O sa Vakarau Tu ke Yaco na Leqa Tubukoso?

1. Na cava e ka vakayalomatua kina meda vakarau tu ni bera na leqa tubukoso?

¹ E tarai ira tu ena veiyabaki e milioni vakacaca na lewe i vuravura, okati kina na tacida vakayalo na uneune, ualoka, cagilaba, covulaca kei na waluvu. Ni dau yaco vakasauri na leqa vaka oqo, qai rawa ni tarai keda tale ga, e ka vakayalomatua meda vakarautaki keda tu.​​—⁠Vkai. 21:⁠5.

2. Na cava e bibi kina mera kila tiko na qase na nodra naba ni talevoni kei na nodra itikotiko na lewe ni ivavakoso?

² Ka Meda Cakava Rawa: So na gauna ni bera ni yaco na leqa tubukoso era sa dau vakasalataki keda rawa mai na tabana ni draki. E ka vakayalomatua meda rogoca na ivakasala vaka oqori. (Vkai. 22:⁠3) Ena ituvaki vaka oqo era na saga na qase mera veitaratara kei ira kece na lewe ni ivavakoso mera vakarau tu ena leqa sa vakarau yaco. Ia ni sa yaco oti na leqa tubukoso, era na veitaratara tale na qase kei ira na lewe ni ivavakoso me kilai kina na kedra ituvaki, kei na veiqaravi era na gadreva. E bibi gona me tu vei ira na qase na nodra naba ni talevoni kei na nodra itikotiko, me kua nira qai cumuwaqara tiko ni vaqarai ira. Kevaka gona e toki e dua na dautukutuku, e bibi me tukuna vua na vunivola ni ivavakoso kei na ivakatawa ni vulivola na nona naba ni talevoni kei na nona itikotiko vou.

3. Eda na tokoni ira vakacava na qase ke da vakaitikotiko ena vanua e dau yaco kina vakalevu na leqa tubukoso?

³ Kevaka e tiko na ivavakoso ena vanua e dau yaco kina vakalevu na waluvu se leqa, mera kerei na dautukutuku mera solia vei ira na qase na yaca kei na nodra naba ni talevoni na wekadra se itokani, me rawa nira tarai ke yaco e dua na leqa. Oqo ena vukei ira tale ga na qase mera kila se o cei so era sa vagalalataki. Rawa nira vakarautaka tale ga na qase e dua na ituvatuva ni ivavakoso me baleta na ka me caka ke yaco na leqa tubukoso, me vaka na veika lalai mera vakarautaka tu na lewe ni ivavakoso, na ituvatuva ni nodra vagalalataki, kei na nodra vukei na vakaleqai tu na yagodra. E bibi dina na veitokoni ena ituvatuva yalololoma vaka oqo.​​—⁠Iper. 13:⁠17.

4. Na cava meda cakava ke yaco e dua na leqa tubukoso ena noda itikotiko?

⁴ Ni Oti na Leqa Tubukoso: Na cava meda cakava ke yaco na leqa tubukoso ena noda itikotiko? Na imatai sara ga ni ka me laurai na veika me bula kina vakayago na vuvale. Oti, vukei ira era vakaleqai, kevaka e rawa. Veitaratara totolo kei koya na ivakatawa ni vulivola se dua na qase ni ivavakoso. Kevaka mada ga eda sega ni gadreva na veivuke, e dodonu ga meda veitaratara kei ira. Ia ke da gadreva na veivuke, meda kila tiko nira na saga nodra vinaka kece na mataveitacini mera vukei keda. (1 Kor. 13:​4, 7) Meda kua ni guilecava ni kila vinaka tu o Jiova na keda ituvaki, meda vakararavi vua me vakaukauataki keda. (Same 37:39; 62:⁠8) Meda tu vakarau tale ga ni veivakacegui vakayalo, vaka kina vakayago vei ira na vakaleqai. (2 Kor. 1:​3, 4) Ia ena kena gauna totolo duadua, meda tosoya tale noda ituvatuva ni veika vakayalo eda sa dau cakava tiko mai.​​—⁠Maciu 6:​33.

5. Me vakacava noda raica na lotu Vakarisito na leqa tubukoso?

⁵ Dina ga ni vakavu lomaocaoca na noda leqataka tiko na veika ena vakavuna na leqa tubukoso, me vakaukauataki keda mada ga na veika totoka sa tu e matada. Sa voleka na gauna ena sega tale kina na leqa vaka oqo, sa na ka ga ni gauna makawa. (Vkta. 21:⁠4) Ia ena gauna mada ga oqo, meda se tei vakarautaki keda tiko ena leqa tubukoso kei na veika dredre eda na sotava, ena gauna vata oqori meda gumatua tiko ga ni kacivaka na itukutuku vinaka.