John Asɛmpa
18 Aber a Jesus kaa dɛm nsɛm yi wiei no, ɔnye n’esuafo no kɛfaa Kidron Bɔnsa* no mu. Nna ture bi wɔ bɔnsa no n’ekyir, ntsi ɔnye n’esuafo no kɔr mu. 2 Nna Judas a oribeyi no ama no so nyim hɔ, osiandɛ nna Jesus taa nye n’esuafo no kehyia mu wɔ hɔ. 3 Ntsi Judas dze asogyafokuw nye aweɔmfo a wofi asɔfompanyimfo no nye Phariseefo no nkyɛn baa hɔ. Nna wokitsakitsa ogyatsɛn* nye nkandzea nye akodze. 4 Nna Jesus nyim dza ɔrobɔto no no nyina, ntsi obegyinaa enyim na obisaa hɔn dɛ: “Hom rohwehwɛ woana?” 5 Woyii no ano dɛ: “Nazarethnyi Jesus.” Nna Jesus kaa kyerɛɛ hɔn dɛ: “Emi nye yi.” Nna Judas a oribeyi no ama no so gyina hɔn nkyɛn.
6 Naaso aber a Jesus kaa kyerɛɛ hɔn dɛ, “Emi nye yi” no, wopimpiin hɔn ekyir na wɔkɔhwehwee famu. 7 Ntsi ɔsanee bisaa hɔn bio dɛ: “Hom rohwehwɛ woana?” Woyii no ano dɛ: “Nazarethnyi Jesus.” 8 Jesus kaa kyerɛɛ hɔn dɛ: “Medzi kan aka akyerɛ hom dɛ emi nye yi. Ntsi sɛ emi na hom rohwehwɛ me dze a, hom mma dɛm mbarimba yi nkɔ.” 9 Iyi maa asɛm a ɔkae no baa mu. Ɔkaa dɛ: “Hɔn a edze hɔn ama me no, mennyeew hɔn mu kor mpo.”
10 Nna Simon Peter wɔ sekan hyɛ no ho, ntsi ɔtwee dze twaa ɔsɔfopanyin no n’akowaa n’asowa nyimfa fii hɔ. Nna wɔfrɛ akowaa no Malchus. 11 Naaso Jesus kaa kyerɛɛ Peter dɛ: “Fa wo sekan no hyɛ beebi a nna ɔhyɛ.* Kɔɔpow a m’Egya dze ama me no, ɔnnsɛ dɛ monom ano a?”
12 Afei asogyafo no nye hɔn panyin* no nye Jewfo aweɔmfo no bɛkyeer Jesus na wɔkyekyeer no. 13 Wodzii kan dze no kɔr Annas hɔ. Nna Annas n’asew nye Caiaphas a nna ɔyɛ ɔsɔfopanyin dɛm afe no. 14 Nokwasɛm nye dɛ, ɔyɛ Caiaphas na otuu Jewfo no fo dɛ oye dɛ nyimpa kor bowu ama ɔman no.
15 Dɛm aber yi, nna Simon Peter na osuanyi kor bi dzi Jesus n’ekyir. Nna ɔsɔfopanyin no nyim dɛm osuanyi no, na osuanyi no nye Jesus kowuraa ɔsɔfopanyin no ne yaad no mu.* 16 Naaso nna Peter gyina abow no n’ekyir, ntsi dɛm osuanyi yi a nna ɔsɔfopanyin no nyim no no nye abowanohwɛfo no kɛkasae, na ɔmaa Peter wuraa mu. 17 Na abaawa a ɔhwɛ abow no n’ano no bisaa Peter dɛ: “Nkyɛ ɔwo so ka dɛm ɔbarimba yi n’esuafo no ho, moboa a?” Nna oyii no ano dɛ: “Oho, mennka ho.” 18 Dɛm aber no nna awɔw wɔ mu, ntsi nna nkowaa no nye aweɔmfo no dze biriw asɔ gya, na wogyinagyina ho roto.* Nna Peter so gyina gya no ho roto bi.
19 Na ɔsɔfopanyin no bisabisaa Jesus nsɛm faa n’esuafo no nye ne nkyerɛkyerɛ ho. 20 Jesus yii no ano dɛ: “Mekasaa kyerɛɛ wiadze no wɔ bagua mu. Dabaa nna mekyerɛkyerɛ wɔ nhyiamudan mu na asɔrfie hɔ, beebi a Jewfo nyina hyia mu no, na mannka asɛm biara wɔ nsumaa mu. 21 Ebɛnadze ntsi na iribisa emi? Bisa hɔn a wɔtsee dza mekaa kyerɛɛ hɔn no. Hwɛ! Woyinom nyim dza mekae no.” 22 Aber a Jesus kaa dɛm nsɛm yi no, aweɔmfo a wogyinagyina hɔ no mu kor bɔɔ n’asowa mu na ɔkaa dɛ: “Dɛm na wɔkasa kyerɛ sɔfopanyin a?” 23 Jesus yii no ano dɛ: “Sɛ mannka no yie a, kyerɛ me asɛm a mekae a mannka no yie no; na sɛ mekaa no yie dze a, ɔno ɔyɛ dɛn ntsi na ebɔɔ me?” 24 Dɛm ntsi Annas kyekyeer no, na ɔmaa wɔdze no kɛmaa ɔsɔfopanyin Caiaphas.
25 Dɛm aber no, nna Simon Peter gyina hɔ roto gya.* Na wobisaa no dɛ: “Nkyɛ ɔwo so ka dɛm ɔbarimba yi n’esuafo no ho, yɛboa a?” Naaso ɔanngye annto mu, ɔkaa dɛ: “Oho, mennka ho.” 26 Nna ɔsɔfopanyin no n’akowaa kor a no busuanyi nye nyia Peter twaa n’asowa no kaa dɛ: “Mennhu wo wɔ ture no mu dɛ eka no ho a? 27 Naaso Peter kaa no bio dɛ ɔnntse dɛm, na amonmu hɔ ara na akokɔ bɔnee.
28 Afei wodzii Jesus n’enyim fii Caiaphas hɔ dze no kɔr ambrado no ne fie. Nna ɔyɛ anapatutuutu. Naaso hɔnara dze, woennwura ambrado no ne fie hɔ, mbrɛ ɔbɛyɛ a worunngu hɔnho fi, na ama woeetum edzi Apaho no. 29 Nna Pilate puei baa hɔn nkyɛn na obisaa hɔn dɛ: “Ebɛn sombo na hom dze abɔ ɔbarimba yi?” 30 Nna woyii no ano dɛ: “Sɛ ɔbarimba yi nnyɛ ɔdzebɔnyɛnyi a nkyɛ yɛremmfa no mmbrɛ wo.” 31 Nna Pilate kaa kyerɛɛ hɔn dɛ: “Homara hom mfa no nkɔ nkobu no atsɛn dɛ mbrɛ hom mbra tse.” Naaso Jewfo no kaa kyerɛɛ no dɛ: “Mbra mma hɛn kwan dɛ yeku obiara.” 32 Nna iyi bɛma asɛm a Jesus kae dze kyerɛɛ owu kor a nna orubowu no aba mu.
33 Ntsi Pilate sanee wuraa ambrado no ne fie hɔ bio na ɔfrɛɛ Jesus bisaa no dɛ: “Ɔwo nye Jewfo hɔn Hen no anaa?” 34 Jesus yii no ano dɛ: “Woara na epɛ dɛ ibisa me dɛm asɛm yi, anaa nkorɔfo na wɔakeka mo ho nsɛm akyerɛ wo?” 35 Pilate yii no ano dɛ: “Ehwɛ a meyɛ Jewnyi a? Woara wo nkorɔfo na asɔfompanyimfo no na wɔdze wo brɛɛ me. Eyɛɛ dɛn?” 36 Jesus yii no ano dɛ: “M’Ahendzi mmfi wiadze yi mu. Sɛ m’Ahendzi fi wiadze yi mu a, nkyɛ m’asomfo bɔko amma wɔaammfa me annhyɛ Jewfo no nsa. Naaso m’Ahendzi mmfi ha.” 37 Nna Pilate bisaa no dɛ: “Ooh, ntsi eyɛ ɔhen ehu?” Jesus yii no ano dɛ: “Ɔwoara na ereka dɛ meyɛ ɔhen. Iyi ntsi na wɔwoo me, na iyi ntsi na mebaa wiadze, dɛ miribedzi nokwar no ho dase. Obiara a ɔwɔ nokwar no n’afa no, otsie me ndze.” 38 Nna Pilate bisaa no dɛ: “Nokwar nye ebɛnadze?”
Ɔkaa dɛm no, ɔsanee puei kɔr Jewfo no nkyɛn na ɔkaa kyerɛɛ hɔn dɛ: “Munnhu mfom biara wɔ no ho. 39 Afei so, hom wɔ amambra bi dɛ sɛ odu Apaho afahyɛ biara a ɔsɛ dɛ migyaa nyimpa kor ma hom. Ntsi hom pɛ dɛ migyaa Jewfo hɔn Hen no ma hom anaa?” 40 Wɔtseatseaa mu bio dɛ: “Mma nngyaa ɔbarimba yi, mbom gyaa Barabbas!” Naaso yɛreka yi ara nna dɛm Barabbas yi yɛ epoobɔnyi o.