Sanebimɔi Ni Jɛ Kanelɔi Adɛŋ

Hebri wiemɔ ni akɛtsu nii yɛ ŋmalɛ nɛɛ mli lɛ baanyɛ akɔ mɛi fɔji lɛ ahe, ni yɛ nakai beiaŋ nɔŋŋ lɛ, ebaanyɛ ekɔ Nyɔŋmɔ webii lɛ hu ahe. Kɛ́ nakai ni lɛ, mɛni hewɔ bianɛ lɛ wɔkɛɔ akɛ ekɔɔ Nyɔŋmɔ webii lɛ ahe? Naa yiŋtoi enyɔ ahewɔ ni wɔkɛɔ nakai:

1. Shishinumɔ nɛɛ kɛ nibii krokomɛi ni awie yɛ lala nɛɛ mli lɛ kpãa gbee. Wiemɔ ni ji “kɛkɛ lɛ” ni akɛtsu nii yɛ kuku 12 lɛ mli lɛ hãa wɔnaa akɛ, jɔɔmɔi ni atsĩ tã yɛ kuku 12 kɛyashi 14 lɛ mli lɛ kɔɔ jalɔi lɛ, ni ji mɛi ni kuku 11 lɛ kɛɛ amɛbiɔ ni ‘ajie amɛ ni ahere amɛ’ kɛje mɛi fɔji lɛ adɛŋ lɛ ahe. Nakai nɔŋŋ kuku 15 lɛ hu mli wiemɔi lɛ kɔɔ jalɔi lɛ ahe. No hewɔ lɛ, “maŋ” ni atsĩ tã yɛ kuku 15 lɛ klɛŋklɛŋ liamɔ lɛ mli lɛ nɔŋŋ ji “maŋ ni Yehowa ji amɛ-Nyɔŋmɔ” ni atsĩ tã yɛ liamɔ ni ji enyɔ lɛ mli lɛ, ni ŋmalɛ lɛ kɛɛ amɛyɛ “miishɛɛ.”

2. Shishinumɔ ni wɔyɔɔ bianɛ lɛ kɛ Biblia lɛ mli saji krokomɛi ni kɔɔ jɔɔmɔi ni Nyɔŋmɔ ewo shi akɛ mɛi ni yeɔ lɛ anɔkwa lɛ baaná lɛ ahe lɛ kpãa gbee. Wiemɔi ni David wie yɛ Lala 144 lɛ tsɔɔ akɛ eheɔ eyeɔ akɛ, kɛ́ Nyɔŋmɔ kpɔ̃ Israelbii lɛ kɛje amɛhenyɛlɔi lɛ adɛŋ lɛ, ebaajɔɔ amɛ, ni ebaahã amɛná miishɛɛ ni amɛshwere, tamɔ bɔ ni ewo shi lɛ pɛpɛɛpɛ. (3 Mo. 26:9, 10; 5 Mo. 7:13; Lala 128:1-6) Shiwoi nɛɛ ateŋ ekome ji nɔ ni yɔɔ 5 Mose 28:4 lɛ. Yɛ jɛmɛ lɛ, Nyɔŋmɔ tsɔ Mose nɔ ewo Israelbii lɛ shi akɛ kɛ́ amɛye anɔkwa lɛ, ‘abaajɔɔ amɛbii kɛ amɛshikpɔŋ lɛ nɔ nibaa nii kɛ amɛlɛɛ kooloi abii, amɛtsinabii kɛ amɛtoobii.’ Yɛ David bi Solomon nɔyeli lɛ shishi lɛ, Israelbii lɛ atoiŋ jɔ amɛ waa, ni amɛshwere bɔ ni anako enɔ dã. Anɔkwa, nibii komɛi ni tee nɔ yɛ Solomon nɔyeli lɛ shishi lɛ feɔ nibii ni baaya nɔ yɛ Mesia lɛ nɔyeli lɛ shishi lɛ ahe mfoniri.​—1 Maŋ. 4:20, 21; Lala 72:1-20.

Bɔ ni wɔnuɔ Lala 144:12-15 lɛ shishi wɔhãa bianɛ lɛ hewɔ lɛ, amrɔ nɛɛ wɔle akɛ lala muu lɛ fɛɛ fiɔ hiɛnɔkamɔ ni Yehowa tsuji yɔɔ kɛjɛ blema beebe lɛ sɛɛ jogbaŋŋ, akɛ, Yehowa baakpãtã mɛi fɔji lɛ ahiɛ, ni ebaahã jalɔi ahi shi kɛya naanɔ yɛ toiŋjɔlɛ mli ni amɛshwere.​—Lala 37:10, 11.