Luke Asɛmpa

2 Na nda no mu no, Caesar Augustus hyɛɛ mbra dɛ wɔnkyerɛw hɔn a wɔtse asaase no do nyina hɔn edzin. 2 (Dɛm dzinkyerɛw a odzi kan yi kɔr do aber a nna Quirinius yɛ ambrado wɔ Syria no.) 3 Na obiara kɔr no kurow mu dɛ ɔrekɛkyerɛw ne dzin. 4 Ntsi Joseph so fi Nazareth a ɔwɔ Galilee no fowee kɔr Judea, ɔkɔr David no kurow a wɔfrɛ no Bethlehem no mu, osiandɛ nna ofi David ne fie na n’ebusua mu. 5 Ɔnye ne yer* Mary kɔree ama wɔaakyerɛw hɔn edzin. Dɛm aber yi dze, nna ɔrennkyɛr biara ma ɔaawo. 6 Na wɔwɔ hɔ no, n’awoo ber durii. 7 Na ɔwoo ne babanyin no, nna ɔno nye n’abakan. Ɔdze tam kyekyeer no ho, na ɔdze no too mbowa edzidzidaka mu, osiandɛ woennya kwan wɔ ahɔhodan no mu.

8 Dɛm aber no ara so, nna nguanhwɛfo bi rohwɛ hɔn nguan wɔ sar no do anafua wɔ dɛm mantɔw no mu hɔ ara. 9 Wohunii ara nye dɛ Jehovah* no bɔfoe ebegyina hɔn enyim, na Jehovah* n’enyimnyam hyerɛnee twaa hɔn ho hyiae, na hɔn akoma tuu papaapa. 10 Naaso ɔbɔfo no kaa kyerɛɛ hɔn dɛ: “Mma hom nnsuro, na hwɛ, medze asɛmpa bi a ɔbɛma nyimpa nyina enyi agye paa rebrɛ hom. 11 Ɔno nye dɛ wɔawo agyenkwa bi ama hom wɔ David no kurow mu ndɛ, ɔno nye Ewuradze Christ no. 12 Na dza ɔbɛma hom ehu no nye yi: Hom bohu abofra kakraba bi a wɔdze tam akyekyer no ho dɛ ɔda mbowa edzidzidaka mu.” 13 Amonmu hɔ ara na ɔsor asafodɔm pii bɛkaa ɔbɔfo no ho ma woyii Nyankopɔn ayɛw. Wɔkaa dɛ: 14 “Enyimnyam nka Nyankopɔn wɔ sorsor, na asomdwee nka nyimpa a wɔsɔ n’enyi* wɔ asaase do.”

15 Aber a abɔfo no fii hɔn nkyɛn kɔr sor no, nguanhwɛfo no kekaa kyerɛɛ hɔnho dɛ: “Hom mma yɛnkɔ Bethlehem seseiara nkɔhwɛ asɛm a woesi a Jehovah* ada no edzi akyerɛ hɛn yi.” 16 Ntsi ntsɛmpanara wosii mu kɔree, na wokohun Mary na Joseph na abofra kakraba no dɛ ɔda mbowa edzidzidaka mu. 17 Aber a nguanhwɛfo no hun iyi no, wɔkaa dza wɔaka akyerɛ hɔn afa abofra kakraba no ho no nyina. 18 Na hɔn a wɔtsee dza nguanhwɛfo no kae no nyina ho dwuruuw hɔn. 19 Naaso Mary dze, ɔdze dɛm nsɛm yi nyina siee yie, na ɔdwendween ho wɔ n’akoma mu. 20 Afei nguanhwɛfo no saan hɔn ekyir, na wɔhyɛɛ Nyankopɔn enyimnyam, na woyii no ayɛw wɔ dza wɔtsee nye dza wohunii no nyina ho; osiandɛ dza wɔkaa kyerɛɛ hɔn no, ɔno ara na wokohunii no.

21 Na ndaawɔtwe soe a worubotwa no bɔtɔ* no, wɔtoo no dzin Jesus. Iyi nye dzin a ɔbɔfo no dze maa no ansaana woribenyinsen no no.

22 Afei so, ber soo dɛ wɔtsew hɔnho dɛ mbrɛ Moses Mbra no ka no. Ntsi wɔdze no fowee baa Jerusalem dɛ wɔdze no rebrɛ Jehovah,* 23 osiandɛ nna wɔakyerɛw wɔ Jehovah* ne Mbra no mu dɛ: “Ɔsɛ dɛ wohyira abakan biara a ɔyɛ banyin* no do ma Jehovah.”* 24 Na wɔbɔɔ afɔr dɛ mbrɛ wɔaka ho asɛm wɔ Jehovah* ne Mbra no mu dɛ: “Ɔsɛ dɛ edze ntamram ebien anaa mbuburmba ebien bɔ afɔr.”

25 Na hwɛ, nna ɔbarimba bi wɔ Jerusalem a wɔfrɛ no Simeon, nna ɔyɛ ɔtseneneenyi nye nyamesuronyi. Nna ɔrotweɔn aber a Israel benya awerɛkyekyer, na nna sunsum krɔnkrɔn wɔ no do. 26 Bio so nna Nyankopɔn nam sunsum krɔnkrɔn do eyi akyerɛ no dɛ orunnwu, gyedɛ oehu Jehovah* ne Christ no ansaana. 27 Na sunsum no dze no baa asɔrfie hɔ, na aber a abofra kakraba Jesus n’awofo dze no baa dɛ wɔrebɛyɛ dza ɔsɛ dɛ wɔyɛ ma no dɛ mbrɛ Mbra no hwehwɛ no, 28 ɔgyee abofra no too ne nsa do na oyii Nyankopɔn ayɛw. Ɔkaa dɛ: 29 “Ewuradze Tumfo, afei dze irigya w’akowaa kwan wɔ asomdwee mu dɛ mbrɛ ekae no, 30 osiandɛ m’enyiwa ehu kwan a ebɛfa do dze nkwagye a 31 esiesie wɔ amanaman nyina enyim aba no. 32 Ɔno nye kan a obeyi dza wɔakata amanaman no do no, na ɔbɛyɛ wo man Israel hɔn enyimnyam.” 33 Na nsɛm a ɔkae faa abofra no ho no yɛɛ abofra no ne maame na ne papa nwanwa. 34 Afei so, Simeon hyiraa hɔn na ɔkaa kyerɛɛ abofra no ne maame Mary dɛ: “Hwɛ! Woeyi abofra yi dɛ ɔbɛma Israelfo pii ahwe ase na ɔaama binom so asoɛr bio. Woeyi no dɛ asɛnkyerɛdze a nkorɔfo bɛkasa etsia, 35 ama nyimpa pii hɔn akoma mu nsusui aada edzi, (nyew, wɔdze sekan tsentsen bowura wo* mu).”

36 Nna ɔbaa nkɔnhyɛnyi bi wɔ hɔ a wɔfrɛ no Anna. Nna ɔyɛ Phanuel a ofi Asher ebusuakuw mu no ne babaa. Nna dɛm ɔbaa yi n’enyi efir paa, na ɔwaree* no ɔnye no kun tsenaa mfe esuon, 37 naaso seseiara dze nna ɔyɛ okunafo a oedzi mfe 84. Dabaa nna ɔwɔ asɔrfie hɔ; nna ɔdze akɔnkyen nye nkotoserɛ som Nyankopɔn adzekyee na adzesaa nyina. 38 Dɛm aber no mu ara na ɔbaa hɔ, na ɔhyɛɛ ase dɛ ɔreda Nyankopɔn ase, na ɔkaa abofra no ho asɛm kyerɛɛ hɔn a wɔrotweɔn dɛ wɔbɛgye Jerusalem no nyina.

39 Na aber a Joseph na Mary yɛɛ dza Jehovah* ne Mbra no hwehwɛ dɛ wɔyɛ no nyina wiei no, wɔsanee kɔr hɔnankasa hɔn kurow mu Nazareth wɔ Galilee. 40 Na abofra kakraba no kɔr do nyinii na noho yɛɛ dzen. Nyansa hyɛɛ no ma, na nna Nyankopɔn n’adom wɔ no do.

41 Afe biara, nna n’awofo kɔ Jerusalem kedzi Apaho afahyɛ no. 42 Na aber a odzii mfe 12 no, wɔfowee kɔr Jerusalem dɛ mbrɛ afahyɛ no ho nhyehyɛɛ tse no. 43 Aber a wodzii afahyɛ no wiei na wɔresan hɔn ekyir aba no, abofra Jesus dze, ɔkaa Jerusalem, naaso n’awofo ennhu. 44 Nna hɔn adwen yɛ hɔn dɛ ɔka nyimpadɔm a wɔrokɔ no ho, ntsi wotwaa da kor kwan na afei wɔhyɛɛ ase dɛ wɔrohwehwɛ no wɔ hɔn ebusuafo nye hɔn amanyifo no mu. 45 Naaso woennhu no, ntsi wɔsanee kɔr Jerusalem na wɔyeer hɔnho hwehwɛɛ no. 46 Nda ebiasa ekyir no, wokohun no wɔ asɔrfie hɔ dɛ ɔtsena akyerɛkyerɛfo no hɔn finimfin ritsie hɔn na oribisabisa hɔn nsɛm. 47 Na mbrɛ osi ma nna n’adwen mu ebue nye mbuae a nna ɔdze ma no maa hɔn a woritsie no no nyina ho dwuruuw hɔn paa. 48 Na aber a n’awofo hun no no, hɔnho dwuruuw hɔn, na ne maame bisaa no dɛ: “Me ba, ebɛnadze na edze ayɛ hɛn yi? Menye wo papa ekyin ahwehwɛ wo araa nko.” 49 Naaso obisaa hɔn dɛ: “Ebɛnadze ntsi na nna hom rohwehwɛ me? Hom nnyim dɛ ɔsɛ dɛ metsena m’Egya ne fie a?” 50 Naaso wɔanntse dza ɔkaa kyerɛɛ hɔn no ase.

51 Na ɔnye hɔn sanee kɔr Nazareth, na ɔkɔr do brɛɛ noho adze maa hɔn.* Na ne maame dze nsɛm yi nyina siee n’akoma mu. 52 Na Jesus kɔr do nyinii, na ɔkɔr do nyaa nyansa pii, na Nyankopɔn na nyimpa nyina pɛɛ n’asɛm.