Katenibong, Maati 27
Ukoukora moa ana Tautaeka n Uea te Atua.—Mt 6:33.
Ngke e mate Iesu ao a a rangi n nanokawaki taan rimwina. E aki tii bua raoraoia ae a tatangiria ma a namakinna naba bwa ai akea te kantaninga ibukia. (Rk 24:17-21) Ma ngke e kaoti Iesu nakoia, e buokiia n ota ni mwiokoana ni kaineti ma kakoroan taetae ni burabeti aika n te Baibara. E angania naba te mwakuri ae kakawaki bwa a na karaoia. (Rk 24:26, 27, 45-48) N te tai are e a rierake iai Iesu nako karawa, e a bitaki rawawataia taan rimwina nakon te kimwareirei ae bati. Ataakin ae e a maiu aia Toka ao n tauraoi ni buokiia ni kakororaoa mwiokoaia ae boou, e boni karika kukureia. Ibukini kimwareireia anne a a kairaki iai bwa a na kamoamoaa Iehova n aki toki. (Rk 24:52, 53; Mwa 5:42) Ngkana ti na kakairi irouia taan rimwin Iesu, e kainnanoaki ngkanne iai moanibwaian Ana Tautaeka n Uea te Atua ni maiura. E ngae ngke ti kainnanoa te nanomwaaka bwa ti aonga ni kona n teimatoa ni beku iroun Iehova, ma e berita bwa e na kabatiaa kakabwaiaara ngkana ti karaoa anne.—TNR 10:22. w23.01 30-31 ¶15-16
Te wareware n te Baibara ibukin te Kauring: (Kanoan te ngaina: Nitian 16) Mareko 16:2-8
Kaabong, Maati 28
Ko na manga okira te tano.—KB 3:19.
Ti bon aki kani karaoa te kairua are a karaoia Atam ma Ewa. Ti kona n tuka rikin anne ngkana ti teimatoa n reiakina taekan Iehova, ti atai aroarona, ao ti kataia n ota n arona n iaiango. Ni karaoan anne, e na bon rikirake iai tangiran Iehova iroura. Iangoa Aberaam are tangira Iehova. Ngkana e aki ota raoi n ana babaire Iehova, e bon aki naba karitei. Ma e kataia ni kinaa riki Iehova. N te katoto, ngke e a ataa Aberaam ana babaire Iehova ibukini kamaunaan Totom ma Komora, e boni maaku n te moantai ngkai E nang kamaunaia aika raoiroi i rarikia aika buakaka “te tia Motika taekan te aonnaba ni kabutaa.” Iroun Aberaam, e aki kona ni karaoa ae buakaka Iehova. E boni kananorinanoa n tabeki ana titiraki teuana imwin teuana, ao e taotaona nanona Iehova ni kaekai. N tokina, e a ataia Aberaam bwa e neneri nanoia aomata nako Iehova ao e bon tuai katuuaaeia aika akea aia bure i rarikia taani bure.—KB 18:20-32. w22.08 28 ¶9-10
Kanimabong, Maati 29
E aki kaota te rongorongo ae raba te aomata ae kona n onimakinaki.—TNR 11:13.
Imwini manga katean oon Ierutarem n 455 B.C.E. iroun te Kowana are Neemia, e a ukeriia mwaane ake a kona n onimakinaki ibukin tararuaan te kaawa. Mai buakoia mwaane ake e rineiia bon te mataniwi n te Tabo ni Kamaiu ae Aanani. E taekinaki Aanani n te Baibara bwa “te mwaane ngaia ae moan te onimakinaki ao e mamaaka riki te Atua ae koaua nakoia ake tabemwaang.” (Ne 7:2) E kairaki Aanani n tangiran Iehova ao kani kakukureiana bwa e na mwakuri korakora ni mwiokoana nako. Ti kona naba n onimakinaki n ara beku ibukin te Atua man aroaro akanne. Iangoa ana katoto Tukiko ae te mwaane are e onimakinna te abotoro Bauro. E onimakina Tukiko Bauro ao e taekinna bwa “te minita ae kakaonimaki.” (Ebt 6:21, 22) E onimakinna ibukin nikirakin reeta nakoia taari i Ebeto ao i Korote, kaungaaia, ao kabebeteaia. Ti a kauringaki n aroaron Tukiko bwa iai mwaane aika kakaonimaki ao ni kona n onimakinaki, aika a tabeakini ngkai baika ti kainnanoi n te itera n taamnei.—Kor 4:7-9. w22.09 9-10 ¶5-6