Vukelulu, Maji 27
Vakaliuca . . . na Matanitu ni Kalou.—Maciu 6:33.
Dua na ka nodratou rarawa na tisaipeli ni sa mate o Jisu. Sa mate nodratou itokani voleka, ratou yalolailai. (Luke 24:17-21) Ia ni rairai tale vei ratou o Jisu, e vukei ratou me ratou kila na nona itavi ena kena vakayacori na parofisai vakaivolatabu. E lesi ratou tale ga ena dua na itavi bibi. (Luke 24:26, 27, 45-48) Ni lesu i lomalagi o Jisu, sa veisau nodratou rarawa na tisaipeli me ratou marau vakalevu. Eratou marau ni ratou kila ni se bula tiko nodratou Turaga, ena vukei ratou ena nodratou ilesilesi vou. E uqeti ratou dina me ratou vakacaucautaki Jiova tiko ga. (Luke 24:52, 53; Caka. 5:42) Eda na vakatotomuri ratou na tisaipeli i Jisu nida vakaliuca na Matanitu ni Kalou ena noda bula. Ena vinakati na vosota meda qaravi Jiova tiko ga, e yalataka o koya ni na vakalougatataki keda ke da cakava qori.—Vkai. 10:22. w23.01 30-31 ¶15-16
Wili iVolatabu ni iVakananumi: (Veika e yaco ena siga: Naisani 16) Marika 16:2-8
Lotulevu, Maji 28
O na suka mo kuvuniqele tale.—Vkte. 3:19.
Eda na sega sara ga ni via muria na nodrau ivakaraitaki ca o Atama kei Ivi. E bibi gona meda vulica tiko ga na veika me baleti Jiova, vakavinavinakataka nona itovo, saga tale ga meda kila nona rai. Nida cakava qori eda na lomani Jiova vakalevu. Vakasamataki Eparama mada. E lomani Jiova dina. Ni dredre mada ga nona kila na vakatulewa i Jiova, e sega ni talaidredre. Ia e saga me kilai Jiova vinaka. Me kena ivakaraitaki, ni kila nona vakatulewa o Jiova me vakarusai Sotoma kei Komora, a rere o Eparama ni na vakamatei ira vata na ivalavala dodonu kei ira na daucaka ca na “Turaganilewa ni vuravura taucoko.” E sega ni donu qori vei Eparama, mani tarogi Jiova ena yalomalumalumu ena vica na taro. E vosovoso o Jiova ni sauma na nona taro. Sa qai kila o Eparama ni o Jiova e dau dikeva na loma ni tamata kece, ena sega ni cudruvi ira vata na ivalavala dodonu kei ira na daucaka ca.—Vkte. 18:20-32. w22.08 28 ¶9-10
Vakaraubuka, Maji 29
Na tamata nuitaki e sega ni tukuna na ka.—Vkai. 11:13.
Ena 455 B.G.V., ni oti nona tara tale na bai kei Jerusalemi na Kovana o Niemaia, e raica o koya eso na tagane nuitaki mera qarava vinaka na koro. E dua gona vei ira e digia o Enanaia, na turaga ni Koronivalu. E vakamacalataki Enanaia na iVolatabu me “turaga nuitaki qai doka vakalevu na Kalou dina ni vakatauvatani kei na levu tale.” (Niem. 7:2) E raica vakabibi o Enanaia na nona itavi baleta ni lomani Jiova, e dokai koya tale ga vakalevu, e sega ni via vakararawataki koya. Na rua na itovo qori ena uqeti keda tale ga meda nuitaki nida qaravi Kalou. Dikeva mada na ivakaraitaki nei Tikiko, na nona itokani nuitaki na yapositolo o Paula. E dau nuitaki Tikiko o Paula, e vakamacalataki koya me “italatala yalodina.” (Efeso 6:21, 22) E nuitaki koya o Paula me dau kauta na ivola vei ira na mataveitacini e Efeso kei Kolosa, me vakayaloqaqataki ira, me vakacegui ira tale ga. Na nona ivakaraitaki ni yalodina o Tikiko, eda nanumi ira kina na tacida tagane nuitaki era qarava tiko na noda veika vakayalo nikua.—Kolo. 4:7-9. w22.09 9-10 ¶5-6