iMatai ni iVola Vei Ira mai Korinia

7 Ena vuku ni veika oni vola mai, e vinaka vua na tagane me kua ni tara* na yalewa. 2 Ia ni takalevu na veiyacovi tawadodonu,* na tagane me tiko ga na watina yalewa,+ kei na yalewa me tiko ga na watina tagane.+ 3 O tagane vakawati me solia vei watina na ka e dodonu me nona, me vakayacora vaka tale ga kina na yalewa vakawati vei watina.+ 4 E sega ni lewa na yagona na yalewa vakawati, e lewa ga na watina. E vaka kina na tagane vakawati, e sega ni lewa na yagona, e lewa ga na watina. 5 Kua ni bureitaki iko vei watimu, vakavo ga ke drau lomavata kina ena dua na gauna drau lokuca, me rawa ni drau masu kina drau qai tikovata tale, me kua ni temaki kemudrau tiko kina o Setani ena nomudrau sega ni lewai kemudrau rawa. 6 E rawa ni oni cakava na ka au tukuna qo, ia e sega ni lawa. 7 Au diva mera vakataki au na tamata kece. Ia e dui tu na isolisoli+ e solia vei keda na Kalou, dua e nona isolisoli qo, dua tale e nona isolisoli ya.

8 Ia qo au tukuna vei ira na sega ni vakawati kei ira na yada, e vinaka mera dawai me vakataki au.+ 9 Ia ke ra sega ni lewai ira rawa, mera vakawati, e vinaka cake mera vakawati e ca ga mera garogaro voli.+

10 Qo na ivakasala vei ira na vakawati, e sega ni noqu, e nona ga na Turaga, oya me kua ni biuti watina na yalewa vakawati.+ 11 Ia ke mani biubiu o yalewa, me kua ga ni vakawati, ke sega me lesu ga vei watina, na tagane vakawati tale ga me kua ni biuta na watina.+

12 Ia au tukuna vei ira na kena vo, qo na noqu vosa ga, sega ni vosa ni Turaga:+ Ke dua na tacida tagane e sega ni vakabauta o watina, qai vakadonuya o yalewa me rau tiko vata ga, me kua ni biuti koya o tagane. 13 Na yalewa tale ga e duatani na vakabauta i watina, qai vakadonuya o tagane me rau tiko vata ga, me kua ni biuti koya o yalewa. 14 E vakasavasavataki na tagane vakawati e sega ni vakabauta ena vuku i watina, e vakasavasavataki na yalewa vakawati e sega ni vakabauta ena vuku i watina e vakabauta, ke sega, era na sega ni savasava na luvedrau, ia qo era sa savasava. 15 Ia ke via biubiu o koya e sega ni vakabauta, laiva me biubiu. E sa na galala mai kina na tacida se ganeda, ia na Kalou ena vakacegui kemuni.+ 16 Vei iko na yalewa vakawati, o kila vakacava ni o na sega ni vakabulai watimu?+ Se, o iko na tagane vakawati, o kila vakacava ni o na sega ni vakabulai watimu?

17 Mera dei tiko ga na tamata yadua ena isolisoli e solia vei ira o Jiova,* me vaka e kacivi ira kina o koya.+ Qo na noqu ivakasala ina ivavakoso kece. 18 Sa bau kacivi e dua sa cili?+ Me kua ni vunitaka nona cili. Sa bau kacivi e dua e tawacili? Me kua ni saga me cili.+ 19 E ka wale na cili, e ka wale tale ga na tawacili,+ e bibi ga na muria na ivakaro ni Kalou.+ 20 Na ituvaki cava ga e kacivi kina e dua, me dei kina.+ 21 O kacivi ni o bobula tu? Kua ni lomaleqa.+ Ia ke o rawa ni sereki, sasagataka sara. 22 O koya e bobula tu ena gauna e kacivi koya kina na Turaga e sa nona tamata sereki na Turaga.+ E vaka tale ga kina o koya e kacivi ena gauna e tamata galala tu kina, e sa nona bobula na Karisito. 23 Oni a voli ena isau levu,+ ni kua ni bobula tiko ni tamata. 24 Raveitacini, ena ituvaki cava ga e kacivi kina e dua, me dei toka kina ena mata ni Kalou.

25 Vei ira na sega ni vakawati,* e sega ni solia vei au na Turaga e dua na ivakaro, ia au tukuna ga na noqu nanuma+ me vaka e dua e yalodina ena yalololoma ni Turaga. 26 O koya gona ena gauna dredre eda donuya, au nanuma ni vinaka vua na tagane me tu ga ena itutu e tu kina. 27 O vakawati? Kua ni qara na veisere.+ O dawai? Kua ni vaqara watimu. 28 Ia ke o mani vakawati, o sega ni cala kina. Ke vakawati o koya e se sega ni vakawati,* e sega ni cala o koya. Ia o ira era vakawati ena vakararawataki na yagodra. Ia au vinakata moni kua ni sotava na rarawa qori.

29 Qo na ka au tukuna raveitacini, sa vakalekalekataki na gauna se vo.+ O koya gona, o ira na vakawati mera vakataki ira na sega ni vakawati, 30 o ira tale ga na tagi mera vakataki ira na sega ni tagi, o ira na marau mera vakataki ira na sega ni marau, o ira na volivoli mera vakataki ira na sega ni taukena na ka, 31 o ira tale ga na vakayagataka na vuravura mera vakataki ira na sega ni vakayagataka vakavinaka, ni sa veisau tiko na ituvaki ni vuravura qo. 32 Au vinakata gona moni kua ni lomaocaoca. Na tagane e sega ni vakawati ena lomaocaocataka ga na veika ni Turaga, ni vinakata me vakamarautaka na Turaga. 33 Ia na tagane vakawati ena lomaocaocataka na veika ni vuravura,+ se me vakamarautaka vakacava na watina, 34 ena waserua nona vakasama. Kena ikuri, na yalewa e sega ni vakawati, se yalewa e sega ni tara tagane, e lomaocaocataka ga na veika ni Turaga,+ me savasava na yagona kei na lomana. Ia na yalewa vakawati e lomaocaocataka na veika ni vuravura, se me vakamarautaka vakacava na watina. 35 Au tukuna qo moni vinaka kina, au sega ni via vesuki kemuni, ia meu uqeti kemuni ga moni cakava na ka e dodonu, me kua ni dua tale ga na ka e vakalatilati ena nomuni qarava tiko na Turaga.

36 Ia ke dua e nanuma ni sega ni lewai koya vinaka ni sega ni vakawati, ke sa sivia na bula vakaitabagone qai vinakata ga me vakawati, me cakava na ka e vinakata, ena sega ni cala kina. Mera vakawati.+ 37 Ke dua e vakadeitaka e lomana me kua ni vakawati, ia e lewai koya vinaka qai vakatulewataka mai lomana me kua ni vakawati, ena vinaka vua.+ 38 O koya gona, o koya e vakawati ena vinaka vua, ia o koya e sega ni vakawati ena vinaka cake.+

39 E vauci tu vei watina na yalewa vakawati ena gauna kece e bula tiko kina o tagane.+ Ia ke sa mani moce o tagane, oya ni sa mate, sa galala o yalewa me vakawati kei koya ga e vinakata, me vakawati ga ena Turaga.+ 40 E noqu rai ni na marau cake o koya ke sega ni vakawati tale. Au kila ni uqeti au tale ga na yalo ni Kalou.