Asitɔtrɔ Siwo Mewɔ Le Agbe Me La Ðe Vi Nam

Abe ale si James A. Thompson gblɔe ene

Wodzim le anyiehe United States le ƒe 1928 me. Ɣemaɣi la, wode se be yevuwo kple ameyibɔwo meganɔ teƒe ɖeka o. Wodea ame sia ame si da se sia dzi la gaxɔ me, alo hea to si gasesẽ wu nɛ.

ƔEMAƔI le United States ƒe akpa vovovowo la, eva hiã be Yehowa Ðasefo siwo nye yevuwo la ƒe hamewo, nutome suewo, kple nutome gãwo nanɔ vovo na Ðasefo siwo nye ameyibɔwo tɔwo. Le ƒe 1937 me la, fofonye zu ameyibɔ hame si nɔ Chattanooga, Tennessee, la ƒe hamesubɔla (si woyɔna fifia be hamemetsitsiwo ƒe ha ƒe ɖoɖowo gbɔ kpɔla). Eye Henry Nichols nye yevu hame la ƒe hamesubɔla.

Meɖoa ŋku nu dodzidzɔname geɖe siwo dzɔ esime menye ɖevi la dzi. Ɣemaɣi la, menɔa Papa gbɔ le míaƒe xɔ godo ne eya kple Nɔviŋutsu Nichols wole dze ɖom. Togbɔ be nyemesea nya siwo katã wogblɔna la gɔme o hã la, edoa dzidzɔ nam be manɔ Papa gbɔ anɔ to ɖom esime woa kple nɔviŋutsua wole dze ɖom tso mɔ nyuitɔ si dzi woato awɔ gbeƒãɖeɖedɔa le nɔnɔme si nɔ anyi ɣemaɣi me la ŋu.

Ƒe aɖewo do ŋgɔ na esia, le ƒe 1930 me la, nu wɔnublanui aɖe dzɔ ɖe míaƒe ƒomea dzi. Dada, si xɔ ƒe 20 ko ɣemaɣi la, ku. Ƒe eve koe mexɔ, eye eva hiã be Papa ɖeɖe nakpɔ mía kple nɔvinyenyɔnu tsitsitɔ si xɔ ƒe ene, si ŋkɔe nye Doris, la dzi. Togbɔ be Papa xɔ nyɔnyrɔ ɣeyiɣi kpui aɖe koe nye ema hã la, enɔ ŋgɔyiyi nyuiwo wɔm le nyateƒea me.

Kpɔɖeŋu Siwo Kpɔ Ŋusẽ Nyui Ðe Nye Agbenɔnɔ Dzi

Le ƒe 1933 me la, Papa do go nɔvinyɔnu Kristotɔ nyui aɖe si ŋkɔe nye Lillie Mae Gwendolyn Thomas, eye eteƒe medidi hafi woɖe wo nɔewo o. Papa kple danye evelia siaa ɖo kpɔɖeŋu nyui aɖe ɖi na mía kple Doris le Yehowa subɔsubɔ nuteƒewɔwɔtɔe me.

Le ƒe 1938 me la, wobia tso Yehowa Ðasefowo ƒe hamewo si be woada asi ɖe tameɖoɖo kplikpaa aɖe si nye be Yehowa Ðasefowo ƒe dɔwɔƒegã si le Brooklyn, New York, la nanɔ hamemetsitsiwo tiam, ke menye be hamea me tɔwo nada akɔ atia wo o. Togbɔ be Chattanooga hamea me tɔ aɖewo medi be yewoalɔ̃ ɖe tɔtrɔ sia dzi o hã la, Papa ya kpe asi ɖe habɔbɔa ƒe tɔtrɔ sia ŋu tso dzi blibo me. Eƒe nuteƒewɔwɔ ƒe kpɔɖeŋua—tsɔ kpe ɖe ale si Dada wɔ nu kplii aduadu tso dzi blibo me ŋu—kpe ɖe ŋunye va se ɖe egbe.

Nyɔnyrɔxɔxɔ Kple Ɣeyiɣiawo Katã Ƒe Subɔsubɔdɔ

Le ƒe 1940 me la, míaƒe hamea me tɔ geɖewo da bɔs zɔ mɔ yi nutome gã takpekpe si wowɔ le Detroit, Michigan. Míaƒe bɔs la me tɔ ʋɛ aɖewo xɔ nyɔnyrɔ le takpekpea me. Wo dometɔ aɖewo menya nu si tae nye ya nyemexɔ nyɔnyrɔ o, evɔ wònye be medze gbeƒãɖeɖedɔa gɔme tso esime mexɔ ƒe atɔ̃ ke eye metsɔa dzo ɖe subɔsubɔdɔa ŋu ale gbegbe hafi.

Esi wobia nyam tso eŋu la, meɖo eŋu be, “Nyemese nu siwo katã nyɔnyrɔxɔxɔ lɔ ɖe eme la gɔme o.” Papa see, eye esia wɔ nuku nɛ ŋutɔ. Tso ɣemaɣi la, edze agbagba etɔxɛ be yeakpe ɖe ŋunye mase nu si nyɔnyrɔxɔxɔ fia kple nu si tae wòle vevie ɖo la gɔme. Ɣleti ene megbe, le October 1, 1940 dzi, esime vuvɔ nɔ wɔwɔm la, wona nyɔnyrɔm ɖe ta aɖe si le Chattanooga ƒe gbɔto la me.

Tso esime mexɔ ƒe 14 la, mewɔa mɔɖeɖedɔa ne míeke mɔ le suku le dzomeŋɔliwo me. Meɖea gbeƒã le duvi siwo le Tennessee la kple Georgia nuto, si te ɖe afi ma ŋu, la me. Mefɔna kaba, ɖaa ŋdɔnuɖuɖu ɖe asi, eye meyina ɖatsoa keteke alo bɔs si hona ŋdi ga 6:00 la heyina ɖe anyigbamama la me. Megbɔna vaa aƒe me ɣetrɔ ga 6:00 me lɔƒo. Zi geɖe la, nuɖuɖu si metsɔna ɖe asi la vɔna xoxoxo hafi ŋdɔnuɖuɣi ɖona. Togbɔ be ga nɔa asinye hã la, nyemetea ŋu yia nudzraƒe siwo le nutoa me ɖaƒlea nuɖuɖu o, le esi menye ameyibɔ ta. Gbe ɖeka la, mege ɖe fiase aɖe me be maƒle ice-cream eye wobia tso asinye be mado go. Yevu nyɔnu dɔmenyotɔ aɖe ƒle ɖeka hetsɔe vae nam le gota.

Esi medze sekɛndrisuku (lycée) gɔme la, ame siwo le Anyiehe United States (si woyɔ kpuie ko be Anyiehe la) va nɔ wo ɖokuiwo ƒom ɖe dumeviwo ƒe gomenɔamesiwo ƒe sɔsɔminasɔe habɔbɔwo me geɖe wu. Habɔbɔwo, abe Dukɔa Me Ameyibɔwo Ƒe Ŋgɔyiha (NAACP) ene, dea dzi ƒo na sukuviwo be woaʋli dumeviwo ƒe gomenɔamesiwo ta. Woƒonɛ ɖe mía nu be míaɖo habɔbɔ mawo me. Ameyibɔwo ƒe suku geɖewo nɔ didim be sukuviawo katã naɖo ha mawo me, suku si medena hã le eme. Woƒo nya ɖe nunye be mawɔ esia hegblɔ nam be “made mía tɔ ameyibɔwo dzi.” Gake megbe, eye meɖe eme na wo be Mawu mekpɔa ame ŋkume o, eye mekpɔa ŋudzedze ɖe ŋutigbalẽ aɖe tɔwo ŋu wu bubuwo o. Eya ta mele mɔ kpɔm be Mawu ava ɖe madzɔmadzɔnyenye ɖe sia ɖe ɖa.—Yoh. 17:14; Dɔw. 10:34, 35.

Esi mewu sekɛndrisuku nu megbe kpuie la, metso nya me be maʋu ayi New York City. Ke hã esi menɔ mɔ dzi yina la, meɖi le Philadelphia, Pennsylvania, be masrã xɔ̃nye aɖewo siwo medo go le takpekpe me ɣeyiɣi aɖe do ŋgɔ la kpɔ. Hame si le afi ma ye nye hame si me mekpɔ yevuwo kple ameyibɔwo tsaka le zi gbãtɔ. Dzikpɔla mɔzɔla va srã hamea kpɔ, eye wòɖe kpɔm hegblɔ nam be woade dɔ aɖe asi nam mawɔ le kpekpe si akplɔe ɖo me. Esia wɔe be metso nya me be manɔ afi ma.

Xɔlɔ̃ siwo medze le Philadelphia la dometɔ ɖekae nye nɔvinyɔnu ɖetugbui aɖe si ŋkɔe nye Geraldine White—si meva yɔna emegbe be Gerri. Enya Biblia nyuie eye wòbi ɖe dzeɖoɖo kple aƒemenɔlawo le tso aƒe me yi aƒe me subɔsubɔdɔa me ŋutɔ. Nu si gado dzidzɔ nam wue nye be enye eya hã ƒe taɖodzinu be yeazu mɔɖela. Míeɖe mía nɔewo le April 23, 1949 dzi.

Wokpe Mí Na Gilead Suku Dede

Le gɔmedzedzea me la, míaƒe taɖodzinue nye be míade Gilead Sukua eye míayi aɖasubɔ le duta abe dutanyanyuigblɔlawo ene. Le ɣeyiɣi siawo katã me la, míenɔ asitɔtrɔwo wɔm be míadze na Gilead Sukua dede. Eteƒe medidi o, wobia tso mía si be míaʋu ayi Lawnside, New Jersey; emegbe míeyi Chester, Pennsylvania; eye mlɔeba, míeyi Atlantic City, New Jersey. Esime míenɔ Atlantic City la, míekpe agbalẽ ɖo be míade Gilead Sukua, elabena míeɖe mía nɔewo ƒe evee nye ema, si wɔe be míedze abia be míade sukua. Gake womete ŋu kpe mí enumake o. Nu ka tae?

Le ƒe 1950 ƒeawo ƒe gɔmedzedze me la, wonɔ ɖekakpui geɖe dzi zim be woazu asrafowo ale be woaɖo wo ɖe Korea ʋa si nɔ edzi yim la wɔƒe. Edze abe dɔwɔƒe si tiaa dukɔmeviwo na asrafodɔwɔwɔ dzizizitɔe la tɔ ŋku mí Yehowa Ðasefo koŋ le míaƒe akpaɖekedzimademade ta ene. Mlɔeba la, ʋɔnudrɔ̃la aɖe va fi tofi nam be Amerika Numekuƒegã (si woyɔna be FBI) la wɔ numekuku tso ŋunye le adzame heɖo kpe edzi be nyemedea akpa aɖeke dzi le dunyahenyawo me o. Eya ta le January 11, 1952 dzi la, Dukplɔha Ƒe Nyagbugbɔdrɔ̃ƒe la tso nya me be woɖem le asrafodɔ me esi menye subɔsubɔha ƒe subɔla ta.

Le ƒe ma ƒe August me la, wokpe mía kple Gerri be míade Gilead Sukua ƒe klass 20 lia, eye míedze egɔme le September me. Le sukua deɣi katã la, míenɔ mɔ kpɔm be woaɖo mí ɖe duta ne míewu sukua nu. Nɔvinyenyɔnu tsitsitɔ, Doris, wu Gilead Sukua ƒe klass 13 lia nu eye wònɔ subɔsubɔm le Brazil. Aleke gbegbe wòwɔ nuku na mía kple Gerri ye nye esi be wode dɔ asi na mí be míawɔ nutome sue dzi kpɔkpɔ dɔa, anɔ ameyibɔ hame siwo nɔ Alabama ƒe anyiehe la srãm kpɔ! Esia te ɖe mía dzi vie, elabena míaƒe dzi ku ɖe subɔsubɔ le duta ŋu vevie.

Hame gbãtɔ si míesrã kpɔe nye Huntsville. Esi míeɖo dua me la, míeyi ɖe nɔvinyɔnu Kristotɔ aɖe si gbɔ míadze la ƒe aƒe me. Esi míenɔ míaƒe agbawo fɔm le aƒea me yim la, míesee nɔvinyɔnua nɔ gbɔgblɔm na ame aɖe le telefon dzi be, “Ðeviawo va ɖo.” Ƒe 24 koe míexɔ eye míaƒe dzedzeme na wòdze abe ɖe míexɔ ƒe ma gɔ̃ hã haɖe o ene. Wotsɔ ŋkɔ na mí be Ðeviawo, eye ŋkɔ siae woyɔna na mí le ɣeyiɣi siwo katã míesubɔ nutome sue ma la me.

Woyɔa Anyiehe la zi geɖe be Biblia Nuto, elabena ame siwo le afi ma la dometɔ akpa gãtɔ dea bubu Biblia ŋu ŋutɔ. Eya ta zi geɖe la, míedzea dzeɖoɖo gɔme kple ɖaseɖinya si le akpa etɔ̃ me:

(1) Nuƒoƒo kpuie tso nu gbegblẽ siwo le dzɔdzɔm le xexea me ŋu.

(2) Egbɔkpɔnu si ŋu Biblia ƒo tsoe.

(3) Nu si Biblia gblɔ be míawɔ.

Eyome míenaa Biblia srɔ̃gbalẽ si sɔ. Le ale si ɖaseɖimɔnu sia tse kui ta la, wode dɔ asi nam le ƒe 1953 me le Xexeme Yeye Habɔbɔ Takpekpe si wowɔ le New York la me be mawɔ esia ƒe wɔwɔfia.

Eteƒe medidi o, wode dɔ asi nam le ƒe 1953 ƒe dzomeŋɔli me be masubɔ ameyibɔwo ƒe nutome sue siwo le Anyiehe la abe nutome gã dzikpɔla ene. Míaƒe anyigbamama la lɔ Virginia nuto bliboa ɖe eme hekeke tso afi ma yi Florida heyi ɖe keke ɣetoɖoƒe le Alabama kple Tennessee ke. Le nyateƒe me la, ehiã be dzikpɔla mɔzɔla siwo nɔ anyi ɣemaɣi la nanye ame siwo trɔna ɖe nɔnɔmeawo ŋu bɔbɔe. Le kpɔɖeŋu me, zi geɖe la, míedzea aƒe siwo me tsileƒe mele o me, eye le esia ta, míelea tsi le tsilezɔ sue aɖe si nɔa dzodoƒe, le gamlea megbe la me. Esia doa dzidzɔ na mí, elabena afi mae nyea aƒea ƒe teƒe si xɔa dzo nyuie wu!

Akɔkpekpe Kple Se Si Wode Be Yevuwo Kple Ameyibɔwo Meganɔ Teƒe Ðeka O

Subɔsubɔ le Anyiehe la bia nuŋububu nyuie do ŋgɔ kple aɖaŋudzedze hafi nuwo natsɔ afɔ. Womeɖe mɔ be ameyibɔwo natsɔ woƒe awuwo ayi nunyaƒe be woanya na wo o. Eya ta Gerri yia afi ma hegblɔna be awuawo nye “Aƒenɔ Thompson” tɔ. Edze abe ame geɖe susuna be gbɔvi ye Gerri nye ene, eye eƒe aƒenɔ ye nye “Aƒenɔ Thompson.” Ne wowɔ ɖoɖo be nutome gã dzikpɔlawo naɖe sinima si nye The New World Society in Action (La Société du Monde Nouveau en action) afia la, meƒoa ka na fiase si me wohayana sinimaɖekpe le la eye mehayaa sinimaɖekpe gã aɖe ɖe “Aƒetɔ Thompson” ƒe ŋkɔ me. Emegbe la, meyina fiasea me ɖakɔa sinimaɖekpea. Míedea bubu amewo ŋu ɣesiaɣi, eye zi geɖe la, esia wɔnɛ be womeɖea fu na mí le subɔsubɔdɔa me o.

Le Anyiehe, afi si menɔ subɔsubɔm le la, fuléle ƒomevi aɖe hã nɔ anyi. Ame geɖe melɔ̃a ame siwo tso Dziehe la ƒe nya kura o. Nutoa me nyadzɔdzɔgbalẽ aɖe ka nya ta gbe ɖeka be James A. Thompson, Jr., si tso Watchtower Bible and Tract Society of New York la aƒo nuƒo aɖe le takpekpe aɖe me. Esia na ame aɖewo susui be New York tɔe menye, eya ta wogbe be yewomagaɖe mɔ na mí míazã sukuxɔ gã aɖe si míebia be míazã la o. Eya ta meyi sukutatɔawo gbɔ eye meɖe eme na wo be Chattanooga ye mede suku le. Ema megbe la, woɖe mɔ na mí míewɔ míaƒe nutome sue takpekpea le afi ma.

Le ƒe 1950 ƒeawo ƒe domedome la, ameƒomevi vovovowo dome nyaʋiʋliwo nu nɔ sesẽm ɖe edzi, eye amewo wɔa ŋutasẽnuwo ɣeaɖewoɣi. Le ƒe 1954 me la, dɔme vea Ðasefo aɖewo ne ameyibɔ aɖeke meva ƒo nuƒo le takpekpewo me o. Míede dzi ƒo na mía nɔvi ameyibɔwo be woagbɔ dzi ɖi. Le dzomeŋɔli si kplɔe ɖo me la, wode nuƒo asi nam be maƒo le takpekpe me. Le ƒe siwo kplɔe ɖo me la, wode nuƒowo asi na nɔviŋutsu ameyibɔ siwo le Anyiehe la dometɔ geɖewo.

Ɣeyiɣi aɖe megbe la, ameƒomevi vovovowo ƒe ŋutasẽse le wo nɔewo ŋu dzi ɖe kpɔtɔ le Anyiehe la, eye nɔvi yevuwo kple nɔvi ameyibɔwo va te ƒuƒoƒo ɖekae le kpekpewo me. Esia bia be woaɖɔli hame na gbeƒãɖela aɖewo ahawɔ asitɔtrɔ le hamewo ƒe anyigbamamawo kpakple nɔviŋutsu siwo nɔ ŋgɔ xɔm la ƒe agbanɔamedziwo ŋu. Nɔvi yevu aɖewo kple nɔvi ameyibɔ aɖewo mekpɔ dzidzɔ ɖe tɔtrɔ yeyea ŋu o. Gake nɔvi akpa gãtɔ nye ameŋkumemakpɔlawo abe mía Fofo si le dziƒo ene. Le nyateƒe me la, nɔvi geɖewo nye xɔlɔ̃ veviwo togbɔ be woƒe ŋutigbalẽwo to vovo hã. Míaƒe ƒomea kpɔ esia teƒe le ƒe 1930 ƒeawo kple ƒe 1940 ƒeawo me le nye ɖevime.

Dɔdeasi Yeye

Le January 1969 me la, wokpe mía kple Gerri be míayi aɖasubɔ le Guyana, Anyiehe Amerika, eye míexɔ dɔdeasia alɔevee. Gbã la, míeyi Brooklyn, New York, afi si wona hehem le be mate ŋu akpɔ gbeƒãɖeɖedɔa dzi le Guyana. Míeɖo afi ma le July 1969 me. Ƒe 16 sɔŋ ye míewɔ mɔzɔzɔdɔa, eye esia wɔe be tɔtrɔ gã aɖe ŋutɔe wònye na mí be míasubɔ le teƒe ɖeka ko. Gerri zãa eƒe ɣeyiɣi akpa gãtɔ le gbeadzisubɔsubɔdɔa me abe dutanyanyuigblɔla ene, eye nye hã mewɔa dɔ le alɔdzedɔwɔƒea.

Mewɔa dɔ vovovo le alɔdzedɔwɔƒea. Meƒoa gbewo heɖea atiwo ŋu, melɔa agbalẽ siwo hame 28 dɔ la yina na wo, eye meɖoa nyatakakawo ɖe habɔbɔa ƒe dɔwɔƒegã le Brooklyn. Mewɔa dɔ gaƒoƒo 14 va ɖo gaƒoƒo 15 gbe sia gbe. Dɔa sesẽ na mí ame evea siaa, gake míekpɔa dzidzɔ le ewɔwɔ me. Esi míeva Guyana la, gbeƒãɖela 950 ye nɔ dukɔa me; egbea la, gbeƒãɖela siwo wu 2,500 ye li.

Togbɔ be yame ƒe nɔnɔme nyoameŋuwo kple atikutsetse vivi kpakple amagbe siwo míeɖu kpɔ o ɖuɖu doa dzidzɔ na mí hã la, nu si nana míekpɔa dzidzɔ vavãtɔe nye ale si ɖokuibɔbɔla siwo Biblia me nyateƒea ƒe tsikɔ le wuwum la nɔ nu srɔ̃m tso Mawu Fiaɖuƒea ŋu. Zi geɖe la, Gerri wɔa Biblia nusɔsrɔ̃ 20 kwasiɖa sia kwasiɖa, eye ame siwo míesrɔ̃ Biblia kplii la dometɔ geɖe wɔ ŋgɔyiyi va xɔ nyɔnyrɔ. Le ɣeyiɣi aɖe megbe la, wo dometɔ aɖewo va zu mɔɖelawo kple hamemetsitsiwo, eye wo dometɔ aɖewo gɔ̃ hã de Gilead sukua heva zu dutanyanyuigblɔlawo.

Kuxi Sesẽwo, Vevietɔ Lãmesẽkuxiwo

Le ƒe 1983 me la, dzinyelawo, siwo nɔ United States la, va hiã kpekpeɖeŋu. Mía kple Gerri kpakple Doris míewɔ ƒometakpekpe le esia ŋu. Doris, si wɔ dutanyanyuigbɔgblɔdɔa ƒe 35 sɔŋ le Brazil la, tiae be yeatrɔ ayi aɖakpɔ wo dzi. Ebia be, nu ka tae dutanyanyuigblɔla eve sɔŋ nadzudzɔ subɔsubɔdɔa esi ame ɖeka ate ŋu akpɔ mía dzilawo dzi hafi? Tso esime mía dzilawo ku la, Doris tsi Chattanooga hele subɔsubɔm abe mɔɖela vevi ene.

Le ƒe 1995 me la, wokpɔ tsinyetoe me kansa le ŋunye eye esia na wòva hiã be matrɔ ayi United States. Míeyi ɖanɔ Goldsboro, le Dziehe Carolina, elabena du sia le Tennessee, afi si nye ƒometɔwo le la, kple Pennsylvania, afi si Gerri ƒe ƒometɔwo le la, ƒe domedome. Nye kansa la ka ɖe eme vie, eye míele subɔsubɔm le Goldsboro hame aɖe me abe mɔɖela vevi siwo mele lãmesẽ nyui me o ene.

Ne metrɔ kpɔ ƒe 65 kple edzivɔ siwo míetsɔ wɔ ɣeyiɣiawo katã ƒe subɔsubɔdɔa la, medaa akpe na Yehowa tso dzi blibo me be eyra mía kple Gerri ale be míete ŋu wɔ asitɔtrɔwo le esubɔsubɔ me. Nyateƒee David to esi wògblɔ be: “[Yehowa awɔ] nuteƒe na ame si wɔa nuteƒe”!—2 Sam. 22:26, NW.

[Nɔnɔmetata siwo le axa 3]

Fofonye kple Nɔviŋutsu Nichols ɖo kpɔɖeŋu nyui aɖe ɖi nam

[Nɔnɔmetata siwo le axa 4]

Mía kple Gerri, míedzra ɖo hena Gilead Sukua dede, ƒe 1952

[Nɔnɔmetata siwo le axa 5]

Le Gilead Sukua dede megbe la, wode dɔ asi na mí be míawɔ mɔzɔzɔdɔa le Anyiehe United States

[Nɔnɔmetata si le axa 6]

Dzikpɔla mɔzɔlawo kple wo srɔ̃wo le dzadzram ɖo na yevuwo kple ameyibɔ siaa ƒe takpekpe gã aɖe, ƒe 1966

[Nɔnɔmetata si le axa 7]

Dutanyanyuigbɔgblɔdɔa wɔwɔ le Guyana nye dzidzɔ gã aɖe na mí