E rawa ni mositi iko nomu vakararawataki ira eso tale ena gauna sa oti. Na cava mo cakava? Saga me vinaka tale nomuni veimaliwai, kere veivosoti tale ga mai vu ni lomamu. Masuti Jiova me tokoni ira o vakararawataka. Ena solia vei iko kei ira o vakararawataka na vakacegu. Mo vuli ena nomu cala makawa qai tu vakarau me vakayagataki iko o Jiova ena sala e vinakata. Dikeva mada na ivakaraitaki ni parofita o Jona. E vakaroti koya na Kalou me lako i Ninive, ia e qai dro, e vunauci Jona o Jiova mani vuli mai na nona cala. (Jona 1:1-4, 15-17; 2:7-10) A sega ni soro o Jiova. E lesi koya tale me lako i Ninive, ena gauna qo sa totolo ni talairawarawa o Jona. A sega ni vakasamataka tiko ga nona cala makawa me tarova nona cakava na ka e vinakata o Jiova.—Jona 3:1-3. w24.10 8-9 ¶10-11

O Jiova e sega ni vosota ga noda ivalavala ca se dinau, e bokoca sara ga vakadua. Eda na rairai vakasamataka e dua na korosi levu (X) e biu tu ena dinau qori. Eda se rawa tiko ga ni raica na naba ena ruku ni korosi qori. Ia e duatani ni sa boko. Meda kila vinaka na vosa vakatautauvata qo, me nanumi tiko na iqi ni volavola ena gauna makawa e rawarawa ni boko ena wai. E rawa ni dua e vakayagataka na isulu suasua me qusia tani kina na ka e volai. Koya gona ni “bokoci” na dinau, sa na sega ni laurai tale na ka e volai tu. E vaka ga a sega tu na dinau. Eda marau vakalevu meda kila ni sega wale ga ni vosota o Jiova na noda ivalavala ca, ia e bokoca sara ga vakadua!—Same 51:9. w25.02 10 ¶11

Nira raicalataki keda eso se ra vakalolomataki keda, meda nuidei ni kila vinaka tu o Jiova. Ena vukei keda qori meda vosota na veika tawadodonu nida kila ni na qai vakadodonutaka o Jiova. Nida waraki Jiova, eda na sega ni cudru tiko ga se cati ira eso tale. Ke da cudru tiko ga, eda na cakava eso na ka lialia, eda na rarawa, ena vakaleqa tale ga noda veiwekani kei Jiova. E macala nida na sega ni muria vinaka sara na ivakaraitaki i Jisu. Eso na gauna, eda na cakava se tukuna na ka eda na veivutunitaka. (Jeme. 3:2) Eso na ka tawadodonu ena rawa ni vakamosia na lomada qai vakararawataki keda tu ena noda bula taucoko. Ke dina qori, mo nuidei ni kila vinaka o Jiova na ivakarau ni lomamu. E kila vinaka tale ga o Jisu na lomamu, ni a caka vua na veika tawadodonu. (Iper. 4:15, 16) Eda kalougata ni vakarautaka o Jiova na ivakasala yaga meda vosota kina na veika tawadodonu. w24.11 6 ¶12-13