Ehe miihia ni wɔyɔse akɛ, nitsumɔ be yɛ, ni hejɔɔmɔ be hu yɛ. Yehowa mumɔ lɛ tsirɛ Maŋtsɛ Solomon ni eŋma akɛ: “Ato be ahã nibii fɛɛ ni afeɔ.” No sɛɛ lɛ, etsĩ nidumɔ, tsumaa, yaafo, ŋmɔlɔ, joo, kɛ ekrokomɛi ni fata he lɛ atã. (Jaj. 3:1-8) Wɔ fɛɛ wɔle akɛ, nibii enyɔ komɛi ni he hiaa waa yɛ shihilɛ mli ji, nitsumɔ kɛ hejɔɔmɔ. Yesu tsu nii, shi ejɔɔ ehe hu. Be ko be ni bɔfoi lɛ tee shiɛmɔ amɛba lɛ, “amɛnáaa dekã kɛye nii po,” ejaakɛ mɛi babaoo miiba miiya. Shi Yesu kɛɛ amɛ wiemɔi ni yɔɔ ŋmɛnɛ ŋmalɛ lɛ mli lɛ. (Mar. 6:30-34) Yesu wiemɔi nɛɛ hãa wɔnaa akɛ, ele akɛ ehe miihia ni amɛ fɛɛ amɛjɔɔ amɛhe, tsɛ jeee be fɛɛ be amɛnyɛ amɛjɔɔ amɛhe bɔ ni amɛtsui shweɔ. Bei komɛi lɛ, ehe miihia ni wɔjɔɔ wɔhe fioo, loo wɔtsake kɔɔyɔɔ lɛ mli. Gbɛjianɔ ko ni Nyɔŋmɔ to ehã blema Israelbii lɛ hãa wɔnaa nakai. No ji Hejɔɔmɔ Gbi ni amɛyeɔ daa otsi lɛ. Wɔbɛ Mose Mla lɛ shishi. Shi kɛ́ wɔkase Hejɔɔmɔ Gbi lɛ he nii lɛ, wɔbaaná he sɛɛ. w19.12 3 kk. 6-7

Yehowa ewo shi akɛ ebaakwɛ etsuji anɔkwafoi lɛ, ni enaa enɛ akɛ eji sɔ̃ ko ni kã enɔ ni esa akɛ etsu he nii. (Lala 31:1-3) Yehowa le akɛ kɛ́ ekwɛɛɛ wɔ, ni ji eshĩabii lɛ, wɔnii baafee mɔbɔ tsɔ. No hewɔ lɛ, ewo shi akɛ ebaadro wɔ nibii ni he hiaa wɔ yɛ heloŋ kɛ mumɔŋ gbɛfaŋ fɛɛ, ni nɔ ko bɛ ni baanyɛ atsĩ enaa ni ekaye shiwoo nɛɛ nɔ! (Mat. 6:30-33; 24:45) Kɛ́ wɔhã nɔ hewɔ ni Yehowa yeɔ eshiwoi anɔ lɛ hi wɔjwɛŋmɔ mli lɛ, no lɛ, kɛ́ wɔbɛ shika po lɛ, wɔyeŋ wɔtsui, ejaakɛ wɔle akɛ ebaaye ebua wɔ. Susumɔ blema Kristofoi lɛ ahe okwɛ. Be ni ate shi awo nyɛmimɛi ni yɔɔ Yerusalem lɛ, “amɛ fɛɛ amɛgbɛ amɛshwã,” ja bɔfoi lɛ pɛ. (Bɔf. 8:1) Ŋwanejee ko bɛ he akɛ, enɛ hã amɛteŋ mɛi pii ahe fi amɛ, ejaakɛ amɛjo foi amɛshi amɛshĩai kɛ amɛnitsumɔi. Shi Yehowa kwaaa amɛ, ni amɛmiishɛɛ hu etãaa. (Bɔf. 8:4; Heb. 13:5, 6; Yak. 1:2, 3) Yehowa ye ebua Kristofoi anɔkwafoi nɛɛ, ni ebaaye ebua wɔ hu.​—Lala 37:18, 19. w20.01 17-18 kk. 14-15

Be ni David kwɛɔ epapa toi lɛ, jata bamɔ toi lɛ eko. Be kroko hu lɛ, oshishibrishi bamɔ eko. Bei enyɔ lɛ fɛɛ lɛ, David gbe kooloo awuiyelɔ lɛ, ni ejie too lɛ yɛ edaaŋ. David wie akɛ, Yehowa ni ye ebua lɛ ni enyɛ egbe kooloi nɛɛ. Be ko hu lɛ, David kɛ oblaŋ ko ni he wa waa, ni atsɛɔ lɛ Goliat lɛ wu, ni egbe lɛ. Yɛ enɛ mli hu lɛ, ena akɛ Yehowa ni ye ebua lɛ. (1 Sam. 17:37) Agbɛnɛ hu, be ni Maŋtsɛ Saul ye David he awuŋa ni eetao lɛ egbe lɛ, David jo foi, ni Saul nine shɛɛɛ enɔ. Shi kome ekoŋŋ lɛ, David yɔse akɛ, Yehowa ni here lɛ. (Lala 18, yiteŋgbɛ niŋmaa) Eji David wóɔ ehe nɔ kulɛ, ebaashi etsitsi ekɛɛ akɛ, lɛ diɛŋtsɛ ehewalɛ naa enyɛ efee nibii nɛɛ. Shi akɛni ebaa ehe shi hewɔ lɛ, ena akɛ Yehowa ni ye ebua lɛ. Mɛni wɔkaseɔ yɛ David sane lɛ mli? Kɛ́ wɔsɔle wɔbi Yehowa dɛŋ yelikɛbuamɔ lɛ, esa akɛ wɔkɛ wɔhiɛ afɔ̃ shi koni kɛ́ eye ebua wɔ lɛ, wɔnyɛ wɔna be kɛ gbɛ ni etsɔ nɔ efee nakai. Kɛ́ wɔba wɔhe shi, ni wɔkpɛlɛ nɔ akɛ jeee nɔ fɛɛ nɔ wɔbaanyɛ wɔfee lɛ, no lɛ, kɛ́ Yehowa ye ebua wɔ lɛ, wɔbaana. Ni be fɛɛ be ni wɔbaana akɛ eye ebua wɔ lɛ, naanyobɔɔ ni yɔɔ wɔ kɛ lɛ teŋ lɛ mli baawa. w19.12 20 kk. 18-19