O Kila na Veiqaravi Vakavuniwai me Caka Vei Iko?

E vuqa na vanua ni veiqaravi vakavuniwai e veiyasa i vuravura sa caka kina na veisele e sega ni vakayagataki kina na dra. O kila tiko na veiqaravi vakavuniwai e rawa ni caka vei iko e sega ni vakayagataki kina na dra? E dodonu mo kila mo na rawa ni vakatulewataka se mataqali veiqaravi vakacava me caka vei iko kei na veisele. Sarava na vidio No Blood​​—⁠Medicine Meets the Challenge. Oti, masulaka na vakatulewa o sa cakava kei na ka o vulica ena saumi ni taro era toka qori e ra. Nanuma matua: Era vakadreti na itubutubu mera lewa vakamatau nira sarava kei luvedra na vidio qo, ni vakaraitaki kina vakalekaleka na veisele.

(1) Na cava na vuna levu era sega kina ni taura na dra na iVakadinadina i Jiova? (2) Na veiqaravi vakavuniwai cava era vinakata na iVakadinadina i Jiova? (3) Na dodonu cava e tu vei ira na qaravi vakavuniwai? (4) Na cava e dodonu qai ka vakayalomatua kina noda digia na veiqaravi vakavuniwai e sega ni vakayagataki kina na dra? (5) Ke yali vakalevu na dra ena gauna ni veisele, na cava e rua na ka bibi mera cakava na vuniwai? (6) Na cava na va na tiki bibi ni veiqaravi vakavuniwai e sega ni taurivaki kina na dra? (7) Na cava mera cakava na vuniwai me (a) vakalailaitaki kina na drodro ni dra, (b) maroroi na red blood cell, (c) vakalevutaki vakatotolo na dra, kei na kena (d) maroroi qai vakayagataki tiko ga na dra i koya e sele? (8) Vakamacalataka na rua na veiqaravi vakavuniwai na (a) hemodilution kei na (b) cell salvage. (9) Na cava meda kila taumada me baleta na veiqaravi eda rawa ni digia e sega ni vakayagataki kina na dra? (10) Rawa beka ni caka na veisele levu e sega ni vakayagataki kina na dra? (11) Na cava e so na veiveisau yaga e sa yaco tiko ena tabana ni veiqaravi vakavuniwai?

Noda digia se sega na veiqaravi vakavuniwai e vakaraitaki ena vidio e noda vakatulewa sara ga, ia me salavata kei na noda lewaeloma e vakavulici ena iVolatabu. Ke o sa vakatulewataka oti na veiqaravi vakavuniwai me caka vei iko vaka kina vei ira na luvemu, o sa vakalewena beka na Advance Medical Directive card? Me ikuri ni vakamacala raica na ulutaga “Taro na Dauwiliwili” ena Vale ni Vakatawa, 15 June, 2004, kei na 15 Okotova, 2000. Me dikevi tale ga na Work Sheet ena Noda Cakacaka Vakaitalatala ni Noveba 2006 e kena ulutaga, “How Do I View Blood Fractions and Medical Procedures Involving My Own Blood?,” me baleta na veiqaravi me caka se me kua ni caka vei iko. Me vakaleweni donu ena nomu Advance Medical Directive card na veiqaravi o sa digia. E dodonu mo vakamacalataka tale ga vakavinaka vei ira na saini ena nomu card kei ira na nomu lewenivuvale era sega ni tiko ena dina na ka o sa vakatulewataka.

[Kato ena tabana e 3]

• O sa vakatulewataka oti na veiqaravi vakavuniwai me caka vei iko vaka kina vei ira na luvemu?

• Ke yaco na leqa tubukoso, e tiko beka vei iko e dua na nomu Advance Medical Directive card sa vakaleweni oti?