“Minɔ Te Sesĩe, Maʋamaʋã”

1-2. Mɔ ka nue Kristotɔwo le abe dziƒoxɔ kɔkɔ ene le? (1 Korintotɔwo 15:58)

LE ƑE 1978 mea, wotu dziƒoxɔ tuɖedzi 60 sɔŋ le Tokyo le Japan. Esi wònye be anyigba ʋuʋuna le dugã ma me enuenu taa, amewo bia wo ɖokuiwo be ɖe wòanya wɔ be xɔ ma nanɔ te ɖe anyigbaʋuʋu mawo nu hã. Nu kae xɔtulawo wɔ be xɔa nate ŋu anɔ te ɖe anyigbaʋuʋu nu? Wotui wòsẽ, gake wogatrɔ asi le eŋu hã be wòate ŋu aviã vie ayi ɖusi alo miame ne anyigba le ʋuʋum, gake mamu o. Míate ŋu atsɔ Kristotɔwo asɔ kple dziƒoxɔ kɔkɔ ma. Le mɔ ka nu?

² Ehiã be Kristotɔ nanɔ te sesĩe eye wòate ŋu atrɔ ɖe nɔnɔmeawo ŋu ne eva hiã. Ehiã be wòatɔ afɔ to sesĩe eye wòaɖoe kplikpaa awɔ ɖe Yehowa ƒe sewo kple nudidiwo dzi. (Xlẽ 1 Korintotɔwo 15:58.) “Elɔ̃na faa ɖoa to” eye menaa ta o. Ehiã hã be wòanye “nugɔmesela” alo wòate ŋu atrɔ ɖe nɔnɔmeawo ŋu ne ebia nenema. (Yak. 3:17) Kristotɔ si tea ŋu wɔa nu siawo dana sɔ le mɔ sia nu be, menɔa kpaɖii akpa alo ɖea mɔ ɖe nu sia nu ko ŋu o. Le nyati sia mea, míadzro nu siwo míawɔ be míate ŋu anɔ te sesĩe maʋamaʋãe me. Azɔ hã, míakpɔ nu atɔ̃ siwo Satana wɔna be wòasesẽ na mí be míanɔ te sesĩe, kple ale si míawɔ atsi tsitre ɖe eŋu.

 3. Se kawoe Senala Gãtɔa de na mí le Dɔwɔwɔwo 15:28, 29?

³ Yehowa, ame si nye Senala Gãtɔ, de se siwo me kɔ eye wo gɔmesese le bɔbɔe na eƒe amewo. (Yes. 33:22) Le kpɔɖeŋu me, dɔdzikpɔha si nɔ anyi le ƒe alafa gbãtɔ mea de dzesi nu etɔ̃ siwo me wòhiã be Kristotɔ nanɔ te sesĩe le. Woawoe nye: (1) míaƒo asa na trɔ̃subɔsubɔ ahasubɔ Yehowa ɖeka ko, (2) míabu ʋu nu kɔkɔe, eye (3) míanɔ agbe nyui abe ale si Biblia fia míi ene. (Xlẽ Dɔwɔwɔwo 15:28, 29.) Aleke Kristotɔwo ate ŋu aɖo to Yehowa le nu etɔ̃ siawo me?

 4. Mɔ ka nue míeɖenɛ fiana le be míesubɔa Yehowa ɖeka ko? (Nyaɖeɖefia 4:11)

⁴ Míeƒoa asa na trɔ̃subɔsubɔ, eye míesubɔa Yehowa ɖeka ko. Yehowa de se na Israel-viwo be woasubɔ ye ɖeka ko. (5 Mose 5:6-10) Eye esi Abosam te Yesu kpɔa, Yesu na eme kɔ nɛ be Yehowa ɖeka ko wòle be míasubɔ. (Mat. 4:8-10) Esia taa, mímesubɔa trɔ̃wo o. Azɔ hã, mímesubɔa amegbetɔ o. Le kpɔɖeŋu me, mímewɔa nu ɖe subɔsubɔhakplɔlawo, dunyahelawo, fefewɔla xɔŋkɔwo kple hadzila bibiwo ŋu abe mawuwoe wonye ene o. Míenɔa Yehowa, ame si “wɔ nuwo katã,” ƒe akpa dzi eye míesubɔa eya ɖeka ko.—Xlẽ Nyaɖeɖefia 4:11.

 5. Nu ka tae míewɔna ɖe se si Yehowa de be míabu agbe kple ʋu nu kɔkɔewoe dzi?

⁵ Míewɔna ɖe se si Yehowa de be míabu agbe kple ʋu nu kɔkɔewoe dzi. Nu si tae nye be, Yehowa gblɔ be ʋu le tsitre ɖi na agbe, eye wònye nunana tso ye gbɔ. (3 Mose 17:14) Esi Yehowa ɖe mɔ zi gbãtɔ be amegbetɔwo nate ŋu aɖu lãa, ede se be woagaɖu eƒe ʋu o. (1 Mose 9:4) Ede se ma ke na Israel-viwo le Mose ƒe Sea me. (3 Mose 17:10) Etsɔ eƒe gbɔgbɔ ʋã dɔdzikpɔha si nɔ anyi le ƒe alafa gbãtɔ me wode se na Kristotɔwo katã be ‘woatsri ʋu.’ (Dɔw. 15:28, 29) Míewɔna ɖe se sia dzi ne míetso nya me le dɔdamɔnu si míalɔ̃ be woazã na mí la ŋu.b

 6. Nu kawoe míawɔ be míanɔ agbe nyui ɣesiaɣi abe ale si Yehowa dii ene?

⁶ Míewɔna ɖe Yehowa ƒe dzidzenu kɔkɔ siwo ku ɖe agbe nyui nɔnɔ ŋua dzi. (Heb. 13:4) Apostolo Paulo ɖo aɖaŋu na mí be ‘míawu’ míaƒe ŋutinuwo. Esia fia be ele be míawɔ nu sia nu si míate ŋui be míaɖe dzodzro vɔ̃ ɖe sia ɖe si va mía me la ɖa. Míeƒoa asa na nu siwo ate ŋu akplɔ mí ade gbɔdɔdɔ manɔsenu me la kpɔkpɔ alo wɔwɔ. (Kol. 3:5; Hiob 31:1) Ne wote mí kpɔa, míeɖea afɔ kaba ƒoa asa na nuŋububu kple nuwɔna ɖe sia ɖe si agblẽ mía kple Yehowa dome.

 7. Nu kae wòle be míaɖoe kplikpaa be míawɔ, eye nu ka tae?

⁷ Yehowa di be ‘míaɖo to ye tso dzi me.’ (Rom. 6:17) Eƒe mɔfiamewo ɖea vi na mí ɣesiaɣi. Mímate ŋu atiae be míawɔ eƒe se aɖewo dzi, evɔ míagbe ɖewo dzi wɔwɔ o. (Yes. 48:17, 18; 1 Kor. 6:9, 10) Ele be míaɖoe kplikpaa be míawɔ nu siwo dzea Yehowa ŋu, eye míato míaƒe nuwɔnawo dzi aɖee afia be míaƒe susu wɔ ɖeka kple hakpalaa tɔ esi wògblɔ be: “Meɖoe le nye dzi me be mawɔ wò ɖoɖowo dzi, mawɔ wo dzi ɖaa va se ɖe nuwuwu.” (Ps. 119:112) Gake Satana dzea agbagba be yeana toɖoɖo Yehowa nasesẽ na mí. Mɔ kawo dzie wòtona wɔa esia?

 8. Aleke Satana le yometiti zãm be yeana wòasesẽ na mí be míawɔ nu si dzea Yehowa ŋu?

⁸ Yometiti. Satana nana amewo tia mía yome, wosẽa ŋuta le mía ŋu, eye wodzua mí ale be wòasesẽ na mí be míawɔ nu si dzea Yehowa ŋu. Eƒe taɖodzinue nye be “yeavuvu mí” alo yeagblẽ mía kple Yehowa dome. (1 Pet. 5:8) Ezã mɔnu siawo ɖe Kristotɔ siwo nɔ anyi le ƒe alafa gbãtɔ mea ŋu. Wodo ŋɔdzi na wo, woƒo wo, eye wowu wo dometɔ aɖewo gɔ̃ hã le esi woɖoe kplikpaa be yewoayi edzi awɔ Yehowa ƒe sewo dzi ta. (Dɔw. 5:27, 28, 40; 7:54-60) Satana gakpɔtɔ le mɔnu ma ke zãm egbea. Esia dze ƒãa le ale si wole fu wɔm mía nɔviwo le Russia kple dukɔ bubuwo me kpakple ale si amewo tsia tsi tre ɖe mí ame ɖekaɖekawo ŋu me.

 9. Gblɔ kpɔɖeŋu aɖe si ɖee fia be ehiã be míanɔ ŋudzɔ ɖe Satana ƒe ayemenuwɔnawo ŋu.

⁹ Mɔnu siwo menya kpɔna dzea si bɔbɔe o. Menye yometiti koe Satana zãna be yeatsɔ agblẽ nu le mía ŋu o, ezãa ayemenuwɔnawo hã. (Ef. 6:11) Bu nu si dzɔ ɖe Nɔviŋutsu Bob dzi esi woxɔe ɖe kɔdzi be woawɔ dɔ nɛ ŋu kpɔ. Ena ɖɔktawo nya be nu ka kee ɖa dzɔ o, womegado ʋu na ye gbeɖe o. Ðɔkta si awɔ dɔ nɛa lɔ̃ ɖe eƒe nyametsotsoa dzi. Gake le zã si do ŋgɔ na ŋkeke si woawɔ dɔ nɛ mea, ɖɔkta bubu va egbɔ esime eƒe ƒometɔwo dzo yi aƒe me. Egblɔ na Bob be anɔ eme be yewomazã ʋu o, gake woatsɔ ɖe ada ɖe alɔ dzi, ɖewohĩ ava hiã. Ðɔktaa anya susui be Bob atrɔ susu esi eƒe ƒomea mele egbɔ o ta. Gake Bob tɔ afɔ to sesĩe eye wògblɔ nɛ be yemedi be woado ʋu na ye o, nu ka kee ɖadzɔ o.

10. Nu ka tae xexea ƒe nuŋububu nye mɔ̃ si ate ŋu aɖe mí? (1 Korintotɔwo 3:19, 20)

¹⁰ Amegbetɔwo ƒe nuŋububu. Ne míebua nuwo ŋu abe ale si ame siwo mevɔ̃a Yehowa o bunɛ enea, esia ate ŋu awɔe be mímagatsɔ ɖeke le Yehowa kple eƒe sewo me o. (Xlẽ 1 Korintotɔwo 3:19, 20.) ‘Xexea ƒe nunya’ nana amewo gbea toɖoɖo Yehowa. Kristotɔ siwo nɔ Pergamo kple Tiatira dometɔ aɖewo ɖe mɔ ame siwo dome wole, siwo nye trɔ̃subɔlawo kple agbe gbegblẽ nɔlawo, ƒe nuwɔnawo kpɔ ŋusẽ ɖe wo dzi. Eya ta Yesu xlɔ̃ nu Kristotɔ mawo ŋkubiãtɔe ɖe ale si woɖe mɔ ɖe gbɔdɔdɔ manɔsenu ŋu le hamea me ta. (Nyaɖ. 2:14, 20) Egbea, ame siwo dome míele ate ŋu azi mía dzi be míava nɔ nuwo ŋu bum abe woawo ene. Ƒometɔwo kple ame nyanyɛwo ate ŋu ana míasusui be míelé Yehowa ƒe sewo me ɖe asi kpaɖii akpa, eye woaƒoe ɖe mía nu be míada le wo dzi. Le kpɔɖeŋu me, woate ŋu agblɔ be naneke megblẽ le eŋu ne míeɖi kɔ na míaƒe dzodzro ɖe sia ɖe o eye be Biblia ƒe se siwo ku ɖe agbe nyui nɔnɔ ŋu nye tsigãdzinu.

11. Nu kae wòle be míaƒo asa na?

¹¹ Ɣeaɖewoɣia, míate ŋu asusui be Yehowa ƒe mɔfiame aɖewo me mekɔ tututu o. Ate ŋu adzro mí gɔ̃ hã be ‘míawɔ nu wòagbɔ nu siwo woŋlɔ ɖi la ŋu.’ (1 Kor. 4:6) Esia tututue subɔsubɔhakplɔla siwo nɔ anyi le Yesu ƒe ŋkekea mea wɔ. Wotsɔ se gbogbo aɖewo kpe ɖe Yehowa ƒe Sea ŋu eye wona wòsesẽ na ame tsɛwo be woawɔ ɖe edzi. (Mat. 23:4) Yehowa toa eƒe Nya kple eƒe habɔbɔa dzi naa mɔfiame siwo me kɔ la mí. Susu aɖeke meli si tae míawo ŋutɔ míawɔ sewo atsɔ akpe mɔfiame siwo Yehowa nana mí o. (Lod. 3:5-7) Eya ta mímagbɔ nu si woŋlɔ ɖe Biblia mea ŋu alo awɔ sewo na mía nɔviwo le nu siwo me ame ŋutɔ atso nya me lea ŋu o.

12. Mɔ kawo dzie Satana tona blea amewo?

¹² Amebeble. Satana zãa “beble dzodzro” kple “xexea ƒe gɔmedzenuwo” tsɔna flua amewo eye wòdea mama amewo me. (Kol. 2:8) Le kpɔɖeŋu me, le ƒe alafa gbãtɔ mea, ezã xexemenunya si wotu ɖe amegbetɔwo ƒe susuwo dzi, Yudatɔwo ƒe alakpanufiafiawo, kple nufiafia si nye be ele be Kristotɔwo nawɔ ɖe Mose ƒe Sea dzi. Gake esia nye beble dzodzro, elabe eɖe amewo ƒe susu ɖa le Yehowa, ame si gbɔ nunya dzɔ tsoa ŋu. Egbea, Satana toa nyakakamɔnuwo kple Internet dzi hahokadoƒewo dzi kakaa dunyahelawo ƒe alakpanyawo kple nyatakaka siwo ŋu kpeɖodzi mele o. Míekpɔ ale si wokaka alakpanya mawo tɔgbi esi corona dɔvɔ̃a do.c Esi amewo xɔ nya mawo dzi sea, ewɔe be wotsi dzimaɖi vevie. Gake Yehowa Ðasefo siwo wɔ ɖe habɔbɔa ƒe mɔfiamewo dzi ya metsi dzi fũu o.—Mat. 24:45.

13. Nu ka tae wòle be míanɔ ŋudzɔ ɖe nu siwo ate ŋu ahe míaƒe susu ŋu?

¹³ Susuhenuwo. Mele be míaɖe susu ɖa le “nu siwo le vevie wu la” dzi o. (Flp. 1:9, 10) Susuhenuwo ate ŋu agblẽ ɣeyiɣi na mí ale be mímagakpɔ ɣeyiɣi ɖe nu siwo le vevie wu ŋu o. Nu siwo míewɔna edziedzi abe nuɖuɖu, nunono, modzakaɖeɖe kple dɔwɔɖuia gɔ̃ hã ate ŋu ava nye susuhenu na mí ne wova nye nu vevitɔwo na mí le agbe me. (Luka 21:34, 35) Azɔ hã míesea nyadzɔdzɔ geɖe ku ɖe gbɔlɔlɔ siwo le edzi yim kple dunyahenyawo ŋu gbe sia gbe. Ele be míakpɔ nyuie be nu mawo nagahe míaƒe susu o. Ne menye nenema oa, míava nɔ akpa aɖe dzi dem le míaƒe dzi me. Satana zãa mɔnu siwo me míedzroa dometɔ ɖe sia ɖe kple susu be yeana be míagawɔ ɖe tame si míeɖo kplikpaa be míawɔ nu si sɔa dzi o. Na míakpɔ ale si míawɔ atsi tsitre ɖe eŋu, eye míanɔ te sesĩe ɖa.

14. Nu kae akpe ɖe mía ŋu míayi edzi anɔ Yehowa ƒe akpa dzi?

¹⁴ De ŋugble le nu si tae nètsɔ ɖokuiwò ɖe adzɔgbe na Yehowa eye nèxɔ nyɔnyrɔa ŋu. Èɖe afɔ vevi mawo elabe èdi be yeanɔ Yehowa ƒe akpa dzi. Bu nu si kpe ɖe ŋuwò be nèva ka ɖe edzi be nyateƒeae nye esia ŋu. Èsrɔ̃ nu tso Yehowa ŋu eye esi nèva nyae be enye Fofowò si le dziƒoa, èva lɔ̃e eye nède bubu geɖe eŋu. Esia na nèva xɔ eyama dzi se, eye wòʋã wò nètrɔ dzi me. Èdzudzɔ nu siwo Yehowa lé fuia wɔwɔ eye nèva le nu siwo dzea eŋua wɔm. Wò dzi dze eme esi nèkpɔe be Yehowa tsɔ wò nu vɔ̃wo ke wò. (Ps. 32:1, 2) Èdze kpekpeawo dede gɔme, eye nèva le nu siwo srɔ̃m nèlea gblɔm na amewo. Fifia esi nèɖe adzɔgbe xɔ nyɔnyrɔ zu Kristotɔa, èva le zɔzɔm le agbemɔa dzi eye nèɖoe kplikpaa be yeanɔ edzi ɖaa.—Mat. 7:13, 14.

15. Nu ka tae wòle vevie be míasrɔ̃ Mawu ƒe Nyaa eye míade ŋugble le eŋu?

¹⁵ Srɔ̃ Mawu ƒe Nyaa eye nàde ŋugble le eŋu. Ale si ko ne ati ƒe ke yi to nyuie wòtea ŋu nɔa te sesĩea, nenema kee míawo hã míate ŋu anɔ te sesĩe ne xɔse sẽŋu le mía si. Ne ati le tsitsimaa, eƒe kewo yia to ɖe edzi. Nenema kee ne míesrɔ̃ Mawu ƒe Nyaa eye míede ŋugble le eŋua, edoa ŋusẽ míaƒe xɔse eye míegakana ɖe edzi be Mawu ƒe mɔwoe nye nyuitɔ. (Kol. 2:6, 7) De ŋugble le ale si Yehowa ƒe mɔfiamewo, aɖaŋuɖoɖowo kple eƒe takpɔkpɔ ɖe vi na esubɔla siwo nɔ anyi le blema ŋu kpɔ. Le kpɔɖeŋu me, Ezekiel kpɔ mawudɔla aɖe wònɔ gbedoxɔa ƒe akpa vovovowo dzidzem le ŋutega me, eye wòlé ŋku ɖe eŋu nyuie. Ŋutegaa do ŋusẽ Ezekiel ƒe xɔse. Eye wòkpe ɖe mía ŋu míekpɔ ale si míalé Yehowa ƒe dzidzenu siwo ku ɖe tadedeagu dzadzɛa ŋu la me ɖe asi.d (Eze. 40:1-4; 43:10-12) Ne míesrɔ̃ nu goglo siwo le Mawu ƒe Nyaa me eye míede ŋugble le wo ŋua, aɖe vi na míawo hã.

16. Esi Bob ƒe dzi le te sesĩe taa, aleke esia kpɔ eta? (Psalmo 112:7)

¹⁶ Na wò dzi nali ke. Fia David ɖoe kplikpaa be yemana naneke nana yeadzudzɔ Yehowa lɔlɔ̃ o. Egblɔ be: “Oo Mawu, nye dzi le te sesĩe.” (Ps. 57:7) Míawo hã míaƒe dzi ate ŋu anɔ te sesĩe ne míeka ɖe Yehowa dzi bliboe. (Xlẽ Psalmo 112:7.) Esia kpe ɖe Bob, si ŋu míeƒo nu tsoe va yi ŋu. Esi wogblɔ nɛ be yewoana ʋua nanɔ asitsɔƒe elabe ate ŋu ava hiã la, egblɔ na wo enumake be ne nenemae woɖoe be yewoawɔea, ke yeadzo le kɔa dzi enumake. Bob gblɔ emegbe be: “Nye susu mewɔ eveve le nyaa ŋu kura o eye nyemetsi dzi ɖe nu si adzɔ hã ŋu o.”

17. Nu kae míate ŋu asrɔ̃ tso nu si dzɔ ɖe Bob dzi me? (Kpɔ fotoa hã.)

¹⁷ Bob te ŋu nɔ te sesĩe elabe etso nya me xoxo be yeatɔ afɔ to sesĩe ne ʋunyawo do mo ɖa hafi wòyi kɔa dzi. Nu kae kpe ɖe eŋu? Gbãa, edi vevie be yeado dzidzɔ na Yehowa ƒe dzi. Evelia, eku nu me le Biblia kple míaƒe Biblia-srɔ̃gbalẽwo me tso ale si agbe kple ʋu nye nu kɔkɔe ŋu. Etɔ̃lia, eka ɖe edzi be ne yewɔ ɖe Yehowa ƒe mɔfiamewo dzia, aɖo eteƒe na ye. Míawo hã aleke kee woɖate mí kpɔe o, míaƒe dzi ate ŋu ali ke sesĩe.

18. Nu kae míate ŋu asrɔ̃ tso Barak ƒe kpɔɖeŋua me? (Kpɔ nɔnɔmetata si le akpaa dzi.)

¹⁸ Ka ɖe Yehowa dzi. Bu Barak ŋu kpɔ. Esi wòka ɖe Yehowa dzi hewɔ eƒe mɔfiamewo dzi taa, nuwo dze edzi nɛ. Ɣemaɣia, Israel-viwo medzra ɖo ɖe aʋa ŋu o elabe aʋawɔnuwo menɔ wo si o. Gake Yehowa gblɔ na Barak be wòayi aɖakpe aʋa kple Kanaantɔwo ƒe aʋafia Sisera kple eƒe aʋakɔ siwo si aʋawɔnu gbogbowo le. (Ʋɔn. 5:8) Nyɔnu nyagblɔɖila Debora gblɔ na Barak be wòaɖi abu aɖakpe Sisera kple eƒe aʋatasiaɖam 900-awo le sɔsɔeƒe. Togbɔ be esia ana wòasesẽ na Israel-viwo be woawɔ aʋa kple Sisera ƒe aʋatasiaɖam siwo le du dzi hãa, Barak ɖo to. Esime Barak kple eƒe asrafowo nɔ ɖiɖim le Tabor Toa dzia, Yehowa na tsi gã aɖe dza. Esia wɔe be Sisera kple eƒe aʋatasiaɖamwo ɖo ba, eye Yehowa to esia dzi na Barak kple Israel-viwo ɖu wo dzi. (Ʋɔn. 4:1-7, 10, 13-16) Nenema kee ne míeka ɖe Yehowa dzi eye míewɔ ɖe mɔfiame siwo wònana mí to eƒe habɔbɔa dzi la dzia, nuwo adze edzi na mí.—5 Mose 31:6.

19. Nu ka tae nèɖoe be yeayi edzi anɔ te sesĩe?

¹⁹ Zi ale si míekpɔtɔ le xexe xoxo sia mea, ahiã be míaku kutri vevie hafi anɔ te sesĩe. (1 Tim. 6:11, 12; 2 Pet. 3:17) Mina míaɖoe kplikpaa be mímaɖe mɔ yometiti, Satana ƒe ayemenuwɔnawo, amegbetɔwo ƒe nuŋububu, amebeble kple susuhenuwo naʋuʋu mí o. (Ef. 4:14) Ke boŋ mina míayi edzi anɔ te sesĩe eye míaɖoe kplikpaa be nu ka kee ɖa dzɔ o, míayi edzi alɔ̃ Yehowa eye míawɔ eƒe sewo dzi. Gake ehiã hã be míanye nugɔmeselawo. Le nyati si kplɔ esia ɖo mea, míakpɔ ale si Yehowa kple Yesu ɖo kpɔɖeŋu deblibo ɖi na mí le esia me.