March

Sesei, wiadze fofor no mmbae. Naaso, ɔwodze hwɛ ndzɛmba ahorow bi a ɔwɔ hɔ ndɛ tse dɛ nworaba, ndua, mbowa nye nyimpa. Ɔwɔ mu dɛ mber bi nna dɛm ndzɛmba yi nnyi hɔ dze, naaso ndɛ obiara nnyi hɔ a ɔbɛka dɛ dɛm ndzɛmba yi nnyi hɔ. Jehovah na ɔbɔɔ dɛm ndzɛmba yi, ntsi na ndɛ yehu dɛ wɔwɔ hɔ no. (Gen. 1:​1, 26, 27) Hɛn Nyankopɔn no asan ahyɛ bɔ dɛ ɔdze wiadze fofor bi bɛba. Yɛgye dze paa dɛ, ɔbɛma dɛm bɔhyɛ yi aba mu. Enyigyesɛm nye dɛ, sɛ yɛkɔ wiadze fofor no mu a, yɛbɛtsena ase daa, na yebenya apɔwmudzen papa so. Ntsi nya awerɛhyɛmu dɛ, sɛ ber a Nyankopɔn ahyɛ no so a, ɔdze wiadze fofor no bɛba ma yɛdze hɛn enyi ehu dɛ mbrɛ yehu ɔsor nye asaase no. (Isa. 65:17; Nyi. 21:​3, 4) Naaso seseiara a wiadze fofor no mmbae yi, hom mma yɛmfa hokwan biara a yebenya no nhyɛ hɛn gyedzi dzen. Ma enyisɔ a ewɔ ma werdam no nyɛ kɛse. Afei so, dwendwen tum a Jehovah wɔ no ho. Bio so, yɛ ndzɛmba yi a, ɔbɛma abɛn Jehovah kɛse. Sɛ eyɛ dɛm ndzɛmba a, ebɛba abɛka “hɔn a wɔnam gyedzi nye abotar do nya anohoba no” ho.—Heb. 6:​11, 12. w23.04 31 ¶18-19

Jesus maa n’enyiwa do hwɛɛ sor, na ɔbɔɔ mpaa ma hɔn a wɔwɔ hɔ no tsee. Ɔyɛɛ dɛm osiandɛ nna ɔpɛ dɛ ɔdze dza oribesi no ho enyimnyam nyina ma Jehovah. Afei, ɔdze ndze kɛse tseaa mu dɛ: “Lazarus, pue bra!” (John 11:43) Hɔ no ara na ofiir ɔbodan no mu puei! Jesus yɛɛ biribi a nna nkorɔfo binom susu dɛ obiara runntum nnyɛ. Dɛm kyerɛwtohɔ yi ma gyedzi a yɛwɔ wɔ owusoɛr no mu no yɛ kɛse. Ebɛnadze ntsi na yɛreka no dɛm? Kaa dɛ Jesus hyɛɛ Martha bɔ dɛ: ‘Wo nuabanyin no bɔsoɛr.’ (John 11:23) Jesus wɔ ɔpɛ nye tum a ɔbɛma dɛm bɔhyɛ no aba mu, tse dɛ n’Egya pɛpɛɛpɛ. Osu a Jesus sui no ma yehu dɛ ɔpɛ paa dɛ oyi awerɛhow a owu dze ba nye owu ankasa mpo fi hɔ koraa. Bio so, Lazarus a Jesus nyaan no no ma yehu dɛ ɔwɔ tum a ɔdze benyan ewufo. Afei so, susu asɛm a Jesus sanee kaa kyerɛɛ Martha a wɔaka ho asɛm wɔ ndɛ daa asɛm yi mu no ho. Yɛwɔ adanse a odzi mu a yebotum egyina do aka dɛ Nyankopɔn no bɔhyɛ a ɔfa owusoɛr ho no bɛba mu ampa. w23.04 11-12 ¶15-16

Ɔtɔ da a, bi a no ho behia dɛ yɛsesa dza yɛbɔ ho mpaa no aber a yeehu dza Jehovah pɛ dɛ yɛyɛ ankasa no. Ɔnnsɛ dɛ yɛma hɛn werɛ fir dɛ Jehovah wɔ adwen bi ma adasamba, na ɔbɛma dɛm adwen no aba mu wɔ ber a nankasa ɔahyɛ mu. Jehovah abɔ ne tsirmu dɛ obeyi ɔhaw ahorow tse dɛ atoyerɛnkyɛm, yarba, owu nye biribiara a ɔhaw adasamba no efi hɔ korakora. Jehovah nam n’Ahendzi no do na ɔbɛma iyinom nyina aba mu. (Dan. 2:44; Nyi. 21:​3, 4) Naaso, seseiara dze, Jehovah ama kwan ma Satan ridzi wiadze yi do tum kesi dɛ ne ber a ɔahyɛ no bɔso. (John 12:31; Nyi. 12:9) Iyi ntsi, sɛ Jehovah yi ɔhaw a adasamba rihyia no fi hɔ seseiara a, ɔbɛyɛ tse dɛ mbrɛ ndzɛmba rokɔ yie wɔ Satan no tumdzi ase. Naaso aber a yɛrotweɔn dɛ Jehovah no bɔhyɛ ahorow bɛba mu no, onngyaa hɛn kwa, mbom ɔboa hɛn. Ampa, Jehovah ayɛ krado dɛ ɔbɔboa hɛn. w23.05 8 ¶4; 9-10 ¶7-8

Yebesi dɛn aboa afofor ma woeenya Nkaadzi no do mfaso? Odzi kan, ɔsɛ dɛ yɛto nsa frɛ hɔn. Yɛdze hɔn a yɛbɔto nsa afrɛ hɔn wɔ asɛnka mu no to nkyɛn a, yebotum so akyerɛw nkorɔfo a yɛpɛ dɛ yɛto nsa frɛ hɔn no hɔn edzin. Binom nye hɛn ebusuafo, hɛn edwumamufo, hɛn skuulfo, nye nkorɔfo afofor a yenyim hɔn. Sɛ yeennya nsato krataa no pii a, yebotum dze no ho link no asɛnd hɔn. Adze yi ara, yennyim obi a ɔbɛba nye obi a ɔremmba. (Ɔsɛnk. 11:6) Kaa dɛ bi a hɔn a yɛbɔto nsa afrɛ hɔn no bebisa hɛn nsɛm bi a ɔfa Nkaadzi no ho, nkanka hɔn a wɔmmbaa hɛn asafo nhyiamu ase da no. Ɔsɛ dɛ yɛdwendwen nsɛm a wobotum ebisa hɛn no ho na yɛyɛ krado dɛ yɛbɛkyerɛkyerɛ hɔn mu. Afei so sɛ yɛyɛ Nkaadzi no wie a, bi a hɔn a yɛtoo nsa frɛɛ hɔn no bɛpɛ dɛ wobisa hɛn nsɛm bi fa ho. Ansaana Nkaadzi da no bodu, aber a Nkaadzi no rokɔ do nye aber a yeewie no, ɔsɛ dɛ yɛyɛ dza yebotum biara dɛ yɛbɔboa hɔn a wɔwɔ akoma pa no ma woeenya Nkaadzi no do mfaso kɛse.—Andw. 13:48. w24.01 12 ¶13, 15; 13 ¶16

Bible no ka nyimpa baawɔtwe bi a wonyaan hɔn baa asaase do ho asɛm. Ibotum agye ber na esua dɛm owusoɛr yi mu biara ho adze. Aber a ereyɛ dɛm no, fa w’adwen si dza ibotum esua efi hɔn asɛm no mu no do. Afei so, mbrɛ owusoɛr no mu biara ma yehu dɛ Nyankopɔn wɔ ɔpɛ nye tum a ɔdze benyan ewufo no, ɔyɛ a dwendwen ho. Sɛ yɛdze owusoɛr a yɛaka ho asɛm no to nkyɛn a, ɔyɛ so a dwendwen Jesus no wusoɛr no ho. Ɔno nye owusoɛr a ɔkyɛn biara a woesi pɛn. Kaa dɛ nyimpa pii dze hɔn enyi hun Jesus aber a wonyaan no no, na iyi ma gyedzi a yɛwɔ wɔ owusoɛr no mu no dzi mu. (1 Cor. 15:​3-6, 20-22) Yɛda Jehovah ase paa dɛ, ɔahyɛ hɛn bɔ dɛ obenyan hɛn adɔfo a woewuwu no! Yebotum agye edzi paa dɛ dɛm bɔhyɛ yi bɛba mu ampa. Osiandɛ Jehovah pɛ dɛ onyan hɔn a woewuwu no na ɔwɔ tum so a ɔdze bɛyɛ dɛm. Owusoɛr ho enyidado no da hɛn akoma do paa. Ntsi gyedzi a yɛwɔ wɔ mu no, hom mma yɛnkɔ do nhyɛ mu dzen. Sɛ yɛyɛ dɛm a, ɔbɛma yɛabɛn hɛn Nyankopɔn a ɔahyɛ hɛn bɔ dɛ, ‘W’adɔfo bɔsoɛr no’ paa!’—John 11:23. w23.04 8 ¶2; 12 ¶17; 13 ¶20

Sɛ obi gye to mu dɛ nnyɛ biribiara na onyim na nnyɛ biribiara na obotum ayɛ a, oye paa. Na dɛm suban no nye ahobrɛadze nam. Obi so a ɔbrɛ noho adze no, ommbu noho nnkyɛn afofor. (Phil. 2:3) Suban ebien yi nyinara nam, na kor nnkɔ nngya ne nyɛnko. Nna Gideon yɛ obi a ɔbrɛ noho adze na ɔgye to mu dɛ nnyɛ biribiara na obotum ayɛ. Jehovah no bɔfoe bi kaa kyerɛɛ Gideon dɛ, Jehovah eyi no dɛ ɔnkɛgye Israelfo no mfi Midianfo a hɔnho yɛ dzen no nsamu. Naaso, Gideon fii ahobrɛadze mu kaa dɛ: “M’ebusua na ɔyɛ mbɔbɔr dodow wɔ Manasseh mu, na emi na musuar dodow wɔ m’egya fie.” (Atsɛ. 6:15) Nna ɔtse nka dɛ ɔmmfata dɛ ɔbɛyɛ dɛm edwuma no, naaso Jehovah dze, nna onyim dɛ obotum ayɛ. Jehovah boaa Gideon ma otumii yɛɛ edwuma a wɔdze hyɛɛ ne nsa no pɛpɛɛpɛ. Asafo mu mpanyimfo yɛ dza wobotum biara dɛ wɔbɛbrɛ hɔnho adze wɔ biribiara mu, na wɔgye to mu dɛ nnyɛ biribiara so na wobotum ayɛ. (Andw. 20:​18, 19) Wɔmmfa dza wotum yɛ anaa dza wɔayɛ no nndwa hɔn anomu. Dɛmara so na sɛ wodzi mfom a, wɔnnka dɛ mfaso biara nnyi hɔn do. w23.06 3 ¶4-5

Ofi ndɛ kesi dɛ mfe 1,000 no bɛba n’ewiei no na nkɔnhyɛ a ɔno nye dɛ wɔbɛpɛkyɛw Satan ne tsir no bɛba mu. (Nyi. 20:​7-10) Naaso ansaana dɛm asɛm yi bɛba mu no, Bible no ka nsɛm akɛse bi a obesisi ho asɛm. Odzi kan, amanaman no bɛpaa mu aka “asomdwee nye ahotɔ” ho asɛm! (1 Thess. 5:​2, 3) Sɛ amanaman no tow hyɛ ator som nyina do a, prɛko pɛ ahohiahia kɛse no bɛhyɛ ase. (Nyi. 17:16) Ɔno ekyir no, Jesus bobu adasamba atsɛn, na ɔdze nyimpa a wɔyɛ hɔnho tse dɛ nguan no egyina nkyɛn na ɔdze hɔn a wɔyɛ hɔn adze dɛ mpɔnkye no so egyina nkyɛn. (Matt. 25:​31-33, 46) Dɛm aber no, Satan bɔkɔ do asoɛr etsia Jehovah. Osiandɛ ɔtan Nyankopɔn no nkorɔfo kɔkɔɔkɔ ntsi, obepiapia amanaman a wɔaka hɔnho abɔ mu a Bible no frɛ hɔn Gog a ɔwɔ Magog asaase do no ma wɔaato ahyɛ Nyankopɔn no nkorɔfo do. (Ezek. 38:​2, 10, 11) Sɛ odu beebi a, wɔbɛfa hɔn a wɔasera hɔn a wɔaka wɔ asaase do no akɔ sor ma wɔaakɛka Jesus nye ɔsor abɔfodɔm no ho ma wɔaako Amagedon ko no. Iyi na ɔdze ahohiahia kɛse no bɛba n’ewiei. (Matt. 24:31; Nyi. 16:​14, 16) Ɔno ekyir no, Christ ne Mfrenhyia Apem Tumdzi no bɛhyɛ ase edzi asaase do tum.—Nyi. 20:6. w23.10 20-21 ¶9-10

Yɛrekasa yi, Jehovah n’asomfo pii na wɔtse nsaase a wɔabra hɛn som edwuma no wɔ hɔ do. Dɛm enuanom yi yɛ hɔn adze dɛ Obadiah. Ɔwɔ mu dɛ wɔdze obu ma aban mpanyimfo no dze, naaso wɔkɔ do dze ɔsom a ɔfata Jehovah nkotsee no ma no. (Matt. 22:21) Wosuro Nyankopɔn, ntsi wotsie no kyɛn aban mpanyimfo no. (Andw. 5:29) Wɔkɔ do yɛ asɛnka edwuma no, na wɔfa akwan ahorow do yɛ asafo nhyiamu dze kyerɛ dɛ wosuro Jehovah. (Matt. 10:​16, 28) Wɔbɔ mbɔdzen dɛ wɔbɛma hɔn nuanom nsa aka ndzɛmba a ɔbɛma wɔakɔ do abɛn Jehovah. Hom mma yensusu onua bi a wɔfrɛ no Henri a ɔwɔ Africa man bi mu ho nhwɛ. Wɔbraa hɛn som edwuma no wɔ dɛm ɔman no mu. Dɛm aber no, Henri tuu noho mae dɛ ɔdze asafo nwoma bɔkɔ akɛma enuanom. Ɔkaa dɛ: “Meyɛ obi a musuro adze kakra. . . . Jehovah . . . maa minyaa akokodur.” Ehwɛ a, ewɔ akokodur a Henri nyae no bi anaa? Sɛ isuro Jehovah a, ibotum enya akokodur a Henri nyae no bi. w23.06 16 ¶9, 11

Aber a Adam na Eve tseew etua no, nna ɔtse dɛ mbrɛ Satan asɛɛ dza Nyankopɔn abɔ ne tsirmu dɛ ɔbɛyɛ no; ɔno nye dɛ ɔbɛma nyimpa a asɛm biara nnyi hɔnho na wotsie no no ahyɛ asaase no do ma. Bi a nna Satan dwen dɛ ɔama Jehovah no ho akyer no na orunntum nndzi n’anohoba no do. Bi a nna Satan n’adwen nye dɛ, dza Jehovah botum ayɛ ara nye dɛ oboku Adam na Eve, na ɔabɔ awarfo fofor a bɔn biara nnyi hɔnho ama siantsir a ɔbɔɔ adasamba no aaba mu. Naaso sɛ Nyankopɔn yɛɛ dɛm a, nkyɛ Abɔnsam bɛka akyerɛ no dɛ ɔyɛ ɔtorfo. Ebɛnadze ntsi a? Osiandɛ wɔ Genesis 1:28 no, nna Jehovah aka akyerɛ Adam na Eve dɛ hɔn asefo na wɔbɛhyɛ asaase no do ma. Anaa obotum aba dɛ Satan nyaa adwen dɛ Jehovah bɛma Adam na Eve awo mba dze, naaso nna bɔn remmpar dɛm mba no da. (Ɔsɛnk. 7:20; Rom. 3:23) Ekyingye biara nnyi ho dɛ, sɛ ɔba no dɛm a, nkyɛ Abɔnsam bɛka akyerɛ Jehovah dɛ dza ɔkae no, oenntum annyɛ. Ebɛnadze ntsi na yɛreka dɛm? Siantsir nye dɛ sɛ Nyankopɔn yɛɛ dɛm a nkyɛ dza ɔabɔ ne tsirmu dɛ ɔbɛma Adam na Eve hɔn asefo a bɔn biara nnyi hɔnho, na wotsie no no atsena Paradise asaase no do na wɔahyɛ do ma no remmba mu. w23.11 6 ¶15-16

Jehovah nam Bible no na n’ahyehyɛdze no do ma hɛn akwankyerɛ a no mu da hɔ. Ntsi, yennyi biribiara a yebotum egyina do dze hɛn nsusui ahyehyɛ mbra aka akwankyerɛ a Jehovah dze ma hɛn no ho. (Mbɛ. 3:​5-7) Iyi ntsi, yɛnnyɛ ndzɛmba nntra dza Bible aka no, anaa yenngyina mbrɛ yesi tse nka do nnhyehyɛ mbra mma hɛn nuanom wɔ ndzɛmba a hɔnankasa na ɔsɛ dɛ wosi ho gyinae no ho. Satan nam “ndaadaa hun” na “wiadze mfitsiasesɛm” do daadaa nkorɔfo na ɔma hɔn mu paapaa. (Col. 2:8) Tsetse Christianfo no hɔn aber do no, nna ndaadaa hun na wiadze mfitsiasesɛm no mu bi nye nyimpa nyansapɛ, Jewfo nkyerɛkyerɛ a onngyina Kyerɛwnsɛm no do, nye nkyerɛkyerɛ a ɔnye dɛ ɔsɛ dɛ Christianfo dzi Moses Mbra do. Nna iyi yɛ ndaadaa, osiandɛ ɔmaa nkorɔfo yii hɔn adwen fii Jehovah a ɔyɛ nyansa nyina Wura no do. Ndɛ so, dza Satan yɛ nye dɛ, ɔnam TV na dawurbɔ ndwuma nye sohyial nɛtwɛk do tserɛw nsɛm a onnyi ngyinado nye atorsɛm a aban mpanyimfo keka no mu. w23.07 16 ¶11-12

Kwan a Jehovah faa do siesiee etua a Satan na awarfo a wodzi kan no tsewee no, Satan annda anndwen ho da. Jehovah maa Adam na Eve woo mba, na iyi maa dza Jehovah kae no baa mu. Ntsi Satan ennya biribiara enngyina do ammbɔ Jehovah sombo dɛ ɔyɛ ɔtorfo. Afei so, Jehovah maa ɔdaa edzi dɛ sɛ ɔka dɛ ɔbɛyɛ biribi a, biribiara nntum nnsiw no kwan. Ɔhwɛe hun dɛ dza ɔaka no bɛba mu na ɔmaa hɛn ‘asenyi’ bi a ɔbɛgye Adam na Eve hɔn asefo a wɔyɛ setsie no nkwa. (Gen. 3:15; 22:18) Ɔbɛyɛ dɛ, werdam no ho nhyehyɛɛ a Jehovah yɛɛ no tɔɔ Satan do papaapa. Ebɛnadze ntsi na yɛreka dɛm? Siantsir a Jehovah dze werdam no maa hɛn nye dɛ, ɔdɔ hɛn papaapa. (Matt. 20:28; John 3:16) Naaso, Satan dze, nankotsee ne yieyɛ na ɔhwehwɛ, ɔnndɔ obiara. Ma yembisa dɛ, ebɛn mfaso na yebenya efi werdam no mu? Sɛ Christ dze mfe 1,000 dzi adze wie a, Adam na Eve hɔn asefo a wɔaabɛyɛ nyimpa a bɔn biara nnyi hɔnho no bɛtsena Paradise asaase do. Ɔno nye dza nna Jehovah abɔ ne tsirmu dɛ ɔbɛyɛ ama adasamba. w23.11 6 ¶17

Jehovah bu nkwa na bɔgya dɛ ɔyɛ krɔnkrɔn, ntsi yedzi mbra a ɔdze ama hɛn wɔ ho no do. Ebɛnadze ntsi a? Osiandɛ Jehovah aka dɛ bɔgya no ara nye nkwa, na ɔyɛ akyɛdze a ɔsom bo a ofi no hɔ. (Lev. 17:14) Ber a odzi kan a Jehovah kaa dɛ nyimpa botum eku mbowa awe no, ɔdze mbra kaa ho dɛ mma wonndzi bɔgya no. (Gen. 9:4) Ɔsanee sii dɛm mbra no do aber a ɔdze Moses Mbra no maa Israelfo no. (Lev. 17:10) Afei so, ɔmaa akwankyerɛ kuw a nna ɔwɔ tsetse Christianfo hɔn aber do no dze akwankyerɛ maa Christianfo nyina dɛ, ‘wɔntwe hɔnho mfi bɔgya ho.’ (Andw. 15:​28, 29) Sɛ yerisi gyinae a ɔfa hɛn ayarsa ho a, yedzi dɛm mbra yi do pɛpɛɛpɛ. Afei so, yedzi Jehovah ne mbra a ɔnye dɛ yɛntwe hɛnho mfi edwamambɔ ho no do pɛpɛɛpɛ. Ɔsomafo Paul dze kasakoa bi dzii dwuma aber a orutu Christianfo fo no. Ɔkaa wɔ afotu no mu dɛ ‘yenku’ hɛn nyimpadua akwaa. Dza iyi kyerɛ nye dɛ ɔsɛ dɛ yɛyɛ dza yebotum biara dze ko tsia akɔndɔ bɔn biara a yɛwɔ no. Ntsi ɔnnsɛ dɛ yɛhwɛ anaa yɛyɛ biribiara a ɔbɛma yɛdze hɛnho ahyɛ nda mu ɔbrasɛɛ mu.—Col. 3:5; Job 31:1. w23.07 15 ¶5-6

Aso nna Samson gye Delilah dzi dodow anaa ɔmaa no ho dɔ furaa n’enyi araa ma oennhu dza nna ɔpɛ dɛ ɔyɛ no? Yerunntum nnkyerɛ, naaso dza yenyim nye dɛ Delilah kɔr do hyɛɛ Samson dɛ ɔnkyerɛ no beebi a n’ahoɔdzen no fi. Delilah yɛɛ araa ma Samson kaa kyerɛɛ no. Awerɛhosɛm nye dɛ, Samson gyaa noho ma Delilah yɛe ma n’ahoɔdzen no fii ne nsa, na ɔhweer Jehovah n’enyim adom kesii ber bi. (Atsɛ. 16:​16-20) Samson hyiaa ɔhaw paa osiandɛ ɔammfa noho annto Jehovah do, mbom ɔdze noho too Delilah do. Philistiafo no kyeer no na wotutuu n’enyiwa. Afei, wɔdze no kɔtoo efiadze wɔ Gaza dɛ akowaa a ɔyam ewu. Ekyir yi, aber a Philistiafo no hyiaa mu dɛ woridzi hɔn afahyɛ no, wɔsomae ma wɔkɛfaa Samson bae dɛ ombeyi hɔn paserew. Wɔbɔɔ afɔr kɛse maa hɔn bosom Dagon tse dɛ mbrɛ ɔno na oeyi Samson ahyɛ hɔn nsa. Wokeyii Samson fii efiadze hɔ dɛ ombeyi hɔn “paserew” na wondzi noho agor.—Atsɛ. 16:​21-25. w23.09 5-6 ¶13-14

Bi a hɛn edwumamunyi anaa hɛn skuulnyi bi botum ebisa hɛn siantsir a yɛdze Bible no bɔ hɛn bra. Sɛ ɔba no dɛm a, ɔsɛ dɛ yɛyɛ dza yebotum biara kyerɛkyerɛ no siantsir a yɛyɛ dɛm no mu. Naaso ɔsɛ dɛ yɛyɛ no wɔ kwan bi do a ɔkyerɛ dɛ yebu no anaa yedzi no nyi. (1 Pet. 3:15) Mpɛn pii no, ɔyɛ papa dɛ yehu asɛm a oribisa no dɛ ɔyɛ hokwan a ɔbɛma yeehu dza ɔwɔ n’adwen mu. Ɔnnsɛ dɛ yenya adwen dɛ ɔpɛ dɛ ɔnye hɛn yiyi nsɛm ano anaa ɔpɛ dɛ ɔnye hɛn gye kyim kɛkɛ. Ɔmmfa ho dza ɔmaa nyimpa no bisaa asɛm no, ɔsɛ dɛ yɛbɔ mbɔdzen dɛ yɛbɛda ɔdwe edzi na yɛnye no akasa bɔkɔɔ. Mbuae a yɛdze bɛma no no botum ama ɔaasesa n’adwen. Fa no dɛ w’edwumamunyi bi ebisa wo siantsir a yenndzi awoda. Sɛ ɔba no dɛm a, ibotum ebisa woho dɛ, ‘Ebɛnadze ntsi na oribisa me dɛm asɛm yi, n’adwen nye dɛ yɛnngye hɛn enyi anaa? Afei, yebedzi kan akamfo no dɛ ɔdwen edwumayɛfo no ho. Ɔno botum ebue hokwan ma yeetum nye no abɔ nkɔmbɔ kama afa dza Bible no ka fa awodadzi ho. w23.09 17 ¶10-11

Yenya hokwan kɛse dɛ yɛdze ber kakra a wɔaka no reka asɛmpa no akyerɛ nyimpa a wɔwɔ wiadze nyina no. Ɔsomafo Peter tuu hɛn fo dɛ yɛmma Jehovah ne da a ɔreba no ntsena hɛn adwen mu. (2 Pet. 3:​11, 12) Yebesi dɛn ayɛ dɛm? Sɛ ɔbɛyɛ yie a, ɔsɛ dɛ yɛdwendwen nhyira a yebenya wɔ wiadze fofor no mu no ho da biara. Ɔwodze, twa ho mfonyin dɛ ewɔ wiadze fofor no mu. Mframa pa robɔ fa woho, iridzi edziban a ahoɔdzen wɔ mu, erema w’adɔfo a woenyan hɔn no akɔaba, na erekyerɛkyerɛ hɔn a wɔtsenaa ase mfe ɔhaha pii a etwa mu no Bible nkɔnhyɛ ahorow a ɔbaa mu no. Sɛ edwendwen ndzɛmba a ɔtse dɛm ho a, ɔbɔboa wo ma edze w’adwen esi Jehovah ne da a ɔreba no do. Afei so, ɔbɔbɔ woho ban ma annyɛ w’adze tse dɛ mbrɛ hɔn a wɔnngye nndzi dɛ wiadze yi bɛba n’ewiei no yɛ no. Sɛ yedzi kan hu “iyinom” fa hɛn daakye ho a, ɔremma ator Christianfo mmfa hɔn nkyerɛkyerɛ “mmpra hɛn nnkɔ.” w23.09 27 ¶5-6

Mbofra a woetwa hɛn mba ho ehyia no, ‘wɔyɛ hɔn awofo do asoɔdzen.’ (2 Tim. 3:​1, 2) Ebɛnadze ntsi na mbofra pii nntsie hɔn awofo asɛm? Siantsir nye dɛ, nsɛm a awofo binom ka kyerɛ hɔn mba dɛ wɔnyɛ no, hɔnankasa wɔnnyɛ. Dɛm ntsi hɔn mba no tse nka dɛ wɔnye hɔn nndzi no yie. Afei so, mbofra binom wɔ adwen dɛ wiadze no asesa, ntsi wobu afotu a hɔn awofo dze ma hɔn no dɛ woetwa mu, worunntum mmfa nnyɛ edwuma anaadɛ ɔma hɔnho kyer hɔn dodo. Sɛ eyɛ abofra a, ana dɛm na etse nka? Ɔyɛ dzen ma mbofra pii dɛ wɔdze Jehovah ne mbra a ɔaka ho asɛm wɔ ndɛ daa asɛm yi mu no bɛyɛ edwuma. (Eph. 6:1) Naaso, ebɛnadze na obotum aboa wo ma eetsie w’awofo? Obi a ɔyɛɛ setsie ho nhwɛdo a ɔkyɛn biara a ibotum esuasua no nye Jesus. (1 Pet. 2:​21-24) Nna ɔyɛ nyimpa a bɔn nnyi noho, naaso nna bɔn wɔ n’awofo ho. Naaso, sɛ nna ɔtɔ da na Jesus n’awofo anntse no ase, anaa wodzi mfomdo bi mpo a, nna odzi hɔn nyi.—Ex. 20:12. w23.10 7 ¶4-5

Ɔsomafo Paul kyerɛkyerɛɛ mu dɛ afɔr a nna Mbra no hwehwɛ dɛ wɔbɔ no runntum nnyi bɔn mmfi hɔ korakora. Ntsi ɔkaa dɛ wɔdze Mbra no ato nkyɛn anaa ‘woegu’ no. Afei, Paul kyerɛkyerɛɛ nokwar a no mu dɔ no bi. “Enyidado a oye kyɛn” biara a wɔnam Jesus no werdam afɔr no do a ɔbɛma woetum ‘atwe epin Nyankopɔn’ no, ɔkaa ho asɛm kyerɛɛ ne mfɛfo Christianfo no. (Heb. 7:19) Paul maa no nuanom Hebrewfo no tsee ase dɛ ɔkwan a wɔfa do som Jehovah dɛ Christianfo no, oye koraa kyɛn kwan a nna wɔfa do som Jehovah dɛ Jewfo no. Nna Jewfo som no yɛ ‘ndzɛmba a ɔbɛba no ho sunsuma ara, na papa no ara dze, ɔno nye Christ.’ (Col. 2:17) Sɛ ihu biribi no sunsuma a, ɔyɛ adze no ho mfonyin kɛkɛ, ɔno nnkyerɛ dɛ ehu adze no ankasa. Ntsi, dɛmara so na nna kwan a Jewfo no fa do som Nyankopɔn wɔ tsetse mber mu no so tse. Nna ɔyɛ kwan pa a wɔbɛfa do asom Nyankopɔn daakye no ho mfonyin ara kɛkɛ. Nhyehyɛɛ a Jehovah ayɛ mbrɛ ɔbɛyɛ a yebenya bɔnfakyɛ na yeetum asom no wɔ kwan a ɔsɔ n’enyi do no, ɔsɛ dɛ yehu. w23.10 25 ¶4-5

Daniel tsir 11 no ka ahemfo beenu anaa aban ebien bi a wɔnye hɔnho dzi esi dze hwehwɛ wiadze tumdzi no ho asɛm. Sɛ yɛdze nkɔnhyɛ yi toto nkɔnhyɛ afofor a ɔwɔ Bible mu no ho a, yebotum aka dɛ Russia na aman a wɔka no ho no nye ‘etsifi afamu hen’ no, nna Anglo-America Wiadze Tumdzi no so nye ‘anaafo afamu hen’ no. Nyankopɔn n’asomfo a wɔtse aman a ‘etsifi afamu hen’ no dzi do tum no rihyia ɔsoɛrtsia a no mu yɛ dzen wɔ ɔhen yi ne nsa ano. Ndɛ, hɛn nuanom binom wɔ hɔ a osian hɔn gyedzi ntsi wɔbor hɔn na wɔdze hɔn gu efiadze. Ɔhaw a ‘etsifi afamu hen’ no dze ba hɛn nuanom do no mma hɔn gyedzi nnhinhim, mbom ɔma hɔn gyedzi kɔ do yɛ dzen. Ebɛnadze ntsi a? Osiandɛ enuanom yi nyim dɛ ɔsoɛrtsia a Nyankopɔn no nkorɔfo hyia no ma nkɔnhyɛ bi a ɔwɔ Daniel nwoma no mu nya ne mbamu. (Dan. 11:41) Sɛ yɛtse ase dɛm a, ɔbɔboa hɛn ma yeekura hɛn enyidado mu pintsinn, na yaakɔ do edzi Jehovah nokwar. w23.08 11 ¶15-16

Jehovah dɔ hɛn, ntsi ɔtse mbrɛ yesi tse nka no ase, na ɔpɛ dɛ ɔbɔ hɛnho ban. Sɛ yɛrefa ɔhaw mu a, ɔyɛ no yaw. Dɛm ntsi, yebotum enya awerɛhyɛmu dɛ sɛ yɛserɛ no dɛ ‘ɔmbɔ hɛn ho ban dɛ enyiwa kyirefuwa’ a, obetsie hɛn. (Ndw. 17:8) Enyiwa yɛ nyimpadua n’akwaa a yenndzi ho agor koraa na ɔsom bo. Ntsi sɛ Jehovah dze hɛn toto enyiwa kyirefuwa ho a, nna ɔtse dɛ mbrɛ ɔreka dɛ, ‘Obiara a ɔdze ne nsa bɛka mo nkorɔfo no, ɔdze ne nsa aka biribi a ɔsom bo ma me.’ Jehovah pɛ dɛ egye dzi paa dɛ ɔdɔ wo. Naaso onyim dɛ osian dza afa mu wɔ asetsena mu ntsi, obotum ayɛ dzen ama wo dɛ ebɛgye edzi dɛ ɔdɔ wo. Obotum so aba dɛ osian ɔhaw a erefa mu seseiara ntsi enngye nndzi dɛ Jehovah dɔ wo. Sɛ dɛm a, ebɛnadze na ɔbɔboa wo ma aagye edzi dɛ Jehovah dɔ wo? Jehovah ada no edzi dɛ ɔdɔ Jesus, hɔn a wɔasera hɔn no, nye hɛn nyina. Sɛ isua mbrɛ Jehovah sii yɛɛ dɛm no ho adze a, ɔbɔboa wo paa. w24.01 27 ¶6-7

Ezra hun mbrɛ Jehovah boaa no nkorɔfo wɔ mber a no mu yɛ dzen mu. Aber a Ɔhen Ahasuerus hyɛɛ dɛ wonkuku Jewfo a wɔwɔ Persia Ahenman no mu no nyinara wɔ afe 484 A.H.B. no, nna ɔbɛyɛ dɛ Ezra tse Babylon. (Esther 3:​7, 13-15) Ntsi nna Ezra noara so no nkwa da esian mu. Aber a Jewfo a wɔwɔ “ɔmansin biara mu” tsee dɛm ahyɛdze no, hɔn werɛ hoow araa ma wodzii mbuada na wosui, na wɔserɛɛ Jehovah dɛ ɔmboa hɔn. (Esther 4:3) Hwɛ mbrɛ Ezra nye ne mfɛfo Jewfo a nna wɔwɔ hɔ dɛm aber no bɛtse nka aber a pɔw bɔn a hɔn atamfo bɔe no dan kɔr hɔnara hɔn do no! (Esther 9:​1, 2) Ɔbɛyɛ dɛ dza ɔtoo Ezra no maa osiesiee noho maa nsɔhwɛ ahorow a nna obehyia daakye no, na iyi hyɛɛ ahotodo a nna ɔwɔ dɛ Jehovah botum abɔ no nkorɔfo ho ban aber biara no mu dzen. w23.11 17 ¶12-13

Dza nna ɔsomafo Paul reka ho asɛm paa nye “mbra ndwuma.” Ɔno nye Moses Mbra a wɔdze maa Israelfo no wɔ Bepɔw Sinai do no. (Rom. 3:​21, 28) Paul n’aber do no, nna ɔtse dɛ mbrɛ ɔyɛ dzen ma Jewfo Christianfo binom dɛ wɔbɛgye ato mu dɛ Moses Mbra no nye dza nna mbra no hwehwɛ dɛ wɔyɛ no etwa mu. Iyi ntsi, Paul kaa Abraham ho asɛm dze yɛɛ nhwɛdo. Na ɔmaa wohun dɛ ɔnnyɛ “mbra ndwuma” na ɔma obi yɛ ɔtseneneenyi wɔ Nyankopɔn n’enyiwa do. Na mbom ɔkyerɛkyerɛɛ mu dɛ ɔyɛ gyedzi. Dɛm asɛm a yenyim yi hyɛ hɛn nkuran paa. Osiandɛ ɔma yenya awerɛhyɛmu dɛ sɛ yenya Nyankopɔn na Christ mu gyedzi a, yebotum asɔ Nyankopɔn n’enyi. Naaso “mbra ndwuma” a Paul kaa ho asɛm no, ɔnnyɛ ɔno ara so nye “ndwuma” a James kaa ho asɛm wɔ no nwoma no tsir 2 no mu no. James nedze no, nna ɔreka “ndwuma” anaa ndzɛmba a Christianfo yɛ wɔ hɔn da biara da asetsena mu no ho asɛm. (Jas. 2:24) Dɛm ndwuma no na ɔkyerɛ dɛ Christiannyi bi wɔ gyedzi mapa wɔ Nyankopɔn mu anaa onnyi bi. w23.12 3 ¶8; 4-5 ¶10-11

Enuanom mbaa, sɛ hom pɛ dɛ hom war a, ɔsɛ dɛ hom to hom bo ase na hom dze hom enyi to famu hwehwɛ obi a ɔbɛyɛ hom hokafo no yie. Naaso kaa dɛ, sɛ ewar a, banyin no na ɔbɛyɛ ebusua no tsir. (Rom. 7:2; Eph. 5:33) Ntsi bisa woho dɛ: ‘Banyin a mepɛ dɛ mowar no no, ɔyɛ Christiannyi a noho akokwaa anaa? Ɔdze Jehovah dzi kan wɔ n’asetsena mu anaa? Osisi gyinae pa anaa? Ɔgye no mfom to mu a? Obu mbaa anaa? Ɔyɛ obi a obotum aboa me ma maasom Jehovah yie, ɔaahwɛ me na ɔama m’enyi agye anaa?’ Naaso ne nyina mu no, kaa dɛ sɛ epɛ kun pa a, ɔsɛ dɛ woara so yɛ obi a ibotum ayɛ ɔyer pa. Ɔyer pa yɛ no kun no “boafo” nye hokafo a “ɔfata no.” (Gen. 2:18) Afei so, osiandɛ ɔdɔ Jehovah ntsi onngu no kun n’enyim ase, mbom ɔma obiara hu suban pa a no kun wɔ no. (Mbɛ. 31:​11, 12; 1 Tim. 3:11) Sɛ ibotum ayɛ dɛm edwuma yi dɛ ɔyer a, nna ɔno nnwaree yi, yer woho bɛn Jehovah kɛse na boa afofor wɔ fie nye asafo no mu. w23.12 23 ¶18-19

Jehovah ahyɛ hɛn bɔ dɛ ɔbɛma hɛn nyansa a yehia no ama yeetum esisi gyinae pa. Yehia Nyankopɔn no hɔ nyansa paa, nkanka aber a yerisisi gyinae a ɔbɛsesa hɛn asetsena no. Jehovah san so ma hɛn ahoɔdzen ma yɛdze gyina ɔhaw ano. Jehovah bɛma hɛn ahoɔdzen a yehia no ama yeetum egyina ɔhaw ahorow a yehyia no ano dɛ mbrɛ ɔyɛe boaa Paul no. (Phil. 4:13) Kwan kor a ɔfa do yɛ dɛm nye dɛ ɔma hɛn nuanom Christianfo a yɛnye hɔn bɔ mu som no boa hɛn. Anafua a adze rebɛkye ma Jesus dze no nkwa abɔ afɔr ama hɛn no, ɔbɔɔ mpaa dzendzenndzen. Ɔserɛɛ Jehovah dɛ, sɛ ɔbɛyɛ yie a mma ɔmma wonngu n’enyim ase dɛ obi a ɔabɔ mbusu. Naaso Jehovah annyɛ dɛm, mbom ɔsomaa ɔbɔfo bi ma ɔkɛhyɛɛ no dzen. (Luke 22:​42, 43) Hɛn so, Jehovah botum ama onua bi afrɛ hɛn wɔ fon do anaa ɔabɛserɛ hɛn na ɔahyɛ hɛn nkuran. Hɛn nyina botum ahwehwɛ hokwan dze aka “asɛmpa” bi dze ahyɛ hɛn nua bi nkuran.—Mbɛ. 12:25. w23.05 10-11 ¶9-11

Sɛ enuanom a woegyaa adzesua na asɛnka kɔ no ba Nkaadzi a, bi a wobosuro dɛ enuanom renngye hɔn fɛw do. Ntsi sɛ wɔba a, mma yemmbisa hɔn nsɛm bi a ɔbɛma wɔafɛr anaadɛ mma yɛnnka nsɛm bi a ɔbɛhaw hɔn. Kaa dɛ, dɛm enuanom yi yɛ hɛn mfɛfo agyedzifo. Na hɛn enyi gye ho dɛ yɛnye hɔn nyina bɔbɔ mu asom bio! (Ndw. 119:176; Andw. 20:35) Ɔyɛ hɛn enyigye dɛ Jesus hyɛɛ hɛn dɛ yɛnkaa no wu no afe biara, na yɛtse siantsir a iyi ho hia paa no ase. Sɛ yɛkɔ Nkaadzi no a, ɔboa hɛn paa na dɛmara so na ɔboa hɔn a yɛto nsa frɛ hɔn ma wɔba bi no. (Isa. 48:​17, 18) Sɛ yɛkɔ Nkaadzi no so a, ɔboa hɛn ma ɔdɔ a yɛwɔ ma Jehovah na Jesus no mu yɛ dzen. Yɛkyerɛ dɛ hɛn enyi sɔ dza wɔayɛ ama hɛn no paa. Afei so, ɔma yɛbɛn hɛn nuanom kɛse. Bio so, ɔma yetum boa afofor ma wobohu mbrɛ hɔn so wobotum enya nhyira ahorow a werdam no ma yenya no. Ntsi hom mma yɛnyɛ dza yebotum biara mfa nsiesie hɛnho mma afe yi Nkaadzi no, osiandɛ ɔyɛ da tsitsir paa ma hɛn wɔ afe no mu! w24.01 14 ¶18-19

Jehovah si dɛn kyerɛ hɛn kwan? Kwan tsitsir a ɔfa do yɛ dɛm nye dɛ, ɔnam n’Asɛm Bible no do. Naaso, ɔsan so fa nyimpa do kyerɛ hɛn kwan. Dɛ nhwɛdo no, Jehovah nam “akowaa nokwafo nye nyansafo” no do ma hɛn nsa ka ndzɛmba a ɔma yɛnye ne ntamu ebusuabɔ no mu yɛ dzen, na ɔno boa hɛn ma yesisi gyinae pa. (Matt. 24:45) Ɔnnyɛ ɔno nko, ɔfa mbarimba anokwafo binom so do kyerɛ hɛn kwan. Dɛ nhwɛdo no, amansin do ahwɛfo nye asafo mu mpanyimfo hyɛ hɛn nkuran na wɔkyerɛkyerɛ hɛn ma yetum gyina ɔhaw a yehyia no ano. Yɛda Jehovah ase paa dɛ ɔma hɛn akwankyerɛ pa wɔ ewiei mber yi mu! Akwankyerɛ ahorow yi boa hɛn ma yɛkɔ do yɛ ndzɛmba a Jehovah pɛ, na ɔboa hɛn ma yɛkɔ do nantsew nkwa kwan no do. Naaso, ɔtɔ da a, obotum ayɛ dzen ama hɛn dɛ yebedzi Jehovah n’akwankyerɛ do, nkanka aber a ɔnam nyimpa do na ɔdze dɛm akwankyerɛ no rema hɛn no. Mber a ɔtse dɛm mu paa na ɔsɛ dɛ yenya gyedzi dɛ Jehovah na ɔrekyerɛ no nkorɔfo kwan, na sɛ yedzi akwankyerɛ a ɔdze ma hɛn no do a, obehyira hɛn. w24.02 20 ¶2-3

Sɛ yɛyer hɛnho sua Bible no a, ɔdɔ a yɛwɔ ma Jehovah no bɛyɛ kɛse. Sɛ erekenkan Bible a, bɔ mbɔdzen dɛ ibohu mbrɛ dza erekenkan no ma ihu fa Jehovah ho. Bisa woho dɛ: ‘Ebɛnadze na ɔwɔ kyerɛwsɛm yi mu a ɔma muhu dɛ Jehovah dɔ me? Ebɛnadze na ɔwɔ dza makenkan yi mu a ɔbɔboa me ma maadɔ Jehovah?’ Adze fofor so a ɔbɔboa hɛn ma ɔdɔ a yɛwɔ ma Jehovah no ayɛ kɛse nye dɛ yebefi hɛn akoma mu abɔ no mpaa aber nyina. (Ndw. 25:​4, 5) Jehovah so betsie mpaa a ɔtse dɛm no. (1 John 3:​21, 22) Afei so, ɔsɛ dɛ yɛkɔ do da ɔdɔ edzi kyerɛ afofor. Ɔsomafo Paul bɛyɛɛ Christiannyi no, mfe bi ekyir no, ohyiaa aberantsɛ kamakama bi a wɔfrɛ no Timothy. Nna Timothy dɔ Jehovah na ɔdɔ afofor so. Paul kaa kyerɛɛ Philippifo no dɛ: ‘Minnyi obiara a ɔtse dɛ Timothy a obefi n’akoma mu edzi hom nsɛm ho dwuma.’ (Phil. 2:20) Iyi kyerɛ dɛ nna Paul nyim dɛ Timothy dɔ enuanom no paa. Ekyingye biara nnyi ho dɛ nna asafo ahorow a Timothy som hɔn no yamu a nkyɛ ber aso ma ɔaaba bio.—1 Cor. 4:17. w23.07 9 ¶7-10

Moses wui ansaana Israelfo no rokɔ Anohoba Asaase no do. Jehovah yii n’enyi maa ne man Israel aber a Moses wui no anaa? Oho. Jehovah kɔr do boaa hɔn ber tsentsen a wɔkɔr do dzii no nokwar no. Ansaana Moses rubowu no, Jehovah kaa kyerɛɛ no dɛ onyi Joshua ma ondzi Israelman no enyim. Dɛm aber no, nna Moses dze mfe pii atsetse Joshua. (Ex. 33:11; Deut. 34:9) Afei so, nna mbarimba anokwafo bi so wɔ hɔ a wodzi ndzɛmba enyim. Nna binom yɛ asafohemfo a wɔhwɛ apem apem do, ɔha ɔha do, eduonum eduonum do, nye du du do. (Deut. 1:15) Nyankopɔn hwɛɛ no nkorɔfo no yie. Biribi a ɔtse dɛmara so sii wɔ Elijah n’aber do. Nna ɔdze mfe pii aboa Israelfo no ma wɔasom Jehovah nokwar mu. Naaso odur mber bi no, Jehovah sesaa no dwumadzi, na ɔmaa no dwumadzi fofor wɔ Judah n’anaafo afamu. (2 Ahe. 2:1; 2 Mber. 21:12) Ehwɛ a, nna iyi kyerɛ dɛ Jehovah eyi no nkorɔfo a wodzi nokwar a nna wɔwɔ Israel mbusuakuw du ahenman no mu no tokyen anaa? Oho. Nna Elijah dze mfe pii atsetse Elisha. Jehovah kɔr do maa dza ɔpɛ baa mu, na n’asomfo anokwafo so ɔhwɛɛ hɔn. w24.02 5 ¶12

Nna Christianfo a wɔwɔ Ephesus no dze Kyerɛwnsɛm mu nokwar a ɔtse dɛ kan a woebohu no robɔ hɔn bra. (Ndw. 119:105) Nna Ephesusfo a woebohu nokwar no atwe hɔnho efi ator som mu ndzeyɛɛ nye ɔbrafun ho. Nna wɔabɛyɛ nkorɔfo a ‘worusuasua Nyankopɔn’ na wɔreyɛ dza wobotum biara dɛ wɔbɔsom no na wɔayɛ dza ɔsɔ n’enyi. (Eph. 5:1) Hɛn so ansaana yerubosua nokwar no ho adze no, nna ator som na ɔbrafun ntsi yɛwɔ sum mu. Nna hɛn mu binom dze hɛnho hyɛ nyamesom mu afahyɛ ahorow a onngyina Bible do mu. Afei so, nna hɛn mu binom abrabɔ asɛɛ koraa. Naaso aber a yebosuaa dza Jehovah pɛ nye dza ɔmmpɛ ho adze no, yɛsesaa hɛn abrabɔ koraa na yɛhyɛɛ ase yɛɛ ndzɛmba a Jehovah pɛ. Dɛm a yɛyɛe no ama yeenya nhyira pii. (Isa. 48:17) Naaso, yɛda ho ara hyia ɔhaw afofor so. Sum a yɛatwe hɛnho efi ho no, ɔsɛ dɛ yɛhwɛ yie na yaammbɛn ho bio. Mbom no, ɔsɛ dɛ yɛkɔ do ‘nantsew dɛ kan mba.’ w24.03 21 ¶6-7

Bi a w’adwen yɛ wo dɛ ennyɛɛ krado dɛ ibehyira woho do ama Jehovah na woenuma wo. Bi a obehia dɛ eyɛ nsesa bi wɔ w’asetsena mu mbrɛ ɔbɛyɛ a ibotum ayɛ ndzɛmba a Jehovah pɛ anaa bi a ibehia ber kakra ama eetum ayɛ ndzɛmba a ɔbɛma wo gyedzi ayɛ dzen. (Col. 2:​6, 7) Ɔsor Bible suanyi biara na mbrɛ osi nya nkɔenyim. Afei so, mbofraba a woedzi mfe kor mpo, ebɔhwɛ no nna ɔnnyɛ hɔn nyinara na wɔayɛ krado dɛ wobehyira hɔnho do ma woenuma hɔn. Dɛm ntsi mma mmfa woho ntoto obi ho, na mbom hwɛ nkɔenyim a enya wɔ Nyankopɔn no som mu no, na hwɛ dza ɔsɛ dɛ eyɛ ka ho. (Gal. 6:​4, 5) Sɛ ihu dɛ ennyɛɛ krado dɛ ibehyira woho do ama Jehovah mpo a, fa si w’enyi do dɛ ibodu botae a ɔtse dɛm ho. Serɛ Jehovah dɛ ɔmboa wo ma yɛ nsesa biara a ohia dɛ eyɛ wɔ w’asetsena mu. (Phil. 2:13) Nya awerɛhyɛmu dɛ Jehovah betsie wo mpaabɔ no na ɔaaboa wo.—1 John 5:14. w24.03 5 ¶9-10

Da kor bi, nna Sarah ahaw paa. Ntsi ɔkaa mbrɛ osi tse nka no ho asɛm kyerɛɛ Abraham, na ɔbɔɔ no sombo dɛ ɔno na ɔama ɔhaw no aba. Nna Abraham nyim dɛ Sarah brɛ no ho adze na ɔyɛ ɔyer pa so. Abraham tsiee Sarah na ɔbɔɔ mbɔdzen dɛ obesiesie asɛm no. (Gen. 16:​5, 6) Ebɛnadze na yebotum esua efi asɛm yi mu? Kunnom, hom wɔ tum a hom dze sisi gyinae ma hom mbusua. (1 Cor. 11:3) Naaso, sɛ hom risisi gyinae, nkanka gyinae a ɔdze nsesa bi bɛba hom yernom asetsena mu a, ɔsɛ dɛ hom nye hɔn susu ho na hom tsie dza wɔwɔ ka wɔ ho no yie ana. Sɛ hom yɛ dɛm a, ɔkyerɛ dɛ hom dɔ hɔn. (1 Cor. 13:​4, 5) Da kor bi so, Abraham sii gyinae dɛ ɔbɔsom nkorɔfo bi a nna onnyim hɔn no ahɔho. Ɔserɛɛ Sarah dɛ ongyaa biribiara a ɔreyɛ no na ɔnyɛ edziban mma hɔn. (Gen. 18:6) Sarah yɛɛ ntsɛm tsiee dza Abraham kae no. Yernom, hom botum esuasua Sarah na hom agye hom kunnom hɔn gyinaesi ahorow no ato mu. Sɛ hom yɛ dɛm a, hom awar bɔsɔ.—1 Pet. 3:​5, 6. w23.05 24-25 ¶16-17

Gideon bɛyɛɛ ɔtsɛmbuafo no, nna ohia paa dɛ otsie Jehovah na ɔda akokodur edzi. Jehovah dze dwumadzi bi a ɔyɛ hu hyɛɛ ne nsa dɛ ɔnkɛsɛɛ afɔrmbukyia a ne papa som Baal wɔ do no. (Atsɛ. 6:​25, 26) Ɔno ekyir no, Gideon boaboaa nsordaafo bi ano dɛ wɔnye hɔn atamfo rokɔko. Naaso Jehovah maa ɔtseew nsordaafo dodow no do mpɛn ebien. (Atsɛ. 7:​2-7) Ekyir koraa no, Jehovah kaa kyerɛɛ Gideon dɛ ɔnkɔto nhyɛ n’atamfo no do esuom. (Atsɛ. 7:​9-11) Ɔsɛ dɛ asafo mu mpanyimfo yɛ “asoɔmberɛw.” Asafo mu panyin a ɔyɛ asoɔmberɛw anaa otsie Jehovah no, aber biara ɔayɛ krado dɛ ɔdze dza Bible no ka nye akwankyerɛ biara a ofi Nyankopɔn n’ahyehyɛdze no hɔ no bɛyɛ edwuma. Sɛ ɔpanyin bi yɛ dɛm a, enuanom hwɛ na wosuasua no. Naaso nnyɛ aber nyina na obotum ayɛ mberɛw ama no dɛ ɔbɛyɛ setsie. Sɛ yɛbɛyɛ nhwɛdo a, adze rekye na adze resa nyina, akwankyerɛ fofor ba ara na ɔba. Ntsi obotum ayɛ dzen ama asafo mu panyin bi dɛ ɔdze dɛm akwankyerɛ no nyina bɛyɛ edwuma. Akwankyerɛ no bi mpo wɔ hɔ a, n’adwen botum ayɛ no dɛ wɔdze yɛ edwuma a ɔrennyɛ yie, anaa nyansa nnyi mu. Anaadɛ bi a, asafo no bɛka dɛ onkedzi dwuma bi a obotum ama wɔaakyer no ato mu. Ebɛnadze na asafo mu mpanyimfo botum ayɛ dze esuasua Gideon wɔ nsɛm a ɔtsetse dɛm mu? Sɛ akwankyerɛ ba a, ɔsɛ dɛ wotsie no yie na wɔdze yɛ edwuma. w23.06 4-5 ¶9-11