John Asɛmpa

15 “Emi nye nokwar wenyindua no, na m’Egya nye okuafo no. 2 Nkorbata biara a ɔwɔ moho a ɔnnsow aba no, otwa fi hɔ, naaso nkorbata biara a ɔsow aba no, oyiyi ho ama wɔaasow aba pii. 3 Hom dze, osian asɛm a maka akyerɛ hom no ntsi homho atsew dada. 4 Hom ntsena mo mu, na emi so mebɛtsena hom mu.* Na dɛ mbrɛ nkorbata bi fi wenyindua ho a onntum nnsow aba no, dɛmara na hom so sɛ hom anntsena mo mu a, hom runntum nnsow aba. 5 Emi nye wenyindua no, na hom nye nkorbata no. Obiara a ɔtsena mo mu na mo so metsena no mu no, ɔno na ɔsow aba pii; osiandɛ sɛ hom kwetsir me a, hom runntum nnyɛ hwee. 6 Sɛ obi anntsena mo mu a, wotwa no kyen tse dɛ nkorbata, na ɔkyenkyen. Na nyimpa boaboa nkorbata a ɔtse dɛm no ano, na wɔdze gu gya mu ma ɔhyew. 7 Sɛ hom tsena mo mu na me nsɛm so tsena hom mu a, hom mbisa biribiara a hom pɛ na hom nsa bɛka. 8 Dza ɔhyɛ m’Egya enyimnyam nye dɛ hom bɔkɔ do asow aba pii na hom akyerɛ dɛ hom yɛ m’esuafo. 9 Dɛ mbrɛ Egya no dɔ me no, dɛmara na mo so modɔ hom; hom ntsena mo dɔ mu. 10 Sɛ hom dzi m’ahyɛdze do a, hom bɛtsena mo dɔ mu dɛ mbrɛ medzi Egya no n’ahyɛdze do na metsena no dɔ mu no.

11 “Maka dɛm nsɛm yi akyerɛ hom ama enyigye a mowɔ no, hom so hom eenya bi,* na hom enyigye no aabor do. 12 M’ahyɛdze nye dɛ, dɛ mbrɛ madɔ hom no, hom so hom ndodɔ homho dɛmara. 13 Obiara nnyi hɔ a ɔwɔ ɔdɔ kyɛn obi a ɔdze no nkwa* to hɔ ma n’anyɛnkofo. 14 Ahyɛdze a medze rema hom yi, sɛ hom dzi do a ɔkyerɛ dɛ hom yɛ m’anyɛnkofo. 15 Seseiara dze memmfrɛ hom nkowaa bio, osiandɛ akowaa nnyim dza no wura yɛ. Mbom mefrɛ hom anyɛnkofo, osiandɛ dza metsee fii m’Egya hɔ nyina mama hom ehu. 16 Nnyɛ hom na hom yii me, mbom emi na miyii hom. Na meyi hom dɛ hom nkɔ na hom nkɔ do nsow aba, na hom aba no ntsena hɔ, ama biribiara a hom bebisa Egya no wɔ me dzin mu no, ɔdze ama hom.

17 “Merema hom dɛm ahyɛdze yi, ama hom aadodɔ homho. 18 Sɛ wiadze tan hom a, hom nkaa dɛ woedzi kan atan me ansaana ɔretan hom. 19 Sɛ hom ka wiadze no ho a,* nkyɛ hom bɛyɛ wiadze no nedze, na wiadze no bɛpɛ hom asɛm. Naaso osiandɛ hom nnka wiadze no ho* na meyi hom efi wiadze no mu ntsi, wiadze no tan hom. 20 Hom nkaa asɛm a mekaa kyerɛɛ hom no: Akowaa nnkyɛn no wura. Sɛ wɔtaan m’enyi a, wɔbɛtan hom so hom enyi. Sɛ wodzii m’asɛm do a, wobedzi hom so hom asɛm do. 21 Naaso osian me dzin ntsi, wɔbɛyɛ iyinom nyina etsia hom, osiandɛ wonnyim Nyia ɔsomaa me no. 22 Sɛ mammba ammbɛkasa annkyerɛ hɔn a, nkyɛ wonndzi bɔn ho fɔ. Naaso seseiara dze, wonnyi biribiara a wɔdze beyi hɔn ano wɔ hɔn bɔn ho. 23 Obiara a ɔtan me no, ɔtan m’Egya so. 24 Sɛ mannyɛ ndwuma a obiara nnyɛɛ bi da wɔ hɔn mu a, nkyɛ wonndzi bɔn ho fɔ; naaso seseiara dze woehu me, na wɔatan emi nye m’Egya nyina. 25 Naaso iyi esi ama asɛm a wɔakyerɛw wɔ hɔn Mbra no mu no aaba mu. Ɔka dɛ: ‘Wɔtan me kwa.’ 26 Sɛ ɔboafo a mobɔsoma no efi Egya no nkyɛn no nya ara ba a, dɛm nokwar sunsum no a ofi Egya no nkyɛn no, ɔno na obedzi mo ho dase. 27 Na hom so, ɔsɛ dɛ hom dzi mo ho dase, osiandɛ hom nye me atsena fi ahyɛse no.