Kato ni Taro
◼ Na cava na sala vinaka duadua e rawa nida cautaka kina na ilavo me baleti ira na tacida era leqa tu e vanua tani?
Eda dau rogoca na nodra gadreva na tacida e so na veivuke vakayago ena vuku ni veivakacacani, leqa tubukoso, se so tale na ka dredre era sotava. So na tacida era dau vakauta vakadodonu na nodra cau ina valenivolavola ni tabana ena veivanua e gadrevi kina na veivuke, era dau kerea me vukei kina e dua na tacida, e dua na ivavakoso, se na tara ni dua na vale e tara tiko.—2 Kor. 8:1-4.
Na cau era cakava na tacida ena yalololoma e vakacaucautaki dina, ia e dau tiko e so na ka e vinakati me qaravi totolo, mai na kena era dau vakatura o ira na cau. Ena so na gauna sa dau qaravi oti na ka se o ira era vakaturi mera vukei oya. Ia, eda nuidei ni cau e dau vakau ena valenivolavola ni tabana me baleta na cakacaka ni vuravura raraba, na ilavo me baleta na tara ni Kingdom Hall, se na veivuke ni leqa tubukoso, ena vakayagataki ga me vaka e vakatura o koya e cau.
Era sa vakavulici vinaka na tacida ena valenitabana kece mera qarava na veika tawanamaki e dau yaco. Era sa veitaratara tiko na valenivolavola ni tabana kei na iLawalawa Dauvakatulewa me baleta na veika e sa yaco tiko. Ke vinakati tale e so na veivuke, na iLawalawa Dauvakatulewa ena sureta e so na valenivolavola ni tabana e voleka mera veivuke, se na vakauta sara ga na itikotiko liu na ilavo ni veivuke.—2 Kor. 8:14, 15.
O koya gona na cau kece vakailavo e soli me baleta na cakacaka ena vuravura raraba, na tara ni vale ena veivanua, se veivukei ni leqa tubukoso, me vakau ga ina valenivolavola ni tabana ena vanua o tiko kina, rawa ni o solia ena nomu ivavakoso me qai vakauta, se o vakauta vakadodonu ga. Oqo na sala e sa qarava tiko kina “na dauveiqaravi yalo dina ka vuku,” ena ituvatuva e vakarautaka na iLawalawa Dauvakatulewa, na nodra vukei na tacida ena veiyasa i vuravura.—Maciu 24:45-47, VV; 1 Kor. 14:33, 40.