Shɔ, March 27
[Taomɔ] Maŋtsɛyeli lɛ . . . klɛŋklɛŋ.—Mat. 6:33.
Yesu kɛ ekaselɔi lɛ bɔ naanyo kpaakpa. No hewɔ lɛ be ni egbo lɛ, kaselɔi lɛ atsui kumɔ. Shi jeee no pɛ; amɛnu he hu akɛ amɛhiɛnɔkamɔ fɛɛ etã. (Luka 24:17-21) No hewɔ lɛ be ni atee Yesu shi lɛ, ejie ehe kpo etsɔɔ ekaselɔi lɛ ni eye ebua amɛ koni amɛnu bɔ ni ehã gbalɛi ni kɔɔ ehe ni yɔɔ Ŋmalɛ lɛ mli lɛ eba mli amɛhã lɛ shishi jogbaŋŋ. Agbɛnɛ hu, ehã amɛ nitsumɔ ko ni he hiaa waa ni amɛtsu. (Luka 24:26, 27, 45-48) Be ni Yesu kuɔ esɛɛ kɛyaa ŋwɛi lɛ, kaselɔi lɛ ená miishɛɛ waa ni amɛyeee awerɛho dɔŋŋ, ejaakɛ amɛna akɛ amɛ-Nuŋtsɔ lɛ yɛ wala mli ni efee klalo akɛ ebaaye ebua amɛ ni amɛtsu nitsumɔ ni ekɛwo amɛdɛŋ lɛ. Miishɛɛ ni amɛná lɛ tsirɛ amɛ ni amɛjie Yehowa yi daa. (Luka 24:52, 53; Bɔf. 5:42) Nɔ kome ni wɔbaanyɛ wɔfee kɛkase Yesu kaselɔi lɛ ji, ni wɔbaahã Nyɔŋmɔ Maŋtsɛyeli lɛ he ahia wɔ fe nibii krokomɛi fɛɛ yɛ wɔshihilɛ mli. Anɔkwa, ja wɔmia wɔhiɛ waa dani wɔbaanyɛ wɔya nɔ wɔsɔmɔ Yehowa daa ni wɔkɛ e-Maŋtsɛyeli lɛ aye klɛŋklɛŋ gbɛhe yɛ wɔshihilɛ mli. Shi Yehowa ewo shi akɛ kɛ́ wɔfee nakai lɛ, ebaajɔɔ wɔ waa.—Abɛi 10:22. w23.01 30-31 kk. 15-16
Kaimɔ lɛ he Biblia kanemɔ: (Nibii ni tee nɔ dani hulu nyɔ shi: Nisan 16) Marko 16:2-8
Soo, March 28
Sũ mli obaaku osɛɛ kɛya.—1 Mo. 3:19.
Wɔsumɔŋ ni wɔfee wɔnii tamɔ Adam kɛ Hawa. No hewɔ lɛ, mɛni baaye abua wɔ ni ekaba lɛ nakai? Nɔ ni baaye abua wɔ ji, ni wɔbaakase Yehowa he nii be fɛɛ be, wɔná esui lɛ ahe miishɛɛ, ni wɔbɔ mɔdɛŋ akɛ wɔbaana nibii tamɔ bɔ ni enaa lɛ ehãa lɛ. Kɛ́ wɔfee nakai lɛ, wɔbaasumɔ Yehowa waa. Hã wɔkɛ Abraham afee enɛ he nɔkwɛmɔnɔ. Abraham sumɔɔ Yehowa waa. Kɛ́ Yehowa kpɛ yiŋ ko ni Abraham nuuu shishi po lɛ, eteee shi ewooo, moŋ lɛ, ebɔɔ mɔdɛŋ akɛ ebaale Yehowa jogbaŋŋ. Akɛ nɔkwɛmɔnɔ lɛ, be ni Yehowa kɛɛ Abraham akɛ eyaakpãtã Sodom kɛ Gomora hiɛ lɛ, Abraham yasusu akɛ “shikpɔŋ lɛ fɛɛ Kojolɔ lɛ” baabɛɛ jalɔ kɛ mɔ fɔŋ fɛɛ eshwie, ni enu he akɛ enɛ ejaaa. No hewɔ lɛ, ejɛ heshibaa mli ebi Yehowa saji komɛi. Yehowa to etsui shi ehã esanebimɔi lɛ fɛɛ hetoo. Enɛ hã Abraham na akɛ, Yehowa kwɛɔ adesa fɛɛ adesa tsui mli, ni ekpãtãŋ jalɔi ahiɛ eshiŋ efɔŋfeelɔi anɔ.—1 Mo. 18:20-32. w22.08 28 kk. 9-10
Sohaa, March 29
Anɔkwafo kɛ saji ni mɛi kɛ lɛ pɛ wie lɛ toɔ.—Abɛi 11:13.
Yɛ afi 455 D.Ŋ.B. be ni Amralo Nehemia tswa Yerusalem gbogboi lɛ egbe naa lɛ, etao hii ni abaanyɛ amu afɔ̃ amɛnɔ koni amɛkwɛ maŋ lɛ nɔ. Mɛi ni ehala lɛ ateŋ mɔ kome ji, Hanania, ni ji Mɔɔ lɛ nɔkwɛlɔ lɛ. Biblia lɛ wie yɛ Hanania he akɛ, eji ‘nuu ni anyɛɔ amuɔ afɔ̃ɔ enɔ waa ni sheɔ anɔkwa Nyɔŋmɔ lɛ gbeyei fe mɛi babaoo.’ (Neh. 7:2) Hanania sumɔɔ Yehowa ni esheɔ lɛ gbeyei, ni tsɔɔ akɛ, esumɔɔɔ ni efeɔ nɔ ko ni Yehowa sumɔɔɔ. Enɛ hewɔ lɛ, etsu nitsumɔ fɛɛ nitsumɔ ni akɛwo edɛŋ lɛ jogbaŋŋ. Kɛ́ wɔ hu wɔsumɔɔ Yehowa ni wɔsheɔ lɛ gbeyei lɛ, wɔbaatsɔmɔ mɛi ni abaanyɛ amu afɔ̃ amɛnɔ. Mɔ kroko ni wɔbaanyɛ wɔkase ji bɔfo Paulo naanyo ko ni emuɔ efɔ̃ɔ enɔ waa ni atsɛɔ lɛ Tihiko lɛ. Paulo kɛ ehiɛ fɔ̃ Tihiko nɔ ni etsɛ lɛ akɛ “sɔɔlɔ anɔkwafo.” (Efe. 6:21, 22) Paulo le akɛ, kɛ́ ekɛ woji hã lɛ ni ekɛyahã nyɛmimɛi ni yɔɔ Efeso kɛ Kolose lɛ ebaaya, ni agbɛnɛ hu, ebaawo amɛ hewalɛ ni ebaashɛje amɛmii. Tihiko nɔkwɛmɔnɔ lɛ hãa wɔkaiɔ hii anɔkwafoi ni anyɛɔ amuɔ afɔ̃ɔ amɛnɔ ni yeɔ amɛbuaa wɔ koni wɔya nɔ wɔsɔmɔ Yehowa lɛ.—Kol. 4:7-9. w22.09 9-10 kk. 5-6