Ɗume woni Laamu Allah?

1. Ɗume woni Laamu Allah?

Laamu Allah ɗum ngomna wonga haa asama. Ngu ittan ngomnaaji duniya fuu e Allah huuwtiniran ngu ngam waɗugo muuyo maako haa asama e dow lesdi. Kubaruwol laamu Allah belŋgol masin. Yeeso seɗɗa, Laamu allah humtinan haaje neɗɗo yelaago ngomna mbooɗŋga. Ngu waddan narral hakkunde jooɗiiɓe haa duniya fuu.​—Njaŋge Daniyel 2:44; Matta 6:9, 10; 24:14.

Kala Laamu mari laamɗo. Yeehova laamini Ɓiɗɗo maako, Yeesu Almasiihu dow Laamu maako.​—Njaŋge Wahayu Yuhanna 11:15.

Laaru videyo Ɗume woni Laamu Allah?

2. Ngam ɗume Yeesu haani laamaago?

Ɓiɗɗo Allah ɓuran Laamiiɓe fuu ngam o goɗɗo booɗɗo e ɗon jiŋgana ko wooɗi. (Matta 11:28-30) O mari baawɗe wallugo yimɓe e o laamoto dow duniya pat diga asama. Ɓaawo ummitineeki maako, o eŋgti haa asama, o jooɗi haa juŋŋgo nyaamo Yeehova, o ɗon reena. (Ibraniŋko’en 10:12, 13) Nde yaake laamugo mo waɗi, Allah hokki mo baawɗe haa o fuɗɗa laamaago.​—Njaŋge Daniyel 7:13, 14.

3. Moy tammi laamugo bee Yeesu?

Yeɓre yimɓe wi’eteende “Yimɓe Allah” laamoto bee Yeesu haa asama. (Daniyel 7:27) “Yimɓe Allah” aartuɓe suɓeego ɗum nelaaɓe hoolaaɓe Yeesu. Yeehova ɗon tokka suɓugo nuɗɗinɓe hoolaaɓe worɓe e rewɓe haa jonta. Ɓe ummitan bee ɓandu ruuhu bana Yeesu.​—Njaŋge Yuhanna 14:1-3; 1 Korintu’en 15:42-44.

Yimɓe noy njahata haa asama? Yeesu ewni ɓe “tokkere famarde.” (Luka 12:32) Ɓe fuu ɓe ujine teemerre e cappanɗe nay e nay (144.000). Ɓe laamoto dow duniya fuu bee Yeesu.​—Njaŋge Wahayu Yuhanna 14:1.

4. Ko waɗi saa’i Yeesu fuɗɗi laamaago?

Laamu Allah fuɗɗi huuwgo nder hitaande ujineere e teemeɗɗe jeenay e sappo e nay (1914).a Ko Yeesu aarti waɗugo nder Laamu maako, o sakkini Sayɗaanu bee ginnaaji muuɗum’en haa duniya. Sayɗaanu ɓerni masin e o fuɗɗi torrugo duniya fuu. (Wahayu Yuhanna 12:7-10, 12) Diga nden, bonondaaji neɗɗo tokki ɗuuɗugo. Konuuji, weelooji, masiibooji, e dimbanɗe lesdi woni “alaama” hollataaŋga Laamu ɓadake huuwgo dow lesdi.​—Njaŋge Luka 21:7, 10, 11, 31.

5. Kuugal ngale Laamu Allah waɗata jotta?

Bee kuugal waazu nder duniyaaru fuu, Laamu Allah ɗon hawta yimɓe ɗuuɗɓe iwɓe haa ummatooje fuu nder narral. Yaŋkiniiɓe miliyoŋji ɗon laato yimɓe Yeesu. Laamu Allah hisnan ɓe yaake o nattinta jamanuuru hallundu ndu. Kala giɗɗo naftoraago bee Laamu Allah fuu, sey o ekkito ɗowtanaago Yeesu.​—Njaŋge Wahayu Yuhanna 7:9, 14, 16, 17.

Nder duuɓi ujineere (1000), Laamu allah hebbinan anniya Allah ngam yimɓe. Duniya pat wartan aljanna. Haa ragare man, Yeesu hokkitan Baabiraawo maako laamu. (1 Korintu’en 15:24-26) Woodi goɗɗo mo on ngiɗi wolwango haala Laamu Allah na?​—Njaŋge Jabuura 37:10, 11, 29.