O Taleitaka Mo Vulica na iVolatabu
Cava me Wiliki Kina na iVolatabu?
NA IVOLATABU e sega ni tautauvata kei na dua tale na ivola—e tu kina na ivakasala momona ni Kalou dau loloma. (1 Cesalonaika 2:13) Ena yaga vakalevu vei iko ke o bulataka na ivakavuvuli ni iVolatabu. Ena titobu na nomu lomana na Kalou, o na voleka tale ga vua e dau solia na “i loloma vinaka kei na i solisoli uasivi kece ga.” (Jemesa 1:17, VV) O na mai kila tale ga na ivalavala ni nomu masuti koya. O na vakila na veivuke ni Kalou ni o sotava na dredre. Ke o bulataka na ivakavuvuli ni iVolatabu, ena nomu na isolisoli ni Kalou na bula tawamudu.—Roma 6:23.
E tu ena iVolatabu na ka dina e veivakararamataki. O ira na sa mai kila na iVolatabu era sa sereki mai na vakasama cala era bobula tu kina e vica vata na milioni na tamata. Me kena ivakaraitaki, nida sa mai kila na ka dina me baleta na ituvaki ni mate, eda sega tale ni rerevaka na ka e vakabauti levu tu ni rawa nira vakaleqai keda na mate, oti tale ga na noda lomaleqataka nira vakararawataki tiko na wekada kei na noda itokani era sa mate. (Dauvunau 9:5, 6) Na ivakavuvuli ni veivakaturi ena iVolatabu e vakacegui ira na sa mate na wekadra voleka. (Joni 11:25) Noda kila na ka dina me baleti ira na agilosi ca eda mai kila kina na rerevaki ni vakatevoro, kei na vuna e levu tu kina na leqa ena vuravura.
Na ivakavuvuli vakalou ena iVolatabu e vakavulici keda ena sala me vinaka kina na noda bula vakayago. Me kena ivakaraitaki, nida ‘lewai keda vinaka’ eda na bulabula vinaka kina. (1 Timoci 3:2) Nida ‘vakasavasavataki keda mai na dukadukali kece ni yago kei na yalo,’ eda na bulabula vinaka kina. (2 Korinica 7:1) Nida bulataka na ivakasala ni Kalou ena iVolatabu, ena mamarau kina na noda bula vakawati, ena vinaka tale ga kina noda lewaeloma.—1 Korinica 6:18.
Ke o bulataka na Vosa ni Kalou, o na tamata mamarau. Na veika eda vulica mai na iVolatabu ena vukei keda meda na dau lomavakacegu qai vakaraitaka vei keda na inuinui. E vukei keda meda vakaitovotaka na itovo vinaka me vaka na yalololoma, loloma, reki, vakacegu, yalovinaka, kei na vakabauta. (Kalatia 5:22, 23; Efeso 4:24, 32) Na veitovo gona oya ena rawa kina meda tagane se yalewa vakawati vinaka, tama se tina vinaka, qai gone vinaka tale ga.
O bau dau vakasamataka tu na veigauna se bera mai? Na parofisai vakaivolatabu e dusimaka vei keda na gauna eda sa bula tu kina oqo. E sega wale ga nira vakamacalataka na parofisai na ituvaki kei vuravura edaidai, ia era vakaraitaka tale ga ni sa voleka sara ni veisautaka na vuravura oqo na Kalou me dua na parataisi.—Vakatakila 21:3, 4.
Veivuke me Kilai Kina na iVolatabu
O sa rairai wilika na iVolatabu ia e dredre mo kila na ka o wilika kina. De dua o sega ni kila na vanua mo cega mo kunea kina na isau ni nomu taro. E sega ni o iko duadua ga o sotava tiko na ituvaki oqori. O keda kece eda gadreva meda vukei meda na kila kina na Vosa ni Kalou. Era vakarautaka na iVakadinadina i Jiova ena sivia e 235 na vanua mera vakavulici ira wale ena iVolatabu e vica vata na milioni na tamata. Era na marau mera na vukei iko tale ga.
De vinaka me vulici ga vakalalai na iVolatabu, me tekivu ena so ga na ivakavuvuli rawarawa. (Iperiu 6:1) Ni toso tiko na vuli, sa na qai rawa ni o kania na “kakana dina”—oya na ivakavuvuli titobu. (Iperiu 5:14) E dina ni na taurivaki e so na ivola me vaka Na Cava Mada e Kaya na iVolatabu?, mo vulica kina e levu na usutu vakaivolatabu, ia na iVolatabu ga e yavu ni vuli.
O Taleitaka Mo Vulica na iVolatabu e Veimacawa?
Ena tuvanaki na vuli iVolatabu ena gauna kei na vanua e ganiti iko. Le levu era vuli ga e nodra vale. E so mada ga era vuli ena talevoni. Na porokaramu ni vuli e sega ni vaka na vuli ena loma ni dua na kalasi mera levu kina na gonevuli, ia e dua na ituvatuva me ganita sara ga na kemu ituvaki, na ivakatagedegede ni nomu vuli kei na nomu kila ka. E sega kina na veitarogi, o na sega tale ga ni maduataka e dua na ka. Ena saumi na nomu taro vakaivolatabu, o na vulica tale ga mo drau veivolekati kei na Kalou.
O sega ni sauma na nomu vuli iVolatabu. (Maciu 10:8) E dola raraba vei ira kece era dui lotu kei ira era sega ni lotu, ia era taleitaka mera vakalevutaka na nodra kila na Vosa ni Kalou.
O cei e rawa ni tiko tale ga ena vuli oqo? Nomu vuvale kece. Ke dua nomu itokani o via sureta e rawa tale ga ni tiko kina. Ke o vinakata, o rawa ni vuli duadua ga o iko.
Le levu era vakayagataka ga e dua na aua ena veimacawa mera vuli iVolatabu kina. Ke mani balavu se lekaleka ga na gauna ni nomu vuli e veimacawa, era na tu vakarau na iVakadinadina mera na vukei iko.
Neimami Veisureti
Vakacava mo veitaratara mada mai kei keimami na iVakadinadina i Jiova. Ke rawa, volavola mai ena itikotiko e koto e ra. Ena qai gole yani e dua mo drau lai vulica vata na iVolatabu.
□ Au kerea me dua na noqu ivola Na Cava Mada e Kaya na iVolatabu?
□ Au kerea me dua e mai vakavulici au wale e vale ena iVolatabu.
Na tikinivolatabu kece e lavetaki mai na Vakadewa ni Vuravura Vou ni iVolatabu.