Sigatabu, Julai 14
Moni lesu mai vei au, . . . Au na qai lesuvi kemuni.—Saka. 1:3.
E laurai ena ivola i Sakaraia na raivotu veivakurabuitaki me baleta na ivolavivigi e vuka tiko, dua na yalewa e tiko ena loma ni itawatawa, kei na rua tale na yalewa rau vakatubutubu tiko ena cagi me vaka na taba ni manumanuvuka na sitoki. (Saka. 5:1, 7-9) Na cava e vakaraitaka kina o Jiova na raivotu veivakurabuitaki qori vua na nona parofita? E warumisa na ivakaro ena ikaono kei na ikavitu ni raivotu i Sakaraia vei ira na tomana nodra veidabui, mera nanuma tiko ni sega ni taleitaka o Jiova na veika ca. Mera vakaraitaka nira tamata lomadina, e vu tale ga mai lomadra nodra cata na ka ca. Na itukutuku qori e vakadeitaka tale ga ni lomani keda na Tamada vakalomalagi. Ke da gumatua me vakadonui keda o Jiova, me taqomaki keda tale ga, eda na sega ni totogimate. Kena veibasai ga ni na vakalougatataki keda. Ena sega ni matewale noda sasaga meda savasava tiko ga ena vuravura ca qo. Eda nuidei ni na rawa ga qori ena veitokoni i Jiova! w17.10 21 ¶1; 25 ¶19
Moniti, Julai 15
Me rakorako . . . na nodra itovo na kenamarama . . . mera vakasalataki ira kina na yalewa gone.—Taito 2:3, 4.
Levu na sala era vakalevutaka kina nodra cakacaka vakaitalatala o ira na tacida yalewa dawai oya nira painia, toki ena vanua e vinakati kina vakalevu na veivuke, vakaitavi ena tarataravaki ena nodra vanua, se vakalewe fomu ena Koronivuli ni iTalatala ni Matanitu. Eso mada ga era lai vuli ena Koronivuli o Kiliati. Era vu tale ga ni veivakalougatataki ena ivavakoso na yalewa itabaqase. Eda lomani ira dina! Eso e lailai na ka era rawa ni cakava ena gauna qo ena nodra veiqaravi, ia era se rawa ni yaloqaqa tiko ga nira qarava na nodra itavi. Kena ivakaraitaki, e vinakati me yaloqaqa e dua na tacida yalewa itabaqase ni vakasalataka e dua na tacida yalewa gone me baleta na isulu rakorako. Ena sega ni cudruvi koya ena isulu e digia, ia ena uqeti koya ga me vakasamataka ni na rawa ni veivakaleqai. (1 Tim. 2:9, 10) Ena yaga vakalevu na nona vosa ena yalololoma. w17.09 31-32 ¶17-18
Tusiti, Julai 16
O na kila na ka e baleta na Kalou.—Vkai. 2:5.
Ena so na gauna, era saga na iliuliu me kua ni soli na iVolatabu vei ira na lewenivanua. Ia era sega ni soro kina o ira na lomadina. Kena ivakaraitaki, vakasamataki John Wycliffe na daunicioloji ena ika14 ni senitiuri. E vakabauta ni dodonu me yaga kece vei ira na lewenivanua na Vosa ni Kalou. Ia donuya nona gauna, era sega ni vakaivolatabu tu na lewenivanua e Igiladi. Ena yabaki 1382, e tabaki na vakadewa vakavalagi ni iVolatabu e kilai me Wycliffe Bible. Nira vinakata me tara na lomadra kei na nodra vakasama na lewenivanua na Vosa ni Kalou, era taubale kina ena veikoro e Igiladi na nona ito (era kilai mera Lollard), mera vunau. Era na wilika eso na tikina mai na iVolatabu i Wycliffe vei ira era donuya, ra qai solia na ilavelave e lavetaki e liga. Na veisenitiuri ga e tarava, era vakauqeta e levu e Urope kei na vo ni veiyasa i vuravura me vakadewataki qai veisoliyaki na iVolatabu mera wilika na lewenivanua. w17.09 20-21 ¶10-12