Mo Vakayagataka Vakacava na Vakatutu e Vakaturi?

1. Meda vakayagataka vakacava na vakatutu e dau vakarautaki?

¹ E sa dau tabaki vakawasoma ena Noda Cakacaka Vakaitalatala na vakatutu ni kena soli na ivoladraudrau kei na so tale na ivola. Nida cakacaka vakavunau, e sega ni gadrevi meda cavuqaqataka sara ga na vakatutu oqori. E vakatututaki ga kina na ka eda rawa ni kaya. Ena yaga sara vakalevu noda ivakamacala kevaka eda tukuna na veika e vakatututaki oqori ena noda vosa ga. Era na lomavakacegu na itaukeinivale kevaka eda vakamacala ena noda vosa ga, ena vakaraitaka tale ga vei ira ni vu dina tiko mai lomada na ka eda tukuna da qai vakabauta.​​—⁠2 Kor. 2:​17; 1 Ces. 1:⁠5.

2. Nida vakarautaka tiko na noda ivakamacala, na cava meda dikeva kina vakabibi na itovo ni vanua eda na cakacaka kina?

² Me Veiganiti Nomu iVakamacala: E vakatau tale ga na noda vunautaka na itukutuku vinaka ena itovo vakavanua. Rawa beka mo drau veivakabulataki e liu kei itaukeinivale, oti mo qai vakamua nomudrau veivosaki ina itukutuku vinaka, se ra dau namaka na tamata ena nomu yavala mo tukuna sara ga yani vakadodonu na inaki ni nomu veisiko? Ena via duidui toka ena veivanua, qai so tale ga na gauna ena vaka oqori vei ira na duidui tamata. Me vakasamataki vinaka na taro e tarogi. So beka na taro e ganita e so na vanua ena sega ni veiganiti ena so tale na vanua. E gadrevi gona kina na vakatulewa vinaka, da qai moica na noda ivakamacala me ganita na vanua eda cakacaka tiko kina.

3. Na cava meda dau vakasamataka kina na ivakarau ni nodra bula kei na nodra rai na itaukeinivale?

³ Kena ikuri, nida vakavakarau tiko ena cakacaka vakavunau, e gadrevi meda vakasamataka na ivakarau ni nodra bula kei na nodra rai o ira na itaukeinivale ena noda yalava. Kena ivakaraitaki, ena rairai duidui na nomu vakamacalataka vua e dua e lotu Katolika kaukaua na Maciu 6:​9, 10 ni vakatauvatani kei na nomu vakamacala vua e dua e sega ni kila na “Masu ni Turaga.” Nida dau vakasama gona e liu, eda na rawa ni vakarautaka na noda ivakamacala me veiganiti kei ira eda sotava ena cakacaka vakavunau.​​—⁠1 Kor. 9:​20-​23.

4. Na cava e gadrevi kina na vakavakarau vinaka?

⁴ E bibi tiko ga na vakavakarau vinaka, ke da mani nakita meda vakayagataka e dua na vakatutu e vakaturi. Meda wilika sara ga vakavinaka na ulutaga se na wase eda lalawataka meda na vakamacalataka da qai vakadeuca na veitikina bibi ena uqeti ira na itaukeinivale. Okata oqori ena noda ivakamacala. Nida kila vinaka na ka e tabaki koto ena noda ivola eda na gumatua ena veisoliyaka.

5. Na cava ena rairai gadrevi kina meda vakayagataka e duatani na iwalewale? Eda na cakava vakacava?

5 So Tale na iWalewale: E dodonu beka ga meda vakamuria sara vakamatailalai na vakatutu e vakaturi? Sega. Ke rawarawa vei iko e dua tale na iwalewale se tikinivolatabu, vakayagataka. Vakabibi na ivoladraudrau, tu vakarau mo vakamacalataka e so tale na ulutaga era kauaitaka na tiko ena noda yalava. Ke vakatasuasuataki na cakacaka vakavunau ena Soqoni ni Cakacaka, e rawa ni vakatasuasuataki na kena ena ganita na noda dui yalava. Oqo ena vukei keda kece me laulau noda kacivaka na itukutuku vinaka.