“Me ia Tikoga na Nomudou Vosa . . . Ka Vakatuituinataki e na Masima”
1. Na cava na ibalebale ni noda ‘vakatuituinataka noda vosa ena masima’?
1 “Me ia tikoga na nomudou vosa e na yalovinaka, ka vakatuituinataki e na masima, mo dou kila kina se cava sa dodonu mo dou kaya tale vei ira na tamata yadua.” (Kolo. 4:6) Nida vakatuituinataka noda vosa ena masima e kena ibalebale noda digia vinaka na vosa eda cavuta me rogorogo vinaka vei ira na rogoca. Qo e bibi dina ena gauna eda cakacaka vakavunau kina.
2. A lai vunau vakacava o Jisu vei koya na yalewa ni Samaria?
2 iVakaraitaki nei Jisu: Ni vakacegu toka o Jisu ena yasa ni dua na toevu, a vakaliuliu me vosa vua na yalewa ni Samaria mai taki wai. Ni rau veitalanoa tiko kei Jisu e kauta cake tiko ga mai na yalewa ni Samaria qo na nodra sega ni dau veiriti na Jiu kei ira na kai Samaria. E vakamacalataka ni o ira na kai Samaria era kawa mai vei Jekope, ia era vakabauta na Jiu nira sega ni kawa mai vei ira. A sega ga ni via veiba kei koya na marama qo o Jisu, e vosa ga ena nuidei. A soli vakadinadina rawa kina qai uqeti koya na marama ni Samaria oya kei ira na tagane ena Koro.—Joni 4:7-15, 39.
3. Na ivakaraitaki cava nei Jisu eda na muria nida cakacaka vakavunau?
3 Na inaki ni noda vunau oya meda—“tukuna nai tukutuku vinaka ni veika vinaka.” (Roma 10:15) Eda vinakata meda wasea vei ira na itaukeinivale na vakasama veiuqeti mai na iVolatabu, meda kua ga ni vakaraitaka nida saqata tiko na nodra vakabauta. Ke tukuna e dua na ka cala, meda kua ni saqati ira vakatotolo. De dua eda na duavata beka kei na so na ka era vakamacalataka se da vakavinavinakataka na nodra talaucaka mai na lomadra? Rawa nida vakamacalataka e dua na tikinivolatabu ena noda taroga, “Ni bau vakasamataka nida rawa ni cakava na veika qo?”
4. Na cava meda cakava ke cudrucudru se via veiba na itaukeinivale?
4 Ia, vakacava ke cudrucudru se via veiba ga na itaukeinivale? Meda vakaitovotaka ga na yalomalumalumu kei na yalo maloku nida vosa. (2 Tim. 2:24, 25) Ke sega ni taleitaka na itukutuku vinaka ni Matanitu ni Kalou, e vinaka meda tatau ga vakavinaka.—Maciu 7:6; 10:11-14.
5. E yaga vakacava na nona vosa vakayalovinaka e dua na tacida yalewa?
5 Kena Yaga: Ni saga e dua na tacida yalewa me vunau vua e dua na marama tiko tikivi koya, a cudru na marama qo, vosataki koya, qai cavuta tale ga e so na vosa veibeci. Ena yalovinaka a sauma na tacida yalewa qo: “Ni vosoti au sara niu vakacaraka na lomamuni. Ni qai vakacegu toka.” Oti ga e rua na macawa a tukituki tale na marama qo ena matanikatuba nei koya na tacida yalewa, kere veivosoti qai tukuna vua ni sa tu vakarau me vakarorogo. Koya gona, na vosa vakayalovinaka ena tiko na kena yaga!—Vkai. 15:1; 25:15.
6. Cava e bibi kina meda vakaisaluakitaka noda vosa ena cakacaka vakavunau?
6 Meda tovolea meda vakaisaluakitaka noda ivakamacala ena gauna eda vunautaka kina na itukutuku vinaka. Dina ga nira na sega ni via vakarorogo na itaukeinivale, de dua era na qai vakarorogo ena dua tale na gauna era vunau kina ena yalava na iVakadinadina i Jiova.