Vakatakila e Vola o Joni
12 E qai laurai mai lomalagi e dua na ivakatakilakila levu: E dua na yalewa+ e vakaisulu ena matanisiga, e tu e ruku ni yavana na vula, e vakaisala ena 12 na kalokalo. 2 E bukete tu o koya. E qolou tale ga ena levu ni nona rarawa kei na nona yaluma ni taratara me vakasucu.
3 E dua tale na ivakatakilakila e laurai mai lomalagi. Raica! E dua na gata damu levu qai rerevaki,+ e vitu na uluna, e tini na kena ileu, e toka e uluna e vitu na isala vakatui,* 4 e yarataka na buina e dua na ikatolu ni kalokalo+ ni lomalagi qai kolotaki ira sobu i vuravura.+ E tu ga na gata levu ena mata ni yalewa+ e sa vakarau vakasucu, me tiloma na luvena ena gauna ga e vakasucu kina.
5 E mani vakasucuma e dua na gonetagane,+ me na vakatawai ira na matanitu kece ena ititoko kaukamea.+ E qai kau yani na luvena vua na Kalou, ina nona idabedabe vakaturaga. 6 E dro sara na yalewa ina vanua talasiga, na vanua e vakarautaka vua na Kalou, mera vakani koya kina me 1,260 na siga.+
7 E qai tubu na ivalu mai lomalagi: o Maikeli*+ kei ira na nona agilosi era vala kei na gata levu, e vala tale ga na gata levu kei ira na nona agilosi 8 ia era sega ni qaqa, e sega tale ga ni kune mai lomalagi e dua na nodra tikina. 9 Sa qai kolotaki sobu na gata levu,+ na gata makawa,+ e vakatokai na Tevoro+ se o Setani,+ o koya e vakacala tiko na vuravura taucoko,*+ e kolotaki sobu i vuravura,+ e kolotaki sobu vata kei ira na nona agilosi. 10 Au rogoca sara e dua na domolevu mai lomalagi, e kaya:
“Raica! E sa veivakabulai+ na Kalou! E kaukaua dina ga o koya! Sa tauyavu na nona Matanitu!+ Sa tekivu lewa na nona Karisito ni sa kolotaki sobu o koya e dau beitaki ira na tacida, o koya e dau beitaki ira ena siga kei na bogi ena mata ni noda Kalou!+ 11 Era vakamalumalumutaki koya+ ena vuku ni dra ni Lami+ kei na itukutuku era kacivaka tiko,+ era sega ni lomana na nodra bula,+ era bolemate sara ga. 12 O koya gona, moni marau na lomalagi kei kemuni na tiko kina! Drau na rarawa na vuravura kei na wasawasa,+ ni sa lako sobu vei kemudrau na Tevoro, e cudru vakalevu, ni kila tiko ni sa lekaleka nona gauna.”+
13 Ia ni raica na gata levu ni sa kolotaki sobu i vuravura,+ e qai vakararawataka na yalewa+ a vakasucuma na gonetagane. 14 E mani soli vua na yalewa e rua na taba ni ikeli levu+ me vuka kina ina vanua talasiga ina nona vanua, me lai vakani kina ena dua na gauna, rua na gauna, kei na veimama ni gauna,*+ me yawa mai na mata ni gata.+
15 E qai luaraka mai na gata e gusuna na wai e vaka na uciwai me muria na yalewa, me vakaluvuci koya ena uciwai. 16 Ia e qai vukei yalewa o vuravura, e dolava na gusuna o vuravura me tiloma na uciwai e luaraka mai na gata e gusuna. 17 E cudruvi yalewa sara ga na gata, mani lako me vala kei ira na vo ni nona kawa,+ o ira na muria tiko na ivunau ni Kalou, ra qai vunautaka tiko na veika me baleti Jisu.+