Qaravi Jiova Tiko Ga

Ena veika kece e cakava na tamata, se ra saenitisi se dauteitei, era na vakanuinui ga ena tawaveisau ni veika e bulia na Dauveibuli nuitaki dauloloma, me vaka na draki se cava tale. Na dei ni veika oqori e vakatau sara ga kina na nodra bula na ka buli kece. E yaga vei keda ena veisiga na nona dau dei tu ga na Kalou ni ‘sega ni dau veivukiyaki, se veigoleyaki.’ (Jeme. 1:17) E vakararai tale tu ga ena veigauna kece o koya me vakalougatataki ira kina na tamata yalodina e sega ni dau veiveisau na nodra veiqaravi vua. Na cava meda dui cakava me dua dua tu ga kina na ivalavala ni noda veiqaravi vua na Kalou?

Edaidai, e sega ni veiveisau na ivalavala ni nodra lomani Jiova kei na nodra ivakatawa na Tui na vo ni lumuti, se o ira nikua era vakataki koya na yalewa ni sulamaiti, ena nodra vakayacora tiko ga ena yalodina na nodra ilesilesi mera vunau yani. Era veitokoni tale ga na isoqosoqo levu ena nodra “qaravi koya [na Kalou] e na siga kei na bogi,” ra qai vakarabailevutaka na nodra cakacaka na lumuti ena kena vunautaki ina veimatanitu kece na itukutuku vinaka. (Vkta. 7:15) Vakaevei o keda, eda vakamareqeta beka na noda itavi dokai meda kua ni cegu ni vunautaka tiko ga na itukutuku vinaka?

Ena yalava e wili ena tabana o Viti, e marautaki ni laurai ena icavacava ni yabaki vakacakacaka ni 2003, ni a vinaka cake mai na noda lakova wasoma na cakacaka vakavunau kei na noda ripotetaka. Dina ni lutu ena voleka na dua na pasede na ripote ni yabaki vakacakacaka e Viti, a rawati ga ena iotioti ni tolu na vula veitaravi e rauta ni 2,000 vakacaca na dautukutuku. E dua dina na ivakaraitaki vinaka ni toso oqori. Sa dodonu gona meda dau dina ena noda ripote, da qai vakabibitaka na veika vakayalo ena noda bula.

E levu era sega ni dau ripote ena vula o Tiseba kei na Janueri. Ni gauna oqori era dau gade sara ga kina e levu na vuvale. Me na namaki gona ni rawa ni veisau vakalekaleka kina na noda ituvatuva ni veiqaravi vakayalo. Ia, vei ira e so tale e gauna vinaka mera vakasoqoni vata kei ira na mataveitacini ena vanua era gade kina, se mera vunau tawalokuci. Na iVolatabu e vakamacalataki Ana, na yada sa kena marama sara ni “sega ni lako tani e na vale ni soro, a sa daulotu ka lolo ka masu e na siga kei na bogi.” (Luke 2:​36, 37) A qai vakalougatataki vakalevu o koya ni dua dua tu ga na ivalavala ni nona qarava na Kalou. Vakacava o keda, eda sa lalawataka dei meda na kua sara ni calata na noda veiqaravi tabu donuya na gauna ni olodei oqori?

Ena veigauna sa oti e marautaka o Jiova me wiliki ira mera nona itokani o ira e sega ni veisau na ivalavala ni nodra sokalou vua. A tukuni ni ‘lako vata tiko ga kei na Kalou’ o Inoki kei na so tale. (Vkte. 5:​22, 24; 6:⁠9) A raica tale ga na Tui kei Papiloni ni ‘qaravi’ Jiova ‘tiko ga’ o Taniela, e kilai koya na dauveiqaravi yalodina oqo o Jiova me “tamata daulomani.” (Tani. 6:​16, 20; 9:23) Me noda inakinaki mada ga me noda itokani o Jiova, me qai kua ni cegu na noda qaravi koya tikotiko ga.