Kilsĩ́ gè gbááá ló gbò e bà bọ́ló dẹ̀lẹ̀ nyíé boo nè Jìhóvà. Bàrì gbĩ́ kọọ̀ dénè bẹ̀ì é fãèe mm̀ gbaa ló. Èé dí mm̀ gbaa ló, be è kilsĩ́ gè bii bá ló kà-kà belí. Kọ̀láá nen ea zaali gbò bel e náa dú kà-kà kilma ló bõ̀ònatõ̀òí gbĩ́ gè poói. Vó ní ea náa kọ Bàrì á ãanéi kọ é ‘kpòòlà lóó lọ̀l vá ló é.’ Be née náà vó, èé láá dààmà togó gè ziga ló gbò nú e náa dú kà-kà, vaá níí é náa kọ é gá bọ ná ló dẹ̀lẹ̀ nyíé boo nè Jìhóvà. (Róm̀ 16:17) Tṍó e nyímà ló kà-kà bel vaá bii bá ló, àé náa kọ é ié agẹ zìgà vaá palàge tõo bã ló Jìhóvà. (Ẹ́fẹ. 4:​15, 16) Vó é náa kọọ̀ gbò kyáá bel e Sétàn gé zaali á gá kẹlẹ́i vaá Jìhóvà é kpenài tṍó pọ̀b kpo tã̀àgã̀. Kilsĩ́ gè bii bá ló kà-kàí, “vaá Bàrì ea ólò nèi fẹ́ẹ́-fẹẹ̀ ló é gbóó zọ̀i tõ̀òà.”​—Fíl. 4:​8, 9. w24.07 13 ¶16-17

Jíízọ̀s beè tó sàn gbò e ba pọ́lọ́ beè naa kọ á tõó va ló belí kọ bà náa íèè ból dẽesĩ́, vaá a beè kolí va kọ bàá nyoonèèe nvée. A beè nyimá kọọ̀ pọ́lọ́ e gbò nen sí ní ea ólò naa kọ bàá mòn tã̀àgã̀ ẽ. Vó beè naa kọ á nvèè bá nè gbò e bà mon tã̀àgã̀ boo béè pọ́lọ́ e bà sí. A beè tú nu dòòle ló bààmà tẽ́ nè va kọọ̀: “Neǹ dóm biè náa dú bíi ló gbò válá ló, sõò ló gbò e lóó va zọ.” A beè kpáá kọọ̀: “Ním beè dú ló gè kolí gbò lé, sõò m beè dú ló gè kolí gbò pọ́lọ́.” (Máát. 9:​12, 13) Níà nú e Jíízọ̀s beè naa ẽ́. A beè tú gbọ́ọ́-gbọọ̀ ló loomá bel nè ńnváá ea beè tò vaá tú gĩ́i kàlẹ̀ẹ́ boo kpóó tọá, vaá a beè ia ló a náàkyọ̀ nèe. (Lúùk 7:​37-50) Tṍó ea géè zọ̀ ńnváá Sàmérià lóá bel, a beè noomàe kà-kà bel ea kil ló Bàrì náa kal ló béè kọọ̀ a beè nyimá kọ ńnvááá géè tõó dùm e bè náa õoà. (Jṍòn 4:​7, 17-19, 25, 26) Kàsĩ́, Bàrì beè nè kpóó Jíízọ̀s kọ á kẽee bã̀àna gbò e ba beè ú boo béè pọ́lọ́ e ba beè sì lọl kemà ú.​—Máát. 11:5. w24.08 4 ¶9-10

Mósĩ́ deè ní e Jìhóvà é beè naa kọ ka á bã ló a bée dì deèsĩ́ ẽ́? Àé náa vó tení dú ló gè naa kọọ̀ lé bèèla á dì. Pọ́ì ńkem̀ tṍó àla, Jìhóvà é kyọsĩ́ Gbele Bábilọ̀n boo béè gã́bug kyáá bel e ba ni kpọ́ẹ́ ló. (Kùùà 17:​5, 16; 19:​1, 2) Sìgà gbò e bà mon tṍó e bà é kyọsĩ́ Gbele Bábilọ̀n é láá ié nèà deè ge zọ̀i fã̀ Jìhóvà. Dee-deè nvée, tṍó bé Ámàgídòn, Jìhóvà é kyọsĩ́ Sétàn nè dénè gbò e bà gé bé uúé boo vaá kpọ́ẹ kyáá bel ló. Sõò, àé duulà gbò e bà vulèe, gbànìe tṍ ló, vaá nvèèe ka ló. (Máàk 8:38; 2 Tẹ̀s. 1:​6-10) Tṍó e Kráìst ni bẹl mm̀ enè tõ̀ò gbáá lọ̀l vaá dee-deè nvéè ẹ̀bmà a íná kùbmà, Jìhóvà é beè zogè kọ à bọ́ló kọ dénè nen á fãàe. (Kùùà 20:​7-10) Tṍóá, “nyìmànù ea kil ló lèèlà Jìhóvà é ḿ-má boo kunukẽ̀í belí bé e múú ólò m-má pène naa.” (Háb. 2:14) Àé palàge dú lé tṍó e kọ̀láá nen é leelà Jìhóvà belí bé ea bọ́ló naa! w25.01 7 ¶15-16