“E bon ingainga te nano, ma e mamaara te rabwata.” (Mt 26:41b) E kaotia raoi Iesu n taeka akanne bwa e bon ota iroura ae ti aki kororaoi. Ma e oti naba man ana taeka aikai te kauring ae kangai: Tai onimakiniko i bon iroum n te aro ae riao. Tabeua te aoa imwain ae e taekini taeka aikai Iesu, ao a berita taan rimwina bwa a na bon aki kitanna. (Mt 26:35) A kani karaoa te bwai ae eti. Ma a aki ataia ae a kona ni waekoa ni mamaara ngkana a kaririaki. Ngaia are e kauringia Iesu n taeka aika koreaki n ara kibu ibukin te bong aei. E kananokawaki bwa a aki teimatoa n tantani taan rimwini Kristo. A tiku i rarikin Iesu ngke e kabureaki ke a maaku ao a birinako? Ibukina bwa a aki teimatoa n tantani taan rimwina, a a karaoa te bwai are a taekinna bwa a na aki karaoia, ae a kitana Iesu.​—Mt 26:56. w24.07 14 ¶1-2

A kabuaa Atam ao Ewa aia iraorao ae kaan ma Tamaia ae Iehova. N te moantai, a riki Atam ao Ewa bwa kaain ana utu te Atua. (Rk 3:38) Ma ngke a aki ongeaba iroun Iehova, a a kabaneaki man ana utu imwain rikia natiia. (KB 3:​23, 24; 4:1) Ngaia are ngkai kanoaia ngaira, ti kainnanoa raoiakinara ma Iehova. (Ro 5:​10, 11) N taekana teuana, ti kainnanoa karikirakean ara iraorao ae kaan ma ngaia. E kaotaki n te boki teuana bwa te taeka ni Kuriiti ae kamanenaaki ikai ibukin “raoiakina,” e kona n nanona “karikan am kairiribai bwa raoraom.” E kamimi bwa bon Iehova ae biririmoa ni karekea te anga ae e na kona n riki iai aei. N te aro raa? Rinanon te babaire ae karekeani kabwaraani buure, are e karaoia Iehova ibukini manga kaokan te reitaki ae nakoraoi i marenana ma aomata aika aki kororaoi. E irekereke ma kaaibibitan te bwai teuana ma te bwai riki teuana ae titeboo raoi boona ma ngaia. Te anga aei, e kona ni manga kaokaki iai ke n oneaki mwin te baere bua ke n uruaki. w25.02 3-4 ¶7-8

E taku te abotoro Bauro bwa e a “tau boaakin te aomata anne, ngkai e boaaki irouia angia kaain te ekaretia.” (2Ko 2:​5-8) Ke n taekana teuana, e a koro bukini boaakin te mwaane are e a tia ni karaoa te wene n taanga ma buun tamana. (1Ko 5:1) Tera te bwai anne? Kairan teuaei bwa e na raira nanona. (Ebr 12:11) E a tua ngkanne ae kangai Bauro nakoia kaain te ekaretia: “Akoia ni kabwaraa ana bure ngkai ao kabebetea” ao “kaota koauan ami tangira ibukina.” Noria bwa e bati riki ae tangiria Bauro bwa a na karaoia kaain te ekaretia nakon tii butimwaean teuaei nako buakoia ana aomata Iehova. E tangiriia Bauro bwa a na karaua nanon te mwaane ae raira nanona aei rinanon aia taeka ao aia mwakuri, ni kaotia nakoina ae a kabwaraa raoi ana bure ao a tangiria. A kamataataa raoi iai ae a butimwaeia ngkai e a manga okira te ekaretia. w24.08 15 ¶4; 16-17 ¶6-8