Yehowa—Elɔ̃a Dzɔdzɔenyenye Kple Ʋɔnu Dzɔdzɔe Dɔdrɔ̃

ÐETUGBI aɖe si le Sarajevo bia eɖokui nusita wòle be ɖevi siwo le dugã si me wòle me la nanɔ fu kpem nenema gbegbe. Egblɔ be: “Míewɔ vɔ̃ aɖeke o. Míedze agɔ o.” Vidada siwo do dziku vevie le Argentina lɔ gbɔ le Buenos Aires ƒe dogbadzi anye ƒe 15 sɔŋ enye sia si wotsɔ le tsitre tsim ɖe dziɖuɖua ŋu le wo viŋutsu siwo bu na wo la ŋu. Afrikatɔ aɖe si ŋkɔe nye Emmanuel, amesi dadaa kple nɔvianyɔnu etɔ̃ wowu ŋutasesẽtɔe le towo dome nuvlowɔwɔ aɖe me gblɔe kaŋ be: “Ele be woaɖo eteƒe na amesiame alesi dze . . . Míedi ʋɔnu dzɔdzɔe dɔdrɔ̃.”

Ʋɔnu dzɔdzɔe dɔdrɔ̃ enye Yehowa Mawu ƒe nɔnɔme vevitɔwo dometɔ ɖeka. Biblia gblɔ be: “Eƒe mɔwo katã dzɔ.” Vavãe, Yehowa nye ‘amesi lɔ̃a dzɔdzɔenyenye kple ʋɔnu dzɔdzɔe dɔdrɔ̃.’ (Mose V, 32:4; Psalmo 33:5) Hafi míadze si Mawu nyuie la, ele be míase eƒe ʋɔnu dzɔdzɔe dɔdrɔ̃ gɔme eye míasrɔ̃ eƒe kpɔɖeŋu.—Hosea 2:21, 22; Efesotɔwo 5:1.

Ðewohĩ alesi amegbetɔwo bua ʋɔnu dzɔdzɔe dɔdrɔ̃e la anya kpɔ ŋusẽ ɖe míaƒe nukpɔsusu le nɔnɔme sia ŋu dzi. Le xexeame ƒe akpa aɖewo la, wowɔa ʋɔnu dzɔdzɔe dɔdrɔ̃ ƒe dzesi zi geɖe abe nyɔnu aɖe si wotsyɔ nu ŋkume na si lé yi kple nudanu ɖe asi ƒe nɔnɔme ene. Wole mɔ kpɔm be amegbetɔ ƒe ʋɔnu dzɔdzɔe dɔdrɔ̃ makpɔ ame ŋku me o, si fia be kesinɔnu alo nɔƒe kɔkɔ maflui o. Ele be wòada amesi nu wotso ƒe fɔɖiɖi alo fɔmaɖimaɖi akpɔ le nudanua me nyuie. Ele be ʋɔnu dzɔdzɔe dɔdrɔ̃ nawɔ eƒe yi la ŋudɔ atsɔ akpɔ fɔmaɖilawo ta eye wòatsɔe ahe to na fɔɖilawo.

Agbalẽ si nye Right and Reason—Ethics in Theory and Practice gblɔ be “ʋɔnu dzɔdzɔe dɔdrɔ̃ do ƒome kple se, agbanɔamedzi, gomenɔamesiwo, kple dɔdasiwo, eye wòdrɔ̃a ʋɔnu ameŋkumemakpɔmakpɔtɔe alo le mɔ si dze nu.” Gake Yehowa ƒe ʋɔnu dzɔdzɔe dɔdrɔ̃ de ŋgɔ kura wu ema. Míate ŋu akpɔ esia to ŋkuléle ɖe Yesu Kristo, amesi le pɛ abe eƒe Dziƒofofo ene ƒe nuwɔna kple nɔnɔmewo ŋu me.—Hebritɔwo 1:3.

Nyanyuiŋlɔla Mateo zã nya siwo le Yesaya 42:3 ɖe Yesu ŋu esi wògblɔ be: “Mele aƒla ŋeŋe la ɖe ge le enu o, eye mele ɖovu bibi fiɖifiɖi la tsi ge o, vaseɖe esime wòawu ʋɔnudɔdrɔ̃ nu.” Yesu gblɔ gbedasi fakɔname aɖe na amesiwo le abe aƒla ŋeŋe si wobi ɖe anyi eye wozɔ edzi gɔ̃ hã ene. Wole abe akaɖi me ɖovu si le dzudzɔ tum, abe ɖe agbe mamle si le wo me tsi vɔ kloe ene la ene. Le esi Yesu naɖe aƒla ŋeŋe la le enu ahatsi ɖovu bibi fiɖifiɖi la teƒe la, ekpɔ veveselawo ƒe nublanui, efia nu wo eye wòda gbe le wo ŋu, ena Yehowa Mawu ƒe ʋɔnu dzɔdzɔe dɔdrɔ̃ me kɔ na wo. (Mateo 12:10-21) Abe alesi Yesaya ƒe nyagblɔɖia gblɔe ene la, ʋɔnu dzɔdzɔe dɔdrɔ̃ ma ƒomevi naa mɔkpɔkpɔ ame.

Nublanuikpɔkpɔ Kple Yehowa ƒe Ʋɔnu Dzɔdzɔe Dɔdrɔ̃

Nublanuikpɔkpɔ nye Mawu ƒe ʋɔnu dzɔdzɔe dɔdrɔ̃ ƒe akpa vevi aɖe. Esia ɖe dzesi esime Yesu va anyigba dzi. Eɖe Mawu ƒe ʋɔnu dzɔdzɔe dɔdrɔ̃ kple nuteƒewɔwɔ ƒe dzidzenu fia bliboe. Gake Yudatɔ agbalẽfialawo kple Farisitɔwo di ʋɔnu dzɔdzɔe dɔdrɔ̃ to se kpaɖii—siwo dometɔ geɖe woawo ŋutɔ de—me léle ɖe asi me. Woƒe senyahehe zi geɖe na nublanuikpɔkpɔ bu. Yesu kple Farisitɔwo dome nyahehe geɖe nɔ te ɖe nya sia dzi be: Nukae nye ʋɔnu dzɔdzɔe dɔdrɔ̃ kple dzɔdzɔenyenye vavãtɔ?—Mateo 9:10-13; Marko 3:1-5; Luka 7:36-47.

Yesu wɔ alesi woawɔ nusi sɔ kple nusi le dzɔdzɔe ɖe ame bubuwo ŋu ƒe kpɔɖeŋu. Gbeɖeka ŋutsu aɖe si nye Sefiala bia Yesu nusi hiã be woawɔ be woakpɔ agbe mavɔ. Yesu bia nyae tsɔ ɖo eŋu eye wòkafui esi wòɖo eŋu be nu vevi eve si hiã enye be woalɔ̃ Mawu kple dzi, luʋɔ, tamesusu, kple ŋusẽ blibo, eye woalɔ̃ ame havi abe ame ɖokui ene. Azɔ ŋutsua bia be: “Amekae nye hanyevi mahã?” Yesu gblɔ Samariatɔ havilɔ̃la la ƒe ŋutinya nɛ tsɔ ɖo eŋui.—Luka 10:25-37.

Yehowa ƒe dzɔdzɔenyenye kple ʋɔnu dzɔdzɔe dɔdrɔ̃ nublanuikpɔkpɔtɔe ƒe kpɔɖeŋu dze le Yesu ƒe lododo tso Samariatɔa ŋu me. Esi Samariatɔa kpe ɖe ŋutsu si medze sii o ŋu ɖokuitɔmadimadii la, ewɔ nusi le dzɔdzɔe, nusi sɔ, eye wònye nublanuikpɔkpɔ. Yesu ŋutɔ ɖe gbɔgbɔ ma ke fia esi wònɔ anyigba dzi. Enye ame dzɔdzɔe kple amesi wɔa nusi le eteƒe. Hekpe ɖe eŋu la, etsɔ eƒe agbe na ɖe ame ɖihiãwo ta, ɖe nuvɔ̃me kple amegbetɔƒome madeblibo si le fu kpem, le dɔ lém, hele kukum la ta. Apostolo Paulo tsɔ ʋɔnu dzɔdzɔe dɔdrɔ̃ sɔ kple tafe si wòna la. Eŋlɔe bena: “Alesi to vodada ɖeka me fɔbubu va amewo katã dzi la, nenema ke to nu dzɔdzɔe wɔwɔ ɖeka me agbe ƒe afiatsotsoname hã va amewo katã dzi.” (Romatɔwo 5:18) “Nu dzɔdzɔe wɔwɔ ɖeka” siae nye mɔ si dzi Mawu ato axɔ ameƒomea me tɔ toɖolawo ɖe agbe tso Adam ƒe nuvɔ̃, si metso wo gbɔ tẽ o la me tsonu si nye afɔku me.

Mawu ƒe ʋɔnu dzɔdzɔe dɔdrɔ̃ bia be woana ɖeɖe amegbetɔƒome wɔnuvɔ̃wo eye le ɣeyiɣi ma ke me woalé gɔmeɖose dzɔdzɔewo me ɖe asi. Be woaŋe aɖaba aƒu nuvɔ̃ dzi masɔ o eye manye lɔlɔ̃ ɖeɖefia o, elabena afia sedzimawɔmawɔ dodo ɖe ŋgɔ. Le go bubu me la, ne Mawu ƒe ʋɔnu dzɔdzɔe dɔdrɔ̃ se ɖe teƒeɖoɖo alo tohehe nana ko dzi la, anye ne mɔkpɔkpɔ aɖeke manɔ ameƒomea si o. Le Biblia ƒe nya nu la, “nuvɔ̃ la ƒe fetu enye ku” eye “ame dzɔdzɔe aɖeke meli o, ɖeka hɔ̃ meli o.” (Romatɔwo 3:10; 6:23) Togbɔ be Yehowa ŋutɔ kple Via lɔlɔ̃a se veve hã la, ena avuléle ɖe nuvɔ̃wo ta.—Yohanes I, 2:1, 2.

Tafea ɖee fia be Mawu ƒe ʋɔnu dzɔdzɔe dɔdrɔ̃ wɔ ɖeka kple lɔlɔ̃ si nɔ te ɖe gɔmeɖose dzi (Helagbe, a·gaʹpe). Nyateƒee, Mawu ƒe ʋɔnu dzɔdzɔe dɔdrɔ̃ enye eƒe gɔmeɖose dzɔdzɔewo dzi wɔwɔ—si nye eƒe agbenyuinɔnɔ ƒe dzidzenu ɖeɖefia. Le esia ta ne Mawu wɔ a·gaʹpe ŋudɔ la, efia lɔlɔ̃ si nɔ te ɖe Mawu ƒe ʋɔnu dzɔdzɔe dɔdrɔ̃ dzi. (Mateo 5:43-48) Eyata ne míese Yehowa ƒe ʋɔnu dzɔdzɔe dɔdrɔ̃ gɔme vavã la, míaka ɖe eƒe afiatsotsowo dzi bliboe. Esi Yehowa nye “xexeame ƒe ʋɔnudrɔ̃la” ta la, ewɔa nusi le dzɔdzɔe ɣesiaɣi.—Mose I, 18:25; Psalmo 119:75.

Srɔ̃ Yehowa ƒe Ʋɔnu Dzɔdzɔe Dɔdrɔ̃

Biblia xlɔ̃ nu mí be ‘míazu Mawu srɔ̃lawo.’ (Efesotɔwo 5:1) Esia fia be míasrɔ̃ eƒe ʋɔnu dzɔdzɔe dɔdrɔ̃ kple eƒe lɔlɔ̃ siaa. Gake esi míede blibo o ta la, míaƒe mɔwo mekɔ abe Yehowa Mawu tɔ ene o. (Yesaya 55:8, 9; Xezekiel 18:25) Ke aleke míate ŋu aɖee afia be míelɔ̃a dzɔdzɔenyenye kple ʋɔnu dzɔdzɔe dɔdrɔ̃? To alesi míado “[amenyenye] yeye, si wowɔ le Mawu ƒe nɔnɔme nu la, le nyateƒe la ƒe dzɔdzɔenyenye kple kɔkɔenyenye la me” dzi. (Efesotɔwo 4:24) Ekema míalɔ̃ nusi Mawu lɔ̃na eye míalé fu nusi wòléa fui. “Nyateƒe la ƒe dzɔdzɔenyenye” tsria nuvlowɔwɔ, agbegbegblẽnɔnɔ, makɔmakɔnyenye, kple xɔsegbegbe, elabena nusiawo tsia tre ɖe nusi le kɔkɔe ŋu. (Psalmo 11:5; Efesotɔwo 5:3-5; Timoteo II, 2:16, 17) Mawu ƒe ʋɔnu dzɔdzɔe dɔdrɔ̃ ʋãa mí be míaɖe ɖetsɔleme afia ame bubuwo anukwaretɔe.—Psalmo 37:21; Romatɔwo 15:1-3.

Hekpe ɖe eŋu la, ne míekpɔ alesi nublanuikpɔkpɔ le Mawu ƒe ʋɔnu dzɔdzɔe dɔdrɔ̃ me dze sii la, míanɔ ʋɔnu drɔ̃m míaƒe gbɔgbɔ me nɔvinyɔnu alo nɔviŋutsuwo o. Aleke wòanya wɔ be míase nu gɔme na wo abe alesi Yehowa sea egɔmee ene? Ðe manye míaƒe nukpɔsusu gbegblẽwo dzie míanɔ te ɖo adrɔ̃ ʋɔnu wo oa? Esia tae Yesu xlɔ̃ nu be: “Migadrɔ̃ ʋɔnu ne woadrɔ̃ ʋɔnu mi o, elabena ʋɔnudɔdrɔ̃, si miedrɔ̃ la, eya ke woatsɔ adrɔ̃ ʋɔnu mi; eye dzidzenu, si mietsɔ dzidze la, eya ke woatsɔ adzidze na miawo hã. Ke nuka wɔ nèkpɔa ati fefee, si ɖo nɔviwò ƒe ŋku me la, eye atikpo si le wò ŋutɔ wò ŋku dzi la, mèdzea si eya o mahã? Alo aleke lawɔ nagblɔ na nɔviwò bena: Na mɔm, ne maɖe ati fefee la le wò ŋku me, eye kpɔ ɖa, atikpo le wò ŋutɔ wò ŋku dzi mahã? Alakpatɔ, ɖe atikpo la le wò ŋutɔ wò ŋku dzi gbã, hafi nakpɔ [nu] nyuie, alesi nawɔ aɖe ati fefee la le nɔviwò ƒe ŋku me.” (Mateo 7:1-5) Mía ŋutɔwo ƒe blibomademadewo dadakpɔ anukwaretɔe akpe ɖe mía ŋu míaganɔ ʋɔnu si Yehowa abu nu madzɔmadzɔe la drɔ̃m o.

Agba le hamemegã siwo wotia dzi be woadrɔ̃ ʋɔnu ne amewo wɔ nuvɔ̃ gãwo. (Korintotɔwo I, 5:12, 13) Le esia wɔwɔ me la, woɖoa ŋkui be Mawu ƒe ʋɔnu dzɔdzɔe dɔdrɔ̃ ɖea nublanuikpɔkpɔ fiana le afisi wòanya wɔ le. Ne naneke meli si dzi woanɔ te ɖo awɔ esia o—abe le nuvɔ̃wɔla matrɔdzimewo gome ene—la, womate ŋu aɖe nublanuikpɔkpɔ afia o. Gake hamemegãwo meɖea nuvɔ̃wɔla ma ƒomevi ɖa le hamea me le wɔɖenui wɔwɔ ta o. Wole mɔ kpɔm be amea ɖeɖe le hamea me ana wòawɔ tɔtrɔ. (Tsɔe sɔ kple Xezekiel 18:23.) Le Kristo ƒe tanyenye te la, hamemegãwo subɔna le ʋɔnu dzɔdzɔe dɔdrɔ̃ me, eye esia kpe ɖe alesi woanɔ abe “sitsoƒe tso ya nu” ene ŋu. (Yesaya 32:1, 2) Eyata ele be woaɖe ameŋkumemakpɔmakpɔ kple nugɔmesesename afia.—Mose V, 1:16, 17.

Miƒã Nukuwo le Dzɔdzɔenyenye Me

Esi míele Mawu ƒe dzɔdzɔenyenye ƒe xexeme yeyea lalam la, ele be ‘míadi dzɔdzɔenyenye’ be Mawu ƒe ŋudzedzekpɔkpɔ nanɔ mía dzi. (Zefanya 2:3; Petro II, 3:13) Woɖe nya sia gblɔ nyuie le Hosea 10:12 ƒe nyagbewo me be: “Miƒã dzɔdzɔenyenye, eye mixa nu kple lɔlɔ̃; mide agble yeye, elabena azã ɖo be, miadi Yehowa, vaseɖe esime wòava, eye wòana dzɔdzɔenyenye nadza ɖe mia dzi.”

Le míaƒe gbesiagbegbenɔnɔ me la, mɔnukpɔkpɔ geɖe sua mía si be ‘miaƒã nukuwo le dzɔdzɔenyenye me,’ abe alesi Yesu wɔ eƒe kpɔɖeŋui le Samariatɔ havilɔ̃la la ƒe lododoa me ene. Yehowa akpɔ egbɔ be ‘míaŋe nu le lɔlɔ̃ me.’ Ne míeyi edzi zɔ le “dzɔdzɔenyenye ƒe mɔ” nu la, míayi edzi axɔ mɔfiame le dzɔdzɔenyenye me le Fiaɖuƒedziɖuɖua te. (Yesaya 40:14) Ne ɣeyiɣia le yiyim la, ɖikeke mele eme o be míava kpɔe adze sii nyuie wu be Yehowa lɔ̃a dzɔdzɔenyenye kple ʋɔnu dzɔdzɔe dɔdrɔ̃.—Psalmo 33:4, 5.

[Nɔnɔmetata si le axa 23]

Samariatɔ havilɔ̃la la nye Yehowa ƒe ʋɔnu dzɔdzɔe dɔdrɔ̃ ƒe kpɔɖeŋu

[Nɔnɔmetata si le axa 23]

Yesu kpɔ vevesela siwo le abe aƒla ŋeŋe ene la ƒe nublanui