Luke Asɛmpa

21 Na aber a ɔmaa n’enyi do no, ohun dɛ esikafo dze hɔn akyɛdze rugu sika ndaka no mu. 2 Afei ohun dɛ ɔbaa kunafo hianyi bi so dze nkapɛrmba ebien a ɔnnsom bo ahen biara* ebogu mu. 3 Na ɔkaa dɛ: “Nokwar mese hom dɛ, dza ɔbaa kunafo hianyi yi dze egu mu no, ɔdɔɔ so kyɛn dza hɔn a wɔaka no nyina dze boguu mu no. 4 Osiandɛ woyinom nyina, akyɛdze a wɔdze boguu mu no yɛ dza woenya ma wɔabor do. Naaso ɔbaa yi dze ofi ne hia mu dze dza ɔdze bɔhwɛ noho nyina ebogu mu.”

5 Ekyir yi, nna binom ridzi asɔrfie no ho nkɔmbɔ. Nna wɔreka mbrɛ wɔdze mbobaa a ɔyɛ fɛw nye ndzɛmba a woehyira do ama Nyankopɔn esiesie asɔrfie hɔ no ho asɛm. 6 Nna ɔkaa kyerɛɛ hɔn dɛ: “Dɛm ndzɛmba yi a hom enyi tua yi, mber bi bɛba a wobodwuruw ne nyina egu famu na worinngya ɔbo kor mpo wɔ ɔbo fofor do.” 7 Nna wobisaa no dɛ: “Kyerɛkyerɛnyi, ebɛn aber paa na iyinom besisi, na ebɛn asɛnkyerɛdze na ɔbɛma yeehu dɛ dɛm ndzɛmba yi ribesisi?” 8 Nna ɔkaa dɛ: “Hom nhwɛ yie na wɔanndaadaa hom, osiandɛ nyimpa beberee dze me dzin bɛba abɛka dɛ, ‘Emi nye ɔno,’ na, ‘Ber a wɔahyɛ no abɛn.’ Mma hom nndzi hɔn ekyir. 9 Bio so, sɛ hom tse dɛ akodzi nye pintampintan* rokɔ do a, mma hom akoma nntu, osiandɛ otwar dɛ dɛm ndzɛmba yi nyina dzi kan sisi, naaso ɔnnyɛ dɛm aber no ara na ewiei no bɛba.”

10 Afei ɔkaa kyerɛɛ hɔn dɛ: “Ɔman bɔsoɛr etsia ɔman, na ahendzi bɔsoɛr etsia ahendzi. 11 Na asaasewosow akɛse besisi, na ɔkɔm na nsanyarba bɛba mbeambea. Na nyimpa bohu ndzɛmba a ɔyɛ hu nye asɛnkyerɛdze akɛse a ofi sor.

12 “Naaso ansaana dɛm ndzɛmba yi nyina besisi no, nkorɔfo bɛkyer hom na wɔaatan hom enyi. Wɔdze hom bɔkɔ nhyiamudan mu na wɔdze hom eegu efiadze. Na osian me dzin ntsi, wɔdze hom bɔkɔ ahemfo nye ambradofo enyim. 13 Na iyi bɛma hom edzi hɔn dase. 14 Ntsi hom nsi hom adwen pi dɛ hom rinndzi kan nndwendwen dza hom bɛka dze eyi hom ano no ho. 15 Osiandɛ nsɛm na nyansa a medze bɛma hom no, sɛ hɔn a wɔrosoɛr etsia hom no nyina ka hɔnho bɔ mu mpo a, worunntum nngyina ano na worunntum mmbɔ nngu so. 16 Bio so, awofo na enuanom na ebusuafo na anyɛnkofo mpo beyi hom ama, na wobokuku hom mu binom. 17 Na me dzin ntsi nyimpa nyina bɛtan hom. 18 Naaso hom tsinhwi kor mpo rennyew. 19 Sɛ hom mia hom enyi gyina mu a, hom benya nkwa.*

20 “Naaso, sɛ hom hu dɛ asogyafo ebotwa Jerusalem ho ehyia a, ɔno hom nhu dɛ ber a wɔdze bɛsɛɛ no no abɛn. 21 Na wɔmma hɔn a wɔwɔ Judea no nhyɛ ase nguan nkɔ mbepɔw no do, na hɔn a wɔwɔ Jerusalem no mfi hɔ, na mma hɔn a wɔwɔ nkuraase no mmba Jerusalem. 22 Osiandɛ iyi nye ber a Nyankopɔn bɔtwe nkorɔfo hɔn asowa* mbrɛ ɔbɛyɛ a dza wɔakyerɛw no nyina bɛba mu. 23 Dɛm aber no, mbaa a wonyinsen nye hɔn a wɔma mbofraba enumfo no ndue! Osiandɛ ahoyerɛw kɛse bɛba asaase no do na ebufuhyew bɛba nkorɔfo yi do. 24 Na wɔdze sekan bokuku hɔn na wɔdze hɔn aakɔ nkowaasom mu wɔ amanaman nyina mu. Na amanaman* no betsiatsia Jerusalem do ekesi dɛ ber a wɔdze ama amanaman* no bɔso.

25 “Afei so, wobohu asɛnkyerɛdze wɔ ewia na bosoom na nworaba mu, na osian po a oruhur na ɔayɛ begyabegya ntsi, amanaman a wɔwɔ asaase do no ho bɛyerɛw hɔn na worunnhu beebi a wɔmfa hɔn tsir mfa. 26 Na suro na ndzɛmba a ɔbɛba asaase no do no ho adwendwen bɛma nyimpa etwitwa ahwe, osiandɛ wɔbɔwosow etum a ɔwɔ sor no. 27 Na afei wobohu dɛ nyimpa Ba no nam mununkum mu dze tum nye enyimnyam kɛse reba. 28 Naaso sɛ hom hu dɛ dɛm ndzɛmba yi ahyɛ ase risisi a, hom nsoɛr ngyina hɔ na hom mma hom tsir do osiandɛ hom nkwagye rebɛn.”

29 Afei ɔyɛɛ mfatoho bi kyerɛɛ hɔn. Ɔkaa dɛ: “Hom nhwɛ adɔmbadua nye ndua ahorow a wɔaka nyina. 30 Sɛ wɔrefefɛw a, homara hom hu na hom tum hu dɛ ɔhyewber abɛn. 31 Dɛmara na hom so, sɛ hom hu dɛ dɛm ndzɛmba yi risisi a, hom nhu dɛ Nyankopɔn n’Ahendzi no abɛn. 32 Nokwar mese hom dɛ dɛm ebusuasantsen yi runntwa mu nnkɔ da, gyedɛ iyinom nyina esisi ansaana. 33 Ɔsor na asaase botwa mu akɔ, naaso me nsɛm dze orunntwa mu nnkɔ dabiarada.

34 “Dɛm ntsi hom nhwɛ homho yie na edzidzi mbordo na nsanom ntrado na ɔbra yi mu dadwen aannhyɛ hom akoma do, na da no aammbɔto hom awerɛfirmu 35 tse dɛ efir. Osiandɛ ɔbɛba nyimpa a wɔtse asaase yi do no nyina do. 36 Ntsi hom nkɔ do nweɔn, na hom ntotɔ nserɛ aber nyina ama hom eetum eguan ndzɛmba a ɔsɛ dɛ osisi yi nyina na hom eegyina nyimpa Ba no enyim.”

37 Sɛ odu anapa a, nna ɔkɛkyerɛkyerɛ wɔ asɔrfie hɔ, na sɛ adze sa a, nna oepue akɔ Ngodua Bepɔw no do akɛda.* 38 Nna nkorɔfo no nyina ba ne nkyɛn anapatutuutu betsie no wɔ asɔrfie hɔ.