Ini nditọ Israel mîsịmke kan̄a Isọn̄ Un̄wọn̄ọ, ini kiet ntem, mbon emi ẹkenyenede ikpọ utom ke Israel ikenyịmeke Moses ada mmọ usụn̄, ikonyụn̄ inyịmeke utom emi Jehovah ọkọnọde Moses. Mmọ ẹkedọhọ ẹte: “Ofụri esop emi ẹdi edisana [idịghe Moses ikpọn̄], Jehovah onyụn̄ odu ke otu mmọ.” (Num. 16:1-3) Kpa ye emi edide ke enyịn Abasi ekedi akpanikọ nte ke “ofụri esop” ẹkedi edisana, Moses ke Jehovah ekemek ete ada ikọt Esie usụn̄. Mbon nsọn̄ibuot emi ẹkesụkde Moses uyo do ẹkesụk Jehovah uyo. Ekikere mmọ ikesịneke ke se Jehovah okoyomde, ekesịne ke se mmọ ẹkeyomde. Mmọ ẹkeyom nte odudu ekpenen̄erede odụk mmimọ ubọk, ye nte ikpenen̄erede iwọrọ iso. Jehovah ama owot mbon emi ẹkedide isịn nsọn̄ibuot oro, ye ediwak tọsịn mme owo eken emi ẹkenyịmede ekikere mmọ oro. (Num. 16:30-35, 41, 49) Mfịn emi n̄ko, Jehovah imaha mbon emi mîmaha ndida se esop esie ẹdọhọde ẹnam ke n̄kpọ ndomokiet. w24.07 11 ¶11

Ini emi idude uwem mi, n̄wakn̄kan owo ke ererimbot inịmke se Bible etịn̄de ete ke utịt ererimbot ke edi-o. Mmọ ẹkam ẹkama nnyịn emi inịmde ẹnam n̄kpọ imam. (2 Pet. 3:3, 4) Kpa ye edide se nnyịn mîdiọn̄ọke osụk awawak, ọfọn inen̄ede inịm ke utịt ererimbot emi eyedi ke nnennen ini emi Jehovah ekenịmde; ke enye eyese aban̄a nnyịn ini oro. N̄kpọ en̄wen emi anade inam edi nnyịn ndinen̄ede nnịm ke “ofụn emi anamde akpanikọ onyụn̄ enyenede ọniọn̄” ke Jehovah ada ada nnyịn usụn̄ mfịn. (Matt. 24:45) Akwa ukụt ama ọtọn̄ọ, mmọ ẹkeme nditeme nnyịn se idinamde man ẹnyan̄a nnyịn. Idahaemi ke ana inen̄ede iberi edem ke mbon emi Jehovah adade ada esop esie usụn̄ inyụn̄ inen̄ede inịm ke se mmọ ẹdọhọde inam enen. Edieke ọsọn̄de nnyịn ndinam se mmọ ẹtịn̄de idahaemi, idimemke inọ nnyịn ndinam se mmọ ẹditịn̄de ke ini akwa ukụt. w24.09 11 ¶11-12

Mme ete ye eka emi ẹdide Christian ẹdiọn̄ọ ke mbuọtidem idịghe n̄kpọ emi eyenọwọn̄ adade oto ete ye eka. Ntre nte ini akade, enye ekeme nditọn̄ọ ndikere ete: ‘Nnam didie ndiọn̄ọ ke Abasi do? Ndi mmekeme ndinen̄ede nnịm se Bible etịn̄de?’ Bible akam ọdọhọ yak ida “ukeme ukere n̄kpọ” nnyịn inam se akpanade inam, inyụn̄ ‘idụn̄ọde kpukpru n̄kpọ ifiọk.’ (Rome 12:1; 1 Thess. 5:21) Edi didie ke ekeme ndin̄wam eyen fo enen̄ede ọbuọt idem ke Abasi onyụn̄ enịm se Bible etịn̄de? Dọhọ eyen fo odụn̄ọde ke idemesie okụt ke se Bible ekpepde edi akpanikọ. Eyen fo ama-edi obụp fi emi, obụp oko, da ifet oro wụt enye nte enye ekemede ndida mme n̄kpọ emi isidade inam ndụn̄ọde utọ nte Watch Tower Publications Index ye N̄wed Ndụn̄ọde Mme Ntiense Jehovah nyom ibọrọ. Ke N̄wed Ndụn̄ọde, enye ama aka “Bible,” enye ekeme ndikese ekpri ibuotikọ emi, “Abasi Ọkọnọ Spirit Esie Ẹda Ẹwet,” man okụt mme n̄kpọ emi ẹwụtde ke Bible idịghe n̄wed emi nti irenowo ẹkewetde, okụre ke oro, utu ke oro ke edi “ikọ Abasi.”​—1 Thess. 2:13. w24.12 15 ¶4-5