu agblɔ le nusi nuteƒewɔwɔ nye ŋu, eye aleke woɖe egɔmee?

⁵ “Nuteƒewɔwɔ” nye nya tɔxɛ aɖe ŋutɔ. Eyata Insight on the Scriptures gblɔ be: “Edze abe Eŋlisigbe me nya aɖeke meli si ɖe Hebri kple Helagbe me nyaawo gɔme bliboe keŋkeŋ o ene, gake ne wozã ‘nuteƒewɔwɔ,’ si me ɖokuitsɔtsɔna kple nyateƒetoto ƒe susu le, abe alesi wònɔna ene, ne wozãe le Mawu kple eƒe subɔsubɔ gome la, etena ɖe gɔmesesea ŋu.a Gbetakpɔxɔ gblɔ le “nuteƒewɔwɔ” ŋu kpɔ be: “Nyateƒetoto, bubu, lɔlɔ̃, agbanɔamedzi, ɖokuitsɔtsɔna. Kadodo kae le nya siawo dome? Wonye nuteƒewɔwɔ ƒe akpa vovovowo.” Ẽ, nɔnɔme nyui geɖe li gake wonye nuteƒewɔwɔ ƒe akpa vovovowo. Nyateƒee, anyo be míade dzesi alesi nuteƒewɔwɔ kple dzɔdzɔenyenye de nu wo nɔewo me zi geɖe le Ŋɔŋlɔawo me.

⁶ Gɔmeɖeɖe siwo gbɔna hã akpe ɖe mía ŋu: ‘Nuteƒewɔwɔ ate ŋu afia nyateƒetoto kple ɖokuitsɔtsɔna sẽŋu si yia edzi nɔa te ɖe kemalimali alo tetekpɔwo nu.’ ‘Nuteƒewɔwɔ fia ŋugbedodo dzi wɔwɔ anukwaretɔe alo ame ɖokui tsɔtsɔ na habɔbɔ alo gɔmeɖose siwo ame aɖe ase le eɖokui me be wobla ye le agbenyuinɔnɔ gome; menye kuku ɖe nu ŋu koe nya la fia o ke efia tenɔnɔ sesĩe be naneke magable ye alo ahe ye ɖa le nusi ŋu yeku ɖo ŋu o.’ Eyata amesiwo léa nuteƒewɔwɔ me ɖe asi le tetekpɔwo, tsitretsiɖeŋu, kple yometiti me la dze woayɔ be “nuteƒewɔlawo.”

7. Vovototo kae woate ŋu ade nuteƒewɔwɔ kple nyateƒetoto dome?

⁷ Gake le go sia me la, ɖewohĩ anyo be míawɔ kpɔɖeŋu atsɔ afia vovototo si ate ŋu anɔ nuteƒewɔwɔ kple nyateƒetoto dome. Tsidziƒe aɖe le ɣetoɖoƒe United States si tua tsi dzodzoe gaƒoƒo ɖeka ɖesiaɖe kloe. Etunɛ ɖe game dzi ale gbegbe be woyɔnɛ be Nyateƒetɔ Xoxo. Biblia ƒo nu tso nusiwo mele agbe o abe dzinu ene ŋu be enye nyateƒetɔ, elabena meblea ame o. Psalmo 89:38 gblɔ le dzinu ŋu be enye ‘ɖasefo nyateƒetɔ si le dziŋgɔli me.’ Wogblɔ be Mawu ƒe nyawo nye nyateƒe. Nyaɖeɖefia 21:5 gblɔ be: “Amesi bɔbɔ nɔ fiazikpui dzi la, gblɔ bena: Kpɔ ɖa, mewɔ nuwo katã yeye! Eye wògblɔ be: Ŋlɔe, elabena nya siawo nye nya vavãwo kple nyateƒenyawo.” Nusiawo katã toa nyateƒe, womeblea ame o, gake woawo mate ŋu aku ɖe naneke ŋu alo be agbenyuinɔnɔ ƒe nɔnɔmewo abe nuteƒewɔwɔ ene nanɔ wo si o.

Yehowa, Nuteƒewɔla Ðedzesi La

8. Ŋɔŋlɔawo me ɖaseɖiɖi kae de dzesi nuteƒewɔwɔ ƒe kpɔɖeŋu nyuitɔ kekeake?

⁸ Ðikeke aɖeke mele eme o be Yehowa Mawue nye nuteƒewɔwɔ ƒe kpɔɖeŋu nyuitɔ kekeake. Yehowa wɔa nuteƒe na ameƒomea, eye wòtsɔ Via gɔ̃ hã na bene amegbetɔwo nate ŋu akpɔ agbe mavɔ. (Yohanes 3:16) Míexlẽ le Yeremya 3:12 be: “Israel dzeaglã, ale Yehowa gblɔ esi: Gatrɔ, nyemaɖo adã ɖe mia ŋu o, elabena [nuteƒewɔla, NW] menye.” Nusiwo gaɖo kpe Yehowa ƒe nuteƒewɔwɔ dzie nye nya siwo woŋlɔ ɖe Nyaɖeɖefia 16:5 be: “Wò amesi li, eye nènɔ anyi, wò [Nuteƒewɔla, NW] wòe nye dzɔdzɔetɔ.” Azɔ wogagblɔ na mí le Psalmo 145:17 be: “Yehowa enye dzɔdzɔetɔ le eƒe mɔwo katã me, kple [nuteƒewɔla, NW] le eƒe nuwɔwɔwo katã me.” Le nyateƒe me la, Yehowa ɖe dzesi le eƒe nuteƒewɔwɔ me ale gbegbe be Nyaɖeɖefia 15:4 (NW) gblɔ be: “Yehowa, amekae mavɔ̃ wò o, eye makafu wò ŋkɔ le esi wò ɖeka hɔ̃ koe nye nuteƒewɔla ta o?” Yehowa Mawu wɔa nuteƒe si etɔgbe meli o.

9, 10. Nuteƒewɔwɔ ŋuti nuŋlɔɖi kae le Yehowa ŋu le eƒe nuwɔwɔ kple Israel-dukɔa me?

⁹ Yehowa ƒe nuteƒewɔwɔ na eƒe amewo, vevietɔ le Israel-dukɔa ƒe ŋutinya me ŋuti ɖaseɖiɖi gbogbo aɖe li. Le ʋɔnudrɔ̃lawo ƒe ŋkekea me la, Israel de megbe le tadedeagu vavãtɔ ŋu zi geɖe, gake eve Yehowa enuenu eye wòɖe wo. (Ʋɔnudrɔ̃lawo 2:15-22) Le ƒe alafa atɔ̃ siwo katã me fiawo nɔ Israel si la, Yehowa ɖe eƒe nuteƒewɔwɔ na dukɔ ma fia.

¹⁰ Yehowa ƒe nuteƒewɔwɔ na wògbɔ dzi ɖi na eƒe dukɔa, abe alesi wòdze le Kronika II, 36:15, 16 ene be: “Yehowa, wo fofowo ƒe Mawu la, ɖo eƒe dɔlawo ɖe wo enuenu, elabena Yehowa kpɔ eƒe dukɔ kple eƒe nɔƒe la ta. Ke woɖe alɔme le Mawu ƒe ame dɔdɔawo ŋu, wodo vlo eƒe nyawo, eye woɖu fewu le eƒe nyagblɔɖilawo ŋu, vaseɖe esime Yehowa do dɔmedzoe ɖe eƒe dukɔ ŋu ɖe dzi, eye womete ŋu lé enu o.”

11. Kakaɖedzi alo akɔfafa kae Yehowa ƒe nuteƒewɔwɔ nana mí?

¹¹ Esi Yehowa ƒe nuteƒewɔwɔ ƒo ɖesiaɖe ta ta la, apostolo Paulo te ŋu ŋlɔe abe alesi wòle Romatɔwo 8:38, 39 ene be: “Menyae keŋ bena, eɖanye ku o, eɖanye agbe o; eɖanye mawudɔlawo o, eɖanye dziɖulawo o; eɖanye ŋusẽwo o; eɖanye nusi le fifi o, eɖanye nusi le vava ge o; eɖanye kɔkɔƒe o, eɖanye gogloƒe o, alo nuwɔwɔ bubu aɖe o, mate ŋu amã mí atso Mawu ƒe lɔlɔ̃, si le Kristo Yesu, mía Aƒetɔ me la gbɔ o.” Ẽ, Yehowa ka ɖe edzi na mí be: “Nyemele asi ɖe ge le mia ŋu o, eye nyemele mia gblẽ ge ɖi akpɔ o.” (Hebritɔwo 13:5) Nyateƒee, enyanya be Yehowa Mawu wɔa nuteƒe ɣesiaɣi la faa akɔ na ame!

Yesu Kristo, Vi Nuteƒewɔla La

12, 13. Mawu Vi la ƒe nuteƒewɔwɔ ŋuti ɖaseɖiɖi kae le mía si?

¹² Yesu Kristoe nye amesi srɔ̃ Yehowa bliboe le tenɔnɔ ɖe nuteƒewɔwɔ ƒe dodokpɔa nu me eye egale esɔsrɔ̃ dzi. Esɔ be apostolo Petro yɔ nya tso Psalmo 16:10 eye wòzãe ɖe Yesu Kristo ŋu le Dɔwɔwɔwo 2:27 be: “Magblẽ nye luʋɔ ɖe tsiẽƒe o, eye mana be, wò [nuteƒewɔla la, NW] nakpɔ nyunyɔ o.” Yesu Kristo dze woayɔe be “nuteƒewɔla.” Ewɔ nuteƒe na Fofoa kple Fiaɖuƒe si ŋugbe Mawu do la le nusianu me. Gbã Satana zã dodokpɔ siwo nye ɖokuitɔdinuwo te Yesu kpɔ be yeagblẽ eƒe nuteƒewɔwɔ me. Esi Abosam do kpo nu le ema me la, etrɔ ɖe yometiti ŋu, eye mlɔeba wòna wowu Yesu ɖe kufiatsotia ŋuti. Yesu mena ta le nuteƒewɔwɔ na eƒe Dziƒofofo, Yehowa Mawu, me gbeɖe o.—Mateo 4:1-11.

¹³ Yesu Kristo wɔa nuteƒe na eyomedzelawo le wɔwɔ ɖe ŋugbedodo si le Mateo 28:20 dzi me be: “Kpɔ ɖa, nye la meli kpli mi ŋkekeawo katã vaseɖe xexeame ƒe nuwuwu.” Le ŋugbedodo ma dzi wɔwɔ me la, eyi edzi le eƒe hamea kplɔm nuteƒewɔwɔtɔe tso Pentekoste ƒe 33 M.Ŋ. me ke vaseɖe fifia.

Ame Madeblibo Siwo Wɔ Nuteƒe

14. Nuteƒewɔwɔ ƒe kpɔɖeŋu kae Hiob ɖo ɖi?

¹⁴ Azɔ ame madeblibowo ya ɖe? Ðe woate ŋu awɔ nuteƒe na Mawua? Hiob ƒe ŋutinya ɖedzesi la li. Satana na nya la me kɔ nyuie le eya gome. Ðe Hiob wɔa nuteƒe na Yehowa Mawua, alo ɖokuitɔdidi ta koe wòsubɔnɛ ɖoa? Satana ƒu asi akɔ be yeate ŋu ana Hiob nagbe Yehowa ne yehe fukpekpe va Hiob dzi. Esi Hiob ƒe nunɔamesiwo katã, viawo katã, kple eƒe lãmesẽ gɔ̃ hã bu la, srɔ̃a ƒoe ɖe enu be: “Gbe Mawu, ne naku!” Gake Hiob wɔ nuteƒe, elabena egblɔ na srɔ̃a be: “ȃo nu, abe alesi nyɔnu abunetɔwo ƒoa nui ene. Míexɔ nu nyuiwo tso Mawu si, ɖe míaxɔ vɔ̃ hã oa? Le nusiawo katã me la Hiob mewɔ nuvɔ̃ kple eƒe nuyiwo o.” (Hiob 2:9, 10) Le nyateƒe me la, Hiob gblɔ na amesiwo be yewole akɔ fam nɛ be: “Togbɔ be [Mawu] wum hã la, eya sinu kpɔm mele.” (Hiob 13:15, New International Version) Mewɔ nuku o be Yehowa kpɔ ŋudzedze ɖe Hiob ŋu! Eyata Yehowa gblɔ na Temanitɔ Elifaz be: “Nye dɔmedzoe bi ɖe mia kple xɔ̃wò eveawo ŋu, elabena mieƒo nu nyui aɖeke le ŋunye abe nye dɔla Hiob ene o.”—Hiob 42:7, 10-16; Yakobo 5:11.

15. Ŋɔŋlɔawo me ɖaseɖiɖi kae li na mí le Yehowa Mawu subɔla geɖe ƒe nuteƒewɔwɔ ŋu?

¹⁵ Woate ŋu ayɔ ŋutsu kple nyɔnu xɔsetɔ siwo katã woɖɔ le Hebritɔwo ta 11 be nuteƒewɔlawo. Menye nyateƒe koe woto o ke wowɔ nuteƒe le xaxawo me hã. Eyata míexlẽ nu tso amesiwo “to xɔse me . . . [miã] nu na dzatawo, wotsi dzo ƒe ŋusẽ nu, wosi le yi nu . . . Ke ame bubuwo la woto fewuɖuɖu kple ƒoƒo ƒe dodokpɔ me, ke gawu la bablawo kple gaxɔ me nɔnɔ me; woƒu kpe wo, wodze wo kple laxalaxa, wote wo kpɔ, wowu wo kple yi, wonɔa tsatsam le alẽgbalẽwo kple gbɔ̃gbalẽwo me, le koɖoɖo, xaxa kple fukpekpe me” la ŋu.—Hebritɔwo 11:33-37.

16. Nuteƒewɔwɔ ƒe kpɔɖeŋu kae apostolo Paulo ɖo ɖi?

¹⁶ Kristotɔwo ƒe Hela Ŋɔŋlɔawo hã gblɔ apostolo Paulo ƒe kpɔɖeŋu ɖedzesi la. Egblɔ na Tesalonika Kristotɔwo le eƒe subɔsubɔdɔa ŋu wòsɔ be: “Miawoe nye ɖaseɖilawo kple Mawu hã, alesi míenɔ anyi [nuteƒewɔwɔtɔe, NW] kple dzɔdzɔe kple mokaka manɔŋui le mi amesiwo xɔe se la gbɔ.” (Tesalonikatɔwo I, 2:10) Paulo ƒe nuteƒewɔwɔ ŋuti kpeɖodzi bubuwo gale eƒe nya siwo le Korintotɔwo II, 6:4, 5, si xlẽ be: “Le nuwo katã me la míeɖea mía ɖokui fiana abe Mawu ƒe subɔlawo ene: le dzidodo geɖe me, le xaxawo me, le hiãkamewo me, le momenuvevewo me, le ƒoƒowo me, le gaxɔwo me, le zitɔtɔwo me, le agbagbadzedzewo me, le ŋudɔdɔwo me, le nutsitsidɔwo me.” Esiawo katã ɖo kpe edzi be bubu nɔ apostolo Paulo ŋu le esi wòwɔ nuteƒe ta.

Nuteƒewɔlawo le Egbeŋkekeawo Me

17. J. F. Rutherford ƒe nya kawoe ɖe alesi wòɖoe kplikpaa be yeawɔ nuteƒe fia?

¹⁷ Ne míetrɔ va egbeŋkekeawo me la, kpɔɖeŋu nyui si ŋu míeƒo nu tsoe le memamã gbãtɔ me li na mí. Se nya si wogblɔ ɖe agbalẽ si nye Worldwide Security Under the “Prince of Peace” ƒe axa 146 le tanya sue si nye “Nuteƒewɔwɔ le Gamenɔɣi” te ɖa. Wogblɔ le afima be: “Esi Gbetakpɔxɔ Habɔbɔa ƒe zimenɔla Joseph F. Rutherford nɔ eƒe nuteƒewɔwɔ na Yehowa ƒe habɔbɔa ɖem fia le eƒe gamenɔɣi la, eŋlɔ nya si gbɔna le December 25, 1918 dzi be: ‘Esi megbe tanana Babilon, eye medze agbagba nyateƒetɔe be masubɔ nye Aƒetɔ ta la, wodem gaxɔ me, eye esia dzɔ dzi nam. . . . Be manɔ gaxɔ me eye Wòakpɔ ŋudzedze ɖe ŋunye nyo nam sã wu be mana ta alo awɔ ɖeka kple Lã la ne mavo eye xexe bliboa katã nakpɔ ŋudzedze ɖe ŋunye.’”b

18, 19. Nuteƒewɔwɔ deŋgɔ le egbeŋkekeawo me ŋuti kpɔɖeŋu kawoe li na mí?

¹⁸ Kristotɔ bubu geɖe siwo do dzi le yometiti me ƒe nuteƒewɔwɔ ƒe kpɔɖeŋu nyuiwo li. Nuteƒewɔla mawo ƒe ɖewoe nye Yehowa ƒe Ðasefo siwo nɔ Germania le Nazi-dziɖuɣi, abe alesi woɖee fia le Purple Triangles ƒe video, si ƒe gbogbo aɖe womã le Eŋlisigbe me la mee ene. Anyo be míaɖo ŋku Yehowa ƒe Ðasefo nuteƒewɔla geɖe siwo le Afrika, abe esiwo le Malawi ene, hã dzi. Gaxɔŋudzɔla aɖe gblɔ le Ðasefoawo ƒe nuteƒewɔwɔ ŋu le afima be: “Womana ta gbeɖe o. Ðeko wole agbɔ sɔm ɖe edzi.”

¹⁹ Màte ŋu axlẽ Yearbook of Jehovah’s Witnesses siwo do nyitsɔ laa eye nuteƒewɔwɔ si Kristotɔ vavãwo, abe esiwo le Greece, Mozambique, kple Poland ene, ɖe fia mawɔ dɔ ɖe dziwò o. Wowɔ funyafunya wo dometɔ geɖe vevie; wowu ɖewo hã. Ŋutsu Kristotɔ asieke siwo nɔ Ethiopia, amesiwo nɔ te ɖe nuteƒewɔwɔ ƒe dodokpɔa nu vaseɖe esime wowu wo la ƒe nɔnɔmetatawo dze le 1992 Yearbook ƒe axa 177. Esi míenye Yehowa Ðasefowo ta la, ɖe medzɔa dzi na mí be kpɔɖeŋu nyui gbogbo siawo li be woaʋã mí míanɔ te ɖe nuteƒewɔwɔ ƒe dodokpɔa nu oa?

20. Ne míeyi edzi wɔ nuteƒe la, nukae ado tso eme?

²⁰ To tenɔnɔ ɖe tetekpɔwo kple nyaƒoɖeamenuwo nu me la, míetua bubu si le mía ŋu ɖo ɖe edzi. Ekema ameka ƒe akpa dzie míedi be woakpɔ mí le le nuteƒewɔwɔ ƒe nya la me? Ne míenɔ te ɖe nuteƒewɔwɔ ƒe dodokpɔa nu la, ke míede Yehowa Mawu dzi le nya la me eye míaɖee afia be Satana Abosam nye alakpatɔ vɔ̃ɖi abe alesi wòle hã ene! Míato esia me ana mía Wɔla, Yehowa Mawu, nakpɔ ŋudzedze ɖe mía ŋu eye míaxɔ agbe mavɔ nɔnɔ le dzidzɔ me ƒe teƒeɖoɖo la. (Psalmo 37:29; 144:15b) Nusi wòbia be woanɔ te ɖe nuteƒewɔwɔ ƒe dodokpɔa nu mee míagadzro.

[Etenuŋɔŋlɔwo]

Aleke Nàɖo Wo Ŋui?

◻ Nukata nuteƒewɔwɔ sesẽna?

◻ Nukata woate ŋu agblɔ be “nuteƒewɔwɔ” nye nya tɔxɛ?

◻ Ame madeblibowo ƒe nuteƒewɔwɔ ŋuti kpɔɖeŋu kawoe le Ŋɔŋlɔawo me na mí?

◻ Egbeŋkekeawo me nuteƒewɔwɔ ƒe kpɔɖeŋu nyui kawoe li na mí?

[Nɔnɔmetata si le axa 11]

Charles Taze Russell

[Nɔnɔmetata si le axa 12]

Yesu nye “nuteƒewɔla” na Yehowa nyateƒe

[Nɔnɔmetata si le axa 13]

Hiob mede blibo o gake ewɔ nuteƒe na Mawu

[Nɔnɔmetata si le axa 14]

Paulo ɖo nuteƒewɔwɔ na Yehowa ƒe kpɔɖeŋu nyui aɖe ɖi