Vukei Ira na “Vakarau Tu Me Vinakata na Bula Tawamudu”
1. Sa vakasoqoni cei tiko edaidai o Jiova?
1 Na ivalavala ni tamata e sau ena vakatau tiko ena ka e tu e lomana. (Maciu 12:35) Na iVolatabu e tukuni koya e “tiko e lomana nai valu.” (Same 55:21) E so tale era tukuni nira “tamata daucudru.” (Vkai. 29:22) Ia, ena yasana adua era tiko o ira era “vakarau tu me vinakata na bula tawa mudu.” (Caka. 13:48) O ira vaka oqo e sa vakasoqoni ira tiko edaidai o Jiova. (Akeai 2:7) Eda na vukei ira vakacava mera mai sokaloutaki koya?
2. Cava e vinakati meda cakava rawa kina na noda ilesilesi ni veivakatisaipelitaki?
2 Gumatua ena Veisikovi Lesu: Eda na rawata vakavinaka na noda ilesilesi ni veivakatisaipelitaki nida raica vakabibi na veisikovi lesu. (Maciu 28:19, 20) Eda dau sikovi ira totolo na tataleitaki? Eda dau lesuvi ira kece era taura na ivola se o ira na taleitaka na itukutuku vinaka? Eda dau gu beka meda vukei ira mera tubu vakayalo? E dodonu meda vukei ira na tataleitaki kece ni vakatau tiko kina na nodra bula.
3. Cava e dodonu meda cakava nida veivosaki oti kei na dua e tataleitaki?
3 Ni se tiko ga ena nomu vakasama na nomudrau veivosaki kei na dua e tataleitaki, vola sara na yacana kei na nona itikotiko. Vola tale ga na veika drau veitalanoataka, na tikinivolatabu drau wilika, kei na ivola e taura. Oti oya, saga sara mo sikovi koya totolo.
4. Rawa ni vuavuaivinaka vakacava na nomu veisikovi lesu?
4 Veisikovi Lesu: Ni o veisikovi lesu tiko, e vinaka mo matadredredre se mamarau qai vakaraitaka votu ni o kauaitaki koya dina na itaukeinivale. Me rawarawa ga na ka o vakamacala kina, yavutaka vakaivolatabu. Vakarautaka e dua na ulutaga vakaivolatabu ena taleitaka, ni bera tale ga ni o tinia nomu ivakamacala tarogi koya ena dua na taro me qai saumi ena veisiko e tarava. E vinaka me kua ni veiletitaki na rai e sega ni vakaivolatabu i taukeinivale. Saga mo drau veivosakitaka ga vakaivolatabu na ka drau duavata kina.—Kolo. 4:6.
5. Vakamacalataka nona sasaga e dua na painia kei na ka e qai yaco.
5 E gadrevi na sasaga ena veisikovi lesu, ia ena tauci kina na ka vinaka. E nona isausau e dua na painia mai Japani me vakalevutaka na nona veisikovi lesu ena veivula. E volai ira kece na tamata a vosa kina ni vunau tiko e veivale, qai lesuvi ira tale ena loma ga ni vitu na siga. E vakarautaka vinaka sara na veika me na tukuna qai vakayacora nona itavi ena nona nuitaka na itukutuku e kauta tiko yani. Dua gona vei ira na veisikovi lesu vaka oqori a tekivuna rawa kina e dua na vuli iVolatabu qai kaya na tataleitaki oya: “Au dau sega tu ga ni via vakarorogo vei kemuni. Se qai imatai ni gauna oqo meu bau vakarorogo.” E vakalougatataki na painia oqo ena nona sasaga tiko ga vakayalololoma. Ni qai oti na vula sa ripotetaka kina e tini era vuli iVolatabu.
6. Na cava meda gu kina ni lesuvi ira tiko ga na tataleitaki?
6 E dau veisau tu ga na kedra ituvaki na tamata. (1 Kor. 7:31) So na gauna e sikovi vaka vica vata na itaukeinivale sa qai kune ni tiko e vale. Noda gumatua tiko ga ena veisikovi lesu eda sa vukei ira sara tiko ga na sa “vakarau tu me vinakata na bula tawamudu” mera muria na sala e basika ina bula.—Maciu 7:13, 14.