O na sega ni tukuna wale ga vei luvemu na ka e donu kei na ka e cala. O na via vukei koya me vakasamataka eso na taro qo: ‘Na cava e vakatabuya kina na iVolatabu eso na ka e dau malele kina na lomada? Cava au vakadeitaka kina ni na vinaka tu ga na ivakatagedegede vakaivolatabu?’ (Aisea 48:17, 18) Ke vakaraitaka e dua na gone ni via papitaiso, e dodonu me vukei na nona rai me baleta na itavi e namaki vua e dua na lotu vaKarisito. E yaga vakacava nona papitaiso? Cava ena vakuai koya kina? Cava e yaga kina vakalevu nona papitaiso ni vakatauvatani kei na ka ena vakuai koya kina? (Mari. 10:29, 30) Qori eso na ka ena rairai sotava ni oti na papitaiso. Ena vinaka me vakasamataki rawa ni bera ni muri na ikalawa bibi qori. Nira vukei na gone mera vakasamataka qori ena rawa ni dei nodra vakabauta. E vinaka tu ga na ivakatagedegede vakaivolatabu. w17.12 21 ¶14-15

E levu na tacida era tauvimate bibi. So era sa qase, ia era se qaravi ira tale tiko na wekadra itabaqase. So tale era saga tiko mera vakarautaka na ka mada ga mera bula kina na vuvale, sega ni ka mera vutuniyau kina. Eda kila tale ga ni levu era sotava e vica vata na leqa ena dua ga na gauna! Ke sa kauaitaka na Kalou na nona ibulibuli era sega ni vosa se kila e dua na ka, sa qai wacava o keda na qaravi koya tiko nida lomani koya. Eda sega ni porokaramutaki meda lomani koya! (Same 19:1, 3, 14) E kilai keda vinaka sara na Tamada dauloloma. E ‘kila vinaka mada ga na iwiliwili ni drauniuluda.’ (Maciu 10:30) E vakadeitaka na daunisame: “E kila vinaka o Jiova na ka era sotava na tamata tawacala.” (Same 37:18) E kila na ka eda dau vakatovolei kina, e rawa tale ga ni vakaukauataki keda meda vosota tiko ga. w18.01 7 ¶1; 8 ¶4

E veivakadeitaki nona vakaturi Tavaita o Pita ni “levu era mai vakabauta kina na Turaga.” E rawa nira vakadinadinataka na Turaga vei ira eso tale, vakabibi nona rawa ni vakabulai ira na mate o Jiova. (Caka. 9:36-42) Dua tale na veivakaturi qo era vakadinadinataka eso. A soqoni tiko o Paula ena dua na rumu ni vale e cake e Tiroa, sa vuaira kei Taki nikua. E vunau tale ga kina me yacova ni sa bogilevu tutu. A vakarorogo tiko e dua na cauravou o Utiko ni dabe volekata toka na katubaleka. Ia e sosovu mani lutu mai na ikatolu ni tabavale. A rairai liu na vuniwai o Luke ena vanua e lutu kina me dikeva na kena ituvaki. Sa mate sara tu ga, sega ni cibati koya ga se mavoa! E siro sobu o Paula, e mokota na yagona qai kaya: “Sa bula tale o koya.” Dua na ivakadinadina levu qori vei ira na tu e kea! E “sega ni tukuni rawa nodra lomavakacegu” nira kila ra raica tale ga na veivakaturi qori.—Caka. 20:7-12. w17.12 5 ¶10-11