April

Sɛ yɛkenkan Bible no a, yehu dɛ Jehovah n’asomfo a wɔtsenaa ase wɔ tsetse mber mu no hyiaa ɔhaw a nna wɔnnhwɛ kwan. Ma yensusu Jacob n’asɛm no ho. Ne papa Isaac kaa kyerɛɛ no dɛ, ɔnkɔwar Laban a nna noara so yɛ Nyankopɔn no somfo no ne ba basia, na ɔmaa no awerɛhyɛmu dɛ Jehovah behyira no paa. (Gen. 28:​1-4) Ntsi, Jacob tsiee ne papa n’asɛm no, na ofii Canaan kɔr Laban ne nkyɛn. Nna Laban wɔ mbabaa beenu. Nna wɔfrɛ panyin no Leah na wɔfrɛ kakraba no so Rachel. Jacob tsewee hwee Rachel no dɔ mu ma nna ɔnnyɛ agor koraa. Ntsi ɔgyee too mu dɛ ɔbɔsom Laban mfe esuon ama ɔdze Rachel ama no awar. (Gen. 29:18) Naaso awerɛhosɛm nye dɛ, ndzɛmba annkɔ dɛ mbrɛ nna Jacob hwɛ kwan no. Laban daadaa Jacob, na ɔdze ne ba Leah mbom maa no awar. Afei, dapɛn kor ekyir no, Laban maa Jacob waar Rachel, naaso nna ɔsɛ dɛ ɔsan som no mfe esuon ka ho. (Gen. 29:​26, 27) Bio so, aber a Laban nye Jacob yɛɛ edwuma no, Laban sisii no pɔtɔɔ. Ntsi, sɛ yɛka ne nyina bɔ mu a, Laban sisii Jacob mfe pɔrpɔr 20!—Gen. 31:​41, 42. w23.04 15 ¶5

Sɛ yɛpɛ awerɛkyekyer na akwankyerɛ a, woana na yebotum akɔ ne nkyɛn? Yenyim dɛ Jehovah Nyankopɔn na yebotum akɔ ne nkyɛn. Jehovah nankasa aka akyerɛ hɛn dɛ yɛmbɔ no mpaa. Bible no ka dɛ, ‘mma yenngyaa mpaabɔ da,’ ntsi yenyim dɛ ɔpɛ dɛ yɛbɔ no mpaa aber nyina. (1 Thess. 5:17) Dɛm ntsi, yebotum abɔ Jehovah mpaa dze ahwehwɛ no hɔ akwankyerɛ wɔ biribiara a yɛbɛyɛ wɔ hɛn asetsena mu no ho a hwee rinnsiw hɛn kwan. (Mbɛ. 3:​5, 6) Jehovah ne yamu ye na ɔwɔ hɛnho adagyer paa, ɔno ntsi ɔama hɛn kwan dɛ yebotum abɔ no mpaa mpɛn dodow biara a yɛpɛ. Nna Jesus nyim dɛ mpaabɔ ho hia Jehovah paa. Jesus nye n’Egya tsenaa mfe pii ansaana ɔreba asaase yi do. Dɛm aber no, ohun mbrɛ n’Egya sii buaa mbarimba na mbaa anokwafo bi hɔn mpaabɔ. Dɛ nhwɛdo no, aber a Jehovah buaa mpaa a Hannah, David, Elijah nye nyimpa anokwafo binom fii hɔn akoma mu bɔe no, nna Jesus nye no wɔ hɔ. (1 Sam. 1:​10, 11, 20; 1 Ahe. 19:​4-6; Ndw. 32:5) Dɛm ntsi, ɔnnyɛ nwanwa dɛ, Jesus kaa kyerɛɛ n’esuafo no dɛ wɔmfa ahotodo mbɔ Jehovah mpaa aber nyina!—Matt. 7:​7-11. w23.05 2 ¶1, 3

Nna Sɔfopanyin Jehoiada suro Jehovah. Iyi bɛdaa edzi aber a Jezebel ne babaa Athaliah yɛɛ noho ɔhembaa wɔ Judah no. Nna Athaliah ne tsirmu yɛ dzen na n’enyi ber tum. Dɛm ntsi ɔbɔɔ mbɔdzen dɛ obokuku adehye asefo a wɔyɛ nankasa ne nananom no nyina! (2 Mber. 22:​10, 11) Nna Jehoash ka hɔn a ɔpɛ dɛ oku hɔn no ho. Naaso ɔno dze oennya no ennku no, osiandɛ Jehoiada ne yer Jehoshabeath yɛɛ tsebea no ho biribi. Ɔnye no kun dze Jehoash kosumae na wɔhwɛɛ no. Iyi ntsi, Jehoiada na ne yer Jehoshabeath boae ma wɔbɔɔ adehye ebusua no ho ban ama daakye woeenya obi a ofi David ebusua mu a obedzi hen. Jehoiada kɔr do dzii Jehovah nokwar na ɔamma dza Athaliah yɛe no nyina ammbɔ no hu. Aber a Jehoash dzii mfe esuon no, Jehoiada yɛɛ biribi fofor dze kyerɛɛ dɛ odzi Jehovah nokwar. Ɔbɔɔ pɔw bi. Sɛ nna ndzɛmba kɔ yie a, nna Jehoash a ɔyɛ David n’asenyi a ɔwɔ hokwan dɛ odzi adze no bɛyɛ hen. Naaso, sɛ pɔw no annkɔ yie a, nna wobotum eku Jehoiada. Jehovah hyiraa dza nna Jehoiada pɛ dɛ ɔyɛ no do. w23.06 17 ¶12-13

Nna nkyɛ Ɔhen Nebuchadnezzar botum enya adwen dɛ Daniel yɛ ne tamfo anaa ɔpɛ dɛ ɔsoɛr tsia no. Nkyɛ iyi botum ama woeeku no mpo. Naaso iyi ammbɔ Daniel hu, mbom ɔdze akokodur kyerɛɛ daa no ase. Sɛ ehwɛ a, ɔbɛyɛ dɛ ebɛnadze na ɔboaa Daniel ma ɔdaa akokodur edzi no nkwa nda nyina no? Aber a Daniel yɛ ɔbabun no, ekyingye biara nnyi ho dɛ osuaa ndzɛmba pii fii n’awofo hɔ. (Deut. 6:​6-9) Iyi ntsi nna Daniel nyim Mbra no yie. Mbra no bi nye Mbransɛm Du no. Ɔnnyɛ ɔno nko, nna Mbra no mu nsɛm a ɔfa dza Israelfo botum edzi nye dza worunntum nndzi ho no, nna onyim ho nsɛm pii. (Lev. 11:​4-8; Dan. 1:​8, 11-13) Afei so, Daniel suaa Nyankopɔn no nkorɔfo ho abakɔsɛm, na ohun dɛ sɛ Jehovah no nkorɔfo ammfa ne mbra ammbɔ hɔn bra a, wohyia ɔhaw. (Dan. 9:​10, 11) Nsɛm a osisii wɔ Daniel n’asetsena mu nyina no maa onyaa ahotodo paa dɛ Jehovah nye n’abɔfoe a wɔwɔ tum no na wɔboaa no.—Dan. 2:​19-24; 10:​12, 18, 19. w23.08 3 ¶5-6

Rebekah no nkwa nda nyina mu no, ɔkyerɛɛ dɛ ɔyɛ ɔbaa a n’adwen mu da hɔ na otum dze akokodur sisi gyinae. Afei so, nna onyim mber a ɔfata a ɔsɛ dɛ ɔyɛ dɛm. (Gen. 24:58; 27:​5-17) Naaso ɔmmfa ho dɛ nna otum yɛ iyinom nyina no, nna obu adze na ɔbrɛ noho adze so. (Gen. 24:​17, 18, 65) Ntsi ɔwo so, sɛ ifi ahobrɛadze mu taa Jehovah ne nhyehyɛɛ ekyir dɛ mbrɛ Rebekah yɛe no a, afofor bɔhwɛ wo nhwɛdo pa no esuasua wɔ w’ebusua mu nye asafo no mu. Ɔsɛ dɛ Christianfo a hɔnho akokwaa no nyina hu dɛ ɔnnyɛ biribiara na wɔwɔ hokwan dɛ wɔyɛ. Nna Esther yɛ ɔbaa nyamesuronyi. Aber mpo a ɔbɛyɛɛ ɔhembaa no, nna onyim dɛ ɔnnyɛ biribiara na ɔwɔ hokwan dɛ ɔyɛ, ntsi ɔammema noho do. Osiandɛ nna ɔwɔ dɛm suban yi ntsi, aber mpo a no nua panyin Mordecai tuu no fo no, otsiei na ɔdze yɛɛ edwuma. (Esther 2:​10, 20, 22) Dɛ mbrɛ Esther yɛe no, sɛ ehwehwɛ afotu pa fi nkorɔfo hɔ na edze yɛ edwuma a, nna woara so rekyerɛ dɛ egye to mu dɛ ɔnnyɛ biribiara na ewɔ hokwan dɛ eyɛ. (Titus 2:​3-5) Adze fofor a Esther yɛe dze daa dɛm suban yi edzi nye dɛ nna ɔdwen afofor ho. Ɔmmfa ho dɛ nna “no bɔbea yɛ fɛw na n’enyim wɔ nyam” no ɔanntwetwe adwen ammba noho do, anaa ɔannka dɛ, ɔbaa hoɔfɛwfo no na maba no obiara nhwɛ me.—Esther 2:​7, 15. w23.12 19-20 ¶6-8

Bu a yebobu hɛnho fɔ atra do dze, ɔnnyɛ adzesoa a Jehovah pɛ dɛ yɛsoa. Sɛ yɛaka hɛn bɔn, yeenu hɛnho, na yeetu anamɔn a ɔremma yɛnnsan nnkɛyɛ dɛm bɔn no bio a, ɔno dze yebotum enya awerɛhyɛmu dɛ Jehovah dze akyɛ hɛn. (Andw. 3:19) Sɛ yeetu anamɔn a ɔtse dɛm ewie a, Jehovah mmpɛ dɛ yɛkɔ do bu hɛnho fɔ. Onyim dɛ, sɛ yɛkɔ do bu hɛnho fɔ a, obotum atseetsee hɛn. (Ndw. 31:10) Sɛ yɛma awerɛhow hyɛ hɛn do a, annhwɛ a yebegyaa nkwa ho mbirika no tu. (2 Cor. 2:7) Sɛ ibu woho fɔ tra do a, fa w’adwen si mbrɛ Nyankopɔn dze bɔn ‘kyɛ koraa’ no do. (Ndw. 130:4) Hɔn a wɔayɛ bɔn na woefi hɔn akoma mu enu hɔnho no, sɛ ɔdze kyɛ hɔn a, ɔhyɛ hɔn bɔ dɛ: ‘Merennkaa hɔn bɔn no bio.’ (Jer. 31:34) Iyi kyerɛ dɛ bɔn a Jehovah dze akyɛ wo no, ɔronntwe w’asowa wɔ ho bio. Sɛ mfom a idzii ntsi hokwan bi a ewɔ wɔ asafo no mu abɔ wo a, mma ɔnnyɛ wo yaw. Bɔn a eyɛe no, Jehovah eyi n’adwen efi do, ntsi wo so, yi w’adwen fi do. w23.08 30-31 ¶14-15

Aber a COVID-19 bae no, Jehovah n’ahyehyɛdze no dze akwankyerɛ mae, na enuanom a wotsiee no, ɔboaa hɔn ma dadwen annhyɛ hɔn do dɛ hɔn a wotsiee atorsɛm no. (Matt. 24:45) Ɔnnsɛ dɛ yebu hɛn enyi gu ‘ndzɛmba ahorow a ohia no do.’ (Phil. 1:​9, 10) Sɛ yɛma ndzɛmba twetwe hɛn adwen a, yɛbɛsɛɛ hɛn ber nye ahoɔdzen a yɛdze bɛyɛ ndzɛmba a no ho hia no. Ndzɛmba ahorow a yɛtaa yɛ no dabaa tse dɛ edzidzi, ɔnom, enyigyedze, nye edwuma mpo botum atwetwe hɛn adwen sɛ yɛma ɔbɛyɛ ndzɛmba a no ho hia hɛn paa wɔ hɛn asetsena mu a. (Luke 21:​34, 35) Ɔno da nkyɛn a, da biara yɛtse ɔyɛkyerɛ ahorow a ɔkɔ do nye amanyɛsɛm ho amandzɛɛbɔ. Ɔnnsɛ dɛ yɛma kwan ma nsɛm a ɔtsetse dɛm no twetwe hɛn adwen koraa. Annyɛ dɛm a obotum ama yɛdze hɛn akoma ekedzi ɔfa bi ekyir. Satan fa akwan ahorow bi do mbrɛ ɔbɛyɛ a ɔbɛsɛɛ hɛn bo a yeesi dɛ yɛbɔkɔ do edzi Jehovah nokwar no. w23.07 16-17 ¶12-13

Jehovah n’asomfo dze, da a yɛdze kaa Christ no wu no yɛ da tsitsir paa ma hɛn wɔ afe no mu. Iyi nkotsee nye afahyɛ a Jesus hyɛɛ n’ekyirdzifo dɛ wondzi. (Luke 22:​19, 20) Ɔkaakaa hɛn ndzɛmba a yebotum ayɛ dze akyerɛ Jesus n’afɔrbɔ no ho enyisɔ. (2 Cor. 5:​14, 15) Afei so, ɔma yenya hokwan nye hɛn nuanom hyia mu na yɛhyehyɛ hɛnho nkuran. (Rom. 1:12) Bio so, nyimpa pii a wɔba Nkaadzi no, dza wohu na wɔtse no ma hɔn enyi gye, na iyi kenyan hɔn ma wɔhyɛ ase sua Bible no. Siantsir fofor ntsi a Nkaadzi no da hɛn akoma do nye dɛ, ɔka Jehovah n’asomfo a wɔwɔ wiadze nyina no bɔ mu. Hom mma yɛnka, iyi nyina ka ho bi ntsi na Nkaadzi no da hɛn akoma do dɛm no! w24.01 8 ¶1-3

Sɛ yɛdwendwen dza Jehovah na Jesus hweree mbrɛ ɔbɛyɛ a wobotum etua werdam no ho a, ɔbɛma yɛatse ɔdɔ a wɔdze dɔ hɛn no ase yie. (Gal. 2:20) Jehovah tuaa werdam no osian ɔdɔ a ɔwɔ ma hɛn ntsi. Jehovah dze no Dɔba Jesus a ɔsom bo ma no paa no bɔɔ afɔr dze kyerɛɛ dɛ ɔdɔ hɛn. Osian hɛn ntsi, Jehovah maa ne Ba no bohun amandze na owui. Jehovah nnka no kɛkɛ dɛ ɔdɔ hɛn mbom ɔma yehu dɛ ɔdɔ hɛn. (Jer. 31:3) Osiandɛ Jehovah dɔ hɛn ntsi ɔatwe hɛn aba ne nkyɛn. (Fa toto Deuteronomy 7:​7, 8 ho.) Nyimpa biara anaa biribiara nnyi hɔ a obotum atsew hɛn efi Nyankopɔn no dɔ no ho. (Rom. 8:​38, 39) Mbrɛ Jehovah si dɔ wo no ma etse nka dɛn? w24.01 28 ¶10-11

Enyidado a Christianfo a wɔasera hɔn no wɔ dɛ wɔbɔkɔ sor no da hɔn akoma do paa. Nna Onua Frederick Franz ka hɔn a wɔasera hɔn no ho. Mbrɛ nna osi tse nka wɔ dɛm enyidado yi ho no, ɔkaa ho asɛm. Ɔkaa dɛ: “Hɛn enyidado no yɛ nokwar, na ɔbɛba mu koraa wɔ kuw ketseaba 144,000 no munyi biara a otwa tun no do ma ekodu beebi a ɔtra dza yesusu no mpo do.” Afe 1991 mu no, osii mbrɛ nna osi tse nka wɔ dɛm enyidado no ho no do dua. Ɔkaa dɛ: “Yɛda ho ara nyim dɛ dɛm enyidado no som bo. . . . Yɛbɔkɔ do akyerɛ ho enyisɔ kɛse ber tsentsen a ɔsɛ dɛ yɛtweɔn no. Ɔyɛ adze a ɔfata dɛ yɛtweɔn . . . Sesei, mubu hɛn enyidado no dɛ ɔsom bo kɛse kyɛn ber biara a etwa mu.” Dɛ yɛbɛtsena ase daa wɔ sor o, dɛ yɛbɛtsena asaase do o, yɛwɔ enyidado papabi a ɔma yedzi dɛw. Dɛm ntsi, awerɛhyɛmu a yɛwɔ wɔ enyidado no mu no, ɔsɛ dɛ yɛhyɛ mu dzen. w23.12 9 ¶6; 10 ¶8

Nna boran afɔrmbukyia bi si tsetse ntamadan no n’abowano wɔ paado a wɔdze mbowa bɔ afɔr wɔ do ma Jehovah. (Ex. 27:​1, 2; 40:29) Naaso dɛm afɔr horow a nna wɔbɔ no, nna onnyi bɔn mmfi hɔ korakora. (Heb. 10:​1-3) Nna mbowa a da biara wɔdze bɔ afɔr wɔ ntamadan no mu no yɛ afɔr bi a nna daakye wɔbɔbɔ no pɛn kor pɛ dze agye adasamba nyina efi bɔn mu korakora no ho mfonyin. Jesus wɔ asaase do no, nna onyim dɛ Jehovah asoma no dɛ ɔmfa no nkwa mbɛyɛ werdam mfa mma adasamba. (Matt. 20:28) Dɛm ntsi, ber a wonumaa Jesus no, ɔdze noho mae dɛ ɔbɛyɛ dza Jehovah pɛ. (John 6:38; Gal. 1:4) Jesus dze no nkwa bɔɔ afɔr “prɛko” anaa pɛn kor mbrɛ ɔbɛyɛ a obiara a ɔbɛgye Christ edzi no, wɔdze no bɔn bɛkyɛ no korakora.—Heb.10:​5-7, 10. w23.10 26-27 ¶10-11

Ɔka hɛn nkotsee a, nkyɛ yerunntum nngye hɛnho mmfi bɔn na owu mu da. (Ndw. 49:​7, 8) Ntsi Jehovah yɛɛ nhyehyɛɛ ma no Dɔba Jesus dze no nkwa too hɔ gyee hɛn nkwa. Jehovah na Jesus nyina dze biribi a ɔsom bo ma hɔn bɔɔ afɔr maa hɛn. Sɛ yɛkɔ do dwendwen dza Jehovah na Jesus dze bɔɔ afɔr maa hɛn no ho a, ɔbɔboa hɛn paa ma yaakyerɛ werdam no ho enyisɔ kɛse. Aber a Adam yɛɛ bɔn no, ɔhweer hokwan a nkyɛ ɔwɔ dɛ ɔno nye n’asefo nyina bɛtsena ase daa no. Mbrɛ ɔbɛyɛ a Jesus botum etua dza Adam hweree no, nna ɔsɛ dɛ nankasa dze no nkwa a odzi mu no bɔ afɔr. Aber a Jesus wɔ asaase do no, “ɔannyɛ bɔn na eso woennhu ndaadaa wɔ n’anomu.” (1 Pet. 2:22) Jesus wui no, nna bɔn biara nnyi noho; nna ɔtse dɛ Adam aber a ɔnnyɛɛ bɔn no. Ntsi aber a Jesus dze no nkwa bɔɔ afɔr no, otuaa nkwa a Adam hweree no.—1 Cor. 15:45; 1 Tim. 2:6. w24.01 10 ¶5-6

Aber a wonyaan Jesus no, ɔkɔr Krɔnkrɔn Mu Krɔnkrɔnbea a ɔwɔ sunsum afamu asɔrfi no mu. Ndzɛmba a yeesusu ho yi ma yehu pefee dɛ nhyehyɛɛ a Jehovah ayɛ a ɔma yetum som no nokwar mu no, ogyina werdam afɔrbɔ no nye Jesus Christ n’asɔfodzi no do. Sɛ nna sɔfopanyin a ɔwɔ Israel no rokɔ Krɔnkrɔn Mu Krɔnkrɔnbea hɔ a, nna ɔdze mbowa a wɔdze hɔn abɔ afɔr no hɔn bɔgyaa na ɔdze kɔ. Naaso Jesus dze, “ɔhɛɛn sor ankasa,” bea a hɔ yɛ krɔnkrɔn kyɛn biara dɛ orikeyi noho edzi akyerɛ Jehovah. Aber a ɔkɔr hɔ no, ɔdze no nkwa a bɔn biara nnyi ho na ɔsom bo no kɛmaa Jehovah ama ‘ɔnam noho a ɔdze bɔɔ afɔr no do eyi bɔn efi hɔ.’ (Heb. 9:​24-26) Sɛ yɛwɔ enyidado dɛ yɛbɔkɔ sor o, anaa yɛbɛtsena asaase do o, hɛn nyina botum asom Jehovah wɔ sunsum afamu asɔrfi no mu. w23.10 28 ¶13-14

Dwendwen dwuma a Jesus ridzi wɔ sor dɛ hɛn Hen na Ɔsɔfopanyin a ɔtse hɛn ase no ho hwɛ. Yɛnam no do tum kɔ Nyankopɔn “adom ahengua” no enyim wɔ mpaabɔ mu, na yɛhwehwɛ no hɔ mboa wɔ “ber a ɔsɛ mu.” (Heb. 4:​14,15) Dza Jehovah na Jesus ayɛ ama hɛn, nye dza wogu do reyɛ ma hɛn no, ɔnnsɛ dɛ yɛma da kor mpo pa hɛn tsir do a yɛronndwendwen ho. Ɔsɛ dɛ ɔdɔ a wɔwɔ ma hɛn no ka hɛn akoma paa na ɔhyɛ hɛn ma yɛdze nsi na ahokeka som Jehovah. (2 Cor. 5:​14, 15) Kwan kor a yebotum afa do akyerɛ dɛ hɛn enyi sɔ dza Nyankopɔn na ne Ba no ayɛ ama hɛn nye dɛ yɛbɔboa nkorɔfo ma wɔaabɛyɛ Jehovah n’Adasefo nye Jesus n’esuafo. (Matt. 28:​19, 20) Dɛm na ɔsomafo Paul yɛe. Nna onyim dɛ dza Jehovah pɛ nye dɛ ‘ɔgye nyimpa nyina nkwa, na wobenya nokwar no ho nyimdzee a odzi mu.’—1 Tim. 2:​3, 4. w23.10 22-23 ¶13-14

Sɛ yɛnam asɛnka mu a, hɛn mu piinara taa kenkan dɛm kyerɛwnsɛm yi dze kyekye nkorɔfo hɔn werɛ na yɛma wohu mbrɛ asetsena bɛyɛ wɔ Paradise. Yebesi dɛn aboa nkorɔfo ma wɔaagye edzi dɛ asɛm a ɔwɔ Nyikyerɛ 21:​3, 4 no bɛba mu? Afei so, yebesi dɛn ahyɛ gyedzi a yɛwɔ wɔ Jehovah na n’anohoba ahorow no mu dzen? Jehovah ammfa n’ano annka dɛm asɛm yi ara kɛkɛ, mbom ɔama hɛn ngyinado ahorow a obotum ama yaagye dɛm asɛm yi edzi. Kyerɛwnsɛm a odzi do yi ma yenya ngyinado ahorow bi a obotum aboa hɛn ma yaagye anohoba a Jehovah dze abɔ hɛn afa Paradise ho no edzi. Ɔka dɛ: “Nyia ɔtse ahengua no do no see dɛ, Hwɛ, mereyɛ adze nyina fofor na ɔsee me dɛ, Kyerɛw: na nsɛm no yɛ ampa nye nokwar. Na ɔsee me dɛ, Ayɛ hɔ. Emi nye Alpha nye Omega, ahyɛse nye ewiei.”—Nyi. 21:​5, 6a. w23.11 3 ¶3-5

Dza ɔkyerɛ dɛ onua aberantsɛ bi n’adwen mu da hɔ nye dɛ ɔbɔhwɛ ne ntarhyɛ na n’ahosiesie yie. Mpɛn pii no, hɔn a wɔyɛ ntar a wɔaba do na wɔbɔ ho dawur no, wommbu Jehovah hwee na hɔn abrabɔ so asɛɛ. Iyi ntsi sɛ obi hyɛ ntar a wɔyɛ no a, otum kyekyer no pampee anaa ɔma mbarimba sɛ mbaa. Sɛ onua aberantsɛ a ɔpɛ dɛ ɔbɛyɛ Christiannyi a noho akokwaa no rebɛhyɛ atar bi a, ɔdze dza oesua efi Bible mu no bɛyɛ edwuma na oeesuasua hɔn a wosiesie hɔnho yie wɔ asafo no mu no. Obotum ebisa noho dɛ: ‘Sɛ nkorɔfo hwɛ m’ahosiesie a, ɔma wohu dɛ meyɛ obi a m’adwen mu da hɔ na modwen afofor ho anaa? Mbrɛ misi siesie moho no, ɔma nkorɔfo hu dɛ meyɛ nyamesomnyi papa anaa?’ (1 Cor. 10:​31-33) Sɛ onua aberantsɛ bi ma n’enyi da hɔ a, enuanom bobu no na no sor Egya no so bɛpɛ n’asɛm. w23.12 26 ¶7

Mber bi a woetwa mu no, ‘anaafo afamu hen’ no soɛree tsiaa Jehovah n’asomfo. (Dan. 11:40) Dɛ nhwɛdo no, aber a Wiadze Ko I nye Wiadze Ko II rokɔ do no, osiandɛ enuanom ammfa hɔnho annhyɛ akodzi no mu ntsi, wɔdze hɔn pii koguu efiadze. Afei so, woyii Adasefo mba a nna wɔkɔ skuul no mu binom edzi osiandɛ woennkyia frankaa ntsi. Naaso ndaansa yi dze, ɔhaw a Jehovah n’asomfo a wɔtse aman a ɔhen yi dzi do tum no hyia no nntse dɛ nkan no dze no, na iyi so ma ɔyɛ dzen ma hɔn dɛ wɔdze hɔn akoma nyinara bɛtaa Nyankopɔn n’Ahendzi no ekyir. Dɛ nhwɛdo no, sɛ abatow ber so a, annhwɛ a Jehovah no somfo bi n’adwen bɛyɛ no dɛ amanyɛkuw bi ye sen fofor, anaa nyimpa bi a oegyina dɛ wɔntow aba mma no no fata kyɛn hɔn a wɔaka no. Bi a ɔronnkɔtow aba no bi dze, naaso ebɔhwɛ no, nna n’adwen na n’akoma dzi ɔfa bi ekyir. Iyi ma yehu dɛ, no ho hia paa dɛ yɛdze hɛn ndzeyɛɛ nye dza yɛdwen ho nyinara kyerɛ dɛ yenngyina ɔfa bi ekyir!—John 15:​18, 19. w23.08 12 ¶17

Ɔsɛ dɛ yetu nkwa ho mbirika no ‘wɔ ɔkwan bi do a ɔbɛma yeenya abadobɔdze no.’ (1 Cor. 9:24) Jesus kaa dɛ “etumfursɛm nye asabow nye ɔbra yi ho dadwen” botum ‘ahyɛ hɛn akoma do.’ (Luke 21:34) Dɛm kyerɛwsɛm yi nye kyerɛwnsɛm afofor botum aboa wo ma eehu nsakyer a bi a obehia dɛ eyɛ ber a irutu nkwa ho mbirika no. Yɛgye dzi dɛ yebedzi konyim wɔ nkwa ho mbirika a yerutu no mu, osiandɛ Jehovah bɛma hɛn ahoɔdzen a yehia no. (Isa. 40:​29-31) Ntsi mma nngow woho! Suasua ɔsomafo Paul, osiandɛ ɔyeer noho tuu mbirika no dɛ mbrɛ ɔbɛyɛ a obenya abadobɔdze a nna osi n’enyiwa do no. (Phil. 3:​13, 14) Obiara runntum nntu dɛm mbirika yi mma wo, naaso Jehovah botum aboa wo ma eedzi konyim. Jehovah botum aboa wo ma aasoa ndzesoa a ohia dɛ esoa no, na aatow dza no ho nnhia no egu. Jehovah ka woho, ntsi ibotum emia w’enyiwa etu mbirika no na eedzi konyim! w23.08 31 ¶16-17

Aber a Jesus dzii mfe 12 no, ɔnye n’awofo kɔr afahyɛ bi wɔ Jerusalem. Wɔresan akɔ hɔn kurow mu no, nna Jesus nnka hɔnho, naaso woennhu. (Luke 2:​46-52) Nna ɔyɛ Joseph na Mary hɔn asodzi dɛ wɔhwɛ dɛ hɔn mba no nyina ka hɔnho ber a wɔresan akɔ hɔn kurow mu no. Ekyir yi, aber a Joseph na Mary hun Jesus no, Mary bɔɔ Jesus sombo dɛ ɔno na ɔama iyi nyina esi. Nkyɛ Jesus botum ama ne maame ehu dɛ dza ɔreka no nnyi mu koraa. Naaso, ɔkaa asɛm bi a nna ɔkyerɛ dɛ obu n’awofo. Joseph na Mary dze, “wɔanntse asɛm a [Jesus] kaa kyerɛɛ hɔn no ase.” Iyi nyina mu no Jesus kɔr do ‘brɛɛ noho adze maa hɔn.’ Mbofra, sɛ hom awofo dzi mfomdo anaa wɔnntse hom ase a, ɔyɛ a ɔyɛ dzen ma hom dɛ hom betsie hɔn anaa? Sɛ dɛm a, ebɛnadze na obotum aboa hom? Hom ndwendwen mbrɛ Jehovah tse nka no ho. Bible no ka dɛ sɛ hom tsie hom awofo a, ‘ɔsɔ Ewuradze enyi.’ (Col. 3:20) Jehovah nyim dɛ ɔtɔ da a w’awofo nntse wo ase papa, anaa wɔhyehyɛ mbra bi a ɔyɛ dzen ma wo dɛ ibedzi do. Naaso sɛ itsie hɔn a, ebɛma Jehovah n’enyi agye paa. w23.10 7 ¶5-6

Hɛn skuulnyi bi botum aka akyerɛ hɛn dɛ, ɔsɛ dɛ yɛsesa adwen a yɛwɔ wɔ mbarimba na mbarimba nye mbaa na mbaa a wɔnye hɔnho da no ho. Sɛ ɔba no dɛm a, yɛbɛma oehu dɛ yɛkyerɛ obu ma hokwan a obiara wɔ dɛ osi nankasa ne gyinae no. (1 Pet. 2:17) Afei, yebotum ama oeehu dɛ, sɛ obi dze Bible no bɔ ne bra a, ɔboa no paa. Sɛ yehyia obi a ɔnye hɛn nnyɛ adwen koraa wɔ hɛn gyedzi ho a, ɔnnsɛ dɛ yɛper hɛnho ka dɛ yenyim dza ɔgye dzi. Fa no dɛ wo skuulnyi bi aka akyerɛ wo dɛ nyansa nnyim dɛ yɛbɛgye edzi dɛ Nyankopɔn bi wɔ hɔ. Sɛ ɔka dɛm a, ɔsɛ dɛ hɔ ara yenya adwen dɛ ɔgye adandandzi nkyerɛkyerɛ no dzi na onyim ho nsɛm pii anaa? Bi mpo a dza ɔatse ho asɛm kɛkɛ na ɔreka. Ibotum akyerɛ no asɛm bi a ɔfa abɔdze ho wɔ jw.org. Bi a ekyir yi n’enyi bɛgye ho dɛ ɔnye wo bɔbɔ asɛm bi a ɔakenkan anaa video bi a ɔahwɛ wɔ wɛbsaet no do ho nkɔmbɔ. Nokwasɛm nye dɛ, sɛ yɛkyerɛ dɛ yebu no a, bi a obekenyan no ma oeesua pii afa Bible no ho. w23.09 17 ¶12-13

Yebotum enya awerɛhyɛmu dɛ, sɛ yeedzi mfomdo mpo a, Jehovah dze hɛn bɛyɛ edwuma na oehyira hɛn. Naaso dza ohia paa dɛ yɛyɛ nye dɛ yɛbɛsesa hɛn akwan na yaakɔ do dze hɛnho ato no do. (Mbɛ. 28:13) Nna bɔn wɔ Samson ho, naaso aber a Delilah hyɛɛ no ma odzii mfomdo mpo no, ɔammpa abaw, mbom ɔkɔr do soom Jehovah. Jehovah so ammpa abaw wɔ noho. Ɔsanee maa no ahoɔdzen ma okunkum Philistiafo pii ansaana oruwu. Nna Jehovah bu no dɛ ɔka n’asomfo a wɔdaa gyedzi kɛse edzi no ho. Dɛm ntsi ɔmaa wɔdze no kaa anokwafo a wɔabobɔ hɔn dzin wɔ Hebrewfo tsir 11 no ho. Yenyim dɛ hɛn Nyankopɔn a yɛsom no no enyi gye ho paa dɛ ɔbɛhyɛ hɛn dzen nkanka aber a yɛayɛ mberɛw no, na iyi ma hɛn enyi gye ankasa! Dɛm ntsi, hom mma yɛnkɔ do nsuasua Samson, na yɛmbɔ Jehovah mpaa dɛ: “Meserɛ wo, kaa me, na hyɛ me dzen.”—Atsɛ. 16:28. w23.09 7 ¶18-19

Sɛ yɛma Jehovah ne da no tsena hɛn adwen mu a, obekenyan hɛn ma yaaka asɛmpa no akyerɛ afofor. Naaso ɔtɔ da a, yɛbɔ hu dɛ yɛbɛka asɛmpa no. Ebɛnadze ntsi a? Siantsir nye dɛ nyimpa ho suro tum bɔ hɛn hu. Tsebea a ɔtse dɛm bi too Peter. Anafua a wɔkyeer Jesus no, nna Peter suro dɛ ɔbɛda noho edzi dɛ ɔyɛ Jesus no suanyi, na ɔkaa no mpɛn ebiasa mpo dɛ onnyim no wɔ beebiara. (Matt. 26:​69-75) Naaso ekyir yi, ɔsomafo Peter tumii dzii nyimpa ho suro do na ɔdze ahotodo kaa dɛ: “Mma hom nnsuro hɔn ho hu, na mma hom akoma nntu.” (1 Pet. 3:14) Asɛm a Peter kae yi ma yehu dɛ, ampa yebotum edzi nyimpa ho suro do. Ebɛnadze na obotum aboa hɛn ma yeedzi nyimpa ho suro do? Peter kaa dɛ: “Hom mbu Ewuradze Christ krɔnkrɔn wɔ hom akoma mu.” (1 Pet. 3:15) Ndzɛmba a yebotum ayɛ dze akyerɛ dɛm no bi nye dɛ yɛbɛkaa dɛ hɛn Ewuradze Christ Jesus yɛ Ɔhen na ɔwɔ tum kɛse. w23.09 27-28 ¶6-8

Ɔsɛ dɛ yɛkɔ do ko tsia ‘sum ndwuma a ɔnnsow aba no,’ amma yaammfa hɛnho annkɛhyɛ mu. (Eph. 5:11) Nsɛm a osisi ma yehu dɛ sɛ obi hwɛ ndwamansɛm ho mfonyin, otsie ho nsɛm anaa ɔnye nkorɔfo bɔ ho nkɔmbɔ a, ɔnnyɛ dzen dɛ ɔdze noho bɛhyɛ ndzeyɛɛ bɔn mu. (Gen. 3:6; Jas. 1:​14, 15) Satan no wiadze no bɔ mbɔdzen dɛ ɔbɛdaadaa hɛn ma yaagye edzi dɛ dza Jehovah aka dɛ ɔyɛ ɔbrafun na no ho nntsew no, ɔnnyɛ dɛm na ɔtse koraa. (2 Pet. 2:19) Iyi yɛ kwan kor a ofi tsetse nyina Abɔnsam abɔ mbɔdzen dɛ ɔbɛfa do dze asɛɛ nyimpa hɔn adwen mbrɛ ɔbɛyɛ a worunnhu papa na bɔn mu nsonsonee. (Isa. 5:20; 2 Cor. 4:4) Ntsi ɔnnyɛ nwanwa dɛ ndɛ sene ahorow, TV do dwumadzi nye nsɛm ahorow a wɔdze gu intanɛt do no hyɛ ndzɛmba a Jehovah kyir ho nkuran! Satan robɔ mbɔdzen dɛ ɔbɛdaadaa hɛn ma yeenya adwen dɛ asɛm biara nnyi ndzeyɛɛ a no ho nntsew nye abrabɔ fun a woebu do wɔ wiadze yi mu ndɛ no ho. Afei so, ɔpɛ dɛ yenya adwen dɛ sɛ yɛdze hɛnho hyɛ mu a, ɔremmfa ɔhaw biara mmberɛ hɛn.—Eph. 5:6. w24.03 22 ¶8-10

Nna ntamadan no yɛ dan a wɔdze tam hyehyɛ tse dɛ tɛnt. Ntsi sɛ nna Israelfo no rutu akɔ beebi a, nna wotutu kɔ. Israelfo no dze bɛyɛ mfe 500 somee wɔ ntamadan mu kesii dɛ wosii asɔrfi ankasa wɔ Jerusalem. (Ex. 25:​8, 9; Nka. 9:22) Sɛ nna Israelfo no pɛ dɛ wɔkɔ Nyankopɔn enyim kɔbɔ afɔr na wɔsom no a, nna ntamadan no enyim na wohyia mu. (Ex. 29:​43-46) Naaso, nna ntamadan no san so gyina hɔ ma biribi tsitsir bi. Nna ɔyɛ “sor ndzɛmba no susudo nye no sunsuma,” na ɔma yehu mbrɛ Jehovah no sunsum afamu asɔrfi kɛse no tse. Ɔsomafo Paul kaa dɛ dɛm ‘ntamadan no yɛ nsɛntoho ma sesei ber a ɔwɔ hɔ yi.’ (Heb. 9:9) Aber a ɔkyerɛɛw krataa kɛmaa Hebrewfo no, nna Christianfo rosom wɔ sunsum afamu asɔrfi no mu dada. Wɔhyɛɛ ase somee wɔ dɛm asɔrfi yi mu wɔ afe 29 H.B. Dɛm afe no mu na wonumaa Jesus ma ɔhyɛɛ ase soom dɛ Jehovah no “sɔfopanyin kɛse” wɔ sunsum afamu asɔrfi hɔ.—Heb. 4:14; Andw. 10:​37, 38. w23.10 26 ¶6-7

Dɛ Christianfo no, sɛ yebotum dze enyigye akɔ do asom Jehovah a, ɔsɛ dɛ yɛyɛ krado dɛ sɛ mber dan a, yɛbɛdan hɛnho, anaa ɔkwan bi do no, sɛ hɛn tsebea sesa a, ɔsɛ dɛ hɛn so yɛsesa hɛnho. Yɛbɛyɛ no dɛn? Sɛ hɛn nsɛm tsebea sesa na yɛgye to mu, na yɛkyerɛ obu ma afofor hɔn adwenkyerɛ nye hɔn gyinaesi a, ɔkyerɛ dɛ yɛwɔ ntseasee. Dɛ Jehovah n’asomfo no, yɛpɛ dɛ yɛyɛ nyimpa a yɛwɔ ntseasee. Afei so, yɛpɛ dɛ yɛbrɛ hɛnho adze na yɛda tsema edzi. Bible no frɛ Jehovah “Ɔbotan no,” osiandɛ ɔbotan tsim hɔ pintsinn na onnhinhim. (Deut. 32:4) Naaso, Jehovah san da ntseasee edzi. Sɛ nsɛm ahorow bi sisi na Jehovah hu dɛ ɔsɛ dɛ ɔyɛ nsesa ahorow bi ama dza ɔpɛ no aba mu a, ɔyɛ dɛm. Jehovah bɔɔ nyimpa wɔ no su do. Dɛm ntsi, hɛn so sɛ hɛn tsebea sesa a, yɛyɛ nsesa ahorow. Ɔmmfa ho tsebea biara a yebehyia no, Jehovah ama hɛn afotu pii wɔ Bible mu a obotum aboa hɛn ma yeesi gyinae pa. Dza Jehovah nankasa ɔayɛ nye afotu a ɔdze ama wɔ Bible mu no ma yehu dɛ, ɔmmfa ho dɛ Jehovah yɛ “Ɔbotan no,” ɔda ntseasee edzi. w23.07 20 ¶1-3

Sɛ yɛhwɛ Bible mu a, Jehovah dze noho toto baatan bi a ɔdɔ ne ba ho. (Isa. 66:​12, 13) Ɔwodze twa baatan bi a ɔdɔ ne ba na ɔhwɛ no yie ho mfonyin hwɛ. Ɔhwɛ hu dɛ ɔdze dza ohia no bɛma no anaa ɔbɛma no ho aatɔ no. Ntsi hɛn so, sɛ biribi haw hɛn a, yebotum enya awerɛhyɛmu dɛ Jehovah dɔ hɛn na ɔbɔboa hɛn. Dɛm ntsi sɛ yedzi mfomdo mpo a, ɔmmpa abaw wɔ hɛnho. (Ndw. 103:8) Israelfo no dzii Jehovah hweambɔ mpɛn pii, naaso aber biara a wobonu hɔnho na woegyaa bɔn yɛ no, nna Jehovah ma wonya awerɛhyɛmu dɛ ɔda ho ara dɔ hɔn. Dɛ nhwɛdo no, ɔkaa kyerɛɛ Israelman no dɛ: “Asom bo wɔ m’enyi do, na enya enyidzi, na modɔ wo.” (Isa. 43:​4, 5) Ndɛ so Jehovah dɔ n’asomfo dɛmara. Sɛ yɛyɛ bɔn kɛse mpo na yenu hɛnho na yɛsan ba ne nkyɛn a, yebohu dɛ ɔda ho ara dɔ hɛn. Jehovah ahyɛ hɛn bɔ dɛ ɔdze hɛn bɔn ‘bɛkyɛ hɛn ma wɔaabor do.’ (Isa. 55:7) Bible no ka dɛ sɛ Jehovah dze hɛn bɔn kyɛ hɛn a, ɔma hɛnho tɔ hɛn.—Andw. 3:19. w24.01 27 ¶4-5

Sɛ yerihyia ɔhaw a, Jehovah botum aboa hɛn ma yeegyina ano. Dɛ nhwɛdo no, sɛ yɛserɛ hɛn edwumawura dɛ ɔmma hɛn kwan ma yɛnkɔ ehyiadzi, anaa sɛ yɛserɛ no dɛ ɔnyɛ nsesa wɔ mber a yɛdze yɛ edwuma no mu mbrɛ ɔbɛyɛ a yebotum akɔ asafo nhyiamu a, nna yɛrekyerɛ dɛ yɛpɛ dɛ yehu Jehovah ne nsa wɔ hɛn abrabɔ mu. Sɛ yɛyɛ dɛm a, Jehovah bɔboa hɛn ma wɔaayɛ hɛn nwanwa, na iyi bɛma ahotodo a yɛwɔ wɔ no mu no ayɛ kɛse. Ezra fi ahobrɛadze mu hwehwɛɛ Jehovah no mboa. Aber biara a nna Ezra bɛtse nka dɛ ndzɛmba a ɔsɛ dɛ odzi ho dwuma no ho dadwen ahyɛ no do no, nna ofi ahobrɛadze mu bɔ Jehovah mpaa. (Ezra 8:​21-23; 9:​3-5) Ezra dze noho too Jehovah do, na iyi maa hɔn a wɔwɔ ne nkyɛn no so taa n’ekyir na wosuasuaa gyedzi a ɔdaa no edzi no. (Ezra 10:​1-4) Sɛ dza yehia wɔ asetsena mu, nye mbrɛ yebesi abɔ hɛn ebusua ho ban no ho dadwen hyɛ hɛn do a, ɔsɛ dɛ yɛdze hɛnho to Jehovah do na yɛbɔ no mpaa. w23.11 18 ¶15-17

Ɔnnyɛ dza Jehovah reka nye dɛ sɛ yɛpɛ dɛ obu hɛn atseneneefo a, nna ɔno ɔsɛ dɛ yɛyɛ dza Abraham yɛe no bi pɛpɛɛpɛ. Kwan ahorow pii wɔ hɔ a yebotum afa do dze hɛn ndwuma akyerɛ dɛ yɛwɔ gyedzi. Dza yebotum ayɛ no bi nye dɛ yɛbɛgye enuanom a wɔaba hɛn asafo mu fofor, nye enyigyefo a wɔba hɛn asafo nhyiamu no fɛw do. Afei so, ɔsɛ dɛ yɛboa hɛn nuanom a wohia mboa no, na yɛyɛ hɛn ebusuafo papa. Dɛm ndzɛmba ahorow yi na Nyankopɔn n’enyi sɔ na ohyira do. (Rom. 15:7; 1 Tim. 5:​4, 8; 1 John 3:18) Edwuma tsitsir a yebotum ayɛ dze akyerɛ dɛ yɛwɔ gyedzi nye dɛ yɛdze nsi na ahokeka bɛka asɛmpa no akyerɛ nkorɔfo. (1 Tim. 4:16) Ɔsɛ dɛ hɛn nyinara dze hɛn ndwuma kyerɛ dɛ yɛgye dzi dɛ bɔ ahorow a Jehovah dze ahyɛ hɛn no bɛba mu, na dza ɔyɛ nyina ye. Sɛ yɛyɛ dɛm a, yɛwɔ awerɛhyɛmu paa dɛ Nyankopɔn bobu hɛn dɛ atseneneefo na yɛbɛba abɛyɛ n’anyɛnkofo. w23.12 2 ¶3; 6 ¶15

Aka kakra ma Ɔhen David ewu no, ɔkaa asɛm a ndɛ daa asɛm yi gyina do no kyerɛɛ ne ba Solomon. (1 Ahe. 2:​1, 3) Ndɛ so, ɔsɛ dɛ Christianfo mbarimba nyina tsie dɛm afotu no. Sɛ wobotum ayɛ dɛm a, ɔsɛ dɛ wodzi Nyankopɔn ne mbra do, na wɔdze Bible mu afotusɛm bɔ hɔn bra wɔ biribiara mu. (Luke 2:52) Ebɛnadze ntsi na ohia paa dɛ enuanom mberantsɛ yer hɔnho bɛyɛ Christianfo a hɔnho akokwaa? Christiannyi banyin dzi dwuma ahorow a no ho hia wɔ n’ebusua nye asafo no mu. Enuanom mberantsɛ, asodzi a bi a hom bedzi ho dwuma daakye no, yɛgye dzi paa dɛ ɔyɛ a hom dwendwen ho. Bi a epɛ dɛ eyɛ ɔkwampaafo, asafo mu asomfo, na ekyir yi ebɛyɛ asafo mu panyin. Bi so a epɛ dɛ ewar na ewo mba. (Eph. 6:4; 1 Tim. 3:1) Sɛ ibotum ayɛ dza yɛaka ho asɛm yi na woesi wo yie a, ɔsɛ dɛ woho kokwaa. w23.12 24 ¶1-2

Jehovah dze no nguan a wɔsom bo ma no no ahyɛ asafo mu mpanyimfo nsa dɛ wɔnhwɛ hɔn do. Dɛm mbarimba yi fi hɔn akoma mu yɛ edwuma na hɔn enyi sɔ hokwan a Jehovah dze ama hɔn dɛ wɔmboa hɔn nuanom Christianfo no. Afei so, wɔyer hɔnho dɛ wɔbɛyɛ ‘nguanhwɛfo a wɔnyɛn’ Nyankopɔn no nguan no yie. (Jer. 23:4; 1 Pet. 5:2) Ɔyɛ hɛn dɛw paa dɛ yɛwɔ mbarimba a wɔtse dɛm wɔ asafo no mu! Asafo mu mpanyimfo botum esuasua dza Ɔtsɛmbuafo Gideon yɛe no. (Heb. 6:12) Ɔgyee Nyankopɔn no nkorɔfo fii hɔn atamfo nsamu na ɔboaa hɔn so. (Atsɛ. 2:16; 1 Mber. 17:6) Tse dɛ Gideon no, Jehovah eyi asafo mu mpanyimfo dɛ wɔnhwɛ n’asomfo do wɔ mber a no mu yɛ dzen paa yi mu. (Andw. 20:28; 2 Tim. 3:1) Hɛn nyina botum esuasua Gideon. Nna ɔbrɛ noho adze, ɔgye to mu dɛ nnyɛ biribiara na obotum ayɛ, na otsiee Jehovah so. Nna ɔwɔ dɛ omia n’enyi paa ansaana oetum ayɛ edwuma a wɔdze ahyɛ ne nsa no. Hɛn nyina botum akyerɛ dza mpanyimfo yɛ no ho enyisɔ. Yebotum ayɛ hɛn afamudze biara dze aboa hɛn nuanom yi a wɔyɛ edwumadzen wɔ asafo no mu no.—Heb. 13:17. w23.06 2 ¶1; 3 ¶3